Twikila okutula moilonga oinima oyo we lihonga
“Naai mwe i lilonga nomwe i tambula nomwe i uda nomwe i mona muame,
i ningeni, Kalunga kombili nota kala pamwe nanye.”—OVAFILIPPI 4:9.
“ENWEFEMO lelongelokalunga otali hapupala, ndelenee enwefemo lokukala neenghedi diwa otali ninipala.” Oshipalanyole osho shi li moshifokundaneki Emerging Trends osha ngonga oidjemo yekonakono lomoshiwana ashishe mOilongo yaHangana. Osha yela kutya oshilongo osho osha li sha mona ehapupalo lomuvalu wovanhu ovo hava i kongeleka notava ti kutya elongelokalunga oli na onhele ya fimana monghalamwenyo yavo. Ndelenee ehokololo otali ti: “Nonande ope na omuvalu oo tau kumwifa, Ovaamerika vahapu osha yela kutya ove na omalimbililo shi na sha nenwefemo leitavelo lelongelokalunga monghalamwenyo yovanhu nosho yo oulipamwe wovanhu aushe.”
1, 2. Monghedi yakwalukeshe, mbela Ombibeli otai nwefa mo tuu okukalamwenyo kwovanhu ovo tave litale ko kutya ove li ovalongelikalunga? Shi yelifa.
2 Onghalo oyo kai li ashike moshilongo shimwe. Mounyuni aushe, ovanhu vahapu ovo tava ti kutya ova tambula ko Ombibeli nosho yo kutya ove li ovalongelikalunga, itava efa Omishangwa di nwefe mo lela onghalamwenyo yavo. (2 Timoteus 3:5) Omukulunhu umwe wongudu yokukonga omauyelele okwa ti: “Ohatu fimaneke natango Ombibeli, ndelenee shi na sha nokulongifa efimbo oku i lesha, oku i konakona nosho yo oku i tula moilonga—osho oshinima shomefimbo la pita.”
3. (a) Ombibeli ohai nwefa mo ngahelipi ovo va ninga Ovakriste vashili? (b) Ongahelipi ovashikuli vaJesus hava tula moilonga omayele aPaulus oo a shangwa mOvafilippi 4:9?
3 Ndelenee shi na sha nOvakriste vashili, onghalo oya yooloka. Okutula moilonga omayele Eendjovo daKalunga okwa eta omalunduluko mokudiladila nosho yo melihumbato lavo. Nounhu mupe wavo ohau limonikila noupu kuvamwe. (Ovakolossi 3:5-10) Kovashikuli vaJesus, Ombibeli kai fi embo ihali longifwa olo hali kala la twima ondwi moshikopa. Mepingafano naasho, omuyapostoli Paulus okwa lombwela Ovakriste muFilippi ta ti: ‘Naai mwe i lilonga nomwe i tambula nomwe i uda nomwe i mona muame, i ningeni, Kalunga kombili nota ka kala pamwe nanye.’ (Ovafilippi 4:9) Ovakriste ohava ningi shihapu shi dulife ashike okutambula ko oshili yEendjovo daKalunga. Ohava katuka metwokumwe naasho ve lihonga, tava twikile okutula moilonga omayele Ombibeli—moukwaneumbo, koilonga, meongalo nosho yo moinima aishe ikwao yokukalamwenyo kwavo.
4. Omolwashike shi li eshongo okutula moilonga eemhango daKalunga?
4 Okutula eemhango nosho yo omafinamhango aKalunga moilonga kashi fi shipu. Otu li mounyuni oo u li mepangelo laSatana Ondiaboli, oo Ombibeli tai mu ifana ‘kalunga kounyuni ou.’ (2 Ovakorinto 4:4, OB-1954; 1 Johannes 5:19) Onghee hano, osha fimanenena tu livangeke keshe shimwe osho tashi dulu oku tu kelela tu lalakanene onghatu youdiinini muJehova Kalunga. Ongahelipi hatu dulu okukala ovakanyateli voudiinini?
Diinina “oshihopaelelwa sheendjovo odo diwa”
5. Jesus okwa li a hala okutya ngahelipi eshi a ti: ‘Kaleni nokushikula nge’?
5 Oshinima shimwe shi na sha nokutula moilonga osho twe lihonga osho okuyambidida noudiinini elongelokalunga lashili, nonande ope na omapataneko okudja kwaavo ve he na eitavelo. Elididimiko otali pula eenghendabala. Jesus okwa ti: “Ngenge ku na ou a hala okushikula nge, oye ne lixupule ye mwene, ne litwike [omuti waye womahepeko, ye na kale nokushikula nge, NW].” (Mateus 16:24) Jesus ina tya kutya otu na oku mu shikula ashike oule woshivike shimwe, womwedi umwe ile womudo umwe. Ponhele yaasho, okwa ti: ‘Kaleni nokushikula nge.’ Eendjovo daye otadi ulike kutya okukala kwetu tu li ovahongwa itaku dulu ashike okukala kwefimbo lixupi longhalamwenyo yetu ile eliyandjo lopakafimbo olo li li po nena ndele mongula kali po. Okudiinina noudiinini elongelokalunga lashili otashi ti kutya ohatu lididimike monghatu yetu oyo twa hoolola, kutya nee oshike tashi ningwa po. Mbela osho ohatu dulu oku shi ninga ngahelipi?
6. Oshihopaenenwa sheendjovo diwa osho Ovakriste vomefelemudo lotete ve lihonga kuPaulus oshilipi?
6 Paulus okwa ladipika omulongi pamwe naye Timoteus ta ti: “Diinina oshihopaelelwa sheendjovo odo diwa we di uda kuame meitavelo nomohole, oyo i li muKristus Jesus.” (2 Timoteus 1:13) Mbela Paulus okwa li a hala okutya shike? Oshitya shOshigreka sha tolokwa apa “oshihopaelelwa” otashi ulike lelalela kefano lomufaneki. Nonande kali na omauyelele aeshe, efano la tya ngaho oli na omifinda da twa nawa opo omutali omunaendunge a dule okuuda ko efano alishe. Sha faafana, oshihopaenenwa shoshili osho Paulus a honga Timoteus nosho yo vamwe kasha li sha longekidwa nelalakano lokuyandja enyamukulo lokondadalunde kepulo keshe tali dulu okuholoka po. Ndele omahongo oo okwa yandja ewiliko la wana—ngaashi ashike omifinda defano—opo ovanamitima diwa va dule okuuda ko osho Jehova te va pula. Doshili, opo va hafife Kalunga ova li va pumbwa okudiinina oshihopaenenwa shoshili mokutula moilonga osho ve lihonga.
7. Ongahelipi Ovakriste tava dulu okukanyatela koshihopaenenwa sheendjovo odo diwa?
7 Mefelemudo lotete, oohandimwe va tya ngaho ngaashi Himeneus, Aleksander nosho yo Filetus ova li va xwaxwameka omadiladilo oo kwa li itaa tu kumwe ‘noshihopaelelwa sheendjovo odo diwa.’ (1 Timoteus 1:18-20; 2 Timoteus 2:16, 17) Ongahelipi Ovakriste vonale va li tava dulu okuhenuka okutwalwaatwalwa kovashunimonima? Omokukonakona noukeka omishangwa da nwefwa mo nosho yo oku di tula moilonga monghalamwenyo yavo. Ovo va enda metwokumwe noshihopaenenwa shaPaulus nosho yo shovadiinini vali vamwe ova li va dula okukoneka nosho yo okweekelashi keshe shimwe osho inashi twa kumwe noshihopaenenwa shoshili osho va li va hongwa. (Ovafilippi 3:17; Ovaheberi 5:14) Ponhele yokukala “[tava] yenwa komapulaapulo eemhata nokomatomhafano,” ova twikila okuya komesho monghatu yavo i li mondjila yeliyandjo lometilokalunga. (1 Timoteus 6:3-6) Ohatu ningi sha faafana ngeenge hatu twikile okutula moilonga oshili oyo twe lihonga. Itashi pameke tuu eitavelo okumona kutya omamiliyona ovanhu oo taa longele Jehova mounyuni aushe otaa diinine oshihopaenenwa shoshili yOmbibeli osho va hongwa!—1 Ovatessaloniki 1:2-5.
Ekelashi “omahokololo oipupulu”
8. (a) Ongahelipi Satana ta kendabala okuteya po eitavelo letu kunena? (b) Elondwelo laPaulus lilipi hatu hange mu 2 Timoteus 4:3, 4?
8 Satana ota kendabala okuteya po oudiinini wetu okupitila mokukuna omalimbililo kombinga yaasho twa hongwa. Kunena, ngaashi mefelemudo lotete, ovashunimonima nosho yo vamwe otava kendabala okuhanauna po eitavelo laavo ve he na ondjo. (Ovagalati 2:4; 5:7, 8) Omafimbo amwe ohava longifa oikundaneki okutandavelifa omauyelele a pilakanifwa ile nokuli oipupulu filufilu shi na sha nomikalo nomalinyengotomheno oshiwana shaJehova. Paulus okwa londwela kutya vamwe otava ka fiya po oshili. Okwa shanga ta ti: “Otape uya efimbo vo tava kenyanana elongo la yuka, ndelenee opauhalu wavo otave ke likongela ovalongi ngaashi omatwi avo taa nyuwa. Nomatwi avo otave a pilike koshili, ndee tava pwilikine [komahokololo oipupulu, NW].”—2 Timoteus 4:3, 4.
9. Otashi dulika Paulus okwa li e na shike momadiladilo eshi a popya shi na “nomahokololo oipupulu”?
9 Ponhele yokushikula oshihopaenenwa sheendjovo odo diwa, vamwe ova li ve na ohokwe ‘momahokololo oipupulu.’ Mbela omahokololo oipupulu oo okwa li shike? Otashi dulika Paulus kwa li ta diladila keengano odo di he na oshili nandenande, ngaashi odo tadi hangika membo loapokrifa laTobit.a Omahokololo oipupulu otashi dulika a kwatela mo yo omapopyo taa mbeleke notaa tunhula. Natango, ‘pauhalu wavo’ vamwe otashi dulika va li va pukifwa nomakoto kwaavo va yambidida etaleko lokuhenakonasha nomifikamhango daKalunga ile ovo va li ovakembauli vaavo tava kwatele komesho meongalo. (3 Johannes 9, 10; Judas 4) Kutya nee opa li oinima oikwashike oyo tai pundukifa, osha yela kutya vamwe ova li va hokwa oipupulu komesho yoshili yEendjovo daKalunga. Diva ova efa okutula moilonga oinima oyo va li ve lihonga, naashi osha yahameka oupamhepo wavo.—2 Petrus 3:15, 16.
10. Omahokololo amwe oipupulu okunena oelipi, nongahelipi Johannes a divilika kutya osha pumbiwa okukala twa angala?
10 Ohatu dulu okuhenuka okunanwa komahokololo oipupulu kunena ngeenge ohatu konakona nokuhoolola nawa shi na sha naasho hatu pwilikine nosho yo osho hatu lesha. Pashihopaenenwa, oikundaneki luhapu ohai xumifa komesho oluhaelo. Ovanhu vahapu otava ladipike eitavelo kutya Kalunga ita dulu okushiivika ile kutya Kalunga ke ko nandenande. Ovapataneki otava sheke Ombibeli kutya otai liti oya nwefwa mo kuKalunga. Nosho yo ovashunimonima kunena otava kendabala okukuna eembuto domalimbililo opo va dule okunyona po eitavelo lOvakriste. Shi na sha noshiponga sha faafana osho sha li sha etwa po kovaprofeti ovanaipupulu mefelemudo lotete, omuyapostoli Johannes okwa londwela ta ti: “Ovaholike, inamu itavela keshe omhepo, ndelenee yelekeni eemhepo, ngenge oda dja tuu muKalunga; osheshi ovaprofeti ovanaipupulu vahapu va ya mounyuni.” (1 Johannes 4:1) Onghee hano otwa pumbwa okukala twa lungama.
11. Onghedi imwe ilipi omo hatu dulu okuliyeleka nokutala ngeenge otu li tuu meitavelo?
11 Moshinima eshi, Paulus okwa shanga ta ti: ‘Twikileni okuliyeleka ngeenge omu li meitavelo.’ (2 Ovakorinto 13:5, yelekanifa NW.) Omuyapostoli okwe tu ladipika tu twikile okuliyeleka fye vene tu shilipaleke ngeenge otwa kanyatela tuu komahongo aeshe opaKriste. Ngeenge omatwi etu oku na eamo lokupwilikina kovangongoti, otwa pumbwa okulikonakona fye vene pamwe neilikano. (Epsalme 139:23, 24) Mbela otu na eamo lokukonga omapuko moshiwana shaJehova? Ngeenge osho ngaho, omolwashike mbela? Mbela otwa li twa yahamekwa kokupopya ile kokukatuka kwavamwe? Ngeenge osho ngaho, mbela ohatu tale ko oinima monghedi ya yuka? Oudjuu keshe hatu shakeneke monghalelo ei yoinima owopokafimbo ashike. (2 Ovakorinto 4:17) Nokuli nongeenge hatu shakeneke omayeleko onhumba meongalo, mbela omolwashike tu na okweefa okulongela Kalunga? Ngeenge otwa handuka omolwoshinima shonhumba, mbela kashi li nawa okuninga ngaashi hatu dulu opo tu shi kandule po nopo nee hatu shi efele momake aJehova?—Epsalme 4:5; Omayeletumbulo 3:5, 6; Ovaefeso 4:26.
12. Ongahelipi Ovaberea ve tu tulila po oshihopaenenwa shiwa?
12 Ponhele yokukala ovakembauli, natu diinine etaleko lopamhepo liwa shi na sha nomauyelele oo hatu mono okupitila mekonakono lopaumwene nosho yo pokwoongala kweongalo. (1 Ovakorinto 2:14, 15) Noponhele yokukala nomalimbililo shi na sha nEendjovo daKalunga, kashi li tuu pandunge unene okukala noikala ngaashi oyo yOvaberea vomefelemudo lotete ovo va konakona Omishangwa noukeka! (Oilonga 17:10, 11) Onghee hano, natu katuke metwokumwe naasho twe lihonga, tu ekeleshi omahokololo oipupulu nokukanyatela koshili.
13. Ongahelipi hatu dulu okutandaveleka omahokololo oipupulu inatu shi shiiva?
13 Ope na natango oludi limwe lomahokololo oipupulu olo twa pumbwa okukala twa lungamena. Omahokololo mahapu taa tunhula luhapu ohaa tandavele okupitila meembapila odo hadi li shangelwa neekompiuta, hadi ifanwa mOshiingilisha E-mail. Oshi li pandunge okukala twa lungama shi na sha nomahokololo oo, unene tuu ngeenge katu shii odjo yomauyelele ao. Nokuli nonande oshimoniwa ile ehokololo lonhumba ola li la tumwa kOmukriste e shii okulineekelwa, omunhu oo otashi dulika a kale e he na omauyelele a wana po. Hano omolwaasho sha fimana okukala twa lungama shi na sha nokweendulula ile okutumina vamwe omahokololo u he na oushili wao. Inatu hala nande okweendulula “eengano itadi popi Kalunga” ile “omahokololo oipupulu oo taa nyono po osho shiyapuki.” (1 Timoteus 4:7, NW; OB-1986) Molwaashi otu na yo oshinakuwanifwa shokupopya oshili nakeshe umwe, ohatu katuka neendunge mokuhenuka keshe osho tashi dulu oku tu ningifa tu tandaveleke oipupulu inashi teelelwa.—Ovaefeso 4:25.
Oidjemo iwa omolwokutula oshili moilonga
14. Omauwa elipi taa di mokutula moilonga oinima oyo twe lihonga mEendjovo daKalunga?
14 Okutula moilonga osho hatu lihongo okupitila mekonakono lOmbibeli lopaumwene nosho yo mokwoongala kwopaKriste otashi eta omauwa mahapu. Pashihopaenenwa, otashi dulika hatu ka mona kutya ekwatafano letu naavo ve tu pamba meitavelo otali xwepopala. (Ovagalati 6:10) Oikala yetu otai ka lunduluka i kale i li nawa ngeenge ohatu tula moilonga omafinamhango Ombibeli. (Epsalme 19:9) Kakele kaasho, mokutula moilonga osho hatu lihongo, ohatu ‘wapaleke ehongo laKalunga’ notashi dulika hatu ka nanena vamwe kelongelokalunga lashili.—Titus 2:6-10.
15. (a) Ongahelipi omunyasha umwe a li nouladi okuyandja oundombwedi kofikola? (b) Owe lihonga mo shike moshimoniwa osho?
15 Mokati kEendombwedi daJehova omu na ovanyasha vahapu ovo tava tula moilonga osho ve lihonga okupitila mekonakono lOmbibeli lopaumwene nomoileshomwa yopaKriste nosho yo mokukala pokwoongala kweongalo nope he na okufaula. Elihumbato lavo liwa oli li oundombwedi u na eenghono kovahongi nosho yo kovalihongi vakwao kofikola. (1 Petrus 2:12) Diladila kuLeslie, okakadona komido 13 mOilongo yaHangana. Okwa dimina kutya okwa li ha mono shidjuu okupopya novanafikola vakwao kombinga yeitavelo laye, ndelenee efiku limwe osho osha lunduluka. “Ongudu oya popya kombinga yanghee ovanhu hava kendabala oku ku landifa oinima. Okakadona kamwe oka ulika eke lako noka tumbula Eendombwedi daJehova.” E li Ondombwedi, mbela Leslie okwe linyenga ngahelipi? Okwa ti: “Onda popila eitavelo lange, osho ndi shii kutya osha kumwifa keshe umwe, molwaashi luhapu ohandi kala nda mwena unene mofikola.” Oshidjemo shouladi waLeslie osha li shike? Leslie okwa ti: “Onda li nda dula okuyandja okabroshure nosho yo okafo komunafikola oo, molwaashi okwa li e na omapulo amwe.” Jehova iha kala tuu a hafa ngeenge ovanyasha ovo tava tula moilonga osho ve lihonga tava kala nouladi okuyandja oundombwedi kofikola!—Omayeletumbulo 27:11; Ovaheberi 6:10.
16. Ongahelipi Ofikola yOukalele woPauteokratika ya yandja omauwa kOndombwedi imwe inyasha?
16 Oshihopaenenwa vali shimwe oshi na sha naElizabeth. Okutameka pomido heyali fiyo omido daye adishe mofikola yopedu, okakadona okanyasha aka oka kala nokushiva ovahongi vako kOlupale lOuhamba ngeenge ke na oshipopiwa mOfikola yOukalele woPauteokratika. Ngeenge omuhongi ka li ta dulu okuuya, Elizabeth oha fyaala kofikola eshi ya dimbuka nokuyandja oshipopiwa komuhongi. Modula yaye yaxuuninwa mofikola yopombada, Elizabeth okwa shanga ehokololo lomapandja omulongo shi na sha nomauwa oo a mona mOfikola yOukalele woPauteokratika nokwa yandja ehokololo li na sha nomauwa oo komesho yovahongi vane. Okwa li yo a pulwa a yandje oshihopaenenwa shoshipopiwa shOfikola yOukalele woPauteokratika, nomolwaasho okwa hoolola oshipalanyole “Omolwashike Kalunga a efa oukolokoshi u kale po?” Elizabeth okwa mona ouwa moprograma yehongo oyo hai ningwa kEendombwedi daJehova mOfikola yOukalele woPauteokratika. Oku li umwe womovanyasha vahapu Ovakriste ovo tava tumbalekifa Jehova mokutula moilonga oinima oyo ve lihonga mEendjovo daye.
17, 18. (a) Ombibeli otai yandje omayele elipi e na sha nouyuki? (b) Ongahelipi omulumenhu umwe kwa li a kumwa kelihumbato li li pauyuki lOndombwedi yaJehova imwe?
17 Ombibeli otai kumaida Ovakriste ve lihumbate pauyuki moinima aishe. (Ovaheberi 13:18) Okuhenouyuki otaku dulu okunyona po ekwatafano letu navamwe naasho sha fimana unene onaJehova mwene. (Omayeletumbulo 12:22) Elihumbato letu li shii okulineekelwa otali yandje oumbangi kutya ohatu tula moilonga oinima oyo twe lihonga nosha ningifa vamwe va kale ve na efimaneko linene lokufimaneka Eendombwedi daJehova.
18 Konakona oshimoniwa shomukwaita wedina Phillip. Okwa li a kanifa otyeke ya shainwa noya li inai shangwa sha, noka li e shi shiiva fiyo ya alulilwa kuye mopoosha. Otyeke oya li ya toolwa kuumwe womEendombwedi daJehova, nokwa li kwa tulwa okambapila kuyo taka ti kutya omahongo elongelokalunga lanaku i toola oo e mu linyengifa e i mu tumine. Phillip okwa li a kumwa. Okwa ti: “Okwa li tava dulu okuvaka nge $9 000 [daAmerika]!” Okwa li a nyematekwa oshikando shimwe eshi embale laye la li la vakelwa mongeleka. Doshili, omunhu oo e mu shii okwa kufa po embale laye, ofimbo omunhu oo e he mu shii a alula otyeke oyo i na ongushu yeedola omayovi! Heeno, Ovakriste ovanashili otava fimanekifa Jehova Kalunga!
Twikila okutula moilonga osho we lihonga
19, 20. Ongahelipi hatu mono ouwa mokukatuka metwokumwe noinima yopamishangwa oyo hatu lihongo?
19 Ovo tava tula moilonga osho ve lihonga okudja mEendjovo daKalunga otava teya omauwa mahapu. Omuhongwa Jakob okwa shanga ta ti: “Ou ta tale nokukonakona momhango ei ya wana yemanguluko ndee ta kala mo, ye e he fi omupwilikini ha dimbwa, ndelenee omuwanifi shili, oye ta kala omunelao mokulonga kwaye.” (Jakob 1:25) Heeno, ngeenge ohatu katuka metwokumwe noinima yopamishangwa oyo twe lihonga, ohatu ka kala tu na elao lashili nohatu ka dula okupondola omafininiko omonghalamwenyo. Komesho yaaishe, ohatu ka mona omanangeko noupuna aJehova nosho yo etimaumbwile lomwenyo waalushe.—Omayeletumbulo 10:22; 1 Timoteus 6:6.
20 Onghee hano, twikila okukonakona Eendjovo daKalunga. Ongala pamwe novalongeli vaJehova nope he na okufaula nosho yo yandja elitulemo komauyelele oo taa yandjwa pokwoongala kwopaKriste. Tula moilonga osho we lihonga, twikila oku shi longifa opo nee ‘Kalunga kombili ota ka kala pamwe naave.’—Ovafilippi 4:9.
[Omashangelo opedu]
a Tobit, olo tashi dulika la shangwa mefelemudo etitatu K.O.P., omwa kwatelwa omahepaululo oidila Omujuda wedina Tobias. Okwa popiwa kutya okwa li e na ounghulungu wokuvelula nosho yo eenghono dokuta mo eendemoni mokulongifa omutima, onyango nosho yo exuli loshi inene.
[Efano pepandja 15]
Ongahelipi Ovakriste vonale va li tava dulu okuhenuka okutwalwaatwalwa koushunimonima?
[Efano pepandja 16]
Eembuto domalimbililo otadi dulu okukunwa okupitila moikundaneki, moInternet nosho yo kovashunimonima vonena
[Efano pepandja 17]
Kashi li pandunge okutandaveleka omahokololo u he na oushili wao
[Efano pepandja 18]
Eendombwedi daJehova ohadi tula moilonga osho da lesha mEendjovo daKalunga koilonga, kofikola nosho yo keshe pamwe
[Efano pepandja 18]
Oto dimbuluka?
• “Oshihopaelelwa sheendjovo odo diwa” oshike, nongahelipi hatu dulu oku shi diinina?
• “Omahokololo oipupulu” elipi twa pumbwa okweekelashi?
• Omauwa elipi taa monika kwaavo tava tula moilonga oinima oyo tave lihongo mEendjovo daKalunga?