Mbela ou na oikala yokuteelela?

“Omu nokuhangika mwa tya ngahelipi [meengeda diyapuki nomoilonga yometilokalunga, NW] mokuteelela nokweendelelifa euyo lefiku laKalunga.”—2 PETRUS 3:11, 12.

1, 2. Ongahelipi hatu dulu okufaneka okukala noikala yokuteelela shi na sha nefiku laJehova?

NATU tye nee ngeno oukwaneumbo wonhumba owa teelela ovaenda tave uya okulya ouvalelo. Efimbo lokufika kwavo otali ehene popepi neenghono. Omukainhu okwe lipyakidila nomalongekido axuuninwa e na sha noikulya. Omushamane waye nounona vavo otava kwafele opo va shilipaleke kutya oinima aishe oya longekidwa. Keshe umwe okwa tunhukwa. Heeno, oukwaneumbo aushe owa teelela nehalo linene ovaenda va fike nokulya ouvalelo muwa nosho yo okuhafela eendafano liwa.

² Tu li Ovakriste, otwa teelela sha osho nokuli sha fimana unene. Oshike osho mbela? Doshili, atusheni otwa teelela ‘efiku laKalunga.’ Fimbo inali fika, otwa pumbwa okukala ngaashi omuprofeti Mika oo a ti: “Ohandi liamene omesho ange kOmwene, handi teelele Kalunga kexupifo lange.” (Mika 7:7) Mbela osho osha hala okutya ohatu kala itatu longo sha? Hasho. Ope na shihapu sha pumbwa okulongwa.

3. Pa 2 Petrus 3:11, 12, oikala ilipi Ovakriste ve na okukala ve na?

³ Omuyapostoli Petrus ote tu kwafele tu kale noikala ya yuka ofimbo twa teelela. Ota ti: “Omu nokuhangika mwa tya ngahelipi [meengeda diyapuki nomoilonga yometilokalunga, NW] mokuteelela nokweendelelifa euyo lefiku laKalunga.” (2 Petrus 3:11, 12) Didilika kutya metumbulo olo, Petrus ka li ta tula momalimbililo shi na sha nokutya otu na okukala ovanhu va tya ngahelipi. Meenhumwafo daye mbali da nwefwa mo kuKalunga, okwa hokolola kutya Ovakriste ove na okukala ovanhu va tya ngahelipi. Okwe va kumaida yo va twikile “meengeda diyapuki nomoilonga yometilokalunga.” Nonande okwa li pa pita omido 30 lwaapo okudja eshi Jesus Kristus a yandja edidiliko ‘lexulilo longhalelo yoinima,’ Ovakriste kava li va pumbwa okweefa okukala oupafi. (Mateus 24:3, NW) Okwa li ve na ‘okuteelela nokweendelelifa’ euyo lefiku laJehova.

4. Oshike sha kwatelwa mo ‘mokweendelelifa euyo lefiku laKalunga’?

⁴ Doshili, itatu dulu ‘okweendelelifa’ lelalela efiku laJehova. Nokuli, katu ‘shii efiku notundi’ oyo Jesus Kristus ta ka wanifa etokolo okutokola ovatondi vaXe. (Mateus 24:36; 25:13) Embo limwe lomauyelele ola yelifa kutya oshityalonga shopefina shoutumbulilo ‘okweendelelifa’ pomhito ei otashi ti “ ‘okuuluma’ nokungaha osha kwatakanifwa unene ‘nokukala omuladi, we lipyakidila, u na ko nasha noshinima shonhumba.’ ” Onghee hano, Petrus okwa li ta ladipike ovaitaveli vakwao va kale va halelela euyo lefiku laJehova. Okwa li tava dulu okuninga ngaho moku li kaleka alushe momadiladilo avo. (2 Petrus 3:12) Paife eshi “efiku linene nolitilifa lOmwene” la ehena popepi, otu na okukala noikala yopamadiladilo ya faafana.—Joel 2:31.

Natu teeleleni ‘neengeda diyapuki’

5. Ongahelipi hatu dulu okuulika kutya otwa halelela okumona ‘efiku laKalunga’?

⁵ Ngeenge otwa halelela okuxupa mefiku laJehova, ohatu ke shi ulika okupitila ‘meengeda detu diyapuki nomoilonga yetu yometilokalunga.’ Outumbulilo ‘eengeda diyapuki’ otashi dulika u tu dimbulukife nawa ekumaido laPetrus tali ti: “Ngaashi ovana hava dulika, mokukala kweni inamu shikula vali omauhalu mwe a wanifa nale mokuhashiiva kweni. Ndelenee hopaeleleni Omuyapuki ou e mu ifana, nye mu ninge yo ovayapuki mokukala kweni akushe, osheshi pa shangwa: Kaleni ovayapuki, osheshi Aame omuyapuki.”—1 Petrus 1:14-16.

6. Opo tu kale ovayapuki, oshike tu na okuninga?

⁶ Okukala ovayapuki, otu na okudiinina oukoshoki wopalutu, wopamadiladilo, wopaenghedi nosho yo wopamhepo. Mbela ohatu lilongekidile ‘efiku laKalunga’ mokukala ovayapuki tu li ovanhu ovo va humbata edina laJehova? Kashipu okudiinina oukoshoki wa tya ngaho kunena molwaashi omifikamhango dopaenghedi dounyuni otadi xutuka mokweendela ko kwefimbo. (1 Ovakorinto 7:31, NW; 2 Timoteus 3:13) Mbela otu wete eyooloko pokati komifikamhango detu dopaenghedi naado dounyuni tali ningi linene? Ngeenge hasho, otu na okulipula. Mbela otashi dulika nonande omifikamhango detu dopaumwene odi dule kokule odo dounyuni, otadi xutuka? Ngeenge osho ngaho, otwa pumbwa okukatuka eenghatu da mana mo tu yukife oinima opo tu wapalele Kalunga.

7, 8. (a) Ongahelipi hatu dulu okudimbwa kutya osha fimana okukala “meengeda diyapuki”? (b) Oshike tu na okuninga po opo tu pukulule oinima?

⁷ Omolweuyo lomafano oipala koInternet nomolwokukala taa dulu okumonika paumwene, vamwe ovo va li nale ihava tale oinima inai koshoka, paife ove na “ondumba yoinima i na sha nomilele,” ngaashi ondokotola younamiti imwe ya ti. Ngeenge ohatu kongo omauyelele keenhele da nyata da tya ngaho dokoInternet, kungaha ohatu lipwililikile oshipango shOmbibeli kutya inatu “kuma oshipo.” (Jesaja 52:11) Mbela ohatu ka ‘endelelifa ngoo shili euyo lefiku laKalunga’? Ile otashi dulika hatu li shelelelifa pamadiladilo, hatu diladila nokuli kutya nande otwa nyateke omadiladilo etu noinima ya nyata, otu na natango efimbo lokuliwapaleka? Ngeenge otu na oupyakadi moinima ya tya ngaho, oshi li sha endelela okwiilikana kuJehova opo ‘omesho etu a aluke ko, a ha tale koinima yongaho noku tu nyatipalifa meendjila daye.’—Epsalme 119:37.

⁸ Omuvalu muhapu wEendombwedi daJehova, ovanyasha novakulunhu, otau kanyatele komifikamhango dopaenghedi daKalunga da denga mbada notadi henuka eamo la nyata lounyuni ou. Molwokushiiva kwado kutya efimbo letu ola endelela nosho yo elondwelo laPetrus kutya “efiku lOmwene otali ke uya ngaashi omulunga,” otadi twikile “meengeda diyapuki.” (2 Petrus 3:10) Oilonga yado otai ulike kutya oda ‘teelela notadi endelelifa euyo lefiku laKalunga.’a

Natu teeleleni ‘noilonga yometilokalunga’

9. Etilokalunga oli na oku tu linyengifa tu ninge shike?

⁹ ‘Oilonga yometilokalunga’ oya fimanenena yo ngeenge otwa hala okukaleka efiku laJehova momadiladilo. ‘Etilokalunga’ ola kwatela mo efimano lokufimaneka Kalunga olo hali tu linyengifa tu ninge osho sha wapala momesho aye. Ohole youdiinini yokuhola Jehova oi li eenghono tadi tu linyengifa tu longe oilonga yometilokalunga. Oshi li ehalo laye “ovanhu aveshe va xupifwe nova fike meshiivo loshili.” (1 Timoteus 2:4) Kalunga “ina hala pa kane nande umwe, ndelenee aveshe ve lialulukile melidilululo.” (2 Petrus 3:9) Onghee hano, etilokalunga letu kali na tuu oku tu linyengifa tu hapupalife eenghendabala detu dokukwafela ovanhu ve lihonge kombinga yaJehova noku mu hopaenena?—Ovaefeso 5:1.

10. Omolwashike tu na okulivangeka ‘eheka loupuna’?

¹⁰ Okukalamwenyo kwetu otaku kala ku yadi oilonga yometilokalunga ngeenge otwa kala hatu kongo tete Ouhamba waKalunga. (Mateus 6:33) Osho osha kwatela mo okukala netaleko li li pandjele li na sha noinima yopamaliko. Jesus okwa londwela ta ti: “Pashukeni onye mu lungame keshe tuu olwisho, osheshi omwenyo womunhu ihau xupifwa kouhapu weliko laye.” (Lukas 12:15) Nonande otashi dulika shi kale shidjuu okudiladila kutya ohatu pofipalekwa kohole yokuhola oimaliwa, ohatu ningi nawa ngeenge ohatu didilike kutya ‘oshisho shounyuni neheka loupuna’ otai dulu ‘okufininika eendjovo’ daKalunga. (Mateus 13:22) Otashi dulika shi ha kale shipu okulongela omboloto. Onghee hano, moitukulwa imwe mounyuni vahapu ohava diladila kutya opo va kale nokukalamwenyo kwa xwepopala, ove na okuya koilongo oyo ya punapala, tashi dulika tava fiye po omaukwaneumbo avo oule womido donhumba. Nokuli navamwe vomoshiwana shaKalunga ova diladila monghedi oyo. Mokuya koshilongo shimwe, otashi dulika va dule okutumina omaukwaneumbo avo oinima yopashinanena. Ndelenee oshike tashi dulu okuningwa po shi na sha noupamhepo wovaholike vavo keumbo? Nope he na elongifo nawa loukwamutwe meumbo, mbela otava ka kala ngoo noupamhepo oo va pumbwa opo va xupe mefiku laJehova?

11. Ongahelipi omunailonga umwe oo a li a tembuka a ulika kutya oilonga yometilokalunga oya fimanenena i dule omaliko?

¹¹ Omunailonga umwe oo a li a tembuka okudja kuFilipine, okwa hongwa oshili yOmbibeli kEendombwedi daJehova muJapani. Eshi e lihonga shi na sha noinakuwanifwa yopamishangwa youkwamutwe, okwa mona kutya okwa li a pumbwa okukwafela oukwaneumbo waye u ninge ovalongeli vaJehova. (1 Ovakorinto 11:3) Omukainhu waye oo a li keumbo, okwa li e li omhinge unene neitavelo laye lipe nokwa li a hala a kale ta tumu oimaliwa ponhele yokwaalukila keumbo opo a honge oukwaneumbo eitavelo laye la kanghamena kOmbibeli. Ndelenee molwaashi omulumenhu oo okwa li e linyengifwa keliudo kutya efimbo ola endelela nosho yo kokukala noshisho shi na sha novaholike vaye, okwa shuna keumbo. Elidiiniko laye mokuungaunga pahole noilyo youkwaneumbo okwa li la punikwa. Konima yefimbo, oukwaneumbo waye owa ka hangana melongelokalunga lashili, nomukainhu waye okwa ya moukalele wefimbo liyadi.

12. Omolwashike tu na okupitifa komesho oinima yopamhepo mokukalamwenyo?

¹² Onghalo yetu otai dulu okufaafanifwa noyovanhu ovo ve li metungo tali pi. Mbela otashi ka kala ngoo pandunge okutondauka opo u xupife oinima yopamaliko metungo olo tali pi noli li pokuhanauka po? Ponhele yaasho, mbela itashi ka kala sha fimana unene okuxupifa eemwenyo—eemwenyo detu nodomaukwaneumbo etu nosho yo davamwe ovo hava kala metungo olo? Doshili, onghalelo ei yoinima youkolokoshi oya yuka mehanauno layo neendelelo, neemwenyo odi li monghuwo i nonghambe. Ngeenge osho tu udite ngaho, doshili, otu na okupitifa komesho oinima yopamhepo nokuyandja elitulemo nouladi koilonga yokuudifa Ouhamba oyo tai xupifa eemwenyo.—1 Timoteus 4:16.

Otwa pumbwa okukala tu “he nonyata”

13. Otwa hala okukala monghalo ya tya ngahelipi eshi efiku laJehova tali ka fika?

¹³ Mokudivilika kutya osha fimana okukala noikala yokuteelela, Petrus okwa ti: “Ovaholike, omokuteelela oinima ei kendabaleni shili, mu [hangike xuuninwa kuKalunga] mu he nonyata nomu he noshipo mombili.” (2 Petrus 3:14, yelekanifa NW.) Kakele kekumaido laye lokukala neengeda diyapuki nosho yo oilonga yometilokalunga, Petrus okwa divilika kutya osha fimana okuhangika xuuninwa kuJehova tu li oohandimwe va koshwa nohonde yaJesus i na ondilo. (Ehololo 7:9, 14) Osho otashi pula omunhu a kale neitavelo tali longo meyambo laJesus nosho yo okuliyapulila Jehova nokukala omupiya waYe a ninginifwa.

14. Okukala u “he nonyata” okwa kwatela mo shike?

¹⁴ Petrus okwe tu ladipika tu kendabale shili tu hangike tu “he nonyata.” Mbela ohatu kaleke ngoo omidjalo detu delihumbato nounhu wopaKriste di he na onyata, inadi nyatekwa kounyuni? Ngeenge twa didilike kutya oikutu yetu oi na onyata, ohatu endelele tu i wapaleke po. Ngeenge oi li koshikutu osho tu hole, ohatu shi wapaleke nokuli noukeka. Mbela ohatu kala tu uditile omidjalo detu dopaKriste sha faafana, ngeenge da kaka, oku shi popya pafaneko, molwomapuko onhumba mounhu wetu ile melihumbato letu?

15. (a) Omolwashike Ovaisrael kwa li ve na okulitungila eenyemba da endjelela keembinga doikutu yavo? (b) Omolwashike ovapiya vaJehova kunena va yooloka ko kounyuni?

¹⁵ Ovaisrael okwa li ve na ‘okulitungila eenyemba da endjelela keembinga doikutu yavo nokumanga meenyemba domeembinga ongodi [imbulau, OB-1986].’ Omolwashike mbela? Opo va dimbuluke oipango yaJehova, va dulike kuyo nova ‘kale ovayapuki’ kuKalunga kavo. (Numeri 15:38-40) Tu li ovapiya vaJehova kunena, otwa yooloka ko kounyuni ou omolwokudiinina eemhango nomafinamhango aKalunga. Pashihopaenenwa, ohatu diinine oukoshoki wopaenghedi, ohatu fimaneke ouyapuki wohonde nohatu henuka elongelo loikalunga loludi keshe. (Oilonga 15:28, 29) Vahapu ohave tu fimaneke omolwokukala kwetu twa tokola toko okulikelela tu ha kale nedilo.—Jakob 1:27.

Otwa pumbwa okukala tu “he noshipo”

16. Oshike sha kwatelwa mokukala tu “he noshipo”?

¹⁶ Petrus okwa ti yo kutya otu na okuhangika tu “he noshipo.” Osho otashi shiiva ngahelipi? Luhapu onyata ohai dulu okupushulwa po ile okukoshwa po ndele ito dulu okuwapaleka po oshipo. Okukala noshipo otaku ulike kutya ope na sha osho sha puka meni loshinima. Omuyapostoli Paulus okwa kumaida Ovakriste vakwao muFilippi ta ti: “Aishe i longeni mu he [na okungongota nokutwa eemhata, NW] opo mu kale ovahenashipo, mwa koshoka, ovana vaKalunga, ve he na edilo mokati koludi eli la pilalala nola ngolyoka, mu vilime mokati kavo ngaashi eenyofi mounyuni.” (Ovafilippi 2:14, 15) Ngeenge otwa landula ekumaido olo, ohatu ka henuka okungongota nokutwa eemhata ndele ohatu ka longela Kalunga nelinyengotomheno la yela. Ohatu ke linyengifwa kohole yokuhola Jehova nokuhola ovanhu vakwetu eshi hatu udifa “evangeli eli louhamba.” (Mateus 22:35-40; 24:14) Kakele kaasho, ohatu ka twikila okuudifa onghundana iwa nokuli nonande ovanhu vahapu otashi dulika va ha kale ve udite ko kutya omolwashike hatu yambe po efimbo letu tu ninge eenghendabala okukwafela vamwe ve lihonge kombinga yaKalunga nosho yo yEendjovo daye Ombibeli.

17. Oshike shi na okukala elinyengotomheno letu ngeenge hatu lalakanene omaufembanghenda meongalo lopaKriste?

¹⁷ Molwaashi otwa hala okuhangika tu “he noshipo,” otu na okukonakona omalinyengotomheno etu e na sha nomalalakano etu aeshe. Otwa fiya po onghedi younyuni yokuninga oinima molwohole yokulihola mwene, ngaashi okukendabala okulikongela omaliko ile efimano. Ngeenge hatu lalakanene omaufembanghenda meongalo lopaKriste, omalinyengotomheno etu naa kale a yela nosho yo natu kale alushe hatu linyengifwa kohole yokuhola Jehova nosho yo vamwe. Otashi mbilipaleke okumona ovalumenhu ve na oupamhepo muwa va “hala oshilonga shoufitaongalo” opo va yakule Jehova nosho yo ovaitaveli vakwao nehafo nosho yo nelininipiko. (1 Timoteus 3:1; 2 Ovakorinto 1:24) Doshili, ovo va wana okukala ovakulunhuongalo ohava ‘lifa oufita waKalunga nehalo liwa; hamolweliko la kaka, ndelenee okehalo liwa lokomwenyo pahalo laKalunga, ihava pangele ava ve va pewa ngaashi omalenga, ndelenee ove li ovahopaelelwa voufita.’—1 Petrus 5:1-4.

Otwa pumbwa okukala “mombili”

18. Omolwomaukwatya elipi Eendombwedi daJehova da shiivikila nawa?

¹⁸ Xuuninwa, Petrus ote tu lombwele kutya natu hangikeni “mombili.” Opo tu kale metwokumwe noshiteelelwa osho, otwa pumbwa okukala nombili naJehova nosho yo navakwetu. Petrus okwa divilika kutya osha fimana okukala ‘nohole yokuholafana ya xwama’ nokukaleka po ombili nOvakriste vakwetu. (1 Petrus 2:17; 3:10, 11; 4:8; 2 Petrus 1:5-7) Opo tu kaleke po ombili yetu, otu na okukala tu holafane. (Johannes 13:34, 35; Ovaefeso 4:1, 2) Ohole nombili yetu ohai kala tai limonikila poyoongalele yetu yopaiwana. Poshoongalele shimwe sha li muKosta Rika mo 1999, omulandifi umwe pokapale keedila okwa li a handuka eshi Eendombwedi domoshitukulwa osho da li tadi hambelele ovatalelipo, noinadi shi ningila owina oda viikilila ongeshefa yaye. Ndelenee mefiku etivali, okwa didilika ohole nombili oyo ya ulikwa mehambelelo olo ovatalelipo va hambelelwa nalo nonande Eendombwedi domoshitukulwa kadi va shii paumwene. Mefiku laxuuninwa, omulandifi okwe limbwanga mumwe naavo tava hambelele vakwao nokwa pula ekonakonombibeli.

19. Omolwashike sha fimanenena okulalakanena okukala nombili novaitaveli vakwetu?

¹⁹ Okulalakanena shili ombili novamwatate novamwameme vopamhepo otaku dulu okunwefa mo okukala twa mana mo kwetu mokuteelela efiku laJehova nosho yo ounyuni mupe waye wa udanekwa. (Epsalme 37:11; 2 Petrus 3:13) Natu tye nee ngeno ohatu mono shidjuu okukaleka po ombili yetu nomwiitaveli mukwetu wonhumba. Mbela ohatu dulu okudiladila tu li pamwe naye nombili moParadisa? Ngeenge pokati ketu nomumwatate ope na sha, otu na ‘okupaafana ombili naye’ meendelelo. (Mateus 5:23, 24) Okuninga ngaho okwa fimana ngeenge otwa hala okukala nombili naJehova.—Epsalme 35:27, NW; 1 Johannes 4:20.

20. Oikala yokuteelela oi na okuulikwa meenghedi dilipi?

²⁰ Mbela otwa ‘teelela nohatu endelelifa euyo lefiku laKalunga’ paumwene? Okuhalelela kwetu okumona exulilo loukolokoshi otaku ulikwa mokukala kwetu ovayapuki mounyuni ou wa nyata. Kakele kaasho, okuhalelela kwetu neenghono euyo lefiku laJehova nokukalamwenyo koshi yepangelo lOuhamba otaku limonikila moilonga yetu yometilokalunga. Neteelelo letu lokukala mounyuni mupe wombili otali limonikila mokulalakanena kwetu okukala nombili novaitaveli vakwetu paife. Meenghedi da tya ngaho, ohatu ulike kutya otu na oikala yokuteelela nosho yo kutya ohatu ‘endelelifa euyo lefiku laKalunga.’

[Omashangelo opedu]

Oto dimbulukwa?

• Otashi ti ngahelipi ‘okweendelelifa euyo lefiku laKalunga’?

• Ongahelipi hatu dulu okuulika okupitila melihumbato letu kutya otu na oikala yokuteelela?

• Omolwashike ‘oilonga yometilokalunga’ ya fimanenena?

• Oshike tu na okuninga opo tu hangike kuJehova tu ‘he na onyata notu he na oshipo notu li mombili’?

[Efano pepandja 11]

Oikala yokuteelela otai limonikila meengeda diyapuki

[Efano pepandja 12]

Oilonga yokuudifa Ouhamba otai xupifa eemwenyo

[Efano pepandja 14]

Ofimbo twa teelela efiku laJehova, natu lalakaneneni okukala nombili navamwe