Kaleka ‘Eteelelo Lexupifo’ Loye La Twa!
‘Djala embale loshivela leteelelo lexupifo.’—1 OVATESSALONIKI 5:8.
1. Ongahelipi ‘eteelelo lexupifo’ hali kwafa mokulididimika?
ETEELELO lokuxupifwa otali dulu okukwafela omunhu opo e lididimike nande nokuli oku li monghalo ya nyika oshiponga. Omunhu a ninga oshihakanwa shoshikepa ya teka nokwa kaama kombada yomeva pakwafo lepeta loshiti lokuxupifa ota dulu okulididimika oule wefimbo lile ngeenge oku shii kutya ekwafo oli li mondjila. Sha faafana, oule womido omayovi, okulineekela ‘mexupifo lOmwene’ okwa pameka ovalumenhu novakainhu ovaitaveli momafimbo madjuu, nelineekelo eli inali va nyemateka nande. (Exodus 14:13; Epsalme 3:8; Ovaroma 5:5; 9:33) Omuyapostoli Paulus okwa yelekanifa ‘eteelelo lexupifo’ “nembale loshivela” olo li li limwe lomoilwifo yopamhepo yOmukriste. (1 Ovatessaloniki 5:8; Ovaefeso 6:17) Heeno, okukala kwetu twe lineekela kutya Kalunga ote ke tu xupifa otaku amene eenghono detu dokudiladila, notaku tu kwafele tu kale twa lungama nande pe na outondwe, epataneko nosho yo omayeleko.
2. Omeenghedi dilipi ‘eteelelo lexupifo’ li li ombinga imwe ya fimana yelongelokalunga lashili?
2 The International Standard Bible Encyclopedia otai ti kutya “eteelelo li na sha nonakwiiwa kala li li li oukwatya wounyuni wovapaani,” sha hala kutya ounyuni oo kwa li wa dingilila Ovakriste vomefelemido lotete. (Ovaefeso 2:12; 1 Ovatessaloniki 4:13) Ndelenee, ‘eteelelo lexupifo’ olo ombinga imwe ya fimana yelongelokalunga lashili. Ngahelipi ngaho? Shotete, exupifo lovapiya vaJehova ola kwatakanifwa nedina laye. Omupsalme Asaf okwa ilikana ta ti: “Kalunga kexupifo letu, tu kwafa, molwefimano ledina loye, tu xupifa.” (Epsalme 79:9; Hesekiel 20:9) Kakele kaasho, okukala nelineekelo momanangeko noupuna aJehova a udanekwa oshinima sha fimana opo tu kale nekwatafano liwa naye. Paulus okwe shi popya monghedi ei: “Kape na ou ta dulu okuwapalela Kalunga, ngenge kape neitavelo, osheshi ou ta ehene kuKalunga e nokwiitavela nokutya, oko e li, naava tave mu kongo, ote va pe ondjabi.” (Ovaheberi 11:6) Natango, Paulus okwa yelifa kutya okuxupifa ovo ve livela ombedi oko kwa li etomheno la fimana lokuuya kwaJesus kombada yedu. Okwa ti: “Ondjovo ei oya pama shili noya wana okutambulwa nokutya: Kristus Jesus okwe uya mounyuni okuxupifa ovalunde.” (1 Timoteus 1:15) Nomuyapostoli Petrus okwa ulika kexupifo li li ‘efikilo [ile, oshidjemo shaxuuninwa] sheitavelo letu.’ (1 Petrus 1:9) Osha yela kutya okukala neteelelo lexupifo oshinima sha yuka. Ndele exupifo oshike naanaa? Oshike tashi pulwa opo li dule okulikolwa?
Exupifo oshike?
3. Oludi lexupifo lilipi la monika kovapiya vaJehova vopefimbo lonale?
3 MOmishangwa dOshiheberi, “exupifo” luhapu otali ti okuxupifwa ile okumangululwa mokufininikwa ile mefyo lonyanya nolombadilila. Pashihopaenenwa, mokwiifana Jehova e li ‘omuxupifi,’ David okwa ti: “Kalunga, emanya lange . . . [Ehondameno] lange, omuxupifi wange. Ove wa xupifa nge mo moukolokoshi. Ohandi ifana Omwene, Oye a wana okuhambelelwa ndee handi xupifwa movatondadi vange.” (2 Samuel 22:2-4) David okwa kala e shii kutya Jehova oha pwilikine ngeenge ovapiya vaYe ovadiinini tave mu lilile e va kwafe.—Epsalme 31:23, 24; 145:19.
4. Eteelelo lashike ovapiya vaJehova ovo va tetekela efimbo lOvakriste va kala ve na?
4 Ovapiya vaJehova ovo va tetekela efimbo lOvakriste navo yo ova kala ve na eteelelo lomwenyo womonakwiiwa. (Job 14:13-15; Jesaja 25:8; Daniel 12:13) Doshili, mahapu omomaudaneko okuxupifa oo taa hangika mOmishangwa dOshiheberi okwa li taa xunganeke exupifo linene—olo tali twala komwenyo waalushe. (Jesaja 49:6, 8; Oilonga 13:47; 2 Ovakorinto 6:2) Pefimbo laJesus, Ovajuda vahapu okwa li ve na eteelelo loku ka mona omwenyo waalushe, ndele ova anya okutambula ko Jesus oo e li oshipatululo osho tashi ka ningifa eteelelo lavo li wanifwe shili. Jesus okwa lombwela ovakwatelikomesho vomalongelokalunga vopefimbo laye ta ti: “Nye tamu konakona momishangwa, osheshi omu shii nye omu na omwenyo waalushe mudo, ndele odo otadi hepaulula nge.”—Johannes 5:39.
5. Exupifo ola kwatela mo naanaa shike?
5 Okupitila muJesus, Kalunga okwa holola pauyadi eshi exupifo tali ti. Osha kwatela mo okumangululwa mepangelo loulunde, meemhango domalongelokalunga oipupulu nokumangululwa ko kounyuni tau pangelwa kuSatana nokoumbada wokutila ovanhu nowokutila efyo nokuli. (Johannes 17:16; Ovaroma 8:2; Ovakolossi 1:13; Ehololo 18:2, 4) Kovapiya vaKalunga ovadiinini okuxupifwa kuKalunga itashi ti ashike okuxupifwa mefininiko nomoudjuu ndele otashi kwatele mo yo omhito yoku ka mona omwenyo waalushe. (Johannes 6:40; 17:3) Jesus okwa honga kutya shi na sha naavo ‘voshiunda shinini,’ exupifo otali ti oku ka nyumuninwa omwenyo womeulu opo va ka kufe ombinga pamwe naKristus mepangelo lOuhamba. (Lukas 12:32, OB-1954) Shi na sha noshixupe shovanhu, exupifo otali ti okwaalulilwa onghalamwenyo ya wanenena nosho yo ekwatafano la wanenena naKalunga olo kwa li tali hafelwa kuAdam naEva moshikunino shaEden omanga inava nyona. (Oilonga 3:21; Ovaefeso 1:10) Omwenyo waalushe koshi yeenghalo di li ngaha dopaparadisa oo wa li elalakano laKalunga lopehovelo li na sha novanhu. (Genesis 1:28; Markus 10:30) Ndele ongahelipi eningululo leenghalo da tya ngaha tali shiiva?
Ekanghameno lokumona exupifo—Oikulila
6, 7. Jesus ota dana onghandangala ya tya ngahelipi mexupifo letu?
6 Exupifo laalushe otali shiiva ashike okupitila mekuliloyambo laKristus. Omolwashike? Ombibeli otai yelifa kutya eshi Adam a nyona, okwe ‘lilandifa po’ koulunde ye mwene nosho yo ovana waye vomonakwiiwa, twa kwatelwa mo—naashi otashi ulike kutya oikulila oya pumbiwa opo ovanhu va dule okukala neteelelo li na ongushu. (Ovaroma 5:14, 15; 7:14) Kutya Kalunga ota ka yandja oikulila kovanhu aveshe okwa li sha fanekwa komaxwikiloyambo oinamwenyo koshi yOmhango yaMoses. (Ovaheberi 10:1-10; 1 Johannes 2:2) Ekuliloyambo laJesus olo la wanifa po omafaneko aeshe oo opaxunganeko. Manga Jesus ina dalwa, omweengeli waJehova okwa shiivifa ta ti: “Oye ta ka xupifa oshiwana shaye momatimba asho.”—Mateus 1:21; Ovaheberi 2:10.
7 Jesus okwa dalwa kokakadona Maria pashikumwifilonga, ndele e li Omona waKalunga, ina fyuulula efyo okudja kuAdam. Oushili ou opamwe nondjila yaye ya wanenena youdiinini oya ningifa omwenyo waye u kale u na ongushu oyo ya pumbiwa okukulila ovanhu moulunde nefyo. (Johannes 8:36; 1 Ovakorinto 15:22) Jesus kakwa li a tokolelwa efyo molwoulunde, ngaashi ovanhu aveshe vakwao. Okwe uya kedu nelalakano lokondadalunde olo li li ‘okuyandja omwenyo waye u ninge oikulila yavahapu.’ (Mateus 20:28) Eshi e shi ninga, Jesus omunyumunwa nomunangekwa koshipangelapundi okwa wana okuyandja exupifo kwaaveshe ovo tava wanifa po oiteelelwa yaKalunga.—Ehololo 12:10.
Oshike tashi pulwa ku monike exupifo?
8, 9. (a) Jesus okwa nyamukula ngahelipi omunyasha oshipuna eshi a pula epulo li na sha nexupifo? (b) Ongahelipi Jesus a longifa omhito ei mokuhonga ovahongwa vaye?
8 Oshikando shimwe, omulumenhu oshipuna Omuisrael oo a li elenga okwa pula Jesus ta ti: “Ondi nokulonga shike ndi mone omwenyo waalushe?” (Markus 10:17) Epulo laye otashi dulika kwa li tali ulike omadiladilo aapeshe Ovajuda vopefimbo laye—kutya Kalunga ota pula oilonga iwa yonhumba nomokulonga sha wana shi na sha noilonga oyo, omunhu ota dulu okufutwa exupifo kuKalunga. Ndele oludi lokuliyandja kwa tya ngaha otali dulu li dje momalinyengotomheno okulihola mwene. Oilonga ya tya ngaho oya dopa okuyandja eteelelo lexupifo lashili, molwaashi kape na omunhu ina wanenena ta dulu okuwanifa po filufilu omifikamhango daKalunga.
9 Mokunyamukula epulo lomulumenhu, Jesus okwe mu dimbulukifa ashike kutya oku na okudiinina oipango yaKalunga. Opo nee omunyasha oshipuna divadiva okwa shilipaleka Jesus kutya okwa kala noku i diinina okudja kounyasha waye. Enyamukulo laye ole linyengifa Jesus a kale e na ohokwe muye. Jesus okwe mu lombwela ta ti: “Shimwe she ku pumbwa: Inda u ka lande po oinima yoye aishe ei u na, ove u i yandje keehepele, ndele to kala u nemona meulu, ove u uye u shikule nge.” Ndelenee omulumenhu okwa ya a nyika oluhodi, “osheshi ye okwa li e noinima ihapu.” Konima yaasho Jesus okwa popya novahongwa nomufindo kutya okukanyatela koinima yomounyuni oko endangalati mondjila yokumona exupifo. Okwa twikila ko kutya kape na ou ta dulu okumona exupifo mokuninga eenghendabala daye mwene. Ndele Jesus okwa twikila ko noku va shilipaleka ta ti: “Otashi nyenge ovanhu, ndele haKalunga, osheshi Kalunga iha nyengwa kusha.” (Markus 10:18-27; Lukas 18:18-23) Ongahelipi exupifo tali shiiva?
10. Oiteelelwa ilipi tu na okuwanifa po opo tu ka mone exupifo?
10 Exupifo olo oshali yaKalunga, ndele ihai uya ashike kuyo vene. (Ovaroma 6:23) Ope na oiteelelwa ya fimana oyo keshe umwe e na oku i wanifa po opo a dule okukala a wana okumona oshali ya tya ngaha. Jesus okwa ti: “Osho Kalunga a kala e hole ounyuni, Oye a yandja Omona waye Ewifa, opo keshe ou [e na eitavelo tali longo muye, NW] a ha kane, ndelenee a kale e nomwenyo waalushe.” Nomuyapostoli Johannes okwa twikila ko ta ti: “Ou [e na eitavelo tali longo mOmona, NW], oye e nomwenyo waalushe; ndelenee ou iha dulika kOmona, ita ka mona omwenyo.” (Johannes 3:16, 36) Osha yela kutya Kalunga ota pula eitavelo osho yo eduliko kukeshe umwe oo a hala oku ka mona exupifo laalushe. Keshe umwe oku na okuninga etokolo okutambula ko oikulila nokushikula oshikoti shaJesus.
11. Ongahelipi omunhu ina wanenena ta dulu okukala a hokiwa kuJehova?
11 Molwaashi inatu wanenena, kashi li oukwatya wetu wopaushitwe okudulika noshi li yo itashi shiiva okudulika panghedi ya wanenena. Omolwaashi Jehova a yandja oikulila i tuvike omatimba etu. Nande ongaho, otu na okutwikila nokuninga eenghendabala opo tu kale metwokumwe neendjila daKalunga. Ngaashi Jesus a lombwela omunyasha oshipuna, otu na okudiinina oipango yaKalunga. Oku shi ninga itashi ke tu kaleka ashike twa hokiwa kuKalunga, ndele otashi ke tu etela yo ehafo linene, molwaashi ‘oipango yaye kai fi idjuu’; oyo ‘ehekeleko.’ (1 Johannes 5:3; Omayeletumbulo 3:1, 8) Ndele nande ongaho, okudiinina meteelelo lexupifo kaku fi oshinima shipu.
‘Kondjeni neenghono molweitavelo’
12. Ongahelipi eteelelo lexupifo hali pameke Omukriste a kondjife omayeleko okuhenoukoshoki kwopaenghedi?
12 Omuhongwa Judas okwa li a hala okushangela Ovakriste vonale “molwexupifo [laye nolavo].” Ndelenee elihumbato lii lopaenghedi olo la kala apeshe ole mu fininika opo a yandje omayele kovamwaxe va “kondje neenghono molweitavelo.” Heeno, opo exupifo li monike inashi wana ashike okukala neitavelo nokukanyatela keitavelo lashili lopaKriste nokudulika ashike ngeenge oinima aishe tai ende nawa. Eliyandjo letu okuliyandjela Jehova oli na okukala la kola tali dulu oku tu kwafela tu kondjife omayeleko nosho yo omanwefemo mai opaenghedi. Ndele omilele da nyonauka noushunimonima, okuhenefimaneko okufimaneka eenghonopangelo, omatukauko nosho yo omalimbililo okwa li tai nyonauna omhepo yeongalo lomefelemido lotete. Oku va kwafela va kondjife oikala ya tya ngaha, Judas okwa ladipika Ovakriste vakwao opo va kaleke oshilalakanenwa shavo sha yela momadiladilo, ta ti: “Ovaholike, litungileni kekanghameno leitavelo leni liyapukiyapuki, nye mu ilikane nOmhepo Iyapuki, opo mu likaleke mohole yaKalunga nokuteelela onghenda yOmwene wetu Jesus Kristus komwenyo waalushe.” (Judas 3, 4, 8, 19-21, yelekanifa NW.) Eteelelo lexupifo otali dulu oku va pameka mekondjo lavo opo va kale va koshoka paenghedi.
13. Ongahelipi hatu dulu okuulika kutya inatu tambula oshimha elalakano lefilonghenda laKalunga?
13 Jehova Kalunga okwa teelela ovo ta ka pa exupifo va kale ve na elihumbato lopaenghedi li li oshihopaenenwa shiwa. (1 Ovakorinto 6:9, 10) Ndelenee, okukanyatela omifikamhango daKalunga dopaenghedi itashi ti okuninga omutokoli wavakweni. Hafye tu na okutokolela vakwetu ehanauno laalushe. Ponhele yaasho, Kalunga oye te ke shi ninga, ngaashi Paulus a lombwela Ovagreka muAtena ta ti: “Ye e tu yukifila efiku lokutokola ounyuni, eshi te u tokolifa ouyuki komulumenhu tuu oo, Ye mwene okwe mu hoolola”—Jesus Kristus. (Oilonga 17:31; Johannes 5:22) Ngeenge otu na eitavelo moikulila yaJesus, katu na okukala twa tila efiku letokolo olo tali uya. (Ovaheberi 10:38, 39) Oshinima sha fimana osheshi kutya ‘efilonghenda laKalunga [lokukwatakanifwa naye okupitila moikulila] tu he li tambule oshimha’ okupitila mokupitika tu wile momayeleko okudiladila nosho yo okulihumbata kwa puka. (2 Ovakorinto 6:1) Natango vali, okupitila mokukwafela vamwe va mone exupifo, ohatu ulike kutya inatu tambula oshimha efilonghenda laKalunga. Ohatu dulu oku va kwafela ngahelipi?
Okutukulilafana eteelelo lexupifo
14, 15. Jesus okwa yandja oshinakuwanifwa shokuudifa onghundana iwa koolyelye?
14 Mokutofa momuprofeti Joel, Paulus okwa shanga ta ti: “Keshe tuu ou ta ifana edina lOmwene, oye ota xupifwa.” Opo nee okwa twikila ko ta ti: “Ndele otava kuu ngahelipi kuou inave mu itavela? Ndele tava itavele ngahelipi ou inave mu uda? Ndele tava udu ngahelipi ngenge kape nomuudifi?” Konima yeevelise donhumba, Paulus okwa ulika kutya eitavelo ihali uya kulo vene; ponhele yaasho ohali “di mokuuda” sha hala kutya, okuuda ‘ondjovo yaKristus.’—Ovaroma 10:13, 14, 17; Joel 2:32.
15 Oolyelye tava ka twala ‘ondjovo yaKristus’ koiwana? Jesus okwa yandja oilonga ya tya ngaho kovahongwa vaye—ovo hano va hongwa nale ‘ondjovo’ oyo. (Mateus 24:14; 28:19, 20; Johannes 17:20) Eshi hatu kufa ombinga moilonga yokuudifa Ouhamba noyokuninga ovanhu ovahongwa, ohatu longo naanaa osho sha shangwa komuyapostoli Paulus, oshikando eshi ota tofa muJesaja ta ti: “Eemhadi oda fewa ngahelipi daava hava udifa eenghundana diwa.” Nokuli nande vahapu itava tambula ko onghundana iwa oyo hatu va etele, eemhadi detu natango kuJehova oda “fewa.”—Ovaroma 10:15; Jesaja 52:7.
16, 17. Oilonga yetu yokuudifa otai wanifa po omalalakano avali elipi?
16 Okulonga oshilonga eshi otaku wanifa po omalalakano avali a fimana. Lotete, onghundana iwa oi na okuudifwa opo edina laKalunga li fimanekwe naavo va hala okuxupifwa va mone kutya openi ve na okuya. Paulus okwa kala e udite ko oshinima eshi shi na sha noshilonga eshi. Okwa popya ta ti: “Osheshi osho ngaha Omwene e tu lombwela: Ame nde ku tula po ouyelele wovapaani u ninge exupifo fiyo okominghulo dedu.” Hano tu li ovahongwa vaKristus, keshe umwe womufye oku na okukufa ombinga moilonga yokutwala etumwalaka lexupifo kovanhu.—Oilonga 13:47; Jesaja 49:6.
17 Elalakano etivali, okuudifa onghundana iwa otaku diki ekanghameno letokolo lopauyuki laKalunga. Shi na sha netokolo olo, Jesus okwa ti: “Omona wOmunhu eshi te uya moshinge shaye novaengeli vayapuki aveshe pamwe naye, opo nee ota kala omutumba kolukalwapangelo loshinge shaye. Noiwana aishe otai ongelwa koshipala shaye, ndee ta yoolola ovanhu moovakwao, ngaashi omufita ta yoolola eedi moikombo.” Ndele nande etokolo nosho yo okuyoolola taku ka ningwa “Omona wOmunhu eshi te uya moshinge shaye,” oilonga yokuudifa otai yandje omhito kovanhu kunena opo va dimine ovamwaxe vaKristus vopamhepo nokulonga moku va yambidida molwexupifo laalushe lavo vene.—Mateus 25:31-46.
Diinina ‘eteelelo la pama’
18. Ongahelipi hatu dulu okukaleka ‘eteelelo lexupifo’ letu la twa?
18 Okukala kwetu twe lipyakidila mokukufa ombinga moilonga yokuudifa oku li yo ekwafo oku tu kwafela tu kaleke eteelelo letu la twa. Paulus okwa shanga ta ti: “Otwa halelela shili keshe umwe womunye a holole [ouladi wa faafana, NW], opo mu diinine mu kale mu neteelelo la pama fiyo exulilo.” (Ovaheberi 6:11) Hano, keshe umwe womufye na djale ‘embale loshivela leteelelo lexupifo,’ nokudimbuluka kutya “Kalunga ine tu ufila okuhandukilwa, ndelenee tu xupifwe omolwOmwene wetu Jesus Kristus.” (1 Ovatessaloniki 5:8, 9) Natu pwilikine yo kekumaido laPetrus tali ti: “Mangeni oiya yomadiladilo eni nokulidilika; lineekeleni shili efilonghenda olo tamu ke li pewa.” (1 Petrus 1:13) Aveshe ovo tave shi ningi otava ka mona ewanifo lofilufilu “leteelelo lexupifo” lavo.
19. Oshike hatu ka kundafana moshitukulwa tashi shikula?
19 Lwopokati opo, otu na okukala tu na etaleko li li ngahelipi li na sha nefimbo longhalelo ei olo la xupa ko? Ongahelipi hatu dulu okulongifa efimbo olo opo tu limonene exupifo osho yo vamwe? Ohatu ka kundafana omapulo aa moshitukulwa tashi shikula.
[Efano pepandja 24]
Exupifo otali ti sha shihapu shi dulife ashike okuxupifwa mehanauno
[Efano pepandja 25]
Oto Dulu Okuyelifa?
• Omolwashike tu na okukaleka ‘eteelelo lexupifo’ letu la twa?
• Exupifo ola kwatela mo shike?
• Oshike tu na okuninga opo tu mone oshali yexupifo?
• Metwokumwe nelalakano laKalunga, oshike tashi wanifwa po koilonga yetu yokuudifa?