Osho tashi dulu oku ku kwafela u ude ko Ombibeli
1. Ilikana kuKalunga e ku kwafele
Ninfa wokuItalia okwa hokolola a ti: “Onda li handi lesha Ombibeli fimbo inandi ka nangala. Onda li handi ningi ngaho molwaashi onda didilika kutya Ombibeli oyo Eendjovo daKalunga. Ashike nonande kanda li handi hafele okulesha Ombibeli, onda li nda hala okushiiva osho Kalunga a shanga mo. Onda li nda lalakanena oku i lesha aishe. Pehovelo onda li ndi i udite, ndele lwanima onda ka shakeneka oitukulwa imwe oyo ya li idjuu, nonda li nda efa po oku i lesha.”
MBELA naave ou na oshimoniwa sha fa shaNinfa? Ovanhu vahapu ove na oshimoniwa sha fa shaNinfa. Ngaashi twa mona moshitukulwa sha tetekela, Omushangi wOmbibeli, Jehova Kalunga, okwa hala u ude ko Eendjovo daye. Ndele mbela ongahelipi to dulu okumona eudeko la tya ngaho? Shotete, ou na okwiilikana kuKalunga e ku kwafele.
Ovayapostoli vaJesus ova li va talwa ko ve li “ovanhu vongaho, inava longwa” molwaashi kava li va mona edeulo lopalongelokalunga keefikola doshirabbi. (Oilonga 4:13) Ndele nande ongaho, Jesus okwa li e va shilipaleka kutya otava ka uda ko Eendjovo daKalunga. Ngahelipi mbela? Jesus okwa ti: “Omupopili, Omhepo Iyapuki, Oye Tate te ke i tuma medina lange, otai mu longo ashishe.” (Johannes 14:26) Kalunga okwa li a longifa omhepo yaye iyapuki ile tu tye eenghono daye tadi longo, opo a shite edu nosho yo oinima aishe i na omwenyo oyo i li ko. (Genesis 1:2) Okwa li yo a longifa omhepo yaye opo a nwefe mo ovashangi 40 lwaapo va shange omadiladilo aye mOmbibeli. (2 Petrus 1:20, 21) Omhepo iyapuki ohai kwafele yo ovanhu ovo va hala okuuda ko Ombibeli.
Ou na okuninga shike opo Kalunga e ku pe omhepo yaye? Ou na okwiilikana u na eitavelo. Doshili, ou na okudiinina okwiilikana. Jesus okwa ti: ‘Indileni, ndee tamu pewa. Ngenge omu shii okupa ovana veni oipewa iwa, unene Xo yeni yomeulu ta yandje omhepo iyapuki kuava tave mu indile.’ (Lukas 11:9, 13) Jehova ota ka yandja nehalo liwa omhepo yaye iyapuki kwaava tave mu indile nomutima aushe. Eenghono daKalunga odo tadi longo otadi dulu oku ku kwafela u ude ko eityo leendjovo da nwefwa mo odo da shangwa mOmbibeli omido omayovi da pita. Omhepo yaKalunga otai ke ku kwafela yo u shiive nghee to dulu okutula moilonga etumwalaka li na eenghono lOmbibeli monghalamwenyo yoye. — Ovaheberi 4:12; Jakob 1:5, 6.
Onghee hano, efimbo keshe to lesha Ombibeli, ilikana kuKalunga, to mu pula e ku pe omhepo yaye iyapuk i ku kwafele opo u ude ko Eendjovo daye.