Natu hopaeneneni ovaprofeti — Sefanja
1. Omonghedi ilipi Sefanja a li ta longo e li omuprofeti, nongahelipi e li oshihopaenenwa shiwa kufye kunena?
1 Osha li lwopokati kefelemudo etiheyali K.O.P., nelongelokalunga laBaal ola li le lihanena muJuda. Ohamba ikolokoshi Amon oya hangwa opo ya dipawa, nohamba inyasha Josia oyo ya li ye mu pingena po. (2 Omaf. 33:21–34:1) Pefimbo opo, Jehova okwa li a lombwela omuprofeti Sefanja a ka udife etumwalaka laYe li na sha netokolo. Nonande Sefanja okwa li oshilyo shomouhamba waJuda, ka li a tila okuudifa etumwalaka laJehova kovawiliki vaJuda. (Sef. 1:1; 3:1-4) Sha faafana, nafye ohatu kendabala okuhopaenena ouladi waSefanja mokuha efa ekwatafano letu novapambele li lidope mokulongela kwetu Jehova. (Mat. 10:34-37) Etumwalaka lilipi Sefanja a li a udifa, noidjemo oya li ya tya ngahelipi?
2. Eenghatu dilipi tu na okukatuka opo tu ka xupifwe mefiku lehandu laJehova?
2 Kongeni Jehova: Jehova oye ashike ta dulu okuxupifa oohandimwe mefiku lehandu laye. Onghee hano, Sefanja okwa li ta kumaida Ovajuda va konge Jehova, ouyuki nelininipiko omanga pe na efimbo. (Sef. 2:2, 3) Osha faafana yo nopefimbo letu. Ngaashi Sefanja, ohatu ladipike vamwe va konge Jehova, ashike nafye otu na okukatuka eenghatu nokukala twa tokola toko ‘tuha efe Omwene.’ (Sef. 1:6) Onghee hano, otu na okukonga Jehova mokukonakona Eendjovo daye noukeka nokwiilikana e tu wilike. Otu na okukonga ouyuki mokukala nonghalamwenyo ya koshoka paenghedi. Otu na yo okukonga elininipiko mokukulika oikala yokudulika nokutambula ko ewiliko olo hatu pewa kehangano laJehova.
3. Omolwashike tu na okukala netaleko liwa moukalele?
3 Oidjemo iwa: Etumwalaka letokolo laSefanja ola li la twa omukumo Ovajuda vamwe unene tuu ohamba inyasha Josia oyo ya li ya hovela okukonga Jehova eshi ya li okamatyona. Lwanima Josia okwa ka kwatela komesho oshikonga shinene shokuhanauna po oikalunga aishe moshilongo. (2 Omaf. 34:2-5) Kunena, nonande eembuto dimwe dOuhamba ohadi wile mondjila, momamanya ile meeshosholo, dimwe ohadi wile yo medu liwa nokwiimika oiimati. (Mat. 13:18-23) Otu na elineekelo kutya Jehova ota ka twikila okunangeka noupuna eenghendabala detu eshi hatu kala twe lipyakidila nokutandavelifa eembuto dOuhamba. — Eps. 126:6.
4. Omolwashike tu na okutwikila ‘okuteelela Jehova’?
4 Ovanhu vamwe muJuda ova li tava diladila kutya Jehova ke na efiku a katuke onghatu. Ashike, okwa li e va shilipaleka aveshe kutya efiku laye ola li li li popepi. (Sef. 1:12, 14) Ovo ve lineekela muJehova ovo ashike tava ka xupifwa. (Sef. 3:12, 17) Eshi hatu twikile ‘nokuteelela Jehova,’ ohatu dulu okumona ehafo mokulongela Kalunga ketu munene moukumwe pamwe novalongelikalunga vakwetu. — Sef. 3:8, 9.