Omhepo iyapuki oyo eenghono odo wa pumbwa monghalamwenyo yoye

OHAMBA David oya li ya ilikana ya mana mo konima eshi ya li ya nyona sha kwata moiti, ya ti: “Ino ekela nge shi nande koshipala shoye, nOmhepo yoye Iyapuki ino i kufulula nge.” — Epsalme 51:13.

David okwa li ha kwafelwa luhapu keenghono domhepo iyapuki. Eshi a li natango omunyasha womido omulongo nasha, omhepo iyapuki oya li ye mu kwafela a finde Goljat, omukwaita oo a li mutilifa. (1 Samuel 17:45-50) Oya li yo ye mu pameka opo a shange amwe omomapsalme aye mawa kuhe na vali. David okwa ti: “Omhepo yOmwene tai popi muame, neendjovo daye di li kelaka lange.” — 2 Samuel 23:2.

Jesus Kristus naye okwa koleka kutya omhepo iyapuki oya li ya kwafela David. Pomhito imwe, Jesus okwa li a lombwela ovapwilikini vaye a ti: “David mwene okwa tile kOmhepo Iyapuki: Omwene okwa lombwela Omwene wange: Kala omutumba kolulyo lange fiyo handi tula ovatondi voye koshi yeemhadi doye.” (Markus 12:36; Epsalme 110:1) Jesus okwa li e shii kutya David okwa li a kwafelwa komhepo iyapuki opo a shange omapsalme aye. Mbela omhepo iyapuki ya tya ngaho otai dulu ngoo oku tu kwafela?

“Indileni, ndee tamu pewa”

Otashi dulika ku na efiku u shange epsalme. Ashike otashi dulika u shakeneke omaupyakadi matilifi a fa omutongolume Goljat. Natu ka taleni koshihopaenenwa shaIsabel.a Omushamane waye okwa li e mu fiya po a ya komukainhu umwe omunyasha. Okwa li e mu fiila eengunga dihapu, noka li he mu yambidida painiwe opo e mu kwafele a file oshisho ovanakadona vavo vavali. Isabel okwa ti: “Onda li ndi udite nda kengelelwa nonda ungaungwa naame monghedi ihe fi yefimaneko. Ndele nande ongaho, onda mona kutya omhepo iyapuki oya li ya kwafela nge, okudja eshi omushamane wange a fiya nge po.”

Mbela Isabel okwa li ashike a teelela a pewe omhepo iyapuki ngahenya nopehe na okuninga eenghendabala da sha? Hasho nandenande! Ponhele yaasho, okwa li ha ilikana efiku keshe opo Kalunga e mu pe omhepo yaye iyapuki. Isabel okwa li e shii kutya okwa pumbwa eenghono okudja kuKalunga di mu kwafele a taalele onakwiiwa e na omukumo, a file oshisho nawa ovana vaye nokukala vali e udite kutya oku na oshilonga. Okwa li a tula moilonga eendjovo daJesus odo tadi ti: “Indileni, ndee tamu pewa; kongeni, ndee tamu mono; kongholeni, ndee tamu yeululwa.” — Mateus 7:7.

Roberto naye okwa li e wete kutya okwa pumbwa omhepo yaKalunga ndele omolwomatomheno amwe e lili. Roberto okwa li a pikwa komakaya nosho yo koingangamwifi, oyo a li ha shili luhapu. Okwa li a kendabala oule womido mbali opo a efe po okushila omakaya, ndele okwa kala ha dopa lwoikando oku a efa po. Roberto okwa ti: “Ngeenge omunhu wa efa po okulongifa oingangamwifi ohashi ku kumu pamaliudo. Oho kala yo u na oxwexwe yokushila oingangamwifi efiku keshe.”

Roberto okwa twikila ko a ti: “Onda li nda tokola toko opo ndi ninge omalunduluko monghalamwenyo yange ndi dule okulongela Kalunga monghedi oyo ta hokwa. Onda kendabala okuyadifa omadiladilo ange nomadiladilo mawa Ombibeli. Ohandi ilikana nda mana mo efiku keshe, handi pula Kalunga a pe nge eenghono opo ndi kaleke onghedi yange yokukalamwenyo metwokumwe nOmbibeli. Ondi shi shii kutya itandi dulu okupondola kwaame mwene. Onda mona nghee Jehova a nyamukula omailikano ange, unene tuu ngeenge nda teka omukumo shimha nda shili vali omakaya. Onda dimina kutya omhepo yaKalunga iyapuki oya pange eenghono dipe, ngeno kaya li po ngeno inandi dula okweefa po okulongifa oingangamwifi.” — Ovafilippi 4:6-8.

Otava yelula ‘omavava avo pombada ngaashi eenhwa’

Ngaashi Isabel naRoberto, Eendombwedi daJehova omamiliyona oda kwafelwa keenghono domhepo iyapuki monghalamwenyo yado. Eenghono daJehova tadi longo, odo a longifa okushita eshito alishe, oto dulu oku di mona ngeenge owa hala. Kalunga okwa halelela oku ku pa omhepo yaye ngeenge oto mu indile nomutima aushe. Ndele opo u mone omhepo iyapuki ya tya ngaho, owa pumbwa okulihonga oshili kombinga yaye nokulonga ehalo laye nomutima aushe. — Jesaja 55:6; Ovaheberi 11:6.

Omhepo iyapuki otai ke ku pameka opo u kale u na eenghono okulongela Kalunga nomupondo nokuungaunga nomashongo aeshe oo tashi dulika a holoke po monghalamwenyo yoye. Ombibeli oye tu shilipaleka ya ti: ‘[Jehova] ota pe ava va loloka ouladi, ndele ta hapupalifa eenghono daau ehe na eenghono. Ndelenee ovo hava teelele Omwene, otava pewa eenghono dipe, otava yelula omavava pombada ngaashi eenhwa. Otava tondoka, ndele itava loloka, tava ende, ndele itava wile po.’ — Jesaja 40:28-31.

[Omashangelo opedu]

[Efano pepandja 9]

EENGHEDI OMO OMHEPO IYAPUKI TAI DULU OKU TU KWAFELA

[Efano pepandja 9]

Omhepo iyapuki otai dulu oku ku pameka u kondjife omayeleko nou efe po eenghedindjikilile dii. Omuyapostoli Paulus okwa ti: “Kalunga Oye omudiinini, ite mu efa mu yelekwe nomayeleko e dule eenghono deni, ndele mumwe neyeleko ota longele yo omhito yokupita mo, opo mu dule oku li humbata.” — 1 Ovakorinto 10:13.

[Efano pepandja 9]

Omhepo iyapuki otai dulu oku ku kwafela u kulike omaukwatya oo a hokiwa kuKalunga. “Oiimati yOmhepo oyo ei: ohole, ehafo, ombili, onheni, oukaume, ouwa, oudiinini, engungumano, elididimiko.” — Ovagalati 5:22.

[Efano pepandja 9]

Omhepo iyapuki otai dulu oku ku pameka u lididimikile omayeleko. ‘Aishe ohandi i dulu omolwaau ta pameke nge.’ — Ovafilippi 4:13, yelekanifa no-NW.

[Efano pepandja 8]

‘Ohandi ilikana nda mana mo efiku keshe, handi pula Kalunga a pe nge eenghono. Ondi shi shii kutya itandi dulu okupondola kwaame mwene. Onda mona nghee Kalunga a nyamukula omailikano ange.’

[Efano pepandja 7]

Nghee Omhepo Iyapuki Hai Longo

Kalunga okwa longifa omhepo iyapuki mokushita edu nosho yo eshito alishe. Omupsalme umwe okwa ti: “Omwene, oilonga yoye oi fike peni! Aishe owe i shita nounongo, edu oli yadi oishitwa yoye.” Okwa weda ko a ti: “Ngenge to pitifa mo omufudo wOmhepo yoye, opo yo otai shitwa.” — Epsalme 104:24, 30; Genesis 1:2; Job 33:4.

Omhepo iyapuki oya nwefa mo ovalumenhu ovatilikalunga va shange Ombibeli. Omuyapostoli Paulus okwa ti: “Omishangwa adishe da yandjwa keenghono dOmhepo yaKalunga odi shii kulonga.” (2 Timoteus 3:16) Oshitya shOshigreka osho sha tolokwa “da yandjwa keenghono dOmhepo yaKalunga” otashi ti lelalela da “fudilwa mo kuKalunga.” Omufudo ile tu tye omhepo yaJehova oyo ya wilika omadiladilo ovashangi vOmbibeli va shange ‘eendjovo daye.’ — 1 Ovatessaloniki 2:13.

Omhepo iyapuki oya kwafela ovapiya vaKalunga va xunganeke onakwiiwa i li paushili. Omuyapostoli Petrus okwa ti: “Pe he na nande ouprofeti womomishangwa u shii okufatululwa keendunge domunhu; osheshi inapa etwa nande ouprofeti kehalo lomunhu, ndelenee ovanhu ovayapuki ova popya odo ve di pewa kuKalunga nokuwilikwa kOmhepo Iyapuki.” — 2 Petrus 1:20, 21; Joel 2:28.

Omhepo iyapuki oya li ya kwafela Jesus nosho yo ovalumenhu vakwao veitavelo va udife onghundana iwa yOuhamba waKalunga nokulonga oikumwifilonga. Jesus okwa ti: ‘Omhepo yOmwene oi li kombada yange, osheshi Ye okwa vaeka nge ndi udifile eehepele evangeli. Okwa tuma nge ndi ingidile eenghwate emangululo novapofi etwikululo.’ — Lukas 4:18; Mateus 12:28.