Efiku laJehova letokolo oli li popepi!
“Efiku linene lOmwene oli li popepi! Heeno, popepi li li,
ndee tali endelele okufika!”—SEFANJA 1:14.
JEHOVA KALUNGA oku li pokukatukila onghatu oukolokoshi. Pwilikina! Elondwelo laye olo ngaha: “Ame ohandi ka komba po ovanhu . . . Ame ohandi ka hanauna po ovanhu kombada yedu.” (Sefanja 1:3) Eendjovo edi dOmwene Omunamapangelo aeshe Jehova oda popiwa okupitila momuprofeti waye Sefanja, omutekulululwa wohamba idiinini Hiskia. Eendjovo odo da popiwa momafiku ohamba iwa Josia, kada li da etela ouwa ovakolokoshi ovo va li moshilongo shaJuda.
2. Omolwashike eenghatu daJosia da li inadi kelela efiku laJehova letokolo?
2 Kape na omalimbililo kutya okuxunganeka kwaSefanja okwa pameka eshiivo lomunyasha Josia lokushiiva kutya elongelokalunga la nyata oli na okukosholwa mo muJuda. Ndelenee eenghatu dohamba mokukoshola oshilongo kelongelokalunga loipupulu inadi komba po oukolokoshi aushe mokati koshiwana ile di dime po ngoo nee nande omatimba axekulululwa, ohamba Manasse, oo kwa li “a yadifa Jerusalem nohonde i he netimba.” (2 Eehamba 24:3, 4; 2 Omafimbo 34:3) Hano, efiku laJehova letokolo ola li tali ke uya shili.
3. Ongahelipi hatu dulu okukala noushili kutya okuxupa “mefiku lehandu lOmwene” otaku shiiva?
3 Ndele nande ongaho, okwa li pe na ovo tava ka xupa po mefiku olo linene. Onghee hano, omuprofeti waKalunga okwa ladipika ta ti: “Fimbo inashi tokolwa—efiku tali tuka po ngaashi olungu—fimbo inamu hangika koupyuhandu wOmwene, fimbo inamu hangika kefiku lehandu lOmwene. Kongeni Omwene, nye amushe ovalininipiki vomoshilongo, onye ava hamu diinine omayukifo aye. Kongeni ouyuki! Kaleni nokukonga elininipiko. Kashiimba tamu ka amenwa mefiku lehandu lOmwene.” (Sefanja 2:2, 3) Natu konakone embo lOmbibeli laSefanja tu na eteelelo lokuxupa mefiku laJehova letokolo momadiladilo. La shangelwa muJuda komesho yo 648 K.O.P., oli li oshitukulwa ‘shondjovo youprofeti’ yaKalunga, oyo atusheni tu na okupwilikina nomutima aushe.—2 Petrus 1:19.
Jehova ota aneke okwooko kwaye
4, 5. Ongahelipi Sefanja 1:1-3 a wanifilwa ovakolokoshi muJuda?
4 “Ondjovo yOmwene” kuSefanja otai hovele nelondwelo olo la tofwa mo metetekelo. Kalunga ota popi ta ti: “Ame ohandi ka komba po oinima aishe kombada yedu, Omwene ta ti. Ame ohandi ka komba po ovanhu noifitukuti, ohandi ka komba po eedila dokeulu neeshi domefuta noipundukifo pamwe novadinikalunga. Heeno, Ame ohandi ka hanauna po ovanhu kombada yedu, Omwene osho ta ti.”—Sefanja 1:1-3.
5 Heeno, Jehova okwa li ta ka xulifa po oukolokoshi moshilongo shaJuda. Kalunga ota ka longifa lyelye ‘mokukomba po oinima aishe kombada yedu’? Molwaashi Sefanja okwa xunganeka pefimbo loshitukulwa shotete shepangelo lohamba Josia, osho sha hovela mo 659 K.O.P., eendjovo odo dopaxunganeko oda ka wanifwa pehanauno laJuda nosho yo oshilandopangelo shasho Jerusalem komake Ovababilon mo 607 K.O.P. Pefimbo opo, opa li ‘ekombepo’ lovakolokoshi muJuda.
6-8. Oshike kwa li sha xunganekwa muSefanja 1:4-6, nongahelipi exunganeko olo kwa li la wanifwa muJuda shonale?
6 Mokuhepaulula eenghatu daKalunga okukatukila ovalongelikalunga ovanaipupulu, Sefanja 1:4-6 ota ti: “Handi ka anekela Juda noonakukalamo vomuJerusalem okwooko kwange. Ame ohandi ka dima mo yo monhele ei oixupe yaBaal, nomadina ovalongeli voikalunga pamwe novapristeri, naava have linyongamene kombada yeenduda nokwiilikana eengudu dokeulu, naavo have linyongamene nokwiilikana Omwene nokwaana kuye ndele hava ane yo kuMilkom, naava yo va efa Omwene, ndele itava kongo Omwene, ndele itave mu pula.”
7 Eke laJehova okwa li la anekelwa ovanhu vomuJuda novo muJerusalem. Okwa li a tokola toko a dime po ovalongeli voshikalunga shomuKanaan Baal nefyo. Oikalunga imwe yomoshitukulwa okwa li hai ifanwa ooBaal molwaashi ovalongeli vayo okwa li hava diladila kutya oi na enwefemo keenghalo donhumba. Pashihopaenenwa, opa li Baal a longelwa kOvamoab nOvamidian komhunda yaPeor. (Numeri 25:1, 3, 6) MuJuda ashishe Jehova okwa li ta ka dima mo ovapristeri aveshe vaBaal nosho yo ovapristeri Ovalevi ve he fi ovadiinini ovo va li va tauluka omhango yaKalunga mokukala ve na ekwatafano novapristeri vaBaal.—Exodus 20:2, 3.
8 Kalunga ota ka dipaa yo ovo ve ‘linyongamena eengudu dokeulu,’ sha hala kutya ovo hava ilikana eenyofi netango. (2 Eehamba 23:11; Jeremia 19:13; 32:29) Ehandu laKalunga otali ka wila yo kombada yaavo tava kendabala okulumbakanifa elongelokalunga lashili nelongelokalunga loipupulu ‘mokwaana kOmwene nokuMilkom.’ Milkom otashi dulika li li edina limwe laMolok, oshikalunga shinene shOvaammoni. Okulongela Molok okwa li kwa kwatela mo omayambo okuyamba po ounona.—1 Eehamba 11:5; Jeremia 32:35.
Exulilo lOukwakriste oli li popepi!
9. (a) Oukwakriste ou na ondjo yashike? (b) Oshike osho tu na okukala twa tokola toko okuninga mekondjifafano naasho sha ningwa kwaavo ve he fi ovadiinini muJuda?
9 Aishe oyo otai tu dimbulukifa Oukwakriste, oo wa wila melongelokalunga loipupulu nosho yo mokunyanekela neenyofi. Ndele onghandangala yao mokuyamba po omamiliyona eemwenyo koaltari okupitila mokuyambidida oita kwovawiliki vomalongelokalunga oshinima shitondifa shili! Inatu kala nande ngaashi ovo va li muJuda ve he na oudiinini “va efa Omwene,” nova hovela okukala ve he na ko nasha noinava konga vali ewiliko laye. Ponhele yaasho natu kanyatele oudiinini wetu muKalunga.
10. Oto yelifa ngahelipi exunganeko likonekwedi laSefanja 1:7?
10 Eendjovo domuprofeti tadi shikula oda yeleka kovanyoni ovo vomuJuda osho yo ovo vomefimbo letu. Sefanja 1:7 ota ti: “Limweneneneni koshipala shOmwene Kalunga! Osheshi efiku lOmwene li li popepi. Osheshi Omwene okwa longekida etomenoyambo, ndele a yapula [ovashivwa] vaye.” “Ovashivwa” ava otashi dulika va li Ovakaldi ovo va li ovatondi vaJuda. “Etomenoyambo” ola li Juda mwene mwa kwatelwa oshilandopangelo shaye. Onghee hano, Sefanja a popya elalakano laKalunga lokuhanauna po Jerusalem, nexunganeko eli okwa li tali ulike yo kokuhanaunwa po kwOukwakriste. Doshili, molwaashi efiku laKalunga letokolo oli li popepi unene kunena, ounyuni aushe ‘ou na okulimwenenena koshipala shOmwene Kalunga’ nokupwilikina eshi ta ti okupitila ‘moshiunda shinini’ shovashikuli vaJesus ovavaekwa nosho yo oovakwao ‘eedi daye dimwe.’ (Lukas 12:32, OB-1954; Johannes 10:16, OB-1954) Ehanauno ola teelela aveshe ovo itava ka pwilikina nokupitila mokuninga ngaho, tave ke litula vo vene mokukondjifa Ouhamba waKalunga.—Epsalme 2:1, 2.
Efiku lokukuwa oli li popepi!
11. Sefanja 1:8-11 oku na eityo lashike la fimana?
11 Shi na sha nefiku laJehova, Sefanja 1:8-11 ota twikile ta ti: “Mefiku tuu olo letomenoyambo lOmwene, Ame ohandi ka kongolola omalenga novana veehamba naaveshe ava hava djala oikutu yokoilongo. Mefiku linya handi ka kongolola yo aveshe ava hava nuka nokutauluka oshikulo shoposhi, hava yadifa ongulu yomwene wavo etinho nekengelelo. Mefiku tuu olo, Omwene ota ti, uda: Ekuwano tali udika pOshivelo [sheeshi, OB-1954], nelilaano kOshilando shipe, nehanauno linene koikulundu! Lileni, nye oonakukalamo mOshini (ombinga yoshilando), osheshi ovalandifi aveshe tava ka hanaunwa po naaveshe ava va yeleka [oshisilveri, OB-1954] tava ka kombwa po.”
12. Ongahelipi ovanhu vamwe va hangika va “djala oikutu yokoilongo”?
12 Ohamba Josia oya shikulwa kuJoahas, Jojakim naJojakin. Opo nee okwa shikula epangelo laSedekia, la didilikwa okupitila mehanauno laJerusalem. Nande kwa li va taalelwa koshiponga sha tya ngaha, vamwe okwa li va pula va idililwe koiwana yopoushiinda okupitila ‘mokudjala oikutu yokoilongo.’ Sha faafana, vahapu kunena otave shi ulike meenghedi di lili naku lili kutya vo kave fi oshitukulwa shehangano laJehova. Molwaashi eshi osha yela nale kutya ove li oshitukulwa shehangano laSatana, otava ka handukilwa.
13. Metwokumwe nexunganeko laSefanja oshike kwa li shi na oku ka ningwa shimha Ovababilon va ponokele Jerusalem?
13 ‘Efiku tuu olo’ lokuhokololifa Juda otali tu kumwe nefiku laJehova lokuwanifila ovatondi vaye etokolo laye, lokuxulifa po oukolokoshi, nosho yo okuulika kutya ye omunaenghono. Eshi Ovababilon va ponokela Jerusalem okwa li taku ka udika ekuwaano pOshivelo sheeshi. Otashi dulika kwa li sha lukwa ngaho molwaashi osha li popepi nomalandifilo eeshi. (Nehemia 13:16) Eengangala daBabilon okwa li di na okupita moshitukulwa hashi ifanwa oshilando shipe, ‘nehanauno linene koikulundu’ otashi dulika tashi ulike embuyaano lOvakaldi eshi tava ehene popepi. Okwa li tapa ka kala ‘elilaano’ loonakukala mOshini, tashi dulika oshitukulwa shopombada sholufilu laTyropoeon. Omolwashike ve na okulilaana? Omolwexulepo lomalipyakidilo ounangeshefa, mwa kwatelwa “ava va yeleka oshisilveri.”
14. Ekonakono laKalunga okukonakona ovo tave liti ovalongeli vaye otali ka kala la kwata moiti shi fike peni?
14 Jehova ota ka konakona ovo tave liti ovalongeli vaye fiyo openi? Exunganeko otali twikile tali ti: “Ndele mefimbo tuu olo Ame ohandi ka hadaahada Jerusalem neelamba, ndele handi ka kongolola ovalumenhu ava va pamekwa konhafi yavo, ava hava ti momitima davo: Omwene ita ningi nande ouwa ile owii. Noupuna wavo otave ke u nyekwa nomaumbo avo taa ka hanaunwa po. Nongenge tava diki omaumbo, vo itava ka kala muo. Nongenge tava twike oikokola yomiviinyu, vo itava ka nwa omaviinyu ayo.”—Sefanja 1:12, 13.
15. (a) Oshike kwa li tashi ka ningilwa ovapristeri ovashunimonima vomuJerusalem? (b) Oshike tashi ka ningilwa ovo tava longele omalongelokalunga oipupulu kunena?
15 Ovapristeri ovashunimonima vomuJerusalem okwa li va lumbakanifa elongelokalunga laJehova nomalongelokalunga oipupulu. Nande va li ve wete ve li meameno, Kalunga okwa li te ke va konga mo neelamba da twa odo tadi dulu okuminikila momulaulu wopamhepo omo va hondama. Kapa li nande umwe kwa li ta ka dula okuya onhapo eudifo nosho yo ewanifo letokolo laKalunga. Ovashunimonima ovo ve he na ko nasha ove liongela ngaashi onhafi koshi yomaviinyu. Kakwa li va hala okwiiwa moshipala keudifo lonhumba li na sha nokuya olunyala kwaKalunga moinima i na sha novanhu, ndele itava ka ya onhapo ewanifo letokolo laKalunga tali ke va hanga. Itapa ka kala yo ouhondameno kwaavo tava longele omalongelokalunga oipupulu kunena, mwa kwatelwa oilyo yOukwakriste nosho yo ovo va ninga ovashunimonima va dja melongelokalunga laJehova. Mokwaanya kutya aa oo ‘omafiku axuuninwa,’ momitima davo otava ti: “Omwene ita ningi nande ouwa ile owii.” Inava puka tuu!—2 Timoteus 3:1-5; 2 Petrus 3:3, 4, 10.
16. Oshike osho kwa li tashi ka ningwa shimha etokolo laKalunga la wanifilwa Juda, nongahelipi eshiivo lokushiiva oshinima osho li na oku tu nwefa mo?
16 Ovashunimonima vomuJuda okwa li va londwelwa kutya Ovababilon otava ka nyeka ko oupuna wavo, otava ka hanauna po omaumbo avo notava ka kufa po oiimati yomiviinyu davo. Oinima yopamaliko oya li i he na ongushu yasha eshi etokolo lopakalunga la wanifilwa Juda. Eshi otashi ka kala sha faafana eshi efiku laJehova letokolo tali ka hanga onghalelo yopaife yoinima. Onghee hano natu kaleni tu na etaleko lopamhepo nosho yo tu “liongeleleni omamona meulu” okupitila mokupitifa komesho oilonga yaJehova mokukalamwenyo kwetu.—Mateus 6:19-21, 33.
“Efiku linene lOmwene oli li popepi”
17. PaSefanja 1:14-16 efiku laJehova letokolo oli li popepi shi fike peni?
17 Efiku laJehova letokolo oli li popepi shi fike peni? PaSefanja 1:14-16, Kalunga okwa yandja eshilipaleko eli: “Efiku linene lOmwene oli li popepi! Heeno, popepi li li, ndee tali endelele okufika! Pwilikineni! Efiku lOmwene! Omuladi ota kuu unene. Efiku olo efiku loupyuhandu, efiku loluhepo noloudjuu, efiku lehanauno nolenyonauko, efiku lomilaulu noloshiwiwili, efiku loilemo nolomidimbi, efiku leshiko [lomanghuma nolonghuwo, OB-1954] okukuwila oilando ya pama, neehoteshungo dile domashakeneno.”
18. Omolwashike tu he na okuuya pexulifodiladilo kutya efiku laJehova letokolo oli li kokule?
18 Ovapristeri ovalunde vaJuda, omalenga noshiwana okwa li sha londwelwa kutya ‘efiku linene lOmwene ola li popepi.’ KuJuda ‘efiku lOmwene okwa li tali endelele okufika.’ Sha faafana mefimbo letu, inapa kala nande umwe ta diladila kutya etokolo laJehova okutokola ovakolokoshi otali ke uya monakwiiwa i li kokule. Ponhele yaasho, ngaashi Kalunga a katukile meendelelo shi na sha naJuda, osho ngoo ta ka ‘endelelifa’ efiku letokolo laye. (Ehololo 16:14, 16) Itali ka kala tuu efimbo lidjuu kwaaveshe ovo tave lipwililikile omalondwelo aJehova taa yandjwa kEendombwedi daye nosho yo ovo tava ka dopa okutambula ko elongelokalunga lashili!
19, 20. (a) Oinima imwe ilipi ya li ya kwatelwa mewanifo lokuwanifila Juda nosho yo Jerusalem ehandu laKalunga? (b) Moku shi talela mehanauno la talekeka nawa olo la taalela onghalelo ei yoinima, otashi pendula omapulo elipi?
19 Efiku lokuwanifila Juda osho yo Jerusalem ehandu laKalunga ola li ‘efiku loudjuu.’ Ovaponokeli Ovababilon ova hepeka neenghono ovakalimo vomuJuda, mwa kwatelwa oudjuu wopamaliudo eshi va taalela efyo osho yo ehanauno. ‘Efiku olo lehanauno nolenyonauko’ ola li efiku lomilaulu, loilemo noloshiwiwili, tashi dulika hapafaneko ashike ndele omonghedi yo yolelalela molwaashi omwifi nomadipao okwa li apeshe. Ola li “efiku leshiko lomanghuma nolonghuwo,” ndele omalondwelo oo a yandjwa inaa pwilikinwa.
20 Ovanangeli vaJerusalem kakwa li tava dulu okuninga sha eshi Ovababilon kwa li tava longifa oingumunifo mokumbonyauna po ‘eehoteshungo domashakeneno.’ Oupamene wonghalelo yoinima yopefimbo lopaife otau ka kala naanaa u he na ekwafo lasha okukondjifa oilwifo yomomalimba aKalunga omeulu, ya pyakudukwa okulongifwa diva mehanauno la talekeka nawa. Mbela ou na eteelelo lokwaamenwa? Mbela owa kufa tuu onghatu ya kola okwaama kuJehova oo ‘ha amene aveshe, ava ve mu hole, ndelenee ovadudu aveshe ote va kombo po’?—Epsalme 145:20.
21, 22. Ongahelipi Sefanja 1:17, 18 ta ka wanifwa mefimbo letu?
21 Kali fi tuu efiku linyanyalifa letokolo la xunganekwa kuSefanja 1:17, 18! Jehova Kalunga ota ti: “Novanhu ohandi ke va twala moudjuu unene, ndele otava ka elaaela ngaashi ovapofi, osheshi ova nyona kOmwene. Nohonde otai ka tilwashi ngaashi ondwi, [naashi] shomeni ngaashi onyata. Oshingoldo noshisilveri shavo itashi dulu oku va xupifa mefiku loupyuhandu wOmwene. Ndelenee omundilo wouladi waye otau ka lungwinifa po edu alishe. Osheshi ehanauno nexulilo lombadilila ote li undulile oonakukalamo aveshe kombada yedu.”
22 Ngaashi a ningile pefimbo laSefanja, Jehova ota ka eta diva oudjuu ‘koonakukala aveshe kombada yedu,’ ovo tava anye okupwilikina elondwelo laye. Molwaashi ova nyona kuKalunga, otava ka enda tava pungauka ngaashi ovapofi ve he na ekwafo lasha, noitava dulu okumona exupifo. Mefiku laJehova letokolo, ohonde yavo “otai ka tilwashi ngaashi ondwi,” ngaashi oshinima shi he na oshilonga. Exulilo lavo otali ke va etela elengwa linene, molwaashi Kalunga ota ka halakanifa omalutu ovakolokoshi—nokuli naashi shomeni—kombada yedu shi ka kale “ngaashi onyata.”
23. Ndele nande ovanyoni itava ka tupuka “mefiku loupyuhandu wOmwene,” mexunganeko laSefanja omu na eteelelo lashike?
23 Kape na oo ta dulu okuxupifa ovo tava lwifa Kalunga noshiwana shaye. Oshisilveri noshingoli kakwa li sha dula okuxupifa Ovajuda, nokuli ngaashi oupuna oo wa tuvikilwa nosho yo eembubo itadi ka eta eameno ile ouhondameno “mefiku loupyuhandu wOmwene” kombada yOukwakriste nosho yo koshixupe shonghalelo ei yoinima. Mefiku olo letokolo, ‘edu alishe otali ka lungwinifwa po’ komundilo wouladi waKalunga eshi ta hanauna po ovakolokoshi. Molwaashi otu na eitavelo meendjovo daKalunga dopaxunganeko, otu na oushili kutya paife otu li mokati “kefimbo lexulilo.” (Daniel 12:4) Efiku laJehova letokolo oli li popepi nota ka wanifila ovatondi vaye onghone yaye. Ndelenee mexunganeko laSefanja omu na eteelelo lexupifo. Ndelenee, hano otu na okuninga shike ngeenge otwa hala okuxupifwa mefiku lehandu laJehova?
1. Elondwelo lashike Kalunga a yandja okupitila muSefanja?
[Efano pepandja 4]
Sefanja okwa udifa nouladi kutya efiku laJehova letokolo ola li popepi
[Efano pepandja 4]
From the Self-Pronouncing Edition of the Holy Bible, containing the King James and the Revised versions
[Efano pepandja 5]
Efiku laJehova ola wila kombada yaJuda nosho yo Jerusalem okupitila momake Ovababilon mo 607 K.O.P.
[Efano pepandja 7]
Mbela owa teelela u ka amenwe eshi Jehova ta ka hanauna po ovakolokoshi?
[Efano pepandja 7]
Oto nyamukula ngahelipi?
• Ongahelipi exunganeko laSefanja la wanifilwa Juda nosho yo Jerusalem?
• Oshike tashi ka ningilwa Oukwakriste nosho yo ovakolokoshi aveshe vopefimbo letu?
• Omolwashike tu he na okudiladila kutya efiku laJehova letokolo otali ke uya monakwiiwa i li kokule?