Ekonakono loukwaneumbo ola fimanenena omolwexupifo

DILADILA ashike kutya “oita mefiku linene laKalunga omunamapangelo aeshe” otai ka kala itilifa shi fike peni! (Eh. 16:14) Omuprofeti Mika okwa longifa eendjovo dopafaneko da twa, a ti: ‘Eemhunda otadi hengumuka nomafilu otaa tende omifya ngaashi edu tali hekuluka komundilo, ngaashi omeva taa kunguluka komhunda ya yukilila.’ (Mika 1:4) Ovanhu ovo itava longele Jehova otava ka hangwa koilanduliko ya nyika oshiponga ilipi? Eendjovo daKalunga oda ti: “Oonakudipawa kOmwene otava ka kala nokunangala kominghulo dounyuni fiyo ominghulo dikwao.” — Jer. 25:33.

Okutala komalondwelo oo, omitwe domaukwaneumbo, odo dihapu di li ovadali vehe na ookaume kopahombo, odi na okulipula kombinga younona vavo ovo va kula kutya: ‘Mbela ounona vange otava ka xupa ngoo puHarmagedon?’ Ombibeli oya shilipaleka kutya otava ka xupa ngeenge ova hangwa ve na ekwatafano lopofingo naJehova, she likolelela keedula davo. — Mat. 24:21.

Osha fimana okukala mwe litulila po efimbo lEkonakono lOukwaneumbo

U li omudali, ninga eenghendabala ngaashi to dulu opo u tekule ounona voye “meduliko nomekumaido lOmwene.” (Ef. 6:4) Osha fimanenena okukala hamu konakona Ombibeli nounona voye. Otwa hala ounona vetu va kale va fa Ovakriste vokuFilippi, ovo va li va pandulwa kuPaulus omolwokudulika kwavo kuJehova nehalo liwa. Paulus okwa ti: “Ovaholike vange, ngaashi mwa kala hamu dulika alushe, longeni shili nokutila nokukakama mu xupifwe, hasheshi ndi li mokati keni ashike, ndelenee unene paife, eshi ndi he po punye.” — Fil. 2:12.

Ounona voye ohava dulika ngoo keemhango daJehova ngeenge uhe li navo? Ongahelipi ngeenge ve li kofikola? Ongahelipi to dulu oku va kwafela va kale va tomwa kutya eemhango daJehova odi li pandunge opo va dule okuwilikwa kudo nokuli nongeenge ve li ovo aveke?

Ekonakono loukwaneumbo otali dulu okudana onghandangala inene mokukwafela ounona va kale ve na eitavelo. Onghee hano, natu ka kundafaneni oinima itatu ya fimana oyo tai dulu oku mu kwafela mu kale mu na ekonakonombibeli loukwaneumbo tali pondola.

Kaleni hamu ningi Ekonakono lOukwaneumbo pandjikilile

Elaka lOmbibeli lopehovelo otali ulike kutya outumbulilo oo wa tolokwa “efiku limwe” muJob 1:6, otau ulike kutya ovana vaKalunga ovaengeli ova li hava shivwa koshipala shaYe pomaufwafimbo. Nanye osho mu ninga ngaho nounona veni. Tule i po efiku nefimbo lokondadalunde olo mu na okukala hamu ningi Ekonakono lOukwaneumbo noku li diinina. Kakele kaasho, tule i po yo efimbo lokondadalunde olo mu na okuninga Ekonakono lOukwaneumbo ngeenge pa holoka eenghalo dombadilila.

Mokweendela ko kwefimbo, inamu kala hamu faula okuninga Ekonakono lOukwaneumbo. Dimbuluka kutya ounona voye ove li ovakonakonimbibeli voye va fimanenena. Ndele nande ongaho, Satana okwa hala oku va ninga oihakanwa yaye. (1 Pet. 5:8) Ngeenge owa longifa po efimbo lEkonakono lOukwaneumbo olo la fimanenena mokutala o-TV ile okuninga oinima imwe inai fimana, kungaho, Satana okwa findana. — Ef. 5:15, 16; 6:12; Fil. 1:10.

Ekonakono lOukwaneumbo nali kale la kwatela mo oinima oyo ya kuma onghalamwenyo yakeshe efiku

Ekonakono lOukwaneumbo oli na okukwatela mo shihapu shihe fi ashike okulihonga oinima yonhumba. Kendabala okukwatela mo oinima oyo ya kuma onghalamwenyo yakeshe efiku. Ngahelipi mbela? Omafimbo amwe, hoolola oikundafanwa oyo ya pamba eenghalo odo ounona voye tava ka shakeneka momukokomoko womafiku ile woivike i li komesho. Pashihopaenenwa, omolwashike ito kwatele mo omalideulo e na sha naasho tamu ka popya moukalele? Ounona ohava hafele okuninga oinima oyo hava ningi nawa muyo. Okukala hamu lilongekida osho tamu ka popya moukalele nokudiladila keenghedi omo tamu dulu okuungaunga novanhu ovo tave mu pataneke otashi ka kwafela ounona va kale ve na omukumo eshi tava kufa ombinga moilonga yokuudifa Ouhamba meenghedi di lili noku lili. — 2 Tim. 2:15.

Otamu dulu yo okuninga omalideulo oo taa ka kwafela ounona voye va dule okuungaunga nomafininiko oomakula. Otamu dulu okuhovela eenghundafana doukwaneumbo tamu longifa embo Questions Young People Ask — Answers That Work, Embo eti-2, etukulwa 15.a Oshitukulwa osho tashi ti: “Peer-Pressure Planner” ile tu tye, “Osho nda diladila oku ka tya opo ndi finde omafininiko oomakula,” osho shi li pepandja 132 nosho yo 133 otashi yandje omaetepo notashi yandje yo eemhito kounona voye va shange omanyamukulo oo ve wete kutya oo tava dulu oku ka longifa va manguluka. Etumbulo olo li li pedu lepandja 133 otali ladipike ovanyasha tali ti: “Liendifa po novadali voye ile nakaume koye e na owino shi na sha naasho to ka tya.” Omolwashike itamu kala hamu liendifa po pefimbo lEkonakono lOukwaneumbo omafimbo nomafimbo?

Ekonakono loukwaneumbo ohali pe ovadali eemhito va divilike ouwa oo hau di mokulitulila po omalalakano e na sha noinima yopamhepo. Young People Ask, Embo eti-2 oli na ouyelele wa denga mbada u na sha naasho, metukulwa 38 li na oshipalanyole: “Ohandi ka longifa ngahelipi onghalamwenyo yange?” Ngeenge tamu kundafana etukulwa olo, kwafela ounona voye va ude ko kutya omunhu ngeenge ota longifa onghalamwenyo yaye mokulongela Jehova oshinima sha denga mbada. Kwafela ounona voye va kale ve na ehalo okukokola ondjila, oku ka longa koBetel, okuya kOfikola yOkudeula mOukalele ile okulalakanena oilonga imwe i lili yefimbo li yadi.

Elondwelo: Ovadali vamwe ovo ve na omalinyengotomheno mawa ohava yandje unene elitulemo kwaasho va hala ounona vavo va ka ninge ndele tava dimbwa okupandula osho ounona tava ningi nale. Oshiwa shili okuladipika ounona ve litulile po omalalakano mawa a tya ngaho, ngaashi oilonga yaBetel nosho yo oilonga youtumwa. Ndele ngeenge to shi ningi, kala wa lungama uha handukife ounona voye shi na sha naasho wa hala va ninge noku va teya omukumo. (Kol. 3:21, NW) Dimbuluka alushe kutya okaana koye oke na okukala ke hole Jehova molwaashi oko vene ka hala, ndele hamolwaashi oove wa hala ka kale ke mu hole. (Mat. 22:37) Onghee hano, konga eemhito u pandule okaana koye mwaasho taka ningi nawa, nokuhenuka okuyandja unene elitulemo kwaasho itaka ningi. Ka kwafela ka kale ke na olupandu mwaashishe osho Jehova a ninga. Opo nee, efa omutima wokaana u linyengifwe kouwa waJehova.

Ekonakonombibeli lOukwaneumbo nali kale lihafifa

Oshinima oshititatu sha fimana osho tashi mu kwafele mu kale mu na Ekonakono lOukwaneumbo tali pondola osho oku li ninga monghedi ihafifa. Ongahelipi mbela to dulu oku shi ninga? Omafimbo amwe otashi dulika mu pwilikine koinyandwa oyo i li moungalo ile mu tale okavidio kehangano lEendombwedi daJehova noku ka kundafana. Ile otamu dulu okulesha oitukulwa yOmbibeli pamwe, naashi tamu lesha, unganeka keshe umwe moukwaneumbo a leshe e lile po omunhu wonhumba metukulwa olo tamu lesha.

Ope na oitukulwa i lili noku lili mOshungonangelo nosho yo mo-Awake!, oyo iwa okulongifa mokuhovela eenghundafana doukwaneumbo. Pashihopaenenwa, oto dulu okulongifa oshitukulwa osho hashi kala pepandja 31 loshifo sho-Awake!, shi na oshipalanyole: “How Would You Answer?” ile tu tye, “Oto nyamukula ngahelipi?” Konyala moshifo keshe shOshungonangelo yomoukalele yOshiingilisha ohamu kala oshitukulwa shokuninga ekonakono shi na oshipalanyole: “For Our Young People,” ile tu tye, “Shovanyasha vetu.” Omafimbo amwe ohamu kala oitukulwa imwe ya nuninwa ovamati noukadona ovanyasha i na oshipalanyole: “Teach Your Children” ile tu tye, “Honga ounona voye.”

Oitukulwa oyo hai kala mo-Awake! i na oshipalanyole: “Young People Ask” ile tu tye, “Ovanyasha tava pula” otai ka kala ihokwifa kovadali ovo ve na ounona ve li mepupi lokamukondapweyu, ngaashi ashike Young People Ask, Embo eti-2. Ngeenge tamu longifa embo olo, kundafaneni yo oshimhungu shi na oshipalanyole: “What Do You Think?” ile tu tye, “Oto diladila ngahelipi?” osho shi li pexulilo letukulwa keshe. Oshimhungu osho osha kwatela mo shihapu shihe fi ashike eendululo. Omapulo oo e li moshimhungu osho otaa dulu okulongifwa mokuhovela eenghundafana doukwaneumbo.

Ashike kala wa lungama opo ekonakono loukwaneumbo liha ninge efimbo lokupula omapulo okanaku. Pashihopaenenwa, ino kondjifa okaana ka leshe pombada oinima oyo ka shanga pomapandja opo pe na oshipalanyole: “My Journal,” ile tu tye, “Epandja lange lokushanga,” ile pepandja keshe lembo opo okaana ka shanga. Oshitukulwa osho shi li pepandja 3 shi na oshipalanyole: “Osho ovadali ve na okudidilika” osha ti: “Ladipika ounona voye vomido omulongo nasha va shange momambo avo tava popi oshili, opo va kale ve na omhito yokuninga oinima yavo yopaumwene. Konima yefimbo, otashi dulika ounona va ka kale va manguluka oku ku lombwela kombinga yoinima oyo va shanga.”

Jehova ota ka nangeka noupuna eenghendabala deni, ngeenge omwa kala hamu ningi ekonakono loukwaneumbo pandjikilile, lihafifa notamu kwatele mo oinima oyo ya kuma onghalamwenyo yakeshe efiku. Efimbo le likalekelwa loukwaneumbo la tya ngaho otali ka kwafela ovaholike voye va kale oupafi nova pama pamhepo.

[Omashangelo opedu]

[Oshimhungu pepandja 31]

Ekonakono lOukwaneumbo nali kale hali ningwa monghedi ihokwifa

J.M. wokOilongo yaHangana okwa ti: “Ngeenge hatu konakona novanakadona vetu vanini, ame nomushamane wange ohatu kundafana ouyelele opo tu lilongekidile okwoongala kweongalo, opo nee hatu pula ovanakadona vetu va faneke efano olo tali ngongo oshilihongomwa. Omafimbo amwe, ohatu ningi oinyandwa yoiningwanima yOmbibeli ile tu liendife po pomatwalemo oo hatu ka longifa moilonga yomomapya. Ohatu ningi ekonakono li kale tali wapalele omido davo, lihokwifa, tali tungu nolishambula.”

Y.T. wokuJapani okwa ti: “Opo ndi kwafele okamonamati komukonakonimbibeli wange ka ude ko kutya osha li hashi kala sha tya ngahelipi okulongifa omishangwatonywa pefimbo lOmbibeli, otwa li twa pilinda eekopi dembo lOmbibeli laJesaja, konima eshi twa dima mo eenomola domatukulwa neevelishe. Otwa li twa twikinika omapandja kumwe, nokomunghulo keshe otwa li twa tula ko oumunino. Okamati oka li ka kendabala okuhopaenena osho Jesus a li a ninga poshinagoga muNasaret. Ehokololo laLukas 4:16-21 otali ti kutya Jesus ‘okwa tonyununa omishangwa domuprofeti Jesaja, ndele te litu poima’ opo pe na oshitukulwa osho a li ta kongo. (Jes. 61:1, 2) Ndele eshi okamati ka li ka kendabala okuninga ngaashi Jesus, oka li ka mona shidjuu okumona Jesaja 61 taka longifa omushangwatonywa oo mule uhe na eenomola domatukulwa nosho yo deevelishe. Molwaashi oka li ka kuminwa ounghulungu waJesus wokuungaunga nomishangwatonywa, okamati oko oka ti: ‘Jesus ka li tuu mukumwifi!’”

[Efano pepandja 30]

Omafimbo okulilongekida otaa dulu okukwafela ounona voye va ungaunge nomafininiko oomakula

[Efano pepandja 31]

Kendabala okuninga Ekonakono lOukwaneumbo lihafifa