Omanyamukulo omapulo ane e na sha nexulilo

JESUS KRISTUS okwa xunganeka kutya ‘otaku ke uya exulilo’ monakwiiwa. Okwa popya kombinga yefimbo lexulilo a ti: “Osheshi omafiku oo otapa kala oudjuu unene, inau kala ko okehovelo lounyuni fiyo opaife, ndele ngaashi itau uya vali.” — Mateus 24:21.

Eendjovo daJesus odo tadi popi kombinga yexulilo nosho yo oitukulwa ikwao yOmbibeli oyo tai popi kombinga yexulilo, oya etifa po omapulo mahapu a fimana. Ndele mbela omolwashike ito kufa Ombibeli yoye nokulesha omanyamukulo omapulo oo?

1 Oshike naanaa tashi ka xulifwa po?

Ombibeli inai popya kutya edu lo venevene otali ka hanaunwa po. Omupsalme umwe okwa ti: “[Kalunga] edu owe li shitila keengudi dalo, lo li ha tengauke nande fiyo alushe.” (Epsalme 104:5) Ombibeli itai hongo kutya ovanhu aveshe otava ka xulifwa po okupitila moita tai ka luwa mounyuni aushe. (Jesaja 45:18) Jesus okwa ulika kutya ovanhu vamwe otava ka xupa eshi exulilo tali uya. (Mateus 24:21, 22) Hano mboli oshike osho Ombibeli ya popya kutya otashi ka xulifwa po?

Omapangelo opanhu oo a xulila mounyengwi otaa ka xulifwa po. Kalunga okwa li a nwefa mo omuprofeti Daniel a shange ta ti: “Kalunga ou komeulu ota ka dika ouhamba itau ka teka po fiyo alushe, nepangelo lawo itali ka yandjwa koshiwana shimwe. Ndele owo otau ka nyanyaula notau ka teyaula omauhamba aeshe noku a xulifa po, ndelenee owo vene tau ka kala fiyo alushe.” — Daniel 2:44.

Oita nosho yo ovo hava nyateke edu otava ka xulifwa po. Epsalme 46:10 ola popya kutya Kalunga ota ka ninga shike, la ti: “[Ota] xulifa po oita fiyo okeengaba dedu, ndee ta teyaula omauta nomaonga, nomatemba oita te a xwike po nomundilo.” Ombibeli otai hongo yo kutya Kalunga ota ka ‘nyonauna po ovo hava nyono edu.’ — Ehololo 11:18.

Ominyonena nokuhenouyuki otai ka xula po. Eendjovo daKalunga oda udaneka da ti: “Ovanashili tava ka nangala oshilongo, naava ve he noshipo tava ka kala mo. Ndelenee ovahenakalunga tava ka dudwa mo moshilongo, novaliteeki tava ka kufwa mo musho.” — Omayeletumbulo 2:21, 22.

2 Exulilo otali uya naini?

Jehova okwa tula po “efimbo” lokondadalunde olo ta ka xulifa po oukolokoshi nosho yo olo Ouhamba waye wa li tau ka hovela okupangela. (Markus 13:33) Ombibeli oya popya sha yela kutya katu shii kondadalunde kutya exulilo otali uya naini. Jesus okwa ti: “Ndelenee efiku olo notundi oyo kaku na ou e i shii, nande ovaengeli vomeulu, ile Omona, oTate Oye aeke.” (Mateus 24:36) Jesus nosho yo ovahongwa vaye ova xunganeka kutya eenghalo otadi ka kala da tya ngahelipi kombada yedu fimbo Kalunga ina eta exulilo. Ngeenge oiningwanima aishe ei tai shikula apa oya hovele okuningwa pefimbo limwe mounyuni aushe, osha li tashi ka ulika kutya exulilo oli li poduka.

Omalipumomumwe opapolitika, oupyakadi moulikumwe wovanhu nosho yo womudingonoko oya hapupala neenghono inashi monika nale mondjokonona. Eshi ovahongwa vaJesus va li ve mu pula omapulo e na sha nexulilo, okwa ti: “Oiwana otai ka fikamena oiwana, noshilongo otashi fikamene oshilongo, otaku di omakakamo edu keembinga neembinga, ondjala tai uya nomapiyaano. Eshi ehovelo lomaudjuu.” (Markus 13:8) Omuyapostoli Paulus okwa ti: “[Momafiku] axuuninwa otape ke uya omafimbo madjuu, osheshi ovanhu tava kala nokulihola vo vene, ovanalwisho voimaliwa, ovalitangi, novalinenepeki novasheki, ve he neduliko kovakulunhu, ve he shii kupandula, ve he neitavelo, ve he nohole, ve he nombili, ovalundili, ovahenalidiliko, ovakwanyanya, ovatondi vouwa, ovakengeleledi, ovahayavala, ovafulalali, ohole yavo yokuhola ouhalu mwii i dule ei yokuhola Kalunga.” — 2 Timoteus 3:1-5.

Onghundana iwa otai udifwa mounyuni aushe momalaka e lili noku lili. Jesus okwa ti: “Evangeli eli louhamba otali udifilwa ounyuni aushe li ningile oiwana aishe ondombwedi, opo nee taku uya exulilo.” — Mateus 24:14.

3 Oshike tashi ka ningwa po konima eshi exulilo le uya?

Ombibeli itai hongo kutya ovanhu aveshe ovo hava longo ouwa otava i meulu. Ndele ponhele yaasho, Jesus okwa honga kutya elalakano laKalunga lopehovelo li na sha novanhu otali ka wanifwa. Okwa ti: “Ovanelao ovananheni, osheshi ovo tava ka fyuulula edu.” (Mateus 5:5; 6:9, 10) Ombibeli oya udaneka kutya ovo tava hangika va fya ofimbo exulilo inali uya, otava ka nyumunwa. (Job 14:14, 15; Johannes 5:28, 29) Oshike tashi ka ningwa po konima ngeenge exulilo ole uya?

Jesus ota ka pangela okudja meulu e li Ohamba yOuhamba waKalunga. Omuprofeti Daniel okwa ti: “Onda mona momamoniko oufiku, ndele tala, Umwe a fOmona womunhu [omunyumunwa Jesus] e uya moilemo yokeulu, ndele ye okwe uya kOmuxungu [Jehova Kalunga] ndele ve mu ehenifa koshipala shaye. Ndele ye okwa pewa eenghono nefimano noshilongo. Noiwana aishe omaludi nomalaka tae mu longele. Eenghonopangelo daye odo eenghonopangelo daalushe, kadi na apa tadi xulu po. Ndele oshilongo shaye osho oshilongo itashi ka teywa po.” — Daniel 7:13, 14; Lukas 1:31, 32; Johannes 3:13-16.

Ovapangelwa vOuhamba waKalunga otava ka kala ve na oukolele muwa, va amenwa notava ka kala nomwenyo fiyo alushe. Omuprofeti Jesaja okwa ti: “Otava ka dika omaumbo ndee tava kala mo, ndele tava twike oikokola yomiviinyu, ndele tava li oiimati yayo; itava ka tunga mu kale vamwe, ihava ka twika, vamwe ngeno va lye oiimati yavo.” (Jesaja 65:21-23) Omuyapostoli Johannes okwa popya kombinga yefimbo olo a ti: “Tala, etwali laKalunga oli li povanhu, Oye ta tula puvo, vo otava ningi ovanhu vaye, Kalunga mwene ota kala pamwe navo, Kalunga kavo; ndele ota feta po omahodi momesho avo, nefyo itali kala po vali ile oluhodi ile okulila ile ouyahame itau kala po vali, osheshi eshi shotete osha xula po.” — Ehololo 21:3, 4.

4 Oshike u na okuninga po opo u ka xupe pefimbo lexulilo?

Omuyapostoli Petrus okwa dimina kutya vamwe ovo tava ka kala ko pefimbo lexulilo otava ka tomhafana kutya Kalunga ke na efiku a ye olunyala moinima yovanhu noita ka xulifa po ovakolokoshi kombada yedu. (2 Petrus 3:3, 4) Ndele nande ongaho, Petrus okwa li a ladipika ovo va li tava ka kala ko pefimbo letu va katuke eenghatu edi tadi landula.

Lihonga koiningwanima yomonakudiwa. Petrus okwa ti kutya Kalunga “nounyuni winya wonale ine u fya eenghoto, nande a amena Noa, omuudifi wouyuki novakwao va-7, eshi a yelulifa ounyuni wovahenakalunga eyelu.” (2 Petrus 2:5) Petrus okwa popya shi na sha novasheki a ti: “[Otave] lipwililike owina va fa inava shiiva nokutya, eulu nedu la dja momeva nola tungwa nomeva, kwa li a kala nonalenale taa kwatelelwa keenghono dondjovo yaKalunga, ndele muo ounyuni winya wonale wa nyonaukila meyelu lao. Ndelenee eulu lopaife nedua eli ola tuvikililwa omundilo okeendjovo tuu odo fiyo kefiku letokolo nolekano lovanhu ve he na Kalunga.” — 2 Petrus 3:5-7.

Kala metwokumwe nomifikamhango daKalunga dopaenghedi. Petrus okwa ti kutya ovo va hala oku ka xupa eshi exulilo tali uya, ove na okweenda “meengeda diyapuki” nokulonga ‘oilonga yometilokalunga.’ (2 Petrus 3:11, NW) Didilika kutya Petrus okwa divilika ‘eengeda diyapuki’ nosho yo ‘oilonga yometilokalunga.’ Osho otashi ulike kutya otu na okuninga shihapu shihe fi ashike okupopya kutya otu na eitavelo ile okukala hatu ningi eshi twa hala ofimbo twa teelela efimbo li fike opo tu kendabale okukala nekwatafano liwa naKalunga opo ngeno vati tu ka xupifwe.

Eengeda noilonga yokondadalunde ilipi Kalunga a hokwa? Omolwashike ito yelekanifa osho u shii nale kombinga yoinima oyo naasho Ombibeli tai hongo shi na sha nayo? Eendombwedi daJehova otadi ka kala da hafa oku ku kwafela. Di pula di ku ulikile omanyamukulo mOmbibeli yoye. Okuninga ngaho otaku ku kwafele u kale wa taalela onakwiiwa nouladi nosho yo nelineekelo, nonande ope na oinima itilifa oyo tai ningwa kunena.

[Eshangelo lopedu]

[Eendjovo dididilikwedi pepandja 7]

Edu itali xulu po, ashike ovo hava nyono edu otava ka xulifwa po