Kulika eduliko eshi exulilo tali ehene popepi

‘Oiwana otai ka dulika kuSilo.’—GENESIS 49:10, yelekanifa NW.

OKUDULIKA kuJehova luhapu okwa kala kwa kwatela mo okudulika kovakalelipo vaye. Ovakalelipo ova kala nokukwatela mo ovaengeli, ootatekulululwa, ovatokolipangeli, ovapristeri, ovaprofeti nosho yo eehamba. Olukalwapangelo leehamba daIsrael okwa li hali ifanwa nokuli olukalwapangelo laJehova. (1 Omafimbo 29:23) Ndele nande ongaho, oshinyikifa oluhodi kutya ovapangeli vaIsrael vahapu inava dulika kuKalunga nokungaha ove lietela omupya vo vene nosho yo ovapangelwa vavo. Ndelenee Jehova ina efa ovadiinini vaye va kale ve he na eteelelo; okwe va hekeleka neudaneko lokutula po Ohamba oyo i he na enyonauko, oyo ovayuki tava ka hokwa okudulika kuyo. (Jesaja 9:5, 6) Tatekulululwa Jakob eshi a li e li pokufya okwa xunganeka shi na sha nomupangeli oo womonakwiiwa, ta ti: “Epangelodibo itali ka kufwa muJuda nodibo youhamba itai di po peemhadi daye fiyo [Silo, NW] ou e nokuuya te uya. Noiwana tai ka dulika kuye.”—Genesis 49:10.

2. “Silo” osha hala okutya shike, nokupangela kwaye otaku ka kwatela mo shike?

² “Silo” oshitya shOshiheberi tashi ti “Oo shi li shaye.” Heeno, Silo ota ka fyuulula pauyadi oufemba waye wokupangela ngaashi tashi fanekwa kodibo youhamba nosho yo eenghonopangelo ngaashi tashi fanekwa kepangelodibo. Kakele kaasho, epangelo laye lopauhamba itali ka kwatela mo ashike oludalo laJakob ndelenee ‘oiwana’ aishe. Eshi oshi li metwokumwe neudaneko laJehova kuAbraham, olo tali ti: “[Oludalo] loye tali ka nangala oivelo yovanaita nalo. Noiwana aishe kombada yedu tai ka nangekwa noupuna moludalo loye.” (Genesis 22:17, 18) Jehova okwa shilipaleka kutya ‘oludalo’ olo olyelye mo 29 O.P. eshi a vaeka Jesus Omunasaret nomhepo iyapuki.—Lukas 3:21-23, 34; Ovagalati 3:16.

Ouhamba waJesus wotete

3. Epangelo lilipi Jesus a pewa eshi a londa meulu?

³ Eshi Jesus a londa meulu, ina pewa divadiva odibo youhamba okupangela oiwana aishe yomounyuni. (Epsalme 110:1) Ndele nande ongaho, okwa pewa ‘ouhamba’ novapangelwa ovo kwa li tava dulika kuye. Omuyapostoli Paulus okwa yelifa shi na sha nouhamba oo eshi a shanga ta ti: ‘Kalunga e tu xupifa mo [Ovakriste ovavaekwa nomhepo] mepangelo lomulaulu nokwe tu tembulila mouhamba wOmona waye omuholike.’ (Ovakolossi 1:13) Exupifo olo ola hovela pOpentekoste 33 O.P. eshi omhepo iyapuki ya tililwa kombada yovashikuli vaJesus ovadiinini.—Oilonga 2:1-4; 1 Petrus 2:9.

4. Omeenghedi dilipi ovahongwa vaJesus votete va ulika okudulika kwavo, nongahelipi Jesus e va ifana ve li ongudu?

⁴ Ve li ‘ovatumwa ponhele yaKristus,’ ovahongwa ovo va vaekwa nomhepo ova dulika eshi va hovela okwoongela vamwe ovo kwa li tava ka ninga ‘vakwao’ mouhamba oo wopamhepo. (2 Ovakorinto 5:20; Ovaefeso 2:19; Oilonga 1:8) Kakele kaasho, vo okwa li ve na okukala hava “udafana meendunge dimwe nomokudiladila shimwe,” opo va dule okuhafela okuhokiwa kOhamba yavo Jesus Kristus. (1 Ovakorinto 1:10) Ve li ongudu, ova li va fikama po ve li “omupiya omudiinini nomunaendunge” ile elenga leumbo lidiinini.—Mateus 24:45; Lukas 12:42, OB-1954.

Va nangekwa noupuna molwokudulika ‘kelenga’ laKalunga

5. Okudja komafimbo onale, ongahelipi Jehova a honga oshiwana shaye?

⁵ Jehova okwa kala alushe nokufya oshisho opo pa kale ovahongi vokuhonga oshiwana shaye. Pashihopaenenwa, konima eshi Ovajuda va aluka okudja muBabilon, Esra nosho yo ovalumenhu vamwe ovo kwa li ovanekeka inava leshela ashike ovanhu Omhango yaKalunga ndele ove i “fatulula” yo opo ovanhu va kale ‘ve udite ko’ Eendjovo daKalunga.—Nehemia 8:8.

6, 7. Ongahelipi ongudu yomupiya okupitila mOlutuwiliki layo ya yandja eendja dopamhepo pefimbo, nomolwashike okuliyandja kongudu yomupiya shi li sha wapala?

⁶ Mefelemido lotete, eshi omhata i na sha nokupita etanda ya holoka mo 49 O.P., olutuwiliki longudu yotete yomupiya oya konakona oshinima osho noku shi ilikanena noye uya pexulifodiladilo lopamishangwa. Eshi ya shiivifa etokolo layo okupitila monhumwafo, omaongalo okwa dulika kewiliko olo la yandjwa nokwa hafela enangeko noupuna linene laKalunga. (Oilonga 15:6-15, 22-29; 16:4, 5) Sha faafana nokunena, ongudu yomupiya omudiinini okupitila mOlutuwiliki layo oya yelifa nawa oinima ya fimana ngaashi okuhenombinga kwopaKriste, ouyapuki wohonde nosho yo elongifo loingangamifi nomakaya. (Jesaja 2:4; Oilonga 21:25; 2 Ovakorinto 7:1) Jehova okwa nangeka noupuna oshiwana shaye omolwokudulika kwasho kEendjovo daye nosho yo komupiya omudiinini.

⁷ Mokuliyandja komupiya omudiinini, oshiwana shaKalunga otashi ulike kutya otashi dulika kOmwene, Jesus Kristus. Okudulika kwa tya ngaho oku na eityo la wedwa po kunena omolwaashi eenghonopangelo daJesus oda wedelwa ngaashi sha xunganekwa kuJakob eshi a li momutala e li pokufya.

Silo ta ningi omupangeli oo e na oufemba okupangela edu

8. Ongahelipi nonaini eenghonopangelo daKristus da wedelwa?

⁸ Exunganeko laJakob ola xunganeka kutya ‘oiwana otai ka dulika’ kuSilo. Osha yela kutya okupangela kwaKristus otaku ka kwatela mo shihapu shi he fi ashike Israel shopamhepo. Mbela otaku ka kwatela mo shike? Ehololo 11:15 otali nyamukula tali ti: ‘Ouhamba wounyuni ou wa ninga wOmwene wetu naKristus waye, ndele ta ka pangela alushe fiyo alushe.’ Ombibeli otai ulike kutya Jesus okwa pewa eenghonopangelo odo pexulilo ‘lomafimbo a-7’ opaxunganeko—“omaufwafimbo oiwana”—mo 1914.a (Daniel 4:16, 17; Lukas 21:24, NW) Momudo oo, “okukala po” ihaku monika kwaKristus e li Ohamba yopaMessias nosho yo ‘okupangela kwaye mokati kovatondi vaye’ okwa hovela.—Mateus 24:3, NW; Epsalme 110:2.

9. Jesus okwa ninga po shike eshi a tambula ko Ouhamba waye, naashi osha kuma ngahelipi ovanhu, unene tuu ovahongwa vaye?

⁹ Oshilonga shaJesus shotete konima eshi a mona eenghono dopauhamba osho okweekela ‘kedu’ ou a shiivika lela omolwokuhadulika kwaye—Satana—nosho yo eendemoni daye. Okudja opo, kakele kokuxwaxwameka omhepo yomomudingonoko oyo tai shi ningi shi li eshongo okudulika kuJehova, eemhepo dowii odo oda etifa okumona oixuna kwovanhu kwa pitilila inashi monika nande onale. (Ehololo 12:7-12; 2 Timoteus 3:1-5) Doshili, moita yaye yopamhepo Satana ota lalakanene okuhanauna po ovavaekwa vaJehova, “ava hava diinine oipango yaKalunga ndee ve na ehepaululo laJesus,” nosho yo ookaume kavo “eedi dimwe.”—Ehololo 12:17; Johannes 10:16, OB-1954.

10. Ewanifo lomaxunganeko Ombibeli elipi taa shilipaleke okudopa kwaSatana moita yaye yokulwifa Ovakriste vashili?

¹⁰ Ndelenee Satana ota ka dopa, molwaashi eli olo ‘efiku lOmwene,’ nokape na sha shimwe osho tashi dulu okwiimba Jesus “a ka findane.” (Ehololo 1:10; 6:2) Pashihopaenenwa, Jesus ota ka shilipaleka okudidilikwa kwaxuuninwa kwOvaisrael vopamhepo 144 000. Ota ka amena yo ‘ongudu inene ya nyengana okuvalwa yomoiwana aishe nomomaludi aeshe nomovanhu aveshe nomomalaka aeshe.’ (Ehololo 7:1-4, 9, 14-16) Ndele mekondjifafano nookaume kavo ovavaekwa, ongudu inene otai ka ninga ovapangelwa vaJesus ovaduliki kombada yedu. (Daniel 7:13, 14) Okukala po kwavo kombada yedu kunena oku li oumbangi wa kola kutya Silo oku li shili Omupangeli kombada ‘youhamba wounyuni.’—Ehololo 11:15.

Eli olo efimbo ‘lokudulika kevangeli’

11, 12. (a) Oolyelye ashike tava ka xupa pexulilo longhalelo yoinima yopaife? (b) Omaukwatya elipi a imikwa kwaavo va nwefwa mo ‘komhepo younyuni’?

¹¹ Aveshe ovo va hala omwenyo waalushe ove na okulihonga okudulika, molwaashi Ombibeli oye shi popya sha yela kutya “ava inava shiiva Kalunga noitava dulika kevangeli lOmwene wetu Jesus” itava ka xupa mefiku laKalunga longhone. (2 Ovatessaloniki 1:8) Ndelenee omudingonoko oo wopaife woukolokoshi nosho yo omhepo yao younashibofa shi na sha neemhango nomafinamhango Ombibeli otau ningi okudulika kevangeli ku li eshongo.

¹² Ombibeli otai hepaulula omhepo oyo younashibofa shi na sha naKalunga kutya oi li “omhepo younyuni.” (1 Ovakorinto 2:12) Mokuyelifa shi na sha nenwefemo layo movanhu, omuyapostoli Paulus okwa shangela Ovakriste vomefelemido lotete vomuEfeso ta ti: “Mwa endaaenda nale panghedi yefimbo lounyuni eli noyomupangeli weenghonopangelo domomhepo nokutya, pamhepo yomupangeli ou ta longo paife movana vokuhadulika, mokati kavo nafye yo atushe twa endaaenda nale, omolwisho lombelela yetu twa shikula ouhalu wombelela noweendunge ndele twa li ovana vehandu paushitwe wetu nongaashi vamwe yo.”—Ovaefeso 2:2, 3.

13. Ongahelipi Ovakriste tava dulu okukondjifa omhepo younyuni nomupondo, noidjemo iwa otai ka kala shike?

¹³ Lao linene, Ovakriste vomuEfeso inava kala alushe va pikwa komhepo oyo yokuhadulika. Ponhele yaasho, ova ninga ovana vaKalunga ovaduliki mokuliyandja komhepo yaye nokuteya oiimati yayo ihapu noiwa elela. (Ovagalati 5:22) Sha faafana nokunena, omhepo yaKalunga—eenghono odo da shiya ko meshito alishe—otai kwafele omamiliyona a dulike kuJehova, noshidjemo osho kutya otava dulu okukala “neteelelo la pama fiyo okexulilo.”—Ovaheberi 6:11; Sakaria 4:6.

14. Ongahelipi Jesus a londwela Ovakriste aveshe ovo ve li momafiku axuuninwa shi na sha noinima yokondadalunde oyo tai ka yeleka okudulika kwavo?

¹⁴ Kaleka yo momadiladilo kutya fye otu na eameno laSilo la denga mbada, oo pamwe naXe itava ka efa omutondi nande oumwe—kutya nee ondemoni ile omunhu—a yeleke okudulika kwetu shi dulife peenghono detu. (1 Ovakorinto 10:13) Doshili, oku tu kwafela moita yetu yopamhepo, Jesus okwa hepaulula omaupyakadi okondadalunde e lili noku lili oo hatu ka shakeneka momafiku aa axuuninwa. Okwe shi ninga okupitila meenhumwafo heyali odo a yandja komuyapostoli Johannes memoniko. (Ehololo 1:10, 11) Doshili, eenhumwafo odo okwa li di na omapukululo a fimanenena e na sha nOvakriste vopefimbo linya, ndelenee etulomoilonga lado linene ola yukifwa ‘kefiku lOmwene,’ okudja mo 1914. Onghee hano, inashi wapala tuu kufye okuyandja elitulemo komatumwalaka ado!b

Henuka okuhenakonasha, oluhaelo nosho yo ohole yokuhola omaliko

15. Omolwashike tu na okulungamena oupyakadi oo wa kuma eongalo lomuEfeso, nongahelipi hatu dulu oku shi ninga? (2 Petrus 1:5-8)

¹⁵ Onhumwafo yaJesus yotete oya shangelwa eongalo lomuEfeso. Konima eshi a pandula eongalo omolwelididimiko lalo, Jesus okwa ti: “Ndelenee ondi na sha naave, eshi wa efa ohole yoye yotete.” (Ehololo 2:1-4) Kunena, vamwe ovo kwa li ve li Ovakriste ovaladi ova kanifa yo ohole ya xwama oyo kwa li ve hole nayo Kalunga. Okutalala mohole kwa tya ngaho otaku dulu okunghundipaleka ekwatafano olo omunhu e na naKalunga, nonghee hano ope na okuningwa sha meendelelo shi na sha naasho. Ongahelipi ohole ya tya ngaho tai dulu okumwenyopalekwa vali? Omokukonakona Ombibeli nope he na okufaula, okukala pokwoongala alushe, okwiilikana nosho yo okudilonga alushe. (1 Johannes 5:3) Doshili, eshi otashi pula ‘eenghono adishe’ oku shi ninga, ndelenee oshi na shili oshilonga. (2 Petrus 1:5-8) Ngeenge okulikonakona mwene ku li paushili otaku ulike kutya ohole yoye oya talala, pukulula onghalo divadiva mokudulika kekumaido laJesus, tali ti: “Dimbulukwa hano oko wa wa ko, u lidilulule, ove u longe oilonga yoye yotete.”—Ehololo 2:5.

16. Enwefemo la nyika oshiponga pamhepo lilipi la li po meongalo laPergamo nolaTiatira, nomolwashike eendjovo daJesus odo e va lombwela da wapalela kunena?

¹⁶ Ovakriste vomuPergamo novomuTiatira okwa li va pandulwa omolwoudiinini, elididimiko nosho yo ouladi wavo. (Ehololo 2:12, 13, 18, 19) Ndele nande ongaho, okwa li va nwefwa mo kuvamwe ovo va li tava ulike omhepo youkolokoshi yaBileam naIsabel, ovo okupitila moluhaelo nosho yo melongelokalunga laBaal va li enwefemo lii muIsrael shonale. (Numeri 31:16; 1 Eehamba 16:30, 31; Ehololo 2:14, 16, 20-23) Ndelenee ongahelipi pefimbo letu—“mefiku lOmwene”? Mbela omanwefemo mai a faafana oko e li kunena? Heeno, omolwaashi oluhaelo olo unene li li oshinima osho sha kondifa mo vahapu moshiwana shaKalunga. Onghee hano, inashi fimana tuu okuhenuka eendafano noohandimwe aveshe ovo ve na enwefemo lopaenghedi lii, kutya nee omeongalo ile okondje yalo! (1 Ovakorinto 5:9-11; 15:33) Ovo va hala okukala ovapangelwa vaSilo ovaduliki ove na okuhenuka omalihafifo taa limbililike nosho yo omafano oipala omomambo nosho yo koInternet.—Amos 5:15; Mateus 5:28, 29.

17. Ongahelipi etaleko nosho yo oikala yaavo va li muSarde nosho yo muLaodikea tai kondjifafana netaleko laJesus li na sha nonghalo youpamhepo wavo?

¹⁷ Kakele ashike koohandimwe vamwe po vanini, eongalo laSarde inali pewa olupandu nande. Okwa li li “nedina” ile eholokepo la fa li na omwenyo, ndelenee okuhenakonasha noinima yopamhepo okwa kwata ko eongalo nomolwaasho Jesus okwa ti ola “fya.” Okudulika konghundana iwa okwa li ashike oilonga yongaho. Kala li tuu ehanyeno la kwata moiti! (Ehololo 3:1-3) Eongalo laLaodikea ola li monghalo ya faafana. Ole litadela oupuna wopainiwe tali ti: “Aame oshipuna,” ndelenee kuKristus ola li “epongo, omukwanaluhepo, omupofi, [li] li hamuhele.”—Ehololo 3:14-17.

18. Ongahelipi omunhu ta dulu okuhenuka okukala a lomoka pamhepo momesho aKalunga?

¹⁸ Kunena, Ovakriste vamwe ovo kwa li ovadiinini ova wila monghalo yokuhadulika ya faafana. Pamwe ova efa omhepo younyuni i va efife eliudo li na sha neendelelo lefimbo mokukalamwenyo kwavo nokungaha ova kulika oikala yopamhepo ya lomoka shi na sha nokukonakona Ombibeli, okwiilikana, okwoongala kwopaKriste nosho yo noukalele. (2 Petrus 3:3, 4, 11, 12) Inashi fimana tuu kovanhu va tya ngaho okudulika kuKristus mokulalakanena oupuna wopamhepo—heeno, ‘okulanda kuKristus oshingoldo sha yelifwa momundilo’! (Ehololo 3:18) Oupuna wolela wa tya ngaho owa kwatela mo okukala ‘oipuna yoilonga iwa, okuninga ovayandji nokutukulilafana.’ Mokulalakanena oiniwe ya tya ngaho i na ondilo shili, ohatu “lituvikilile emona tali ningi ekanghameno liwa laayo yokomesho, opo [tu] mone omwenyo waalushe.”—1 Timoteus 6:17-19.

Va pandulilwa okudulika kwavo

19. Olupandu nomakumaido elipi Jesus a pa Ovakriste vomuSmirna novomuFiladelfia?

¹⁹ Eongalo lomuSmirna nosho yo lomuFiladelfia, okwa li a denga mbada mokukala e li oihopaenenwa mokudulika, molwaashi eenhumwafo daJesus kuvo kada li di na nande epukululo lasha. Kwaavo ve li muSmirna, okwa ti: “Oilonga yoye nokufininikwa kwoye noluhepo loye ondi [li] shii—ndelenee oove oshipuna.” (Ehololo 2:9) Kape na tuu eyooloko pokati kavo naavo vomuLaodikea ovo kwa li tave litadele oupuna wopaunyuni ndelenee paushili ova li moluhepo! Doshili, Ondiaboli kaya li ya hafa okumona nande oumwe ta ulike oudiinini nota dulika kuKristus. Onghee hano, Jesus okwa londwela ta ti: “Ino tila oyo tai ke ku hepeka. Tala, ondiaboli otai idilile vamwe vomunye modolongo, mu yelekwe, ndele otamu ka monifwa oudjuu omafiku omulongo. Diinina fiyo kefyo, Ame nohandi ku pe oshishani shomwenyo.” (Ehololo 2:10) Sha faafana, Jesus okwa pandula ovo va li muFiladelfia, ta ti: “Ove wa diinina ondjovo yange [ile wa dulika kwaame], ndele ino lidimbika edina lange. Tala, ohandi uya diva; diinina shili [osho, OB-1954] u shi kwete u ha nyekwe oshishani shoye nande kuumwe.”—Ehololo 3:8, 11.

20. Ongahelipi omamiliyona kunena a diinina eendjovo daJesus, nokwe shi ninga meenghalo da tya ngahelipi?

²⁰ “Mefiku lOmwene,” okudja mo 1914, oshixupe oshidiinini nosho yo ookaume vasho eedi dimwe ovo ve li paife omamiliyona onhumba, ova diinina yo eendjovo daJesus mokukala ovaladi moukalele nosho yo mokukanyatela koudiinini wavo. Ngaashi ovamwaxe vomefelemido lotete, vamwe vomuvo ova mona oixuna omolwokudulika kuKristus kwavo, va ekelwa nokuli meedolongo nosho yo meekamba deenghwate. Vamwe ova diinina eendjovo daJesus mokukala ‘neisho li li nawa,’ nonande okwa li va dingililwa koupuna nokolwisho. (Mateus 6:22, 23) Heeno, momudingonoko keshe nosho yo monghalo keshe, Ovakriste vashili otava twikile okuhafifa omutima waJehova okupitila mokudulika kwavo.—Omayeletumbulo 27:11.

21. (a) Oshinakuwanifwa shopamhepo shilipi ongudu yomupiya tai twikile okuwanifa po? (b) Ongahelipi hatu dulu okuulika kutya otwa hala shili okudulika kuSilo?

²¹ Eshi hatu ehene poudjuu unene, “omupiya omudiinini nomunaendunge” onghee ngoo e li a tokola okuhaefa okudulika kwaye kOmwene, Kristus. Osho osha kwatela mo okulongekida eendja dopamhepo pefimbo molwoukwaneumbo waKalunga. Onghee hano natu twikile okukala nolupandu okupandula ehangano laJehova lopauteokratika likumwifi nosho yo osho hali yandje. Monghedi ya tya ngaho, ohatu ulike eliyandjo letu okudulika kuSilo, oo ta ka yandja kovapangelwa vaye ovaduliki ondjabi yomwenyo waalushe.—Mateus 24:45-47; 25:40; Johannes 5:22-24.

[Omashangelo opedu]

1. (a) Monakudiwa okudulika kuJehova okwa kala luhapu kwa kwatela mo shike? (b) Exunganeko lilipi li na sha nokudulika la xunganekwa kuJakob?

Oto dimbuluka?

• Jesus okwa li ta ka dana onghandangala ilipi ngaashi sha xunganekwa kuJakob eshi a li e li momutala e li pokufya?

• Ongahelipi hatu dimine Jesus e li Silo, nomhepo ilipi tu na okuhenuka?

• Omapukululo elipi oo e li meenhumwafo odo da shangelwa omaongalo aheyali omEhololo taa wapalele efimbo letu?

• Omeenghedi dilipi hatu dulu okuhopaenena ovo va li momaongalo oo a li muSmirna nosho yo muFiladelfia shonale?

[Efano pepandja 28]

Jehova oha nangeke noupuna oshiwana shaye molwokudulika ‘kelenga’ lidiinini

[Efano pepandja 29]

Enwefemo laSatana otali shi ningi shi li eshongo okudulika kuKalunga

[Efano pepandja 31]

Ekwatafano naJehova la kola otali tu kwafele tu dulike kuye