Okulididimikila omayeleko otaku fimanekifa Jehova

“Ngenge tamu lididimike eshi tamu hepekelwa oilonga yeni iwa, osho [oshinima sha hokiwa kuKalunga, NW].”—1 PETRUS 2:20.

1. Molwaashi Ovakriste vashili ove na ko nasha nokukala metwokumwe neliyapulo lavo, epulo lilipi tu na okukonakona?

OVAKRISTE ove liyapulila Jehova nova hala okulonga ehalo laye. Opo va kale metwokumwe neliyapulo lavo, ohava ningi osho tava dulu opo va shikule oshikoti shOmuhopaenenwa wavo Jesus Kristus nokuyandja oundombwedi woshili. (Mateus 16:24; Johannes 18:37; 1 Petrus 2:21) Ndelenee Jesus nosho yo ovadiinini vakwao ova yandja eemwenyo davo ndele tava file eitavelo lavo ve li eendombwedi. Mbela osho osha hala okutya Ovakriste aveshe otava dulu okuteelela va file eitavelo lavo?

2. Ovakriste ohava tale ko ngahelipi omayeleko nokumona oixuna?

² Tu li Ovakriste, otwa ladipikwa tu kale ovadiinini fiyo okefyo, ndele hakutya naanaa tu fye omolweitavelo letu. (2 Timoteus 4:7; Ehololo 2:10) Osho osha hala okutya fimbo twe lilongekida okumona oixuna, nongeenge sha pumbiwa tu fye omolweitavelo letu, ediladilo lokumona oixuna nokufya kali hokwifa. Ihatu hafele okumona oixuna noihatu hokwa ouyahame nokushundulwa. Ndele molwaashi otu na okukala twa teelela omayeleko nomahepeko, otwa pumbwa okukonakona noukeka nghee hatu dulu okukatuka ngeenge tae tu hange.

Va diinina eshi va li va yelekwa

3. Oihopaenenwa ilipi yopaMbibeli i na sha nokulididimikila omahepeko to dulu okuhokolola? (Tala oshimhungu “Nghee ve lididimikila omahepeko,” pepandja tali landula.)

³ MOmbibeli ohatu hange mo omahokololo mahapu oo taa ulike nghee ovapiya vaKalunga vomefimbo la pita ve linyenga eshi kwa li va shakeneka eenghalo odo da li da tula onghalamwenyo yavo moshiponga. Eenghedi di lili noku lili omo ve linyenga odi li ekwafo kOvakriste kunena ngeenge tava shakeneke omashongo a faafana. Konakona omahokololo e li moshimhungu “Nghee ve lididimikila omahepeko” nokutala osho to dulu okulihonga kuvo.

4. Oshike tashi dulu okutiwa shi na sha nonghedi oyo Jesus nosho yo ovapiya vakwao ovadiinini ve linyenga eshi va li va shakeneka omayeleko?

⁴ Nonande Jesus nosho yo ovapiya vaKalunga vakwao ovadiinini ove linyenga komahepeko meenghedi di lili noku lili she likolelela keenghalo, osha yela kutya inava tula eemwenyo davo moshiponga owina. Eshi va li meenghalo da nyika oshiponga, ova li va nyatipala ndele ova li yo va lungama. (Mateus 10:16, 23) Elalakano lavo ola li okuxumifa komesho oilonga yokuudifa nokukanyatela oudiinini wavo kuJehova. Omalinyengo avo meenghalo di lili noku lili okwa tulila po Ovakriste kunena oshihopaenenwa ovo tava shakeneke omayeleko nomahepeko.

5. Omahepeko elipi a li moMalawi mo 1960 nasha, nEendombwedi oko ode linyenga ngahelipi?

⁵ Kunena, oshiwana shaJehova osha shakeneka luhapu eenghalo didjuu unene nosha kanifa omolwoita, okushilikwa ile okuhepekwa filufilu. Pashihopaenenwa, mo 1960 Eendombwedi daJehova muMalawi oda li da hepekwa unene. Omalupale Ouhamba ado, omaumbo, oikulya nosho yo eengeshefa, hanga oiniwe yado aishe, oya li ya hanaunwa po. Oda li da monifwa oixuna omolwokudengwa nosho yo oinima imwe itilifa. Mbela ovamwatate ova li ve linyenga ngahelipi? Omayovi okwa li a fiya po omikunda dao. Vahapu ova li va ka hondama moixwa, ofimbo vamwe va ninga eenhauki oule wokafimbo moshishiindalongo Mosambike. Nonande ovadiinini vahapu ova kanifa eemwenyo davo, vamwe ova fiya po eenhele odo kwa li da nyika oshiponga, osho sha yela kutya osha li pandunge okuninga ngaho meenghalo da tya ngaho. Mokuninga ngaho, ovamwatate ova shikula oshihopaenenwa sha tulwa po kuJesus naPaulus.

6. Oshike osho Eendombwedi dokoMalawi inadi efa nonande pa li omahepeko onyanya?

⁶ Nonande ovamwatate Ovamalawi ova li ve na okutembuka ile oku ka hondama, ova konga nokushikula ewiliko lopauteokratika nova twikila noilonga yavo yopaKriste meholeko ngaashi tava dulu. Oshidjemo osha li shike mbela? Ova hanga oshitwa shopombada shovaudifi vOuhamba 18 519 fimbo ashike eshiliko inali ningwa mo 1967. Nonande okushilikwa kwoilonga okwa li natango metifa novanhu vahapu ova li va ya onhapo koMosambike, mo 1972 okwa li kwa lopotwa oshitwa shopombada shipe shovaudifi 23 398. Ova li ve na oupokati weevili 16 moukalele omwedi keshe. Nope he na omalimbililo, oilonga yavo oya fimanekifa Jehova, na Jehova okwa nangeka noupuna ovamwatate ovo ovadiinini pefimbo olo loudjuu munene.a

7, 8. Omolwomatomheno elipi vamwe va tokola va ha ye onhapo nonande omapataneko otaa etifa omaupyakadi?

⁷ Mepingafano naasho, moilongo oyo omapataneko taa eta omaupyakadi, ovamwatate vamwe otashi dulika va tokole okuhatembuka, nonande otava dulu oku shi ninga. Okutembuka otaku dulu okukufa po omaupyakadi onhumba, ndele otashi dulika ku ete omaupyakadi amwe. Pashihopaenenwa, mbela otava ka dula ngoo okukaleka po ekwatafano noumwainafana wopaKriste nokuhakala va tukaulwa pamhepo? Mbela otava ka dula ngoo okutwikila nelandulafano lopamhepo eshi tava ningi eenghendabala dokukonga eenhele dokukala, tashi dulika moshilongo osho shi na oupuna muhapu ile mwaasho shi na eemhito dihapu dokumona oinima yopamaliko?—1 Timoteus 6:9.

⁸ Vamwe ova tokola va ha tembuke molwaashi ove na ko nasha nonghalonawa yopamhepo yovamwaxe. Ova tokola okukala moshilongo shavo nokutaalela onghalo oyo opo va kale tava udifa moshitukulwa shavo nokukala ve li etwomukumo kovalongelikalunga vakwao. (Ovafilippi 1:14) Mokuninga etokolo olo, xuuninwa vamwe ova li va dula okuyambidida omafindano opaveta moshilongo shavo.b

9. Oitwa ilipi i na okukonakonwa ngeenge omunhu ta tokola kutya ota kala moshilongo ile ota tembuka mo shi na sha nomahepeko?

⁹ Okukala moshilongo sheni ile okutembuka mo—oshi li shili etokolo lopaumwene. Doshili, omatokolo a tya ngaho oku na ashike okuningwa konima yokukonga ewiliko laJehova meilikano. Ndele kashi na nee mbudi kutya ohatu katuka onghatu ilipi, otu na okukaleka momadiladilo eendjovo domuyapostoli Paulus tadi ti: “Keshe umwe womufye e na okulihokolola ye mwene kuKalunga.” (Ovaroma 14:12) Ngaashi twa mona nale, osho Jehova ta pula osho kutya keshe omupiya waye a kale omudiinini meenghalo keshe. Vamwe vomovapiya vaye otava shakeneke omayeleko nosho yo omahepeko kunena, vamwe otashi dulika tave ke a shakeneka komesho. Aveshe otava ka yelekwa monghedi yonhumba ile yongadi, ndele kape na oo ta dulu okuteelela a kale ina yelekwa. (Johannes 15:19, 20) Tu li ovapiya vaJehova ve liyapula, itatu dulu okuhenuka omhata yomeshito alishe ya kwatela mo okuyapula edina laJehova nosho yo okuyukipalifa ounamapangelo waye.—Hesekiel 38:23; Mateus 6:9, 10.

“Inamu alulila nande omunhu owii waye”

10. Oshihopaenenwa sha fimana shilipi Jesus nosho yo ovayapostoli ve tu tulila po mokulididimikila omafininiko nomapataneko?

¹⁰ Efinamhango limwe la fimana olo hatu dulu okulihonga monghedi oyo Jesus nosho yo ovayapostoli vaye ve linyenga koshi yomafininiko olo kutya inatu alulila nande ovahepeki vetu owii. Kape na sha mOmbibeli osho tashi ulike kutya Jesus ile ovashikuli vaye ova li ve liunganeka va kale ongudu yonhumba yokulwa ile va longifa eenghono opo va lwife ovahepeki vavo. Mepingafano naasho, omuyapostoli Paulus okwa yandja omayele kOvakriste ta ti: “Inamu alulila nande omunhu owii waye. . . . Ovaholike, nye vene inamu alulila omunhu owii, ndelenee peni ehandu laKalunga omhito. Shaashi opa shangwa: Ehandu olange, ame handi futu, Omwene osho ta ti.” Kakele kaasho, “ino findwa kowii, dula owii onouwa.”—Ovaroma 12:17-21; Epsalme 37:1-4; Omayeletumbulo 20:22.

11. Omunandjokonona umwe okwa popya shike shi na sha noikala yOvakriste vonale i na sha nepangelo?

¹¹ Ovakriste vonale ova pwilikina omayele oo. Membo laye The Early Church and the World, omunandjokonona Cecil J. Cadoux ota hokolola oikala yOvakriste i na sha nepangelo pefimbo lo 30-70 O.P. Okwa shanga ta ti: “Katu na nande euliko la yukilila kutya opa li pa ningwa eenghendabala kOvakriste mefimbo olo okuliamena komahepeko tava longifa eenghono. Osho ashike hava ningi osho okupukulula ovapangeli vavo ile oku va nyemateka molwokuya onhapo kwavo. Ndele luhapu mokulinyenga kwavo komahepeko, Ovakriste inava ninga sha shimwe shi he fi okwaanya va pama panghedi yombili okudulika komalombwelo epangelo oo ve wete taa kondjifa okudulika kwavo kuKristus.”

12. Omolwashike okulididimikila okumona oixuna ku dule okushunifila owii?

¹² Mbela onghatu yokuhalwa oyo oi li ngoo shili pandunge? Mbela ovanhu ovo have linyenge monghedi oyo itava ka ninga noupu oihakanwa yaavo va tokola oku va nyona po? Mbela itashi ka kala pandunge okuliamena? Oku shi tala pataleko lopanhu, osho otashi dulu okumonika sha fa osho shi li ngaho. Ndelenee tu li ovapiya vaJehova otu na elineekelo kutya okulandula ewiliko laJehova moinima aishe oko onghatu yopandunge. Ohatu kaleke momadiladilo eendjovo daPetrus tadi ti: “Ngenge tamu lididimike eshi tamu hepekelwa oilonga yeni iwa, osho [oshinima sha hokiwa kuKalunga, NW].” (1 Petrus 2:20) Otu na elineekelo kutya Jehova oku shii nawa onghalo noita ka efa oinima i twikile ngaho fiyo alushe. Mbela ongahelipi hatu dulu okukala noushili mwaasho? Jehova okwa popya noshiwana shaye eshi sha li moukwatwa muBabilon ta ti: “Ou te mu kumu, ota kumu ondada yeisho [lange, NW].” (Sakaria 2:8) Mbela oule wefimbo li fike peni omunhu ta ka efa ondada yeisho laye i kumwe? Jehova ota ka eta epepelelwo pefimbo la wapala. Shi na sha naasho kape na omalimbililo asha.—2 Ovatessaloniki 1:5-8.

13. Omolwashike Jesus a efa ovatondi vaye ve mu kwate po?

¹³ Moshinima osho, ohatu dulu okutala kuJesus e li oshihopaenenwa shetu. Eshi a efa ovatondi vaye ve mu kwate po moshikunino shaGetsemane, hasheeshi kwa li ngeno ita dulu okuliamena. Okwa lombwela ovahongwa vaye ta ti: “Ou shii, nghi dulu okwiindila Tate, a tumine nge paife ovaengeli ve dule eengudu da kula omulongo nambali! Ndele omishangwa otadi wanifwa ngahelipi ngeno, odo tadi ti, oshi nokuningwa ngaha?” (Mateus 26:53, 54) Okuwanifa ehalo laJehova osha li oshinima sha fimana kuJesus, nokuli nande osha li tashi ti oku na okumona oixuna. Okwa li e lineekela filufilu meendjovo dopaxunganeko depsalme laDavid tadi ti: “Omwenyo wange Ove ito u efele moshovafi nomuyapuki woye ito mu efa a mone eolelo.” (Epsalme 16:10) Konima yomido donhumba, omuyapostoli Paulus okwa popya kombinga yaJesus ta ti: “Ou kwa li a hepekelwa [koshiti shomahepeko, NW] omolwehafo e li tulikilwa, nokwa li e he na ko na sha nomasheko, Oye a kala omutumba kolulyo lolukalwapangelo laKalunga.”—Ovaheberi 12:2.

Ehafo lokuyapulifa edina laJehova

14. Ehafo lilipi la kwafela Jesus a pite momayeleko aye aeshe?

¹⁴ Ehafo lilipi la kwafela Jesus a pite momayeleko madjuu itaa dulu okudiladilwa? Movapiya aveshe vaJehova, Jesus Omona waKalunga omuholike, okwa li shili unene oshihakanwa shaSatana. Onghee hano, okukanyatela oudiinini kwaJesus momayeleko okwa li taku ka kala enyamukulo la shiya ko lokunyamukula elundilo laSatana okulundila Jehova. (Omayeletumbulo 27:11, yelekanifa NW.) Mbela oto dulu okudiladila kehafo nokuwanenwa oko Jesus kwa li e udite eshi a nyumunwa? Ka li tuu a hafa eshi a mona kutya okwa dana onghandangala oyo kwa li a pewa a dane e li omunhu a wanenena mokuyukipalifa ounamapangelo waJehova nosho yo mokuyapulifa edina laYe! Natango, okukala omutumba “kolulyo lolukalwapangelo laKalunga” nope he na omalimbililo oshi li efimaneko likumwifa nodjo yehafo linene kuJesus.—Epsalme 110:1, 2; 1 Timoteus 6:15, 16.

15, 16. Omahepeko onyanya elipi Eendombwedi muSachsenhausen de lididimikila, noshike she di pameka opo di shi ninge?

¹⁵ Oshi li yo ehafo kOvakriste okukufa ombinga mokuyapulifa edina laJehova mokulididimikila omayeleko nomahepeko, tava shikula oshihopaenenwa shaJesus. Oshihopaenenwa shimwe tashi wapalele osha li oshimoniwa shEendombwedi odo da mona oixuna mokamba yeenghwate yaSachsenhausen oyo ya shiivika apeshe mowii noda xupa molweendo lidjuu neenghono la ifanwa olweendo lefyo pexulilo lOita Itivali yOunyuni. Pefimbo lolweendo olo, omayovi eenghwate okwa fya omolwonghalomhepo, komikifi ile kondjala ile eshi kwa li a dipaelwa nonyanya komunghulo wondjila kovanangeli voSS. Eendombwedi adishe 230 oda xupa omolwokukala de limanga kumwe nokukwafelafana nonande osha li sha tula eemwenyo dado moshiponga.

¹⁶ Oshike sha pameka Eendombwedi di lididimikile omahepeko onyanya a tya ngaho? Diva eshi da hanga eameno, oda popya ehafo nolupandu lado okupandula Jehova modokumende yoshipalanyole “Okatokolifo keendombwedi daJehova 230 da dja moiwana ihamano, odo da li da ongala momufitu popepi naSchwerin moMecklenburg.” Modokumende oyo oda popya da ti: “Efimbo lile lidjuu lomayeleko ola pita, naavo vomufye ovo va xupifwa, va vakulwa momundilo paku shi popya pafaneko, itava nyika nokuli nomwifi. (Tala Daniel 3:27.) Mepingafano naasho, ova pama nove na eenghono da dja kuJehova nova teelela nehalo omalombwelo mape taa di kOhamba opo va xumife komesho oinima yopauteokratika.”c

17. Omayeleko oludi lilipi oshiwana shaKalunga tashi shakeneke kunena?

¹⁷ Ngaashi ovadiinini ovo 230, nafye ohatu ka shakeneka omayeleko eitavelo, nokuli nonande inatu “lwa fiyo ohonde” natango. (Ovaheberi 12:4) Ndele omayeleko otaa dulu okuningwa meenghedi di lili noku lili. Otaa dulu okukala okushekwa kovanafikola vakweni ile okufininikwa koomakula opo u ye moluhaelo nosho yo momanyono amwe. Natango, etokolotoko lokulidilika ohonde, okuhombola ashike mOmwene ile okutekula ounona meitavelo moukwaneumbo wa tukauka pamalongelokalunga otai dulu yo okweeta omafininiko nomayeleko a kwata moiti.—Oilonga 15:29; 1 Ovakorinto 7:39; Ovaefeso 6:4; 1 Petrus 3:1, 2.

18. Eshilipaleko lilipi tu na kutya ohatu dulu okulididimikila nokuli nomayeleko oo madjuu?

¹⁸ Ndele kashi na nee mbudi kutya omayeleko oludi lilipi tae tu hange, otu shi shii kutya ohatu mono oixuna molwaashi ohatu pitifa komesho Jehova nosho yo Ouhamba waye, nohatu shi tale ko shi li oufembanghenda nehafo lashili oku shi ninga. Ohatu mono etwomukumo meendjovo daPetrus tadi shilipaleke tadi ti: “Onye ngenge tamu shekelwa edina laKristus, onye ovanelao, osheshi Omhepo yoshinge noyaKalunga otai kala kombada yeni.” (1 Petrus 4:14) Keenghono domhepo yaJehova, otu na eenghono dokulididimikila nokuli nomayeleko oo madjuu unene, omolwetumbalo nefimano laye.—2 Ovakorinto 4:7; Ovaefeso 3:16; Ovafilippi 4:13.

[Omashangelo opedu]

Oto dulu okuyelifa?

• Ovakriste ohava tale ko ngahelipi okumona oixuna nokuhepekwa?

• Oshike hatu dulu okulihonga monghedi oyo Jesus nosho yo ovadiinini vamwe ve linyenga koshi yomayeleko?

• Omolwashike shi li pandunge oku ha shunifila owii ngeenge hatu hepekwa?

• Ehafo lilipi la kwafela Jesus a pite momayeleko aye, noshike hatu dulu okulihonga mwaasho?

[Oshimhungu pepandja 27]

Nghee ve lididimikila omahepeko

• Fimbo ovakwaita vaHerodes inava fika muBetlehem opo va dipae ounona aveshe voumati ovo ve na omido mbali okuyuka pedu, okupitila mewiliko lomwengeli, Josef naMaria ova kufa okaana Jesus ndele tava i onhapo kuEgipti.—Mateus 2:13-16.

• Oikando ihapu pefimbo loukalele waJesus, ovatondi vaye ova kendabala oku mu dipaa omolwoundombwedi waye u na eenghono. Jesus okwe va henuka pomhito keshe.—Mateus 21:45, 46; Lukas 4:28-30; Johannes 8:57-59.

• Eshi ovakwaita novapiya va ya koshikunino shaGetsemane opo va ka kwate Jesus, okwe liholola, ndele te va lombwele oikando ivali ta ti: “Aame ou.” Okwa kelela nokuli ovashikuli vaye va ha lwe ndele ta efa ongudu yovahangakeni i ye naye.—Johannes 18:3-12.

• MuJerusalem, Petrus nosho yo vamwe ova li va kwatwa nokudengwa neeshokoto ndele tava lombwelwa va ha popye vali kombinga yaJesus. Ndelenee eshi va mangululwa, ova “dja mo . . . vo inava efa okulonga omafiku nomotembeli nomomaumbo nova udifa evangeli laKristus Jesus.”—Oilonga 5:40-42.

• Eshi Saulus oo konima a ka ninga omuyapostoli Paulus, a uda omhangela yOvajuda muDamaskus kutya ova hala oku mu dipaa, ovamwatate ove mu tula moshimbaba ndele tave mu pitifile mombululu yekuma loshilando oufiku, ndele ta i onhapo.—Oilonga 9:22-25.

• Konima yomido donhumba, Paulus okwa hoolola okuya koshipala shOmukesari, nokuli nande omupangeli Festus nohamba Agrippa inava mona “sha shoku mu dipaifa ile shoku mu mangifa” muye.—Oilonga 25:10-12, 24-27; 26:30-32.

[Efano pepandja 28]

Nonande ova fininikwa komahepeko madjuu va ye onhapo, omayovi Eendombwedi didiinini moMalawi okwa twikila okulonga oilonga yOuhamba nehafo

[Efano pepandja 29]

Ehafo lokuyapulifa edina laJehova ola kwafela ovadiinini ava molweendo lidjuu neenghono olo va endifwa koNazi nomeekamba deenghwate dayo

Death march: KZ-Gedenkstätte Dachau, courtesy of the USHMM Photo Archives

[Efano pepandja 31]

Omayeleko nosho yo omafininiko otaa dulu okuningwa meenghedi di lili noku lili