Kala ho dulika nou na ouladi ngaashi Kristus

“Kaleni [mu na ouladi, NW], Ame onda finda ounyuni.” — JOH. 16:33.

1. Jesus okwa li ha dulika kuKalunga shi fike peni?

JESUS KRISTUS oha longo alushe ehalo laKalunga. Ke na efiku a li ina dulika kuXe womeulu. (Joh. 4:34; Heb. 7:26) Ndele eenghalo odo a li a shakeneka kombada yedu oda li de shi ninga shidjuu kuye okudulika. Eshi Jesus a hovela oilonga yaye yokuudifa, ovatondi vaye, mwa kwatelwa Satana, ova li tava kendabala oku mu tomha, oku mu kondjifa noku mu heka a efe po oudiinini waye. (Mat. 4:1-11; Luk. 20:20-25) Ovatondi ovo ova li va etela Jesus ouyahame munene wopamadiladilo, wopamaliudo nowopalutu. Hauxuuninwa, ova li va pondola oku mu dipaifa komuti womahepeko. (Mat. 26:37, 38; Luk. 22:44; Joh. 19:1, 17, 18, NW) Ndele nonande Jesus okwa li a pita meenghalo didjuu da tya ngaho, okwa li a “dulika fiyo omefyo.” — Lesha Ovafilippi 2:8.

2, 3. Oshike hatu dulu okulihonga mokukala kwaJesus omuduliki nonande okwa li ta mono oixuna?

² Eenghalo odo Jesus a li a shakeneka eshi a li omunhu kombada yedu ode mu kwafela e lihonge kutya ohashi kala sha tya ngahelipi okudulika ngeenge omunhu e li meenghalo didjuu odo ina shakeneka nande onale. (Heb. 5:8) Otashi monika sha fa kutya Jesus ka li vali e na okulihonga sha kombinga yokulongela Jehova. Jesus okwa kala e na ekwatafano liwa naJehova oule womido dihapudihapu nokwa kala ‘omulongi waJehova onghulungu’ pefimbo lokushitwa kwoinima. (Omayel. 8:30, NW) Ndele okulididimikila kwaye okumona oixuna e li omunhu nokudiinina eitavelo laye oya li ya ulika kutya omudiinini filufilu. Jesus, Omona waKalunga, okwa li a kulika ekwatafano lopofingo naXe. Oshike mbela hatu dulu okulihonga moshimoniwa shaye?

³ Nonande Jesus okwa li a wanenena, ka li a kendabala okudulika filufilu kuye mwene. Ndele ponhele yaasho, okwa li ha ilikana kuKalunga e mu kwafele opo a dulike. (Lesha Ovaheberi 5:7.) Nafye otwa pumbwa okukala twe lininipika nokwiilikana pandjikilile kuKalunga e tu kwafele opo tu kale hatu dulika. Nomolwaasho omuyapostoli Paulus okwa pa Ovakriste omayele a ti: ‘Omadiladilo eni naa fe enya aKristus Jesus kwa li e a na, oo e lininipika Ye mwene nokwa dulika fiyo omefyo.’ (Fil. 2:5-8) Onghalamwenyo yaJesus oya ulika kutya ovanhu otava dulu okudulika nonande ove li mokati kovanhu ovakolokoshi. Oshoshili kutya Jesus okwa li a wanenena, ndele mbela ongahelipi shi na sha novanhu ovo inava wanenena ngaashi fye?

Ohatu dulu okudulika nonande inatu wanenena

4. Okushitwa tu na emanguluko lokuninga omatokolo osha hala okutya ngahelipi?

⁴ Kalunga okwa li a shita Adam naEva ve na eendunge nove na emanguluko lokuninga omatokolo. Tu li oludalo lavo, nafye otu na emanguluko lokuninga omatokolo. Mbela osho osha hala okutya ngahelipi? Osha hala okutya ohatu dulu okutokola okulonga osho shiwa ile osho shii. Noitya imwe, Kalunga okwe tu pa emanguluko lokuhoolola okudulika kuye ile okuhadulika kuye. Ndele nonande otu na emanguluko linene la tya ngaho, otu na oku ke lihokolola kuye. Omatokolo oo hatu ningi e na sha naasho shi li mondjila ile sha puka otaa dulu okutya omwenyo ile efyo kufye, notaa dulu yo okukuma ovanhu ovo ve tu dingilila.

5. Atusheni otu na okukondjifa shike, nongahelipi hatu dulu okupondola?

⁵ Omolwokuhawanenena kwetu oko twa fyuulula, okudulika ihaku uya ashike paushitwe, noihashi kala alushe shipu okudulika keemhango daKalunga. Paulus naye okwa li e na okukondja opo a kale ha dulika. Okwa shanga a ti: “Moinhimbu yange ondi wete omhango ikwao tai kondjifa omhango yomadiladilo ange, ndele otai pikile nge momhango youlunde i li moinhimbu yange.” (Rom. 7:23) Ohashi kala shipu okudulika ngeenge omunhu ina pumbwa okuninga eliyambo ile itashi mu ehameke ile ngeenge eenghalo ode mu wapalela. Ndele mbela ohatu linyenge ngahelipi ngeenge pe na ekondjifafano pokati kokukala twa hala okudulika nosho yo “okahalu kombelela nokahalu komesho”? Okahalu kombelela nokahalu komesho ohaka xwaxwamekwa kokuhawanenena kwetu nosho yo kenwefemo ‘lomhepo younyuni’ oyo ye tu dingilila, noinima ya tya ngaho otai dulu oku tu nwefa mo neenghono. (1 Joh. 2:16; 1 Kor. 2:12) Opo tu kondjife oinima ya tya ngaho, otu na ‘okulongekida omitima detu’ fimbo inatu hangika komaupyakadi ile komayeleko nokukala twa tokola toko kutya ohatu ka dulika kuJehova kashi na nee mbudi kutya oshike tashi ningwa po. (Eps. 78:8, NW) Otu na oihopaenenwa ihapu mOmbibeli yovanhu ovo va li va pondola molwaashi ova li va longekida omitima davo. — Esra 7:10, NW; Dan. 1:8, NW.

6, 7. Yandja oshihopaenenwa u yelife nghee okuninga ekonakonombibeli lopaumwene taku dulu oku tu kwafela tu ninge omatokolo e li pandunge.

⁶ Onghedi imwe oyo hatu dulu okulongekida omitima detu oyo okukonakona Omishangwa noukeka nosho yo oishangomwa ya kanghamena kOmbibeli. Kala nee ngeno wa fa u wete u li monghalo ei tai landula apa: Natu tye nee ngeno oto ningi ekonakonombibeli loye lopaumwene konguloshi oyo ho li ningi. Fimbo ino hovela ekonakono, owa ilikana kuJehova e ku pe omhepo yaye i ku kwafele u tule moilonga osho to lihongo mEendjovo daye. Owa ninga vali omhangela yoku ka tala ofilima yonhumba ko-TV onguloshi yefiku tali landula ko. Owa uda ovanhu tava popile mouwa ofilima oyo, ashike ou shii kutya oi na oinima imwe ya nyika oluhaelo nelongifo leenghono.

⁷ Opo nee owa dilonga komayele aPaulus oo e li mOvaefeso 5:3, taa ti: “Oluhaelo nakeshe tuu onyata youlunde ile olwisho inali tumbulwa nande vali mokati keni — ngaashi sha wapalela ovayapuki.” Owa dimbuluka yo omayele aPaulus oo e li mOvafilippi 4:8. (Lesha.) Fimbo to dilonga komayele oo a nwefwa mo, owe lipula kutya: ‘Ngeenge onda palula owina omadiladilo ange nomutima wange neeprograma da tya ngaho, mbela ohandi landula ngoo oshihopaenenwa shaJesus shi na sha nokudulika filufilu kuKalunga?’ Mbela oto ka ninga po shike? Mbela oto ka tala ngoo vali ofilima oyo?

8. Omolwashike tu na okudiinina omifikamhango daJehova dopaenghedi?

⁸ Osha puka okulipwililikila omifikamhango daJehova dopaenghedi, tashi dulika hatu diladila kutya otwa pama pamhepo nohatu dulu okukondjifa enwefemo leendafano lii, nokuli nongeenge eendafano olo ola kwatela mo omalihafifo e na sha nelongifo leenghono nosho yo oinima ya nyika oluhaelo. Ponhele yaasho, otu na okuliamena fye vene nosho yo ounona vetu opo tuha nwefwe mo koikala ii yaSatana. Pashihopaenenwa, ngeenge ovanhu vamwe tava diki eengudi deenduda, ohave di vaeke omahooli opo ve di amene diha like po keehedi, molwaashi ove shii kutya eehedi otadi dulu okulya po nokuli neengudi odo da kola neenghono. Mbela nafye katu na okukala oupafi shi dulife nale opo tu liamene ‘komakonda’ aSatana? — Ef. 6:11.

9. Omolwashike tu na okukala twa tokola toko okudulika kuJehova efiku keshe?

⁹ Efiku keshe konyala ohatu ningi omatokolo monghedi yonhumba ile yongadi shi na sha nongeenge ohatu ka ninga ngoo oinima metwokumwe nehalo laJehova ile hasho. Opo tu ka xupifwe, otu na okukala hatu dulika kuKalunga nokukala metwokumwe nomafinamhango aye ouyuki. Ohatu ka ulika kutya otu na eitavelo lashili ngeenge otwa landula oshihopaenenwa shaKristus shi na sha nokudulika, “fiyo omefyo” nokuli. Jehova ote ke tu pa ondjabi omolwoudiinini wetu. Jesus okwa udaneka a ti: “Ou te lididimike fiyo exulilo, oye ta xupifwa.” (Mat. 24:13) Oshoshili kutya osho otashi pula ouladi washili, ngaashi oo wa li wa ulikwa kuJesus. — Eps. 31:24.

Jesus oku li oshihopaenenwa sha denga mbada shokukala nouladi

10. Omashongo elipi tashi dulika tu shakeneke, notu na okulinyenga ngahelipi kuo?

¹⁰ Otwa pumbwa okukala ovaladi opo tuha nyatekwe koikala nokelihumbato lounyuni oo we tu dingilila. Ovakriste ohava shakeneke omashongo ngaashi, ouxupilo, enwefemo loomakula, elihumbato lii lopaenghedi lovanhu ovo ve va dingilila nosho yo omapataneko omalongelokalunga. Oinima oyo otai dulu oku va ningifa va efe po okweenda meendjila daJehova douyuki. Ovakriste vahapu ohava patanekwa momaukwaneumbo. Moilongo imwe, oiputudilo yehongo otai xumifa komesho neenghono ehongo loevolusi, novanhu vahapu ova itavela kutya Kalunga ke ko. Tu li Ovakriste, ngeenge otwa shakeneke oinima ya tya ngaho, katu na ashike okukala twa mwena. Otu na okukatuka eenghatu opo tu dule okukondjifa oinima ya tya ngaho, nokungaho, ohatu ke liamena. Oshihopaenenwa shaJesus otashi tu kwafele tu mone kutya ongahelipi hatu dulu okupondola.

11. Ongahelipi okudilonga koshihopaenenwa shaJesus taku dulu oku tu kwafela tu kale tu na ouladi wa xwama?

¹¹ Jesus okwa lombwela ovahongwa vaye a ti: “Mounyuni omu li mo mu noudjuu, [kaleni mu na ouladi, NW], Ame onda finda ounyuni.” (Joh. 16:33) Jesus okwa li ha kondjifa alushe omanwefemo ounyuni. Ke na efiku a efele ounyuni u mu efife po oilonga yaye yokuudifa ile u mu ningife aha dulike filufilu komifikamhango delongelokalunga lashili di na sha nelihumbato. Nafye otu na okuhopaenena oshihopaenenwa shaye. Jesus okwa li a popya kombinga yovahongwa vaye meilikano a ti: “Kave fi vomounyuni, ngaashi Ame ndi he fi womounyuni.” (Joh. 17:16) Okukonakona nokudilonga koshihopaenenwa shaKristus shouladi otaku dulu oku tu kwafela tu kale tu na ouladi opo tuha kale oshitukulwa shounyuni.

Natu lihonge okukala ovaladi koshihopaenenwa shaJesus

12-14. Yandja oihopaenenwa oyo tai ulike kutya Jesus oku na ouladi.

¹² Jesus okwa li a ulika ouladi wa xwama moukalele waye aushe. E li Omona waKalunga, okwa li a ulika eenghonopangelo daye, ‘mokuya motembeli yaKalunga nopehe na oumbada; ndele ta te mo aveshe ovo va li mo tava lande naava tava landele motembeli, nokuundulila poshi oitaafula yovakumaani voimaliwa noipundi yovalandifi veenghuti.’ (Mat. 21:12) Eshi ovakwaita va li ve uya okukwata po Jesus moufiku waye waxuuninwa kombada yedu, Jesus okwa li a katuka eenghatu nouladi opo a amene ovahongwa vaye, a ti: ‘Ngeenge Aame tamu kongo, efeni ava va ye.’ (Joh. 18:8) Efimbo lixupi konima yaasho, Jesus okwa li a lombwela Petrus a shune mo eongamukonda laye moshilaleko, naasho osha li sha ulika kutya Jesus ka li e lineekela moilwifo oyo ya longwa kovanhu, ndele okwa li e lineekela muJehova. — Joh. 18:11.

¹³ Nokuhenoumbada, Jesus okwa li a nyaneka pomutenya okuhenohole nosho yo omahongo oipupulu ovahongi vopefimbo laye. Okwa li e va lombwela a ti: ‘Woo nye, ovanongo vomishangwa novafarisai, ovanaihelele nye, eshi tamu idilile po ovanhu oshivelo shouhamba wokeulu. Hamu efa oinenenima yomomhango ouyuki nefilonghenda noudiinini! Hamu yelifa eholo netiti kombada, ndele meni oli yadi enyeko noufukenhu.’ (Mat. 23:13, 23, 25) Ovahongwa vaJesus ova li va pumbwa okukala ve na ouladi wa fa waye molwaashi ovawiliki vomalongelokalunga oipupulu ova li yo tave ke va hepeka nokudipaa vamwe vomuvo. — Mat. 23:34; 24:9.

¹⁴ Jesus okwa li yo a kondjifa nouladi eendemoni. Pomhito imwe, okwa li a shakena nomulumenhu umwe e na eendemoni, odo da li de mu ningifa a kale e na eenghono nokapa li oo a dula okumanga omulumenhu oo nelyenge. Nopehe na oumbada, Jesus okwa li a ta mo eendemoni dihapu odo da li tadi hepeke omulumenhu oo. (Mark. 5:1-13) Kunena, Kalunga ina pa Ovakriste eenghono dokulonga oikumwifilonga ya tya ngaho. Ndele eshi hatu wanifa po oilonga yetu yokuudifa nokuhonga, nafye otu na okukondjifa Satana, oo a ‘twikifa eendunge daavo vehe na eitavelo.’ (2 Kor. 4:4) Ngaashi Jesus, oilwifo yetu “kai fi yopambelela, ndelenee oya pama koshipala shaKalunga okuhanauna po eenguluhote,” sha hala okutya, omahongo a puka omalongelokalunga oo a kanyatelwa kovanhu. (2 Kor. 10:4) Ohatu lihongo shihapu koshihopaenenwa shaJesus shi na sha nanghee tu na okulongifa oilwifo yopamhepo.

15. Ouladi waJesus owa li we likolelela kushike?

¹⁵ Ouladi waJesus kawa li we likolelela kekuni ndele okeitavelo. Nafye otu na okukala tu na ouladi wa tya ngaho. (Mark. 4:40) Ongahelipi hatu dulu okukala tu na eitavelo lashili? Natango, ohatu dulu okulandula oshihopaenenwa shaJesus. Jesus okwa li e shii nawa Omishangwa nokwa li e di lineekela filufilu. Jesus ka li ha lu noilwifo yopambelela, ndele okwa li ha lwifa eongamukonda lomhepo, sha hala okutya, Eendjovo daKalunga. Jesus okwa li ha yambidida luhapu omahongo aye nOmishangwa. Okwa li yo ha hovele luhapu eendjovo daye noutumbulilo oo kutya: “Okwa shangwa,” ta ulike kwaasho shi li mEendjovo daKalunga.a

16. Oshike tashi dulu oku tu kwafela tu kale tu na eitavelo la kola?

¹⁶ Opo nafye tu dule okukala tu na eitavelo olo tali dulu oku tu kwafela tu kondjife omayeleko nomupondo oo taa dulu oku tu hanga tu li Ovakriste, otu na okukala hatu lesha Ombibeli noku i konakona efiku keshe nosho yo okukala pokwoongala kwopaKriste, opo tu findile momadiladilo etu eeshili odo di li ekanghameno leitavelo letu. (Rom. 10:17) Otu na yo okukala hatu dilonga moule kombinga yaasho twe lihonga, opo shi ye moule womitima detu. Ngeenge eitavelo letu oli na oilonga, otali ke tu linyengifa tu katuke eenghatu nouladi. (Jak. 2:17) Otu na yo okwiilikana tu pewe omhepo iyapuki molwaashi eitavelo oli li oshitukulwa shoshiimati shomhepo. — Gal. 5:22.

17, 18. Omumwameme umwe omunyasha okwa li a ulika ngahelipi ouladi kofikola?

¹⁷ Omumwameme umwe omunyasha wedina Kitty okwa li a mona nghee eitavelo lashili hali kwafele ovanhu va kale ve na ouladi. Okudja kounona, Kitty okwa kala e shii kutya ke na ‘okufya ohoni evangeli’ kofikola, nokwa li shili a hala okuyandja oundombwedi kovanafikola vakwao. (Rom. 1:16) Omudo keshe, Kitty okwa li ha kala a halelela okuudifila ovanafikola vakwao, ndele ka li e na ouladi. Eshi a li e na omido omulongo nasha, okwa li a tembukila kofikola imwe. Okwa ti: “Pomhito ei, itandi ka hepifa nande eemhito da tya ngaha ngaashi nale.” Kitty okwa li a ilikana a pewe ouladi wa fa waKristus, elungi nosho yo omhito iwa.

¹⁸ Eshi Kitty a ya kofikola oko efiku lotete, ovanafikola ova li va pulwa va popye kutya ovo oolyelye kooumwe nooumwe. Ovanafikola vahapu ova li va tumbula omalongelokalunga avo, nokupopya kutya ihava kufa lela ombinga momalongelokalunga avo pandjikilile. Kitty okwa li a didilika kutya okwa mona omhito oyo a li a ilikana a pewe. Eshi olufo laye lokupopya la li la fika, okwa popya nouladi a ti: “Ame oumwe womEendombwedi daJehova, nohandi wilikwa kOmbibeli moinima i na sha nelongelokalunga nosho yo elihumbato liwa.” Eshi Kitty a twikila okupopya, ovanafikola vamwe ova li tave mu tale ve mu yemba. Ashike vamwe ova li va pwilikina nawa nokonima yefimbo ova li va pula omapulo. Omuhongi okwa li nokuli a popya kutya Kitty oku li oshihopaenenwa shiwa omolwokupopila eitavelo laye. Kitty okwa hafa neenghono eshi e lihonga okukala omuladi koshihopaenenwa shaJesus.

Kala u na ouladi neitavelo ngaashi Kristus

19. (a) Okukala neitavelo lashili okwa kwatela mo shike? (b) Ongahelipi hatu dulu okuhafifa Jehova?

¹⁹ Ovayapostoli navo ova li va mona kutya eenghatu odo tava katuka omolwouladi odi na okukala de likolelela keitavelo. Ova li va indila Jesus tava ti: “Tu wedela eitavelo.” (Lesha Lukas 17:5, 6.) Okukala neitavelo lashili osha kwatela mo shihapu shihe fi ashike okwiitavela kutya Kalunga oko e li. Okukala neitavelo okwa kwatela mo okukala tu na ekwatafano lopofingo naJehova, ngaashi olo okaana kanini haka kala ke na naxe omunahole noku na olune. Salomo okwa nwefwa mo a shange ta ti: “Omumwange, omutima woye ngenge tau mono ounongo, opo nee omutima wange yo otau hafe. Neefiyo dange tadi kuwilile, omilungu doye ngenge tadi popi odo da yuka.” (Omayel. 23:15, 16) Sha faafana, okupopila nosho yo okudiinina omafinamhango ouyuki nouladi ohashi hafifa Jehova. Onghee hano, okukala tu shii kutya osho ohashi hafifa Jehova, oshi na oku tu kwafela tu kale twa nyatipala nokuhopaenena alushe oshihopaenenwa shaJesus shokupopila nokudiinina omafinamhango ouyuki nouladi.

[Eshangelo lopedu]

Oto dulu okuyelifa?

• Oshike tashi dulu oku tu kwafela tu kale hatu dulika nonande inatu wanenena?

• Eitavelo lashili ole likolelela kushike, nongahelipi osho tashi dulu oku tu kwafela tu kale ovaladi?

• Ohatu ka mona oidjemo ilipi ngeenge otwa kala hatu dulika notu na ouladi wa fa waKristus?

[Efano pepandja 16]

Oto ‘longekida ngoo omutima woye’ opo u dule okukondjifa omayeleko?

[Efano pepandja 18]

Ngaashi Jesus, nafye ohatu dulu okukala tu na ouladi we likolelela keitavelo