OSHILESHWA 11
Nghee to dulu okumona ouwa muhapu mokulesha Ombiibeli
Mbela owa kalele ngoo nande onale wa hala okulonga oshilonga shinene, ndele ou wete shidjuu? Opo shiha kale shidjuu, otashi dulika u shi tukule moutukulwa vanini. Otwa pumbwa okuninga sha faafana, ngeenge tashi uya pokulesha Ombiibeli. Otashi dulika u lipule kutya, ‘Ohandi hovele peni?’ Moshileshwa eshi, ohatu ka tala koinima imwe i li paunafangwa, oyo tai dulu oku tu kwafela tu hafele okulesha nokukonakona Ombiibeli.
1. Omolwashike twa pumbwa okulesha Ombiibeli pandjikilile?
Omunhu oo ha lesha Ombiibeli pandjikilile, ile “omhango yOmwene,” ota ka kala a hafa nota ka pondola. (Lesha Epsalme 1:1-3.) Hovela nokulesha oule wominute dinini efiku keshe. Ngeenge owa kala u shii nawa Eendjovo daKalunga, oto ka hafela elesho loye lOmbiibeli.
2. Oshike tashi dulu oku ku kwafela u mone ouwa mokulesha Ombiibeli?
Opo tu mone ouwa mokulesha Ombiibeli, otwa pumbwa okukala hatu kanghama po nokudiladila kwaasho hatu lesha. Otwa pumbwa oku i konakona ‘nokudilonga kuyo.’ (Josua 1:8) Eshi to lesha, lipula kutya: ‘Eshi otashi hongo nge shike kombinga yaJehova Kalunga? Ongahelipi handi dulu okutula moilonga oshinima eshi monghalamwenyo yange? Ongahelipi handi dulu okulongifa eevelishe edi ndi kwafele vamwe?’
3. Ongahelipi handi dulu okukonga efimbo opo ndi leshe Ombiibeli?
Mbela oho mono shidjuu okukonga efimbo lokulesha Ombiibeli? Vahapu vomufye ohatu mono shidjuu. Kendabala u ‘longife nawa efimbo loye.’ (Ovaefeso 5:16) Oto dulu okuninga ngaho mokulitulila po efimbo lokondadalunde, opo u leshe Ombiibeli efiku keshe. Ovanhu vamwe ove litulila po efimbo lokulesha Ombiibeli efimbo longula. Vamwe ove litulila po efimbo lokulesha Ombiibeli momukokomoko wefiku, tashi dulika pefimbo lefudepo. Natango, vamwe ohava lesha Ombiibeli konguloshi, ofimbo inava ka nangala. Mbela ove efimbo lilipi tali ku wapalele?
KONAKONA MOULE
Lihonga nghee to dulu okuningifa elesho lOmbiibeli loye li kale lihokwifa nonghee to dulu okulilongekida nawa, opo u mone ouwa mekonakonombiibeli loye.
Ngaashi ashike hatu lihongo okukala tu hole okulya oikulya ya yoolokafana, ohatu dulu yo okulihonga okuhafela okulesha Ombiibeli
4. Lihonga nghee to dulu okuhafela elesho lOmbiibeli
Otashi dulika shiha kale shipu okuhovela okulesha Ombiibeli. Ashike, ohatu dulu okukala twa “halelela” oku i lesha, ngaashi ashike omunhu ha dulu okuhafela oikulya oyo ina lya nande onale. Lesha 1 Petrus 2:2, ndele tamu kundafana epulo tali shikula:
Ngeenge owa kala ho lesha Ombiibeli efiku keshe, mbela oto ke i hafela ngoo, ndele to kala wa halelela okulesha shihapu?
Dana OKAVDIO mu tale nghee ovanhu vamwe va hovela okukala hava hafele okulesha Ombiibeli. Opo nee, tamu kundafana omapulo taa shikula.
Ngaashi twa mona mokavidio, omashongo elipi ovanyasha va finda?
Oshike she va kwafela va kale hava lesha Ombiibeli pandjikilile?
Ongahelipi va ninga elesho lavo lOmbiibeli li kale lihokwifa?
Omaetepo oo tae ku kwafele u hovele:
Hoolola Ombiibeli oyo ya tolokwa paushili, nomelaka olo hali popiwa kunena. Kendabala okulesha o-New World Translation, ngeenge oi li melaka leni.
Tete, lesha oitukulwa yOmbiibeli oyo tashi dulika i kale ihokwifa kwoove. Opo u mone omaetepo, tala oshimhungu “Hovela okulesha Ombiibeli” pehovelo lembo eli.
Kala to didilike osho wa lesha nale. Longifa oshimhungu “Didilika osho wa lesha mOmbiibeli” pexulilo lembo eli.
Longifa o-JW Library® app. Ko-JW Library, oto dulu okulesha nokupwilikina kOmbiibeli keshe apa u li, to longifa ongodi, ile oikwaelektronika imwe vali.
Longifa oiwedelwako oyo i li mo-New World Translation. Oya kwatela mo ouwaalita, oimhungu nomafatululo oitya, oo taa dulu okuningifa elesho loye li kale lihokwifa.
5. Lilongekidila ekonakonombiibeli loye
Lesha Epsalme 119:34, ndele tamu kundafana epulo tali shikula:
Omolwashike sha fimana okwiilikana ofimbo ino hovela okulesha Ombiibeli, ile eshi to lilongekidile ekonakonombiibeli loye?
Ongahelipi to dulu okumona ouwa muhapu pekonakono keshe? Eshi to lilongekidile oshileshwa keshe membo eli, kendabala u ninge ngaashi tashi landula:
Lesha outendo vopehovelo loshileshwa.
Konga nokulesha omishangwa, ndele to kendabala okuuda ko nghee da pambafana noshileshwa.
Didilika oitya, ile omautumbulilo oo a nyamukula epulo keshe; osho otashi ku kwafele u kundafane oshileshwa nomuhongi woye.
Owe shi shiiva tuu?
Eendombwedi daJehova oda longifa omatoloko Eembiibeli a yoolokafana. Ashike nande ongaho, otu hole o-New World Translation of the Holy Scriptures molwaashi oi li paushili, ya yela noya longifa edina laKalunga.— Tala oshitukulwa ko jw.org “Mbela Eendombwedi daJehova odi na Ombibeli yado vene?”
VAMWE OHAVA TI: “Okukonakona Ombiibeli oshinima shidjuu. Kandi na efimbo, ile eenghono dokukonakona.”
Ove oto ti ngahelipi?
ENGONGO
Opo u mone ouwa mOmbiibeli, litulila po efimbo loku i lesha, ilikana u ude ko osho to lesha nokulilongekidila ekonakonombiibeli loye.
Eendululo
Oshike tashi dulu oku ku kwafela u mone ouwa muhapu mOmbiibeli?
Onaini to dulu okukonga efimbo u leshe nokukonakona Ombiibeli?
Omolwashike sha fimana okulilongekidila ekonakonombiibeli loye?
TALA OUYELELE WA WEDWA PO
Tala omaetepo oo taa dulu oku ku kwafela u mone ouwa muhapu eshi to lesha Ombiibeli.
“Nghee to dulu okumona ouwa muhapu ngeenge to lesha Ombiibeli” (Oshungonangelo No. 1 2017)
Lihonga eenghedi nhatu nghee u na okulesha Ombiibeli.
Tala nghee to dulu okuhafela okulesha Ombiibeli.
Konga omaetepo kuvamwe ovo va lesha Ombiibeli omido dihapu.