Kala u hole ouyuki nomutima woye aushe

“Ove u hole ouyuki.” — EPS. 45:8.

1. Oshike tashi ke tu kwafela tu ende “mondjila ya yuka”?

JEHOVA oha wilike oshiwana shaye shi ende “mondjila ya yuka” okupitila mEendjovo daye nosho yo mOmhepo yaye iyapuki. (Eps. 23:3) Ndele molwaashi inatu wanenena, ohatu kwatwa keamo lokuyapuka mo mondjila oyo. Otu na okukala hatu ningi eenghendabala da mana mo opo tu longe osho sha yuka. Ndele mbela oshike tashi ke tu kwafela tu pondole? Ngaashi Jesus, nafye otu na okukala tu hole okulonga osho sha yuka. — Lesha Epsalme 45:8.

2. “Ondjila ya yuka” oshike?

² “Ondjila ya yuka” oshike? “Ondjila” oyo otai ulike konghedi yokukalamwenyo oyo tai wilikwa komifikamhango daJehova douyuki. Oshitya shOshiheberi nosho yo shOshigreka osho sha tolokwa ‘ouyuki’ otashi ulike koshinima “sha yukilila,” osho tashi yandje ediladilo lokudulika filufilu komifikamhango dopaenghedi. Molwaashi Jehova oye “onhele youyuki,” ovalongeli vaye ohava kongo nehafo ewiliko laye opo va mone kutya ove na okukala nelihumbato lopaenghedi la tya ngahelipi. — Jer. 50:7.

3. Ongahelipi hatu dulu okulihonga shihapu kombinga youyuki waKalunga?

³ Ohatu ka hafifa ashike Kalunga ngeenge otwa ningi eenghendabala da mana mo opo tu kale filufilu metwokumwe nomifikamhango daye douyuki. (Deut. 32:4) Ndele opo tu ninge ngaho, otu na okulihonga shihapu kombinga yaJehova Kalunga ngaashi hatu dulu okupitila mEendjovo daye Ombibeli. Apa ngoo pe fike okulihonga kwetu kombinga yaKalunga nokweehena popepi elela naye efiku keshe, opo ngoo tapa ka kala pe fike ohole yetu yokuhola ouyuki waye. (Jak. 4:8) Ngeenge hatu ningi omatokolo oo a fimana monghalamwenyo, otu na okweefa tu wilikwe kEendjovo daKalunga da nwefwa mo.

Kongeni ouyuki waKalunga

4. Okukonga ouyuki waKalunga okwa kwatela mo shike?

⁴ Lesha Mateus 6:33. Okukonga ouyuki waKalunga osha kwatela mo shihapu shihe fi ashike efimbo letu olo hatu longifa mokuudifa onghundana iwa yOuhamba. Opo oilonga yetu iyapuki i kale ya hokiwa kuJehova, onghalamwenyo yetu yakeshe efiku oi na okukala metwokumwe nomifikamhango daye da denga mbada. Ndele mbela aveshe ovo hava kongo ouyuki waJehova ove na okuninga po shike? Ove na “[okudjala] omunhu mupe a shitwa a fe Kalunga omouyuki nomouyapuki woshili.” — Ef. 4:24.

5. Oshike tashi ke tu kwafela tu ungaunge netekomukumo?

⁵ Otashi dulika tu teke omukumo omafimbo amwe omolwomapuko etu vene, eshi hatu ningi eenghendabala tu kale metwokumwe nomifikamhango daKalunga douyuki. Ndele mbela oshike tashi dulu oku tu kwafela tuha kale twa teka omukumo neenghono notu kale tu hole ouyuki nohatu u longo? (Omayel. 24:10) Otu na okukala hatu ilikana kuJehova pandjikilile opo tu kale “tu nomutima wa yuka notu neitavelo la pama.” (Heb. 10:19-22) Otu na yo okukala tu na eitavelo tali longo mekuliloyambo laJesus Kristus nosho yo moilonga oyo ta longo e li Omupristeri wetu Omukulunhu, kutya nee otu na eteelelo lomeulu ile olokombada yedu. (Rom. 5:8; Heb. 4:14-16) Ongushu yohonde yaJesus ya tika oya kundafanwa mOshungonangelo oyo ya li ya nyanyangidwa tetetete. (1 Joh. 1:6, 7) Oshitukulwa shimwe shomOshungonangelo yOshiingilisha yaJuli 1879, epandja 6, osha ti: “[Ngeenge] owa talele mouyelele oshinima shitilyana okupitila mekende litilyana, oshinima osho shitilyana ohashi monika sha fa shitoka; sha faafana, nonande omatimba etu naa kale a tilyana otaa ka kala a toka eshi Kalunga te a talele mohonde yaKristus.” Olo kali fi tuu efiloshisho likumwifi olo Jehova a yandja okupitila mekuliloyambo lOmona waye omuholike! — Jes. 1:18.

Kala ho konakona oilwifo yoye yopamhepo

6. Omolwashike sha fimanenena okukala hatu konakona oilwifo yetu yopamhepo?

⁶ Otwa pumbwa okukala twa djala “ponhulo oipapa yoivela youyuki” efimbo keshe, molwaashi oi li oshilwifo shopamhepo sha fimanenena osho twa pewa kuKalunga. (Ef. 6:11, 14) Osha fimanenena okukala hatu konakona oilwifo yetu yopamhepo efiku keshe, kashi na nee mbudi kutya opo twe liyapulile Jehova ile otwa kala hatu mu longele oilonga iyapuki oule womido omilongo. Omolwashike mbela? Omolwaashi Ondiaboli neendemoni dayo ova umbilwa kombada yedu. (Eh. 12:7-12) Satana oha ponokele oshiwana shaKalunga nonyanya, molwaashi okwa handuka noku shii kutya oku na ko ashike okafimbo kanini. Mbela otu shii ngoo kutya osha fimana shi fike peni okukala twa djala “ponhulo oipapa yoivela youyuki”?

7. Otu na okulihumbata ngahelipi ngeenge otu shii kutya osha fimana shi fike peni okukala twa djala “ponhulo oipapa yoivela youyuki”?

⁷ Oshipapa shoponhulo ohashi amene omutima wovene vene. Molwaashi inatu wanenena, omitima detu dopafaneko odi na omakoto noda nyonauka. (Jer. 17:9) Osha fimanenena okudeula omitima detu noku di pa outekuduliko, molwaashi odi na eamo lokulonga owii. (Gen. 8:21) Ngeenge otwa dimina kutya otwa pumbwa shili okudjala “ponhulo oipapa yoivela youyuki,” itatu ke lidula oipapa oyo pakafimbo opo tu ninge oinima oyo Kalunga e tonde; noitatu ka diladila okukufa ombinga moinima oyo ya puka. Katu na okukala hatu tale o-TV oule wefimbo lihapu neenghono. Ndele ponhele yaasho, natu ningeni eenghendabala tu kale hatu longo osho tashi hafifa Jehova. Nokuli nongeenge otwa punduka molwaashi twa kala hatu diladila oule wokafimbo oinima yopambelela inai yuka, Jehova ote ke tu kwafela tu penduke po natango. — Lesha Omayeletumbulo 24:16.

8. Omolwashike twa pumbwa “oshikelelifo sheitavelo”?

⁸ “Oshikelelifo sheitavelo” oshi li yo shimwe shomoilwifo yopamhepo, osho hatu dulu “okudima po nasho oikuti yomunawii ya xwama omundilo.” (Ef. 6:16) Eitavelo nosho yo ohole yokuhola Jehova nomutima wetu aushe ohai tu kwafele tu longe ouyuki notu kale mondjila oyo tai twala komwenyo waalushe. Apa ngoo pe fike okukala kwetu tu hole Jehova, opo ngoo tapa ka kala pe fike okukala kwetu twa lenga ouyuki waye. Ndele mbela ongahelipi shi na sha neliudo letu? Eliudo letu ohali tu kwafele ngahelipi eshi hatu ningi eenghendabala tu kale tu hole ouyuki?

Kala u na eliudo liwa

9. Ouwa ulipi hau di mokukala tu na eliudo liwa?

⁹ Peninginifo letu, otwa li twa pula Jehova e tu kwafele tu kale tu na “eliudo liwa.” (1 Pet. 3:21) Molwaashi otu na eitavelo tali longo mekuliloyambo laJesus, ohonde yaye oya tuvika omanyono etu, naasho oshe tu ningifa tu kale twa koshoka momesho aKalunga. Ndele opo tu kale alushe twa koshoka koshipala shaKalunga, otwa pumbwa okukala tu na eliudo liwa. Ngeenge eliudo letu ohali tu nyenyetele nohali tu londwele efimbo nefimbo, natu kale tu na olupandu molwaashi kungaho otali longo nawa. Omalondwelo a tya ngaho otaa ulike kutya inatu fifa eliudo letu ngeenge tashi uya peendjila daJehova douyuki. (1 Tim. 4:2) Ashike eliudo otali dulu okudana onghandangala ya wedwa po kwaavo va hala okukala ve hole ouyuki.

10, 11. (a) Hokolola oshimoniwa osho tashi ulike kutya omolwashike tu na okudulika keliudo letu la deulwa kOmbibeli. (b) Omolwashike ohole yokuhola ouyuki tai dulu oku tu etela ehafo linene?

¹⁰ Ngeenge otwa ningi oshinima sha puka, eliudo letu otashi dulika li kale tali tu nyenyetele pakafimbo ile lwoikando. Omunyasha umwe okwa li a yapuka mo ‘mondjila youyuki,’ ndele ta pikwa kokutala omafano oipala nokwa li yo a hovela okushila epangwe. Okwa li ha kala e udite etimba ngeenge e li pokwoongala nokwa li ha kala e litala ko a fa omunaihelele ngeenge ta kufa ombinga moilonga yomomapya, naasho osha li she mu ningifa a efe po omalipyakidilo oo opaKriste. Okwa ti: “Ndele nande ongaho, onda li nda dopa okudimbuluka kutya eliudo lange otali ka kala tali nyenyetele nge omolweenghatu dange.” Okwa weda ko a ti: “Onda kala handi ende mondjila oyo ya puka oule womido nhee.” Opo nee, okwa li a diladila okwaalukila moshili. Okwa li a indila Jehova e mu dimine po, nonande okwa li ta diladila kutya Jehova ita ka pwilikina keilikano laye. Meni ashike lominute omulongo, ina okwa li uya oku mu talela po nokwa li e mu ladipika a kale ha i kokwoongala. Omunyasha oo okwa li a ya kOlupale lOuhamba, nokwa li a pula omukulunhuongalo umwe a kale ta konakone naye. Lwanima okwa ka ninginifwa, nota pandula Jehova eshi a xupifa omwenyo waye.

¹¹ Mbela inatu didilika kutya ehafo linene ohali di mokulonga osho sha yuka? Eshi hatu kendabala okulonga ouyuki pauyadi nokukala tu u hole, ohatu ka hafela neenghono okulonga osho tashi wapalele Tate yetu womeulu. Ndele natu dimbulukeni kutya efiku otali uya eshi ovanhu aveshe tava ka kala ve na eliudo liwa; notava ka ulika monghedi ya wanenena kutya ove li oshifeka shaKalunga. Onghee hano, natu kulike ohole yomoule yokuhola ouyuki momitima detu nokuhafifa Jehova. — Omayel. 23:15, 16.

12, 13. Ongahelipi hatu dulu okudeula eliudo letu?

¹² Oshike tu na okuninga opo tu dule okudeula eliudo letu? Ngeenge hatu konakona Omishangwa nosho yo oileshomwa oyo ya kanghamena kOmbibeli, osha fimana okudimbuluka kutya “omutima womuyuki otau diladila osho tau shi nyamukula.” (Omayel. 15:28) Diladila nghee osho tashi ke tu etela ouwa ngeenge hatu ningi ehoololo li na sha noilonga yokulikongela omboloto. Ngeenge oshi liwetikile kutya oilonga yonhumba kai li metwokumwe noiteelelwa yopamishangwa, vahapu vomufye ohatu liufa diva kewiliko olo twa pewa okupitila mongudu yomupiya omudiinini nomunaendunge. Ndele ngeenge katu na oushili kutya oilonga yonhumba otai wapalele Omukriste ile hasho, otu na okuninga omapekaapeko tu tale kutya omafinamhango Ombibeli otaa ti ngahelipi kombinga yaasho noku a konakona pamwe neilikano.a Otu na yo okuninga sha faafana ngeenge tashi uya pomafinamhango oo tae tu kwafele tu henuke okunyemateka omaliudo avamwe. (1 Kor. 10:31-33) Ndele otu na unene tuu okuyandja elitulemo komafinamhango e na sha nekwatafano letu naKalunga. Ngeenge Jehova oku li omunhu washili kufye, fimbo inatu ninga oshinima shonhumba otu na okulipula kutya, ‘Ngeenge onda ningi oshinima eshi, mbela ohandi ka nyemateka Jehova?’ — Eps. 78:40, 41.

¹³ Ngeenge hatu lilongekidile Ekonakono lOshungonangelo ile Ekonakonombibeli lEongalo, otu na okukala hatu dilonga kouyelele oo hatu lesha. Mbela peemhito dimwe ohatu lihange hatu tende ashike okatendo meendelelo ndele hatu i ku kakwao? Okukonakona monghedi ya tya ngaho itashi ke tu kwafela tu kale tu na ohole yomoule yokuhola ouyuki ile tu kale tu na eliudo la deuka. Ngeenge otwa hala okukala tu hole ouyuki, otwa pumbwa okukala hatu konakona Eendjovo daKalunga noukeka nokudilonga moule kwaasho twa lesha. Doshili, okukala tu hole ouyuki nomutima wetu aushe ohashi pula eenghendabala da mana mo.

Ovo va fya ondjala nenota louyuki

14. Jehova Kalunga naJesus Kristus ova hala tu kale tu uditile ngahelipi oilonga iyapuki oyo hatu longo?

¹⁴ Jehova Kalunga naJesus Kristus ova hala tu kale twa hafa eshi hatu longo oilonga iyapuki. Ndele mbela oshike tashi ke tu kwafela tu kale twa hafa? Ohole yetu yokuhola ouyuki oyo tai ke tu kwafela. Jesus okwa li a popya mEudifo laye lokOmhunda a ti: “Ovanelao [ovovo] va fya ondjala nenota louyuki, osheshi ovo tava ka kutifwa.” (Mat. 5:6) Eendjovo odo itadi ti sha tuu kovanhu ovo va halelela okukala ve hole ouyuki!

15, 16. Ongahelipi ondjala nenota lopamhepo tai ka xulifwa po?

¹⁵ Otu li mounyuni tau pangelwa komunawii. (1 Joh. 5:19) Kashi na nee mbudi kutya ou li moshilongo shilipi, ngeenge owa lesha oshifokundaneki oto ka uda kutya ominyonena nosho yo elongifo leenghono otai hapupala neenghono. Ohashi nyemateke omuyuki ngeenge ta diladila kombinga yaavo hava longele vakwao owii. (Omuud. 8:9) Ava tu hole Jehova otu shii kutya oye aeke ta dulu okuxulifa po ondjala nenota lopamhepo laavo va hala okushiiva ouyuki waye. Mafiku, ovahenakalunga otava ka xulifwa po, naavo ve hole ouyuki itava ka kala vali va nyemata omolwovanhu ovo ihava dulika komhango nomolwoukolokoshi wavo. (2 Pet. 2:7, 8) Itatu ka kala tuu twa pepelelwa!

¹⁶ Tu li ovapiya vaJehova nosho yo ovashikuli vaJesus Kristus, otu shii kutya aveshe ovo va fya ondjala nenota louyuki ‘otava ka kutifwa.’ Ohatu ka kutifwa filufilu okupitila melongekido laKalunga leulu nedu lipe omo “tamu ka kala ouyuki.” (2 Pet. 3:13) Onghee hano, inatu teka omukumo ile tu kale twa kumwa eshi omahepeko nosho yo elongifo leenghono lomounyuni waSatana la pingena po ouyuki. (Omuud. 5:8) Omukombadambada, Jehova, oku wete osho tashi ningwa po nota ka xupifa mafiku ovo ve hole ouyuki.

Mona ouwa oo hau di mokukala u hole ouyuki

17. Omauwa amwe elipi haa di mokukala tu hole ouyuki?

¹⁷ Epsalme 146:8 otali divilike ouwa muhapu oo hau di mokweenda mondjila youyuki. Omupsalme oo okwa imba ta ti: “Omwene omuhokwi wovayuki.” Diladila ashike kwaashi: Omwene weshito alishe oku tu hole molwaashi otu hole ouyuki. Otu na elineekelo kutya Jehova ote ke tu fila oshisho ngeenge hatu pitifa komesho oinima yOuhamba monghalamwenyo yetu, molwaashi oku tu hole. (Lesha Epsalme 37:25; Omayeletumbulo 10:3.) Hauxuninwa, kombada yedu otaku ka kala ashike ovo ve hole ouyuki. (Omayel. 13:22) Ovapiya vaKalunga vahapu otava ka kala va hafa neenghono notava ka pewa ondjabi yomwenyo waalushe meduparadisa molwaashi hava longo ouyuki. Nokuli nopaife, ovanhu ovo ve hole ouyuki waKalunga ova nangekwa noupuna nombili yokomutima oyo hai va kwafele va kale va hangana momaukwaneumbo avo nosho yo momaongalo. — Fil. 4:6, 7.

18. Oinima ilipi tu na okukala hatu ningi ofimbo twa teelela efiku laJehova?

¹⁸ Otu na okukala hatu kongo ouyuki waJehova ofimbo twa teelela efiku laye linene. (Sef. 2:2, 3) Onghee hano, natu ulikeni kutya otu hole shili eendjila daJehova Kalunga douyuki. Osho osha kwatela mo okukala twa djala “ponhulo oipapa yoivela youyuki” opo tu amene omutima wetu wopafaneko. Otwa pumbwa yo okukala tu na eliudo liwa olo tali ke tu etela ehafo notali ka hafifa yo omutima waKalunga. — Omayel. 27:11.

19. Otu na okukala twa tokola toko okuninga shike, noshike tashi ka kundafanwa moshitukulwa tashi landula?

¹⁹ Ombibeli oya ti: “Omesho Omwene taa tale edu alishe, opo a kwafe neenghono ovo have liameke kuye nomutima aushe.” (2 Omaf. 16:9) Eendjovo odo itadi tu hekeleke tuu eshi hatu ningi eenghendabala tu longe osho sha yuka nonande otu li mounyuni omu muhe na ombili, mu yadi elongifo leenghono nosho yo oukolokoshi! Doshili, otashi dulika tu kumwife ovanhu vahapu ovo va amuka ko kuKalunga eshi hatu longo osho sha yuka. Ndele nande ongaho, ohatu mono omauwa mahapu molwaashi hatu dulika filufilu kouyuki waJehova. (Jes. 48:17; 1 Pet. 4:4) Onghee hano, natu kale twa tokola toko okukala tu hole ouyuki noku u longa nomutima wetu aushe. Ndele okukala tu hole ouyuki nomutima wetu aushe osha kwatela mo yo okukala tu tonde owii nomutima wetu aushe. Oshitukulwa tashi landula otashi ka kundafana kutya ongahelipi osho hatu dulu oku shi ninga.

[Eshangelo lopedu]

Oto nyamukula ngahelipi?

• Omolwashike sha fimana okukala twa lenga ongushu yekuliloyambo ngeenge otwa hala okukala tu hole ouyuki?

• Omolwashike sha fimanenena okukala twa djala “ponhulo oipapa yoivela youyuki”?

• Ongahelipi hatu dulu okudeula eliudo letu?

[Efano pepandja 26]

Eliudo la deulwa nawa otali ke tu kwafela tu shiive kutya oilonga ilipi tu na okuhoolola