Natu kongeni tete ‘ouyuki waYe’

“Kongeni tete ouhamba waKalunga nouyuki waye, opo tamu wedelwa ko ei aishe.” — MAT. 6:33.

1, 2. Ouyuki waKalunga oshike, nohau longo metwokumwe nashike?

MEUDIFO laye lokOmhunda, Jesus Kristus okwa li a yandja ekumaido olo li shiivike nawa kunena kEendombwedi daJehova, a ti: “Kongeni tete ouhamba waKalunga.” (Mat. 6:33) Ohatu ningi eenghendabala okuulika kutya otu hole epangelo lOuhamba notwa hala okukala ovadiinini kulo mokukalamwenyo kwetu akushe. Ndele otwa pumbwa yo okukaleka momadiladilo oshitukulwa oshitivali shekumaido olo, osho tashi tu kumaida tu konge yo ‘ouyuki waye.’ Ouyuki waKalunga oshike, nokukonga tete ouyuki waKalunga otashi ti shike?

² Oshitya shomelaka lopehovelo osho sha tolokwa “ouyuki” otashi yandje yo ediladilo loshinima “shi li mondjila ile sha yukilila.” Onghee hano, ouyuki waKalunga owa yukilila ngeenge tashi uya pomifikamhango daye nosho yo eemhango daye. Molwaashi Jehova oye Omushiti, oku na oufemba wokutula po omifikamhango di na sha naasho shiwa nosho yo osho shii, osho shi li mondjila naasho sha puka. (Eh. 4:11) Ashike ouyuki waKalunga kau fi omusholondodo weemhango dikukutu dihe li pahole ile omusholondodo womaufomhango mulemule. Ndele ponhele yaasho, Jehova oha longifa ouyuki waye metwokumwe nomaukwatya aye makwao a denga mbada ngaashi ohole, ounongo nosho yo eenghono. Onghee hano, ouyuki waKalunga ou li metwokumwe nehalo laye nosho yo nomalalakano aye. Owa kwatela mo yo osho a teelela shi ningwe kwaavo va hala oku mu longela.

3. (a) Okukonga tete ouyuki waKalunga otashi ti shike? (b) Omolwashike tu na okudiinina omifikamhango daJehova douyuki?

³ Okukonga tete ouyuki waKalunga otashi ti shike? Oku shi popya paunafangwa, otashi ti okulonga ehalo laKalunga opo u mu hafife. Okukonga ouyuki waKalunga okwa kwatela mo okuninga eenghendabala tu kale metwokumwe nomifikamhango daye nosho yo eemhango daye da wanenena, ndele haku landula omifikamhango detu vene. (Lesha Ovaroma 12:2.) Onghedi yokukalamwenyo ya tya ngaho oya kwatela mo ekwatafano letu naJehova. Katu na okukala hatu dulika keemhango daJehova molwaashi twa tila e tu handukile. Ndele ponhele yaasho, ohole yetu yokuhola Jehova oyo tai ke tu linyengifa tu kendabale okuninga osho tashi mu hafifa mokukala hatu dulika komifikamhango daye, ndele hakutota po detu vene. Otwa mona kutya osha yuka okuninga ngaho, molwaashi otwa shitwa kuKalunga tu kale hatu dulika kuye. Otu na okukala tu hole ouyuki ngaashi Jesus Kristus, Ohamba yOuhamba waKalunga. — Heb. 1:8, 9.

4. Omolwashike sha fimanenena okukonga ouyuki waKalunga?

⁴ Okukonga ouyuki waJehova osha fimana shi fike peni? Diladila kwaashi: Eyeleko lotete olo Adam naEva va li va yelekwa nalo moshikunino shaEden ola li la yeleka oudiinini wavo u na sha nokutambula ko omifikamhango daJehova douyuki. (Gen. 2:17; 3:5) Okuhadulika kwavo okwa etela oludalo lavo okumona oixuna nosho yo efyo. (Rom. 5:12) Ndele nande ongaho, Eendjovo daKalunga oda ti: ‘Ou ta lalakanene ouyuki nolune, ota ka mona omwenyo, ouyuki nefimano.’ (Omayel. 21:21) Doshili, ngeenge otwa kongo tete ouyuki waKalunga ohatu ka kala tu na ekwatafano liwa naye nohatu ka xupifwa. — Rom. 3:23, 24.

Omwiyo wokukala tu lishii ouyuki

5. Omwiyo ulipi twa pumbwa okuhenuka?

⁵ Eshi omuyapostoli Paulus a li ta shangele Ovakriste vomuRoma, okwa li a divilika omwiyo oo atusheni twa pumbwa okuhenuka ngeenge otwa hala okukonga tete ouyuki waKalunga nomupondo. Paulus okwa popya kombinga yOvajuda vakwao a ti: ‘Ohandi va hepaulula, ove na ngaa ouladi okukondjela Kalunga, ndele hapakushiiva; osheshi inava shiiva ouyuki waKalunga, ndele va hala okudika ouyuki wavo vene, inave liyandja koshi youyuki waKalunga.’ (Rom. 10:2, 3) Paulus okwa ti kutya ovanhu ovo kava li va shiiva ouyuki waKalunga molwaashi ova li ve lipyakidila unene nokulalakanena ouyuki wavo vene.a

6. Oikala ilipi tu na okuhenuka, nomolwashike?

⁶ Onghedi imwe omo hatu dulu okukwatwa komwiyo wokudika po ouyuki wetu vene oyo okukala hatu ningi omafiyafanepo moilonga oyo hatu longele Kalunga nokukala hatu liyelekanifa navamwe. Oikala ya tya ngaho otai dulu oku tu ningifa noupu tu kale twe lineekela mufye vene sha pitilila. Ashike okulihumbata monghedi ya tya ngaho otaku ke tu dimbwifa ouyuki waJehova. (Gal. 6:3, 4) Ohole yetu yokuhola Jehova oyo i na oku tu linyengifa tu ninge osho shi li mondjila. Onghendabala keshe hatu ningi nelalakano lokuliulika kutya fye ovayuki otai ka ulika kutya katu hole shili Jehova. — Lesha Lukas 16:15.

7. Jesus okwa li a kandula po ngahelipi oupyakadi wokulishiiva ouyuki?

⁷ Jesus okwa li te lipula kombinga ‘yaavo va li ve lineekela kutya ovayuki vati, ndele ova dina vamwe.’ Okwa li a kandula po oupyakadi oo wokulishiiva ouyuki mokuhokolola efaneko eli, a ti: “Ovalumenhu vavali ova ya motembeli okwiilikana, umwe omufarisai nomukwao omufendelifi. Ndele omufarisai okwa kala ofika e likalela ndele okwa ilikana ngaha: Kalunga, ohandi ku pandula, osheshi ame inandi fa ovanhu vamwe, ovakolokoshi, eembudi novanyoni vohombo ile ongaashi omufendelifi ou, eendya ohandi di lidilike luvali moshivike keshe ndele handi yandje oitimulongo moilikolwa yange aishe. Ndele omufendelifi okwa kala ofika kokule, ye ina hala okuyelula omesho keulu, okwe lidenga ponhulo yaye ndee ta ti: Kalunga, file nge onghenda, aame omulunde.” Jesus okwa xulifa efaneko olo a ti: “Ohandi mu lombwele: ou a shuna keumbo omuyuki, e dule winya, osheshi ou te linenepeke ota ninipikwa, ndele ou te lininipike ota nenepekwa.” — Luk. 18:9-14.

Omwiyo wokukala we litala ko “unene omuyuki”

8, 9. Okukala we litala ko “unene omuyuki” otashi ti shike, notashi dulu oku tu ningifa shike?

⁸ Otu na yo okuhenuka omwiyo oo wa hokololwa mOmuudifi 7:16, oo ta ti: ‘Ino kala unene omuyuki ndele ino limonifa omunaendunge unene. Omolwashike wa hala ngeno okulinyona po?’ Omushangi wOmbibeli oo okwa nwefwa mo a shange movelishe 20 yetukulwa olo kutya omolwashike tu na okuhenuka oikala oyo, a ti: “Osheshi kombada yedu kape na nande omunhu omuyuki, ou ha ningi ngeno ouwa auke, ndee ita nyono.” Omunhu oo e lishii “unene omuyuki” oha tula po omifikamhango daye mwene douyuki noha tokola vamwe she likolelela kudo. Ndele omunhu a tya ngaho ina shiiva kutya ota tumbalekifa ashike omifikamhango daye mwene ponhele yokutumbalekifa omifikamhango daKalunga, nokungaho, ita ka kala omuyuki koshipala shaKalunga.

⁹ Okukala we litala ko “unene omuyuki” ile we litala ko “omuyuki sha pitilila unene” ngaashi omatoloko Eembibeli dimwe a ti, otashi dulu oku ku ningifa u kale wa limbililwa onghedi omo Jehova ha ningi oinima. Ndele otwa pumbwa okudimbuluka kutya ngeenge otu wete omatokolo aJehova ehe li pauyuki, paulelalela otwa hovela okutala ko kutya omifikamhango detu douyuki odi dule daJehova. Kungaho, otwa fa nokuli hatu yeleke Jehova noku mu tokola she likolelela komifikamhango detu vene di na sha naasho shi li mondjila nosho yo osho sha puka. Ashike Jehova oye aeke e na oufemba wokutula po omifikamhango douyuki, ndele hafye. — Rom. 14:10.

10. Oshike tashi dulu oku tu ningifa tu tokole Kalunga ngaashi Job a li a ninga?

¹⁰ Nonande kape na umwe womufye a hala okutokola Kalunga owina, okuhawanenena kwetu otaku dulu oku tu ningifa ngaho. Osho otashi dulu okuningwa noupu unene tuu ngeenge tu wete oshinima shonhumba shihe li pauyuki ile ngeenge tu li meenghalo didjuu. Nokuli nomulumenhu omudiinini Job okwa li a ninga epuko la tya ngaho. Potete Job okwa li a popiwa e li omulumenhu “e he noshipo nomuyuki ta tila Kalunga ndee ta kukuma owii.” (Job 1:1) Ndele lwanima Job okwa li a hangika komaupyakadi a shikulafana, nokwa li e a tala ko ehe li pauyuki. Osho osha li she mu ningifa a kale e “litala omuyuki [e dule Kalunga, NW].” (Job 32:1, 2) Job okwa li a pumbwa okukwafelwa a yukife etaleko laye. Onghee hano, katu na okukala twa kumwa ngeenge omafimbo amwe otwe lihange monghalo ya tya ngaho. Ngeenge otwe lihange monghalo ya fa yaJob, oshike tashi ke tu kwafela tu yukife okudiladila kwetu?

Haalushe hatu kala tu na oushili we lixwa po

11, 12. (a) Ngeenge otu wete kutya oshinima shonhumba kashi li pauyuki, otwa pumbwa okudimbuluka shike? (b) Omolwashike umwe ta dulu okudiladila kutya efaneko laJesus li na sha novanailonga vomepya lomiviinyu otali faneke oshinima shihe li pauyuki?

¹¹ Oshinima osho twa pumbwa okudimbuluka tete oshosho kutya haalushe hatu kala tu na oushili we lixwa po. Job naye okwa li monghalo ya tya ngaho. Job ka li e shii kutya ovanamati vaKalunga vomeulu ova li hava ongala, nonokutya pokwoongala opo Satana okwa li he mu lundile. (Job 1:7-12; 2:1-6) Job ka li yo e shii kutya Satana oye lela e mu etela omaupyakadi. Katu shii nokuli ngeenge Job okwa li e shii kutya Satana oye lela lyelye. Onghee hano, Job okwa li a fika pexulifodiladilo la puka kutya Kalunga oye e mu etela omaupyakadi. Oshipu shili okufika pexulifodiladilo la puka ngeenge katu shii oushili aushe oo wa kwatelwa mo.

¹² Pashihopaenenwa, diladila kombinga yefaneko laJesus li na sha novanailonga vomepya lomiviinyu. (Lesha Mateus 20:8-16.) Mefaneko olo, Jesus okwa hokolola shi na sha nomushamane oo a li a futa ovanailonga vaye aveshe ondjabi i fike pamwe, kashi na nee mbudi kutya ova longa efiku alishe ile ovili ashike imwe. Mbela ou uditile ngahelipi oshinima sha tya ngaho? Mbela omushamane oo okwa li ngoo a ninga oshinima shi li pauyuki? Tete, otashi dulika u kale wa etela onghenda ovanailonga ovo va longa efiku alishe tava fi omutenya. Otashi dulika yo u tye kutya ova li va wana shili okufutwa oimaliwa ihapu. Ngeenge owa fiki pexulifodiladilo la tya ngaho, otashi dulika u tale ko omushamane oo kutya ke na ohole noiha ningi oinima pauyuki. Nokuli nenyamukulo olo a li a yandja kovanailonga ovo va li tava nyenyeta otali dulu okutalwa ko li li elongifo nai leenghonopangelo. Ndele mbela otu shii ngoo oushili aushe oo wa kwatelwa mo?

13. Etaleko lilipi hatu dulu okukala tu na ngeenge otwa talulula efaneko laJesus li na sha novanailonga vomepya lomiviinyu?

¹³ Efaneko olo natu litalele ombinga imwe vali. Nopehe na omalimbililo, omushamane womeyele olo okwa li a didilika kutya ovalumenhu ovo aveshe ova li va pumbwa okupalula omaukwaneumbo avo. Pefimbo laJesus, ovalongi vomepya ova li hava pewa ondjabi yavo kexulilo lefiku. Ondjabi oyo va li hava pewa efiku keshe oyo ya li hai kwafele omaukwaneumbo avo. U na oushili oo momadiladilo, diladila konghalo yovanailonga ovo omuneumbo a ka mona kohainga nova li va dula ashike okulonga ovili imwe. Otashi dulika kava li tava dulu okupalula omaukwaneumbo avo nondjabi yovili imwe. Ndele nande ongaho, ova li va hala okulonga nehalo liwa nova kala va teelela efiku alishe va kutwe. (Mat. 20:1-7) Kasha li epuko lavo eshi va li inava kutwa diva opo va dule okulonga efiku alishe. Kape na osho tashi ulike kutya ova li tava henuka oilonga owina. Diladila nee ngeno u na okuteelela efiku alishe u kutwe, ove ou shii kutya ou na okupalula oukwaneumbo weni nondjabi oyo u na okumona efiku olo. Ito ka kala tuu wa hafa ngeenge owa kutwa noito ka kala tuu wa kumwa ngeenge owa pewa ondjabi oyo tai wana okupalula oukwaneumbo weni!

14. Oshilihongomwa sha fimanenena shilipi hatu dulu okulihonga mefaneko li na sha nepya lomiviinyu?

¹⁴ Natu talululeni vali eenghatu odo da li da katukwa komushamane womeyele laJesus. Omushamane oo ka li a futa omunailonga nande oumwe oimaliwa inai lixwa po. Ndele ponhele yaasho, okwa li e wete kutya ovanailonga aveshe ova pumbwa okupewa ondjabi ya wana opo va dule okulikwafela vo vene nosho yo omaukwaneumbo avo. Molwaashi opa li ovanhu vahapu va hala oilonga, omushamane oo okwa li ta dulu okufuta ovanailonga ovo oimaliwa inini. Ndele nande ongaho, hasho a li a ninga ngaho. Ovanailonga aveshe ova li va shuna komaumbo avo ve na ondjabi ya wana okupalula omaukwaneumbo avo. Ngeenge otwa konakona nawa oinima aishe oyo, otashi dulika shi tu kwafele tu lundulule etaleko letu li na sha neenghatu odo a li a katuka. Omushamane oo okwa li a ninga etokolo lopahole, ndele ka li a longifa nai eenghonopangelo daye. Oshike hatu lihongo moshinima osho? Ohatu lihongo mo kutya ngeenge katu na oushili we lixwa po moshinima shonhumba, ohatu dulu okufika pexulifodiladilo la puka. Doshili, efaneko olo otali divilike kutya ouyuki waKalunga owa denga mbada, molwaashi inau likolelela keemhango odo da tulwa po kovanhu ile kwaasho ovanhu tava diladila kutya osho shi li pauyuki.

Etaleko letu otashi dulika li kale la puka ile la ngabekwa

15. Omolwashike etaleko letu li na sha naasho sha yuka tali dulu okukala la puka ile la ngabekwa?

¹⁵ Oshinima oshitivali osho tu na okudimbuluka ngeenge tu wete onghalo yonhumba tai monika ya fa ihe li pauyuki oshosho kutya etaleko letu otashi dulika li kale la puka ile la ngabekwa. Etaleko letu otali dulu okukala la puka omolwokuhawanenena, onhondo ile molwomifyuululwakalo. Otali dulu yo okukala la ngabekwa molwaashi itatu dulu okushiiva omalinyengotomheno avamwe noitatu dulu okushiiva osho shi li momitima davo. Ndele mepingafano naasho, Jehova naJesus kave na omangabeko a tya ngaho. — Omayel. 24:12; Mat. 9:4; Luk. 5:22.

16, 17. Omolwashike Jehova ina tula moilonga omhango oyo tai tokola oluhaelo eshi a li ta ungaunga nenyono laDavid naBatseba?

¹⁶ Natu konakoneni ehokololo li na sha naDavid eshi a li a ya moluhaelo naBatseba. (2 Sam. 11:2-5) PaMhango yaMoses, David naBatseba ova li va wana okudipawa. (Lev. 20:10; Deut. 22:22) Nonande Jehova okwa li e va handukila, ka li a ninga ngaashi omhango yaye tai ti. Mbela kungaho Jehova okwa li a longa okuhenouyuki? Mbela Jehova okwa li a hokwa unene David ndele ta nyono omifikamhango daye douyuki? Ovaleshi vamwe vOmbibeli osho va li ve udite ngaho.

¹⁷ Jehova okwa li a yandja omhango oyo tai tokola oluhaelo kovatokoli vopanhu inava wanenena, ovo ihava dulu okushiiva osho shi li momitima dovanhu. Nonande ovatokoli ovo ova li ve na omangabeko, omhango oyo oya li ye va kwafela vaha kale tava tengauka mokuninga omatokolo. Ndele mepingafano novanhu, Jehova ota dulu okutala osho shi li momitima dovanhu. (Gen. 18:25; 1 Omaf. 29:17) Onghee hano, katu na okuteelela Jehova a kale a ngabekwa komhango oyo a li a tulila po ovanhu inava wanenena. Ngeno Jehova okwa li a ngabekwa komhango oyo, mbela ngeno osho itashi fe ashike omunhu ta fininike umwe oo ha mono ko nawa a djale omakende omesho oo a longelwa ovo ve na ounghundi womesho? Jehova okwa li ta dulu okutala osho shi li momutima waDavid nosho yo waBatseba nokwa li ta dulu okumona kutya ove livela ombedi shili. Ngeenge otwa konakona ouyelele aushe oo, ohatu ka mona kutya Jehova okwe va tokola pauyuki, panghenda nopahole.

Twikila okukonga ouyuki waJehova

18, 19. Oshike tashi ke tu kwafela tuha tokole Jehova she likolelela komifikamhango detu douyuki?

¹⁸ Ngeenge omafimbo amwe otu wete oshinima shonhumba osho Jehova a ninga sha fa shihe li pauyuki, kutya nee otwe shi lesha mOmbibeli ile oshimoniwa shetu vene, inatu tokola nande Jehova she likolelela komifikamhango detu douyuki. Natu dimbulukeni kutya haalushe hatu kala tu na oushili we lixwa po nonokutya etaleko letu otashi dulika li kale la puka ile la ngabekwa. Natu dimbuluke yo kutya “ehandu lomulumenhu ihali longo osho sha yuka koshipala shaKalunga.” (Jak. 1:19, 20) Mokuninga ngaho, otashi ka ningifa omitima detu diha “handukile Omwene.” — Omayel. 19:3.

¹⁹ Ngaashi Jesus, otwa pumbwa okudimina alushe kutya Jehova oye aeke e na oufemba wokutula po omifikamhango odo da yuka nosho yo odo diwa. (Mark. 10:17, 18) Natu kendabaleni okulikola ‘eshivo lashili’ ile tu tye ‘eshiivo loshili’ li na sha nomifikamhango daJehova. (Rom. 10:2, NW; 2 Tim. 3:7) Ngeenge otwa dimina oinima oyo nohatu kala metwokumwe nehalo laJehova, ohatu ka ulika kutya ohatu kongo tete ‘ouyuki waye.’ — Mat. 6:33.

[Eshangelo lopedu]

Oto dimbuluka?

• Omolwashike sha fimana okukonga ouyuki waJehova?

• Eemwiyo mbali dilipi twa pumbwa okuhenuka?

• Ongahelipi hatu dulu okukonga tete ouyuki waKalunga?

[Efano pepandja 17]

Oshike hatu lihongo mefaneko laJesus li na sha novalumenhu vavali ovo va li tava ilikana motembeli?

[Efano pepandja 18]

Mbela osha li ngoo sha yuka okupa ovanailonga ovo ve uya potundi onhi-11 ondjabi i fike pwaayo yovanailonga ovo va li va longa efiku alishe?