Ulika oikala yopamadiladilo yaKristus

“Kalunga kelididimiko nokehekeleko ne mu kwafe mu kale [mu na oikala yomadiladilo oyo Kristus Jesus a li e na, NW ].”—OVAROMA 15:5.

1. Ongahelipi onghalamwenyo yomunhu tai dulu okunwefwa mo koikala yaye?

OIKALA oi na enwefemo la kula monghalamwenyo. Oikala yokuhatonyoka ile youladi, oikala iwa ile ii, oikala youtondwe ile yelongelokumwe noikala yokungongota ile yolupandu otai dulu okunwefa mo neenghono omunhu nghee ha ungaunga neenghalo osho yo nghee vakwao tave ke linyenga kuye. Okukala noikala iwa, omunhu ota dulu okukala a hafa nonande oku li meenghalo didjuu. Komunhu oo e na oikala ii, kape na nande osha tashi monika shiwa kutya nee oshi na elalakano le likolelela kouwa wonghalamwenyo.

2. Ongahelipi omunhu he lihongo oikala?

² Oikala—iwa ile ii—otai dulu okulihongwa. Doshili, yo oi na okulihongwa. Mokupopya okaana opo ka dalwa, Collier’s Encyclopedia oya ti: “Keshe oikala oyo taka ka kala ke na konahiya oke na okukala ke i lihonga, ngaashi ashike ke na okulihonga keshe elaka ile ounghulungu wonhumba.” Ohatu lihongo ngahelipi oikala? Ndele nande ope na oinima ihapu oyo i na mo ombinga moshinima, omudingonoko osho yo eendafano oyo unene enwefemo la kula. Oensiklopedia ya tumbulwa metetekelo oya popya tai ti: “Ohatu lihongo ile ohatu tambula ko noupu oikala yaavo tu na oukaume wopofingo navo inatu shi shiiva.” Eedula omayovi da pita, Ombibeli oya tonga sha faafana tai ti: “Kala nokweenda novanongo, opo nee naave yo u ninge omunongo. Ndelenee ou ha endafana novashima, ota ka laipala.”—Omayeletumbulo 13:20; 1 Ovakorinto 15:33.

Oshihopaenenwa shoikala iwa

3. Olyelye a li e na oikala i shii okuhopaenenwa, nongahelipi hatu dulu oku mu hopaenena?

³ Ngaashi ashike moinima aishe ikwao, osho yo moshinima shi na sha noikala, Jesus Kristus okwa tula po oshihopaenenwa shiwa. Okwa ti: “Osheshi Ame nde mu pa oshihopaelelwa, nye mu ninge yo ngaashi Ame nde mu ningila.” (Johannes 13:15) Opo tu kale ngaashi Jesus, tete otu na okulihonga kombinga yaye.a Ohatu lihongo onghalamwenyo yaJesus nelalakano tu ninge ngaashi omuyapostoli Petrus a ti: “Osho tuu eshi mwe shi ifanenwa, osheshi naKristus yo okwe mu hepekelwa nokwe mu fiila oshihopaelelwa mu shikule oshikoti shaye [filufilu, NW].” (1 Petrus 2:21) Elalakano letu olo okukala naanaa twa fa Jesus ngaashi tashi dulika. Eshi osha kwatela mo okukulika oikala yomadiladilo i li ngaashi yaye.

4, 5. Oshinima shilipi shi na sha noikala yopamadiladilo yaJesus tashi divilikwa mOvaroma 15:1-3, nongahelipi Ovakriste tava dulu oku mu hopaenena?

⁴ Okukala noikala yomadiladilo i li ngaashi yaKristus Jesus osha kwatela mo shike? Etukulwa 15 lonhumwafo yaPaulus kOvaroma otali tu kwafele mokunyamukula epulo eli. Meevelishe dopetameko metukulwa eli, Paulus okwa li ta ulike koukwatya wa tongomana waJesus eshi a ti: “Fye ava twa pama, otwa pewa tu humbate oungone waava inava pama, fye tu ha kale nokuliwapalela fye vene. Keshe womufye na wapalele mukwao oku mu yakula mouwa opo a tungwe. Osheshi naKristus yo ine liwapalela Ye mwene, ndelenee ongaashi pa shangwa: Omasheko aava have ku sheke a wila nge.”—Ovaroma 15:1-3.

⁵ Mokuhopaenena oikala yaJesus, Ovakriste otava ladipikwa va kale ve lilongekida okukwafela meemhumbwe davamwe nelininipiko ponhele yokukala ashike tave likwafa ovo aveke. Doshili, elininipiko eli lokukala lehalo liwa lokuyakula vamwe olo oukwatya waava va “pama.” Jesus, oo kwa li a pama pamhepo e dule omunhu keshe oo a li ko, okwe lipopya ye mwene a ti: “NOmona wOmunhu ine uya okuyakulwa, ndele okuyakula nokuyandja omwenyo waye u ninge oikulila yavahapu.” (Mateus 20:28) Tu li Ovakriste, otwa hala okuninga sha faafana tu yakule vakwetu mwa kwatelwa ‘ava inava pama.’

6. Omonghedi ilipi hatu dulu okuhopaenena nghee Jesus e linyenga kepataneko nokodino?

⁶ Oukwatya umwe muwa waJesus oo kutya omadiladilo noilonga yaye oya li alushe tai tungu. Ina efa nande oikala ii yavamwe i nwefe mo oikala yaye iwa i na sha nokulongela Kalunga, nafye katu na oku i efa. Eshi kwa li ta shekwa nokuhepekwa omolwokulongela Kalunga noudiinini, Jesus okwe lididimika noina ngongota nande. Okwa li e shii kutya ovo tava kendabala okuningila ovanhu vakwao ‘ouwa opo va tungwe’ otava ka patanekwa kwaavo ve he fi ovaitaveli vakwao nokounyuni u he na eshiivo.

7. Ongahelipi Jesus a ulika elididimiko, nomolwashike tu na okuninga sha faafana?

⁷ Jesus okwa ulika oikala iwa meenghedi dikwao. Ina ulika nande oku he na oudiinini kuJehova ndele okwa teelela nelididimiko mokuwanifa elalakano laYe. (Epsalme 110:1; Mateus 24:36; Oilonga 2:32-36; Ovaheberi 10:12, 13) Kakele kaasho, Jesus ina ulika nande oku he na elididimiko novashikuli vaye. Okwe va lombwela a ti: “Nye mu lilonge kuame,” molwaashi okwa li “omunambili” omahongo aye okwa li taa tungu notaa hekeleke. Nomolwaashi okwa li e ‘lininipika momutima,’ ine litada nande ile e linenepeke. (Mateus 11:29) Paulus okwe tu ladipika tu hopaenene oikala aishe yaJesus eshi a ti: “Omadiladilo eni naa fe enya aKristus Jesus kwa li e a na, Oye nande olupe laKalunga, Oye ina hakana a kale a fa Kalunga, ndelenee okwe lidula Ye mwene nokwa djala olupe lomupika nokufafana novanhu.”—Ovafilippi 2:5-7.

8, 9. (a) Omolwashike tu na okukendabala tu kulike oikala yokuhelihola mwene? (b) Omolwashike tu he na okuteka omukumo ngee itatu dulu okukala filufilu pashihopaenenwa osho twa fiilwa kuJesus, nongahelipi Paulus e li oshihopaenenwa shiwa moshinima omu?

⁸ Oshipu okupopya kutya otwa hala okuyakula vamwe nokutula eemhumbwe davo komesho yaadi detu. Ndelenee okukonakona pauyuki oikala yetu yomadiladilo otashi dulika ku holole kutya omitima detu hasho da hala okuninga shili. Omolwashike? Shotete, omolwaashi otwa fyuulula oikala yokulihola mwene kuAdam naEva; oshitivali, omolwaashi otu li mounyuni oo tau xumifa komesho okulihola mwene. (Ovaefeso 4:17, 18) Okukulika oikala yokuhelihola mwene luhapu otashi ti okukulika omadiladilo a yooloka ko kwao etu okuhawanenena twa dalwa nao pashitwe. Eshi otashi pula okuninga etokolotoko nosho yo eenghendabala.

⁹ Okuhawanenena kwetu ku liwetikile, okwa yooloka ko filufilu koshihopaenenwa sha wanenena osho twa fiilwa kuJesus, otashi dulika omafimbo amwe shi tu ningife tu kale twa teka omukumo. Otashi dulika tu kale nomalimbililo kutya okukala noikala yomadiladilo ya fa oyo Jesus a li e na otashi shiiva. Ndele didilika osho eendjovo detwomukumo laPaulus tadi ti: “Ondi shi shii muame, nokutya, mombelela yange kamu na ouwa nande washa. Ehalo ondi li kwete, ndelenee eenghono dokuwanifa ouwa, ahowe; shaashi ouwa ou nde u hala, ihandi u longo, ndele owii ou inandi u hala, ohandi u longo. Shaashi kombinga yomunhu ou womeni onda dimina nehafo omhango yaKalunga, ndele moinhimbu yange ondi wete omhango ikwao tai kondjifa omhango yomadiladilo ange, ndele otai pikile nge momhango youlunde i li moinhimbu yange.” (Ovaroma 7:18, 19, 22, 23) Doshili, okuhawanenena kwaPaulus luhapu okwa kala taku mu piyaaneke okuwanifa po ehalo laKalunga ngaashi a hala, ndele oikala yaye—onghedi omo kwa li ha diladila naasho kwa li e udite kombinga yaJehova neemhango daYe—oshi shii okuhopaenenwa. Na etu otaa dulu okuninga sha faafana.

Wapaleka oikala ya puka

10. Paulus okwa ladipika Ovafilippi va kulike oikala ilipi yomadiladilo?

¹⁰ Mbela otashi shiiva ngoo kutya vamwe ova pumbwa okuyukifa oikala ya puka? Heeno. Eshi osho sha li ngaho kOvakriste vamwe mefelemido lotete. Monhumwafo yaye kOvafilippi, Paulus okwa popya kombinga yokukala noikala ya yuka. Okwa shanga ta ti: “Hakutya nde shi hanga ngeno [omwenyo womeulu okupitila menyumuko lotete] ile nda wana nda pwa, ndelenee ohandi shi lotokele, ndi shi kwate, ngaashi ame nda kwatwa kuKristus Jesus. Ovamwatate, ame itandi litale nokutya, nde shi hanga, ndelenee handi shi ningi: ohandi dimbwa ei yokonima nohandi lalakanene ei yokomesho, ohandi lotokele kefikilo, okondjabi yefindano Kalunga e i ifanena nge neifano lopombada muKristus Jesus. Hano ofyeni atusheni ava twa wana, natu diladileni ngaha.” (Eendada ofye twe di shanga da endameka.)—Ovafilippi 3:12-15.

11, 12. Omonghedi ilipi Jehova he tu hololele oikala iwa yomadiladilo?

¹¹ Eendjovo daPaulus otadi ulike kutya, keshe oo a ninga Omukriste ndele ota diladila kutya ina pumbwa okuninga exumokomesho, oku na oikala ya puka. Omunhu a tya ngaha okwa dopa okutambula ko oikala yomadiladilo ya fa yaKristus. (Ovaheberi 4:11; 2 Petrus 1:10; 3:14) Mbela onghalamwenyo yomunhu a tya ngaha kai na eteelelo lasha? Hasho nandenande. Kalunga ota dulu oku tu kwafa tu lundulule oikala yetu ngee otwa hala shili. Paulus ota twikile ko ta ti: “Nongenge mu nomadiladilo amwe moshinima shonhumba, naasho otamu ke shi hololelwa kuKalunga.”—Ovafilippi 3:15.

¹² Ndelenee ngee otwa hala Jehova e tu hololele oikala ya yuka, nafye otu na okuninga sha. Okukonakona Eendjovo daKalunga pamwe neilikano osho yo nekwafo loileshomwa yopaKriste ya yandjwa ‘komupiya omudiinini nomunaendunge’ otashi ka kwafa ovo ‘omadiladilo avo e na oshinima shonhumba’ opo va kulike oikala ya yuka. (Mateus 24:45) Ovakulunhuongalo Ovakriste, ova nangekwa po komhepo iyapuki opo va ‘life eongalo laKalunga,’ otava ka kala va hafa okuyandja ekwafo. (Oilonga 20:28) Inatu pandula tuu eshi Jehova ha yavelele okuhawanenena kwetu nohe tu kwafele pahole! Natu shi dimine.

Lihonga kuvamwe

13. Oshike hatu lihongo kombinga yoikala ya yuka okudja mehokololo lOmbibeli laJob?

¹³ MOvaroma etukulwa 15, Paulus okwa ulika kutya mokudilonga koihopaenenwa yopandjokonona otaku dulu oku tu kwafa tu yukife oikala yetu. Okwa shanga ta ti: “Osheshi keshe eshi sha shangwa nale, osha shangelwa elongo letu, opo tu kale tu neteelelo hali di melididimiko nomehekeleko lomomishangwa.” (Ovaroma 15:4) Vamwe vomovapiya ovadiinini vaJehova vomefimbo la pita okwa li va pumbwa okuwapeka oinima yonhumba yomoikala yavo. Pashihopaenenwa, Job okwa li e na oikala iwa. Ina popya sha nande shii ta ula Jehova, noina pitika nande okumona oixuna ku nghundipaleke elineekelo laye muKalunga. (Job 1:8, 21, 22) Ndelenee okwa li e hole okuliyukipalifa mwene. Jehova okwa li a lombwela Elihu a kwafele Job mokuyukifa oikala ya tya ngaha. Ponhele yokukala e udite a yahamekwa, Job okwa tambula ko nelininipiko epukululo a lundulule oikala yaye nokwa li a hala oku shi ninga.—Job 42:1-6.

14. Ongahelipi hatu dulu okukala ngaashi Job, ngee hatu pewa omapukululo kombinga yoikala yetu?

¹⁴ Ohatu ke linyenga tuu ngaashi Job, ngeenge Omukriste mukwetu e tu lombwele nombili kutya otwa ulika oikala ya puka? Ngaashi Job, inatu “popya sha shokupa Kalunga oushima.” (Job 1:22) Ngee hatu hepekwe tu wete kutya kashi li pauyuki, inatu ngongota nande ile tu pe Jehova ombedi kutya oye te tu etele omaupyakadi. Natu henuke okukendabala okuliyukipalifa fye vene, nokudimbuluka kutya, kashi na nee mbudi kutya otu na omaufembanghenda ashike moilonga yaJehova, otu li ashike “ovapiya vongaho.”—Lukas 17:10.

15. (a) Vamwe vomovashikuli vaJesus ova ulika oikala ilipi ya puka? (b) Ongahelipi Petrus a ulika oikala iwa?

¹⁵ Pefimbo lefelemido lotete, vamwe ovo kwa li va pwilikina kuJesus okwa li va ulika oikala ii. Pomhito imwe, Jesus okwa li a popya sha osho kwa li shidjuu okuudiwa ko. Mokunyamukula: “Vahapu vomovalongwa vaye eshi ve shi uda, ova tya: Eendjovo edi dikukutu, olyelye ta dulu oku di pwilikina?” Ovo va popya monghedi ei osha yela kutya ova li ve na oikala ya puka. Noikala yavo ya puka oye va ningifa va ha pwilikine kuJesus. Ehokololo otali ti: “Okudja opo vahapu vomovalongwa vaye va shuna monima, vo inava enda vali naye.” Mbela aveshe okwa li ve na oikala ya puka? Ahowe. Ehokololo otali twikile tali ti: “Opo nee Jesus okwa lombwela ava omulongo navavali: Nanye yo mwa hala okuya? Simon Petrus okwe mu nyamukula ta ti: Omwene, otu ye kulyelye ngeno?” Oshidjemo, Petrus okwa nyamukula epulo laye mwene a ti: “Ove u neendjovo domwenyo waalushe.” (Johannes 6:60, 66-68) Kai shi tuu oikala iwa! Ngee hatu shakeneke efatululo ile eyelifo li na sha nokuuda ko Omishangwa olo tashi dulika pehovelo lidjuu okuudiwa ko, itashi ka kala mbela shi li pandunge okuulika oikala ngaashi oyo ya ulikwa kuPetrus? Itashi ka kala tuu sha nyika oulai okweefa po okulongela Jehova ile tu popye monghedi oyo itai tu kumwe ‘noshihopaelelwa sheendjovo odo diwa’ molwaashi ashike pe na oinima imwe oyo idjuu okuuda ko!—2 Timoteus 1:13.

16. Oikala inyanyalifa ilipi ya ulikwa kovawiliki velongelokalunga lOshijuda vopefimbo laJesus?

¹⁶ Ovawiliki velongelokalunga lOshijuda vomefelemido lotete ova dopa okuulika oikala yomadiladilo oyo kwa li i niwe kuJesus. Okutokola kwavo okuhapwilikina kuJesus okwa ulikwa eshi a nyumuna Lasarus koufi. Kukeshe oo e na oikala ya yuka, oshikumwifilonga eshi okwa li tashi ulike kutya Jesus okwa tumwa shili kuKalunga. Ndelenee momushangwa ohatu lesha: “Opo ovapristeri ovakulunhu novafarisai ova shiva oshiongalele shovakulunhu ndee tava ti: Ohatu ningi ngahelipi, osheshi omulumenhu ou ota ningi oikumifilonga ihapu? Ngenge hatu mu efa ngaha, aveshe otave mu itavele, nOvaroma otave uya ndee tave tu kufa oshilongo novanhu yo.” Mbela etokolo lavo ola li shike? “Ndele kefiku olo tuu olo va pangela oku mu dipaa.” Kakele komhangela yokudipaa Jesus, ova pangela vali okuhanauna po oushili waye u liwetikile wokukala e li omulongi woikumwifilonga. “Novapristeri ovakulunhu ova pangela omhangela okudipaa yo naLasarus.” (Johannes 11:47, 48, 53; 12:9-11) Itashi ka kala tuu shitondifa ngee hatu ulike oikala ya fa oyo mokuningilwa nai ile mokuhanduka koinima oyo kwa li twa wana ngeno okukala twa hafa kuyo! Heeno, kashi li tuu oshiponga!

Hopaenena oikala iwa yaKristus

17. (a) Okoshi yeenghalo dilipi Daniel a li eshi a ulika oikala yoku he na oumbada? (b) Ongahelipi Jesus a ulika ouladi waye?

¹⁷ Ovapiya vaJehova ova diinina oikala iwa. Eshi ovatondi vaDaniel va pangela omhangela ku yandjwe omhango tai kelele ku ha ilikanwe nande okukalunga keshe ile komunhu wonhumba kakele ashike kohamba omafiku 30, Daniel oku shi shii kutya eshi otashi ka kuma ekwatafano laye naJehova Kalunga. Mbela ota kala ita ilikana Kalunga omafiku 30? Ahowe, noku he na oumbada okwa twikila okwiilikana kuJehova lutatu mefiku, ngaashi a kala ha ningi shito. (Daniel 6:6-17) Sha faafana, Jesus okwa ekelashi embadameko lovatondi vaye. Eshabata limwe okwa shakeneka omulumenhu e na eke la kukuta. Jesus okwa li e shii kutya Ovajuda vahapu ovo va li po itava ka kala va hafa ngee okwa velula umwe mEshabata. Okwe va pula e va yukilila va popye nghee ve udite shi na sha noshinima. Eshi va anya okunyamukula sha, Jesus okwa twikila komesho nokwa velula omulumenhu. (Markus 3:1-6) Jesus ke na fiku nande a shunine monima mokuwanifa oshilonga shaye ngaashi kwa li e shi shii kutya oku shi longa oshi li mondjila.

18. Omolwashike vamwe have tu pataneke, ndele otu na okulinyenga ngahelipi koikala yavo ii?

¹⁸ Eendombwedi daJehova nado kunena oda dimina kutya itadi tilifwa nande komalinyengo mai ovapataneki. Ngeenge hasho, itava ulike oikala yomadiladilo ya fa yaJesus. Vahapu ohava pataneke Eendombwedi daJehova, vamwe omolwaashi ve he na eshiivo lashili ndele vamwe omolwaashi ve tonde Eendombwedi ile etumwalaka lado. Ndele inatu pitika nande oikala yavo youtondwe i nwefe mo oikala yetu iwa. Inatu efa nande vamwe va nyone po onghedi yetu omo hatu longele Kalunga.

19. Ongahelipi hatu dulu okuulika oikala yomadiladilo ya fa yaJesus Kristus?

¹⁹ Jesus okwa ulika alushe oikala iwa yomadiladilo kombinga yovashikuli vaye nosho yo kelongekido laKalunga, nonande okwa li shidjuu oku shi ninga. (Mateus 23:2, 3) Otu na okuhopaenena oshihopaenenwa shaye. Doshili, ovamwatate inava wanenena, nafye osho yo. Ndele mbela openi hatu dulu okumona eendafano li li nawa nosho yo ookaume vashili ve shii okulineekelwa shi dule moumwainafana wetu womounyuni aushe? Jehova ine tu pa natango eudeko alishe koonono lEendjovo daye da shangwa, ndele ope na ngoo mbela ongudu yelongelokalunga imwe i lili oyo i na eudeko lihapu? Natu kale alushe noikala iwa yomadiladilo, oikala yomadiladilo ya fa oyo Jesus Kristus kwa li e na. Kakele koinima imwe, eshi osha kwatela mo oinima ngaashi okushiiva nghee tu na okuteelela kuJehova, ngaashi hatu ke shi kundafana moshitukulwa tashi shikula.

Oto dulu okuyelifa?

• Ongahelipi okukalamwenyo kwetu taku nwefwa mo koikala yetu?

• Hokolola oikala yopamadiladilo yaJesus Kristus.

• Oshike hatu dulu okulihonga moikala yaJob?

• Oikala ya yuka ilipi tu na okukala tu na ngee hatu taalele omapataneko?

[Omashangelo opedu]

[Efano pepandja 18]

Omukriste e na oikala iwa oha ningi eenghendabala dokukwafa vamwe

[Efano pepandja 20]

Eilikano nekonakono lEendjovo daKalunga otali tu kwafa tu tambule ko oikala yopamadiladilo yaKristus