Onghandangala oyo omhepo iyapuki tai dana mokuwanifwa kwelalakano laJehova

‘Ondjovo yange tai di mokanya kange otai wanifa eshi nde i tumina.’ — JES. 55:11.

1. Eyooloko lilipi li li pokati komhangela nelalakano?

NATU tye nee ngeno ope na ovalumenhu vavali tave lilongekida okuya molweendo nohauto. Omulumenhu umwe okwa diladila ondjila yokondadalunde oyo ta ka ya nayo opo a fike konhele yonhumba. Omulumenhu mukwao oku shii kondadalunde kutya ota i peni, ndele oku shii yo eendjila dihapu odo ta dulu okuya nado. Omulumenhu oo okwe lilongekida okulundulula ondjila oyo ta ende nayo ngeenge opa holoka eenghalo odo tadi pula a ninge omalunduluko. Eenghedi da yoolokafana odo da longifwa kovalumenhu ovo vavali vomefaneko otadi dulu okuyandja eyooloko olo li li pokati komhangela nosho yo elalakano monghedi yonhumba ile yongadi. Omhangela otai dulu okufaafanifwa nokudiladila shi na sha nondjila yokondadalunde oyo omunhu ta ka enda, ofimbo elalakano tali dulu okukwatela mo okukala u shii konhele oko to i, ndele inashi pumbiwa naanaa u kale to diladila ondjila yokondadalunde oyo u na okuya nayo.

2, 3. (a) Elalakano laJehova ola kwatela mo shike, nokwa li a ungaunga ngahelipi nonghalo oyo ya li ya holoka po eshi Adam naEva va nyona? (b) Omolwashike tu na okukala hatu yandje elitulemo kunghee elalakano laJehova tali wanifwa?

² Ngeenge Jehova ta wanifa po ehalo laye, iha kala a pangela omhangela, ndele oha kala e na elalakano lokuwanifa po ehalo laye. (Ef. 3:11, NW) Elalakano laye ola kwatela mo osho a li a lalakanena pehovelo shi na sha novanhu nosho yo edu, sha hala okutya, okuninga edu alishe oparadisa omo ovanhu va wanenena tava dulu okukala fiyo alushe mombili nova hafa. (Gen. 1:28) Eshi Adam naEva va nyona, Jehova okwa li a ninga po omalongekido opo a shilipaleke kutya elalakano laye otali ka wanifwa. (Lesha Genesis 3:15.) Jehova okwa li a tokola kutya omukainhu waye wopafaneko ota ka dala ‘oludalo’ ile Omona, oo hauxuninwa ta ka hanauna po omupukifi Satana, nokukufa po oilanduliko aishe iyahameka oyo a etifa. — Heb. 2:14; 1 Joh. 3:8.

³ Kape na oo e na eenghono meulu ile kombada yedu ta dulu okwiimba Kalunga a wanife po elalakano laye. (Jes. 46:9-11) Omolwashike taku dulu okutiwa ngaho? Omolwaashi elalakano olo ola kwatela mo omhepo iyapuki yaJehova. Eenghono odo ihadi imbwa kusha otadi shi ningi tashi shiiva opo elalakano laKalunga ‘li wanifwe.’ (Jes. 55:10, 11) Otu na okukala hatu yandje filufilu elitulemo kunghee elalakano laJehova tali wanifwa. Eteelelo letu loku ka kala nomwenyo monakwiiwa ole likolelela kokuwanifwa kwelalakano olo. Kakele kaasho, otashi pameke eitavelo okumona nghee Jehova ta longifa omhepo yaye iyapuki. Paife natu ka tale konghandangala oyo omhepo iyapuki ya kala tai dana monakudiwa, pefimbo letu nosho yo onghandangala oyo tai ka dana monakwiiwa opo elalakano laJehova li wanifwe.

Onghandangala oyo omhepo iyapuki ya dana monakudiwa

4. Jehova okwa kala ngahelipi ta holola elalakano laye kanini nakanini?

⁴ Pefimbo lOmbibeli, Jehova okwa li a holola elalakano laye kanini nakanini. Tete, kapa li oo e shii kutya Oludalo la udanekwa olo lyelye molwaashi ola li ‘oshiholekwa shiyapuki.’ (1 Kor. 2:7, NW) Konima yomido 2000 lwaapo okudja eshi Jehova a li a xunganeka kombinga yoludalo olo, opo ashike a ka popya vali kombinga yalo. (Lesha Genesis 12:7; 22:15-18.) Jehova okwa li a udanekela Abraham eudaneko olo la li tali ka wanifwa monghedi ya tongomana. Eendjovo odo kutya “moludalo loye” oda li da ulika sha yela kutya Oludalo olo ola li tali ka dja moludalo laAbraham. Ohatu dulu okukala noushili kutya Satana okwa li ta tale nohokwe inene eshi ouyelele oo tau hololwa. Nopehe na omalimbililo, Omutondi oo okwa li a hala okuhanauna po ile okunyona po epata loludalo laAbraham opo a imbe elalakano laKalunga li wanifwe. Ndele osho kasha li tashi ka ningwa molwaashi omhepo yaKalunga ihe wetike okwa li tai dana onghandangala. Omeenghedi dilipi mbela?

5, 6. Jehova okwa li a longifa ngahelipi omhepo yaye opo a amene ovanhu vomepata omo mwa li tamu ka dja Oludalo?

⁵ Jehova okwa li a longifa omhepo yaye opo a amene ovanhu vomepata omo mwa li tamu ka dja Oludalo. Jehova okwa li a lombwela Abram (Abraham) a ti: “Aame oshikelelifo shoye.” (Gen. 15:1) Eendjovo odo oda li tadi ti sha. Pashihopaenenwa, natu tale kwaasho sha li sha ningwa po mo 1919 K.O.P. eshi Abraham naSara va li va tula muGerar oule wokafimbo. Abimelek, ohamba yaGerar, okwa li a kufa po Sara nelalakano loku mu hombola po molwaashi ka li e shii kutya Sara omukulukadi waAbraham. Mbela Satana okwa li e na mo ombinga moshinima osho, ta kendabala okwiimba Sara a dalele aAbraham oludalo? Ombibeli inai popya sha kombinga yaasho, ashike otai tu lombwele kutya Jehova okwa li a ya olunyala moshinima osho, a li a londwela Abimelek okupitila mondjodi kutya ina kuma Sara. — Gen. 20:1-18.

⁶ Jehova ka li ashike a amena oukwaneumbo waAbraham pomhito oyo, ndele okwa li yo e u amena oikando ihapu. (Gen. 12:14-20; 14:13-20; 26:26-29) Omupsalme umwe okwa popya shi na sha naAbraham noludalo laye a ti: “[Jehova] ina efa nande umwe e va fininike, nokwa li a handukila eehamba omolwavo, ndee ta ti: Inamu kuma nande ovavaekwa vange, nye inamu hepeka ovaprofeti vange.” — Eps. 105:14, 15.

7. Omeenghedi dilipi Jehova a li a amena oshiwana shaIsrael?

⁷ Jehova okwa li a amena oshiwana shaIsrael shonale nomhepo yaye iyapuki, omo Oludalo la li tali ka dalwa. Okupitila momhepo yaye, Jehova okwa li a pa Ovaisrael Omhango, oyo ya li ya amena elongelokalunga lashili noya li ye va amena vaha nyatekwe pamhepo, paenghedi nosho yo palutu. (Ex. 31:18; 2 Kor. 3:3) Pefimbo lOvatokolipangeli, omhepo yaJehova oya li ya pameka ovalumenhu vonhumba opo va xupife Ovaisrael momake ovatondi vavo. (Ovatok. 3:9, 10) Momukokomoko womafelemido oo a twala fiyo opefimbo lokudalwa kwaJesus, oo e li oshitukulwa sha fimanenena sholudalo laAbraham, omhepo iyapuki otashi dulika ya li ya kwafela okwaamena Jerusalem, Betlehem nosho yo otembeli, molwaashi eenhele odo okwa li tadi ka dana onghandangala mokuwanifwa kwomaxunganeko e na sha naJesus.

8. Oshike tashi ulike kutya omhepo iyapuki oya li ya dana onghandangala odikilila monghalamwenyo nosho yo moukalele wOmona waKalunga?

⁸ Omhepo iyapuki oya li ya kwafela Jesus odikilila mokukalamwenyo kwaye nosho yo moukalele waye. Omhepo iyapuki oya li ya dana onghandangala moshidalelo shokakadona Maria, ya li ya longa oshikumwifilonga osho inashi longwa nande onale. Oya li ya ningifa omukainhu oo ina wanenena a dale Omona a wanenena, oo ina fyuulula oulunde nefyo. (Luk. 1:26-31, 34, 35) Omhepo oya li yo ya amena Jesus eshi a li okahanana aha fye efyo lomhiva. (Mat. 2:7, 8, 12, 13) Eshi Jesus a li e na omido 30 lwaapo, Kalunga okwa li e mu vaeka nomhepo iyapuki, e mu nangeka po a ninge omufyuululi wolukalwapangelo laDavid noku mu pa oshilonga shokuudifa. (Luk. 1:32, 33; 4:16-21) Omhepo iyapuki oya li ya pameka Jesus a longe oikumwifilonga, mwa kwatelwa okuvelula ovanaudu, okupalula eemhunga dovanhu nosho yo okunyumuna oonakufya. Oilonganghono ya tya ngaho oya li ashike euliko linini li na sha nomanangeko noupuna oo twa teelela koshi yepangelo lohamba Jesus.

9, 10. (a) Osha li shi liwetikile mo ngahelipi kutya omhepo iyapuki oya li tai longo movahongwa vaJesus vomefelemudo lotete? (b) Oshike sha li sha ningwa po mefelemudo lotete O.P. osho tashi ulike kutya elalakano laJehova otali ka wanifwa?

⁹ Okudja poPentekoste 33 O.P., Jehova okwa li a longifa omhepo yaye a vaeke oshitukulwa oshitivali sholudalo laAbraham, ovo vahapu vomusho inava dja mepata laAbraham. (Rom. 8:15-17; Gal. 3:29) Omhepo iyapuki oya li tai longo mokati kovahongwa vaJesus vomefelemudo lotete, ye va kwafela va dule okuudifa nouladi noye va pameka va dule okulonga oikumwifilonga. (Oil. 1:8; 2:1-4; 1 Kor. 12:7-11) Okupitila meeshali dopashikumwifilonga da tya ngaho, omhepo iyapuki oya li ye va hololela oshinima shipe shi na sha nanghee Jehova ta ka wanifa po elalakano laye. Jehova ka li vali a hokwa onghedi yelongelokalunga yonale oyo ya li ya totwa po omafelemido a pita oyo yoku mu longela motembeli muJerusalem. Jehova okwa li a hokwa eongalo lipe lopaKriste olo opo la li la totwa po. Okudja opo, Jehova okwa kala ta longifa eongalo lovavaekwa opo a wanife po elalakano laye.

¹⁰ Jehova okwa li a longifa omhepo yaye iyapuki pefimbo lOmbibeli opo a amene vamwe, e va pameke nokuvaeka vamwe opo a shilipaleke kutya elalakano laye otali ka wanifwa. Ndele mbela ongahelipi kunena? Mbela Jehova oha longifa ngahelipi omhepo yaye iyapuki kunena opo a wanife po elalakano laye? Otwa pumbwa okushiiva omanyamukulo omapulo oo, molwaashi otwa hala okukala metwokumwe nomhepo iyapuki. Onghee hano, natu ka tale keenghedi nhee omo Jehova ha longifa omhepo yaye kunena.

Onghandangala oyo omhepo iyapuki tai dana kunena

11. Oshike tashi ulike kutya omhepo iyapuki ohai kaleke oshiwana shaKalunga sha koshoka, nongahelipi to dulu okuulika kutya oto longele kumwe nomhepo ya tya ngaho?

¹¹ Onghedi yotete, omhepo iyapuki ohai kaleke oshiwana shaKalunga sha koshoka. Ovo hava longele Jehova metwokumwe nehalo laye ove na okukala va koshoka paenghedi. (Lesha 1 Ovakorinto 6:9-11.) Vamwe ovo va ninga Ovakriste vashili ova li hava kufa ombinga moinima inai koshoka ngaashi, oluhaelo, eteyohombo nosho yo oushenge. Okahalu oko haka dala oulunde otashi dulika ka kale ka mena omidi momunhu neenghono. (Jak. 1:14, 15) Ashike ovanhu ovo ova li ‘ve liyelifa,’ tashi ulike kutya ova ninga omalunduluko a pumbiwa monghalamwenyo yavo opo va dule okuwapalela Kalunga. Mbela oshike hashi kwafele omunhu oo e hole Kalunga a finde eamo lokukala a hala okulonga oilonga ii? Ovakorinto votete 6:11 ova ti: ‘Omhepo yaKalunga ketu.’ Ngeenge owa kala wa koshoka paenghedi, oto ulike kutya oto efa omhepo iyapuki i nwefe mo onghalamwenyo yoye.

12. (a) Pamoniko laHesekiel, Jehova oha wilike ngahelipi ehangano laye? (b) Ongahelipi to dulu okuulika kutya oto longo metwokumwe nomhepo iyapuki?

¹² Onghedi onhivali, Jehova oha longifa omhepo yaye opo a wilike ehangano laye li dule okuyuka kombinga oko a hala. Oshitukulwa shehangano laJehova shomeulu osha popiwa pafaneko memoniko laHesekiel shi li etemba lomeulu olo ihali iwa kusha moshipala mokweenda kwalo opo li wanife po elalakano laJehova. Oshike hashi wilike etemba laJehova li yuke kombinga yonhumba? Omhepo iyapuki. (Hes. 1:20, 21) Natu dimbuluke kutya ehangano laJehova ola fikama po moitukulwa ivali, shimwe oshomeulu nashimwe oshokombada yedu. Ngeenge oshitukulwa shehangano laJehova shomeulu ohashi wilikwa komhepo iyapuki, eshi shokombada yedu nasho ohashi wilikwa yo komhepo iyapuki. Ngeenge owa kala ho dulika nou li omudiinini kewiliko olo hali yandjwa koshitukulwa shehangano laKalunga shokombada yedu, oto ulike kutya oto endele pamwe netemba laJehova lomeulu noto longo metwokumwe nomhepo iyapuki. — Heb. 13:17.

13, 14. (a) “Epupi” olo la tumbulwa kuJesus ola fikama po moolyelye? (b) Yandja oshihopaenenwa u ulike kutya omhepo iyapuki otai dana onghandangala ilipi mokuyelifa eeshili dOmbibeli. (Tala oshimhungu, “Oto endele ngoo pamwe nouyelele tau hapupala?”)

¹³ Oshititatu, Jehova oha longifa omhepo yaye iyapuki oku tu kwafela tu ude ko eeshili dOmbibeli. (Omayel. 4:18) “Omupiya omudiinini nomunaendunge” okwa kala unene ta longifa oshifo eshi oule wefimbo okuyelifa eeshili dOmbibeli kanini nakanini. (Mat. 24:45) Pashihopaenenwa, natu tale kombinga yeudeko letu li na sha nokutya “epupi eli” olo la tumbulwa kuJesus ola fikama po moolyelye. (Lesha Mateus 24:32-34.) Mbela Jesus okwa li ta ulike kepupi lilipi? Oshitukulwa shimwe shi na oshipalanyole: “Okukala po kwaKristus otaku ti shike kwoove?” osha li sha yelifa kutya Jesus ka li ta popi shi na sha novanawii ndele okwa li ta popi ovahongwa vaye, ovo va li pokuvaekwa nomhepo iyapuki.a Ovashikuli vaJesus ovavaekwa vomefelemudo lotete nosho yo vopefimbo letu kava li ashike tava ka mona edidiliko lokukala po kwaye, ndele ova li yo tava ka uda ko eityo lalo olo kutya Jesus ‘oku li popepi, poshivelo.’

¹⁴ Mbela eyelifilo olo otali ti shike kufye? Nonande itatu dulu okuvalula kondadalunde oule wefimbo ‘lepupi,’ otu na okukaleka momadiladilo oinima ihapu i na sha noutumbulilo “epupi.” Luhapu outumbulilo “epupi” ohau ulike kovanhu vomido da yoolokafana ovo ve li momwenyo pefimbo limwe, ndele efimbo olo ka lile unene noli na exulilo. (Ex. 1:6) Ndele mbela ongahelipi hatu dulu okuuda ko eendjovo daJesus di na sha ‘nepupi eli’? Osha yela kutya Jesus okwa li a hala okutya onghalamwenyo yovavaekwa vamwe ovo va li po eshi edidiliko la hovela okulimonikila mo 1914 oi na okukala ya kwatafana naayo yovavaekwa vakwao ovo tava ka mona ehovelo loudjuu munene. Epupi olo ola li li na ehovelo, notali ka xula po yo. Okuwanifwa kwoinima i lili noku lili yedidiliko lokukala po kwaJesus otaku ulike filufilu kutya oudjuu munene ou li popepi. Ngeenge ou wete kutya efimbo olo u li mulo ola endelela noto twikile okukala oupafi, oto ulike kutya ou li metwokumwe neudeko li li pefimbo loshili yOmbibeli noto landula ewiliko lomhepo iyapuki. — Mark. 13:37.

15. Oshike tashi ulike kutya omhepo iyapuki oyo hai tu pameke tu udife onghundana iwa youhamba?

¹⁵ Oshitine, omhepo iyapuki ohai tu pameke tu udife onghundana iwa. (Oil. 1:8) Diladila kombinga yaashi: Mbela oshike she shi ningifa tashi shiiva opo onghundana iwa i kale tai udifwa mounyuni aushe? Otashi dulika naave oumwe womwaavo va li tava diladila kutya: ‘Nghi na efiku ndi dule okuya moilonga yokuudifa eumbo neumbo,’ molwaashi u na eehoni unene ile oumbada. Ndele nande ongaho, paife oho kufa ombinga nouladi moilonga ya tya ngaho.b Eendombwedi daJehova dihapu di diinini otadi twikile okuudifa nonande otadi patanekwa ile tadi hepekwa. Omhepo iyapuki yaKalunga oyo aike tai dulu oku tu pameka tu tauluke omandangalati manene notu longe oilonga oyo itatu dulu okulonga keenghono detu vene. (Mika 3:8; Mat. 17:20) Ohatu ulike kutya ohatu wilikwa komhepo iyapuki mokukala hatu kufa ombinga pauyadi moilonga yokuudifa.

Onghandangala oyo omhepo iyapuki tai ka dana monakwiiwa

16. Omolwashike hatu dulu okukala noushili kutya Jehova ota ka amena oshiwana shaye poudjuu munene?

¹⁶ Jehova ota ka longifa omhepo yaye iyapuki meenghedi dididilikwedi monakwiiwa opo a wanife po elalakano laye. Tete, natu ka tale koshinima shi na sha neameno. Ngaashi twa kundafana nale, Jehova okwa li a longifa omhepo yaye iyapuki monakudiwa okwaamena oohandimwe nosho yo oshiwana shaIsrael ashishe. Onghee hano, ohatu dulu okukala noushili kutya Jehova ota ka longifa natango omhepo yaye oyo i na eenghono opo a amene oshiwana shaye poudjuu munene oo u li popepi. Ashike inatu pumbwa okufekela kutya Jehova ote ke tu fila oshisho ngahelipi kondadalunde, ndele ponhele yaasho, ohatu dulu okuteelela onakwiiwa tu na elineekelo notu na oushili kutya Jehova ota ka amena alushe ovo ve mu hole nonokutya omhepo yaye iyapuki otai ke va kwafela. — 2 Omaf. 16:9; Eps. 139:7-12.

17. Jehova ota ka longifa ngahelipi omhepo yaye iyapuki mounyuni mupe?

¹⁷ Jehova ota ka longifa ngahelipi omhepo yaye iyapuki mounyuni mupe? Jehova ota ka nwefa mo omambo mape oo taa ka nyanunwa pefimbo opo okupitila momhepo yaye. (Eh. 20:12) Momambo omo otamu ka kala mwa shangwa shike? Osha yela kutya otamu ka kala mu na oiteelelwa yaJehova yokondadalunde oyo tu na okuwanifa po momukokomoko womido eyovi. Mbela owa teelela nodjuulufi oku ka konakona oshikalimo shomambo oo? Otwa teelela nodjuulufi ounyuni oo mupe. Otwa hala yo oku ka tala kutya onghalamwenyo otai ka kala ya tya ngahelipi pefimbo opo ovanhu tava ka kala va nangekwa noupuna, eshi Jehova ta ka longifa omhepo yaye iyapuki opo a wanife po elalakano laye li na sha nedu nosho yo ovanhu.

18. Owa tokola toko okuninga shike?

¹⁸ Inatu dimbwa nande kutya elalakano laKalunga otali ka wanifwa filufilu, molwaashi oha longifa omhepo yaye iyapuki oyo i dule eenghono adishe meshito alishe okuwanifa po elalakano laye. Naave owa kwatelwa mo melalakano olo. Onghee hano, kala wa tokola toko okwiindila Jehova e ku pe omhepo yaye nou longe metwokumwe newiliko layo. (Luk. 11:13) Kungaho, oto ka kala u na etimaumbwile loku ka kala nomwenyo fiyo alushe mOparadisa kombada yedu, ngaashi Jehova a lalakanena.

[Omashangelo opedu]

Oto dimbuluka?

• Jehova okwa li a longifa ngahelipi omhepo yaye iyapuki pefimbo lOmbibeli opo a ende ta wanifa elalakano laye?

• Jehova oha longifa ngahelipi omhepo yaye kunena?

• Jehova ota ka longifa ngahelipi omhepo yaye monakwiiwa opo a wanife po elalakano laye?

[Oshimhungu pepandja 22]

Oto endele ngoo pamwe nouyelele tau hapupala?

Jehova ota twikile okuyelifila oshiwana shaye eeshili dOmbibeli. Eeshili dimwe dOmbibeli dilipi da kala tadi yelifwa mOshungonangelo?

▪ Efaneko laJesus li na sha nonhafi otali divilike shike shi na sha nekulo lopamhepo? (Mat. 13:33) — Oshungonangelo ye 1 Juli 2008, epandja 27-28.

▪ Okwoongelwa kwOvakriste ovo ve na eteelelo lokuya meulu otaku xulu naini? — Oshungonangelo (yOshiingilisha) ye 1 Mei 2007, epandja 30-31.

▪ Okulongela Jehova “momhepo” otashi ti shike? (Joh. 4:24) — Oshungonangelo ye 1 Auguste 2002, epandja 12.

▪ Ongudu inene ohai longele Jehova moshihale shilipi? (Eh. 7:15) — Oshungonangelo ye 1 Mei 2002, epandja 30-31.

▪ Eedi noikombo otai ka yoololwa naini? (Mat. 25:31-33) — Oshungonangelo ye 1 Oktoba 1995, epandja 19-27.