Ombibeli ohai lundulula onghalamwenyo yovanhu
MBELA oshike sha li she linyengifa orasta imwe i kulule ko eexwiki dayo dorasta noi efe po outondwe wokutonda oilumbu? Mbela oshike sha li she linyengifa omulumenhu umwe omunyasha omunamapove oo kwa li ha tumwa a ka pule ko oimaliwa kovanhu ovo ve na eendjo dovalandifi voingangamwifi a lundulule onghedi yaye yokukalamwenyo? Natu ka tale osho va ti.
“Onda li yo nda efa po outondwe wokutonda oilumbu.” — HAFENI NGHAMA
OMIDO: 34
OSHILONGO OMO A DALELWA: ZAMBIA
ONAKUDIWA: ORASTA
ONGHALAMWENYO YANGE YONALE: Onda dalelwa mokamba yeenhauki moZambia. Meme okwa li a ya onhapo okudja moNamibia pefimbo loita ndele ta ningi oshilyo shongudu yoSouth West Africa People’s Organization (SWAPO). Ongudu oyo okwa li tai lwifa epangelo laSouth Africa olo la li tali pangele Namibia pefimbo opo.
Onda kala meekamba deenhauki di lili noku lili omido dange 15 dotete dokukalamwenyo. Ovanyasha ovo va li meekamba do-SWAPO ova li va hongwa kutya nava yambidide o-SWAPO oyo tai kondjele emanguluko. Okwa li hatu hongwa opolitika notwa li twa hongwa tu kale tu tonde oilumbu.
Eshi nda li ndi na omido 11, onda li nda hala okukolekwa ndi li Omukriste mongeleka yomokamba oyo ya li ya fikama po membwida leengeleka, ngaashi Katolika kaRoma, Luteri, Angilikana nadikwao dimwe. Omufita oo nda li nda popya naye okwa li a shololifa nge ndiha kolekwe. Okudja opo, onda kala nda itavela kutya Kalunga ke ko. Ndele fimbo nda li ndi na omido 15, ohole yange yokuhola omusika yo-reggae nosho yo ehalo lokuxulifa po okuhenouyuki kumwe oko kwa li taku ningilwa ovalaule muAfrika oya li ye linyengifa nge ndi ye mongudu yEerasta. Onda li nda hovela okukulika eexwiki dange di ninge orasta, okushila epangwe, handi efa po okulya ombelela nonda li handi popile emanguluko lovalaule. Ndele nande ongaho, kanda li nda lundulula onghedi yange yokukalamwenyo inai koshoka nokanda li nda efa po okutala eefilima delongifo leenghono. Onda li yo nda twikila okukala handi longifa eendjovo inadi koshoka.
NGHEE OMBIBELI YA LUNDULULA ONGHALAMENYO YANGE: Mo 1995, eshi nda li ndi na omido 20, onda li nda hovela okudiladila nda mana mo shi na sha nonghalamwenyo yange. Onda li handi konakona oishangomwa yEerasta aishe oyo handi mono. Imwe yomuyo oya li ya popya kombinga yOmbibeli, ndele kanda li ndi udite ko kutya omayelifo ayo okwa hala okutya shike. Onghee hano, onda li nda tokola okulesha Ombibeli kwaame mwene.
Konima yefimbo, kaume kange umwe wOrasta okwa li a pange embo lokukonakona Ombibeli la nyanyangidwa kEendombwedi daJehova. Onda li nda konakona embo olo kwaame mwene pamwe nOmbibeli. Mokweendela ko kwefimbo, onda li nda shakeneka Eendombwedi daJehova ndele handi twikile okukonakona Ombibeli pamwe nado.
Onda li nda ninga eenghendabala da mana mo opo ndi efe po okushila oingangamwifi nokunwa omalodu sha pitilila. (2 Ovakorinto 7:1) Onda li nda lundulula eholokepo lange, handi kulula ko eexwiki dange dorasta, handi efa po okutala omafano oipala neefilima delongifo leenghono nosho yo okulongifa omalaka inaa koshoka. (Ovaefeso 5:3, 4) Hauxuuninwa, onda li yo nda efa po outondwe wokutonda oilumbu. (Oilonga 10:34, 35) Okuninga omalunduluko a tya ngaho okwa li kwa kwatela mo okweekelashi oungalo ovo tava xwaxwameke oukwamuhoko nosho yo okuxulifa po eendafano nookaume kange vonale, ovo va li tava kendabala okuningifa nge ndi shune konghedi yange yokukalamwenyo yonale.
Konima eshi nda ninga omalunduluko oo, onda li nda ka konga Olupale lOuhamba lEendombwedi daJehova ndele handi di pula ndi ye melongelokalunga lado. Opo nee, oda li da konakona Ombibeli naame. Ashike eshi nda li nda tokola okuninginifwa ndi li umwe womEendombwedi daJehova, ovapambele vange kava li va hafa. Meme okwa li a lombwela nge ndi hoolole limwe lomomalongelokalunga oo haku tiwa oopaKriste, ndele haEndombwedi daJehova. Tatekulu umwe womepata loomeme oo a li e na ondodo ya tumbala mepangelo okwa li ha kembaula nge lwoikando eshi nda tokola okukala handi endafana nEendombwedi.
Eshi nde lihonga kombinga yanghee Jesus a li ha ungaunga novanhu nokutula moilonga omayele aye, osha kwafela nge ndi lididimikile omapataneko nomasheko. Eshi nda li nda yelekanifa osho Eendombwedi hadi hongo naasho Ombibeli tai ti, onda li nda tomwa ndi itavele kutya onda mona elongelokalunga lashili. Pashihopaenenwa, Eendombwedi ohadi dulika koshipango shOmbibeli shokuudifila vamwe. (Mateus 28:19, 20; Oilonga 15:14) Natango, Eendombwedi ihadi kufa ombinga moinima yopapolitika. — Epsalme 146:3, 4; Johannes 15:17, 18.
OUWA OO NDA MONA: Okulihonga okukala metwokumwe nomifikamhango dOmbibeli okwa kwafela nge neenghono meenghedi dihapu. Pashihopaenenwa, eshi nda efa po okushila epangwe osha kwafela nge ndiha hepeke eedola omafele omwedi keshe. Ihandi ningi vali omahaluhalu noukolele wange wopamadiladilo nowopalutu owa xwepopala.
Onghalamwenyo yange paife kai li vali mehalakano noi na elalakano, ngaashi ashike nda li nda hala eshi nda li ndi na omido omulongo nasha. Ndele osho sha fimanenena oshosho kutya paife ondi udite nda ehena popepi naKalunga. — Jakob 4:8.
“Onde lihonga okupangela ehandu.” — MARTINO PEDRETTI
OMIDO: 43
OSHILONGO OMO A DALELWA: AUSTRALIA
ONAKUDIWA: OMULANDIFI WOINGANGAMWIFI
ONGHALAMWENYO YANGE YONALE: Oukwaneumbo wetu owa kala hau tembauka luhapu eshi handi kulu. Onda li handi kala moudoolopa vanini, moshilando sha kula nonda li yo nda kala momishiona yongeleka oule wefimbo koshitukulwa shokomikunda oko haku kala eedalele daAustralia. Ohandi dimbuluka nehafo eshi nda li pamwe novapambele vange, hatu kwata eeshi, hatu i koukongo, hatu hongo oinima yopamifyuululwakalo yeedalele domoshilongo osho nosho yo oinima ikwao.
Tate okwa li omudengingonyo nokwa li a hovela okuhonga nge okulwa fimbo nda li ndi munini lela. Onda li ndi hole omapove neenghono. Eshi nda li ndi na omido omulongo nasha, onda li handi kala luhapu meembaa handi nu. Ame nookaume kange otwa li hatu ka konga omalwoodi. Okwa li hatu longifa eembele nosho yo oiti yokudanifa oudano wo-baseball opo tu ponokele ovanhu 20 ile ve dule po.
Onda li handi limonene oimaliwa mokulandifa oingangamwifi nosho yo oinima oyo ya li hai vakwa kovanailonga vopetuliloshikepa. Onda li yo handi ka pula ko oimaliwa yovalandifi voingangamwifi oyo i li kovanhu noku va tilifa, handi longifa omishasho neembishitoli. Onda li nda lalakanena okuninga omudipai. Etokolo lange ola li kutya ohandi dipaa omunhu ile a dipae nge.
NGHEE OMBIBELI YA LUNDULULA ONGHALAMENYO YANGE: Onda li nda uda kombinga yEendombwedi daJehova fimbo nda li handi kulu. Eshi nda li ndi na omido 20 nasha, ohandi dimbuluka handi pula meme ngeenge oku shii opo hapa di dimwe domEendombwedi. Konima yomafiku avali okudja eshi nda pula ngaho, Ondombwedi yedina Dixon oya li ye uya peumbo letu. Eshi twa popya oule wefimbo, Dixon okwa li a shiva nge ndi ye kokwoongala kwEendombwedi daJehova. Onda li nda ya kokwoongala oko nonda kala handi i kokwoongala oule womido di dule 20 paife. Eendombwedi oda li da nyamukula epulo keshe olo nda li ndi na, da longifa Ombibeli.
Onda li nda hafela okulihonga kutya Jehova oku na ko nasha novanhu pauhandimwe, nokuli novahenakalunga. (2 Petrus 3:9) Onda didilika kutya Jehova oXe omunahole, oo ta file nge oshisho nokuli nonande kape na omunhu wonhumba oo te shi ningi. Onda li yo nda hafa okulihonga kutya Jehova ota ka dima po omanyono ange ngeenge onda lundulula onghedi yange yokukalamwenyo. Eendjovo dOvaefeso 4:22-24 oda li da kuma nge neenghono. Omushangwa oo owa li wa ladipika nge ‘ndi lidule omunhu mukulu’ nondi ‘djale omunhu mupe a shitwa a fa Kalunga.’
Osha li sha pula nge efimbo opo ndi lundulule onghedi yange yokukalamwenyo. Kanda li handi shili oingangamwifi momukokomoko woshivike, ndele mexuliloshivike onda li handi shili oingangamwifi omolwomafininiko ookaume kange. Onda li nda mona kutya ondi na okuya kokule nookaume kange ngeenge onda hala okuwapeka onghalamwenyo yange, onghee hano, onda li nda tembukila koshitukulwalongo shimwe. Ookaume kange vamwe ova li va pula va findikile nge nonda li nda dimina. Pefimbo lolweendo, ova li va hovela okushila epangwe ndele tava pe nge limwe. Onda li nde va lombwela kutya inandi hala vali okukala nonghedi yokukalamwenyo ya tya ngaho, nonda li nda twikila olweendo lange aame andike okudja peengaba doshitukulwalongo osho. Konima yefimbo onda ka uda kutya diva konima yaasho, ookaume kange ova teya ombaanga va longifa ondjebo.
OUWA OO NDA MONA: Eshi nda efa po okweendafana novanhu ovo va li ookaume kange, onda li nda mona shipu neenghono okuninga omalunduluko monghalamwenyo yange. Mo 1989, onda ninga Ondombwedi ya ninginifwa. Konima eshi nda ninginifwa, omumwamemekadona, meme natate navo ova hovela okulongela Jehova pamwe naame.
Paife onda kala nda hombola oule womido 17 nondi na ounona vatatu ovo ndi hole. Onde lihonga okupangela ehandu, nokuli nongeenge nda nyematekwa. Onde lihonga yo okukala ndi hole ovanhu ‘vomihoko adishe, vomaludi aeshe novomalaka aeshe.’ (Ehololo 7:9) Ondi wete kutya eendjovo daJesus oda wanifwa monghalamwenyo yange. Jesus okwa ti: “Ngenge tamu kala meendjovo dange, onye ovalongwa vange shili, ndele tamu ka shiiva oshili, noshili otai mu mangulula.” — Johannes 8:31, 32.
[Eendjovo dididilikwedi pepandja 9]
Okuninga omalunduluko okwa li kwa kwatela mo okweekelashi oungalo ovo tava xwaxwameke oukwamuhoko
[Eendjovo dididilikwedi pepandja 10]
Ame nookaume kange otwa li hatu ka konga omalwoodi. Okwa li hatu longifa eembele nosho yo oiti yokudanifa oudano wo-baseball opo tu ponokele ovanhu 20 ile ve dule po