Owa ninga ngoo Jehova oshitukulwafyuululo shoye?

“Kongeni tete ouhamba waKalunga nouyuki waye, opo tamu wedelwa ko ei aishe.” — MAT. 6:33.

1, 2. (a) Outumbulilo ‘Israel yaKalunga’ oo wa tumbulwa mOvagalati 6:16 otau ulike koolyelye? (b) Outumbulilo “omapata aIsrael omulongo naavali” oo wa longifwa muMateus 19:28 otau ulike koolyelye?

OSHIKE hashi uya momadiladilo oye ngeenge to lesha edina Israel mOmbibeli? Mbela oho diladila omona waIsak, Jakob, oo a li a lukululwa a ninge Israel ile oshi na sha noludalo laye, oshiwana shaIsrael shonale? Ongahelipi shi na sha naIsrael shopamhepo? Luhapu ngeenge outumbulilo Israel tau longifwa pafaneko, otau ulike ‘kuIsrael yaKalunga,’ ile tu tye kovanhu 144 000 ovo va vaekwa nomhepo iyapuki va ka ninge eehamba novapristeri meulu. (Gal. 6:16; Eh. 7:4; 21:12) Ndele didilika nghee outumbulilo omapata 12 aIsrael, oo tau hangwa muMateus 19:28, wa li wa longifwa monghedi ye likalekelwa.

² Jesus okwa ti: “Medalululo olo Omona wOmunhu eshi ta ka kala omutumba [kolukalwapangelo] loshinge shaye, nanye yo ava mwa shikula nge, tamu ka kala omutumba komalukalwa omulongo naavali, ndele tamu ka tokola omapata aIsrael omulongo naavali.” Outumbulilo “omapata aIsrael omulongo naavali” oo wa longifwa movelishe oyo otau ulike kwaavo ve na eteelelo loku ka kala nomwenyo waalushe mOparadisa kombada yedu, ovo tava ka tokolwa kovahongwa vaJesus ovavaekwa. Oohandimwe va tya ngaho otava ka mona ouwa moilonga youpristeri oyo tai ka longwa kovavaekwa 144 000.

3, 4. Ovavaekwa ovadiinini ove tu tulila po oshihopaenenwa shiwa shilipi?

³ Ngaashi ashike ovapristeri nOvalevi vopefimbo lonale, Ovakriste ovavaekwa vokunena navo ohava tale ko oilonga yavo i li oufembanghenda. (Num. 18:20) Ovavaekwa navo inava teelela okupewa oshitukulwafyuululwa shonhumba kombada yedu. Ndele ponhele yaasho, ova teelela nodjuulufi oku ka ninga eehamba novapristeri meulu pamwe naJesus Kristus. Eshi tava ka ya meulu otava ka twikila natango okulongela Jehova oshilonga osho, ngaashi naanaa sha popiwa mEhololo 4:10, 11, olo la popya shi na sha nonghandangala oyo tava ka dana meulu. — Hes. 44:28.

⁴ Ofimbo ve li kombada yedu, ovavaekwa ohava kala nonghedi yokukalamwenyo oyo tai ulike kutya ova ninga Jehova oshitukulwafyuululwa shavo. Ohava kala va lenga neenghono oufembanghenda oo ve na wokulongela Kalunga. Ove na yo eitavelo tali longo mekuliloyambo laKristus notava twikile oku mu shikula, nokungaho, ‘otava pameke eifano lavo nokuhoololwa kwavo.’ (2 Pet. 1:10) Nonande ovavaekwa ove na omangabeko nokudula kwa yoolokafana, ihava kongo omalipopilo opo ngeno va longe shinini moilonga yaKalunga. Ndele mepingafano naasho, ohava ningi eenghendabala ngaashi tava dulu va wanife po oilonga yaKalunga, molwaashi ove i lenga neenghono. Ohava tulile po yo ovo ve na eteelelo lokukala nomwenyo kombada yedu oshihopaenenwa shiwa.

5. Ongahelipi Ovakriste aveshe tava dulu okuninga Jehova oshitukulwafyuululwa shavo, nomolwashike osho tashi dulu okukala eshongo?

⁵ Kutya nee otu na eteelelo loku ka kala nomwenyo meulu ile okombada yedu, atusheni otu na ‘okulixupula fye vene, nokulitwika [omuti wetu womahepeko, NW], nokushikula Kristus.’ (Mat. 16:24) Ovanhu omamiliyona ovo ve na eteelelo loku ka kala nomwenyo mOparadisa kombada yedu ohava longele Kalunga nohava shikula Kristus monghedi ya tya ngaho. Ihava kala ashike va wanenwa mokukufa ombinga omalufe moilonga yaKalunga ngeenge ove shii kutya otava dulu okuninga shihapu. Osho oshe linyengifa vahapu vomuvo va kaleke onghalamwenyo yavo paunafangwa opo va ninge ovakokolindjila. Vamwe ohava kufa oukwafelikokolindjila oule weemwedi donhumba omudo keshe. Vamwe ava itava dulu okukufa oukokolindjila ohava kufa ombinga moukalele nouladi. Oohandimwe va tya ngaho ohava longo noudiinini ngaashi Maria oo a li a vaeka Jesus nomaadi edimba liwa. Jesus okwa popya shi na sha naMaria, a ti: ‘Okwa longela nge oshilonga shiwa. Okwa ninga osho shi fike peenghono daye.’ (Mark. 14:6-8) Molwaashi otu li mounyuni ou tau pangelwa kuSatana, otashi dulika shi kale shidjuu kufye okulonga shi fike peenghono detu. Ndele nande ongaho, ohatu longo noudiinini notwe lineekela muJehova. Natu ka taleni nghee hatu dulu okuninga ngaho meembinga nhee dokondadalunde dokukalamwenyo kwetu.

Kongeni tete Ouhamba waKalunga

6. (a) Ongahelipi ovanhu vahapu hava ulike kutya ova ninga ashike okukalamwenyo oku oshitukulwafyuululo shavo? (b) Omolwashike shiwa okukala tu na etaleko la fa laDavid?

⁶ Jesus okwa li a lombwela ovashikuli vaye kutya nava konge tete Ouhamba waKalunga nouyuki waye. Ndele ovakwaunyuni luhapu ohava pitifa komesho omahalo avo vene, molwaashi ove li ‘ovanhu vounyuni ou, ovo ve noshitukulwa shavo shi li mokukalamwenyo oku.’ (Lesha Epsalme 17:1, 13-15.) Ovanhu vahapu kave na ko nasha nOmushiti wavo, nomolwaasho ohava kala ashike ve lipyakidila nokulonga olutaima opo va dule okukala nonghalamwenyo youdjeko, okufila oshisho omaukwaneumbo avo nokulindubila oinima yopamaliko opo i ka fyuululwe po kovana vavo. Ovanhu ovo ova ninga okukalamwenyo oku oshitukulwafyuululo shavo. Ndele mepingafano naasho, David okwa li a lalakanena okuliningila “edina la fimana [liwa]” naJehova. Omona waDavid, Salomo, naye okwa ka ladipika ovanhu aveshe lwanima a ti kutya nave liningile edina liwa naKalunga. (Omuud. 7:1, yelekanifa neshangelo lopedu mo-NW.) Ngaashi Asaf, David naye okwa li a mona kutya oshixwepo okukala kaume kaKalunga shi dulife okupitifa komesho omahalo aye mwene. David okwa li a hafela okweenda pamwe naKalunga. Ovakriste vahapu kunena navo ova pitifa komesho oinima yopamhepo ponhele yokupitifa komesho oilonga yavo yokulikongela omboloto.

7. Omumwatate umwe okwa li a mona omanangeko noupuna elipi molwaashi a li a pitifa komesho Ouhamba?

⁷ Natu ka taleni koshihopaenenwa shomukulunhuongalo umwe wokOrepablika yaAfrika loPokati wedina Jean-Claude. Omumwatate oo oku na omukulukadi nosho yo ounona vatatu, nokashi fi shipu okumona oilonga moshilongo shavo. Ovanhu vahapu vomoshilongo osho ohava ningi hanga keshe shimwe opo va kaleke po oilonga yavo. Efiku limwe omuyandji woilonga waJean-Claude okwa li e mu lombwela kutya oku na okukala ta longo oufiku oshivike ashishe, ta hovele po 6:30 yokomatango. Jean-Claude okwa li a yelifila omuyandji woilonga oo kutya oku na okufila oshisho oukwaneumbo waye painiwe nosho yo pamhepo. Okwa li yo e mu yelifila kutya oku na oshinakuwanifwa shokukwafela eongalo. Ndele mbela omuyandji woilonga oo okwa li e linyenga ngahelipi? Okwa ti: “Ngeenge wa mona oilonga owa ninga elao, nou na okudimbwa oinima ikwao, mwa kwatelwa omukulukadi woye, ounona voye nosho yo omaupyakadi oye. Oilonga yoye oyo u na okukala wa pitifa komeshoelela mokukalamwenyo kwoye. Paife ou na okutala ngeenge oto hoolola po oilonga yoye ile elongelokalunga loye.” Ndele ngeno oove nee wa li monghalo ya tya ngaho, mbela ngeno owa ninga po shike? Jean-Claude okwa li e shii kutya Kalunga ote ke mu fila oshisho nonande oku kanife oilonga yaye. Kakele kaasho, okwa li e shii kutya ota ka kala e na shihapu okulonga moilonga yaJehova nonokutya Jehova ota ka wanifa po eemhumbwe dopalutu doukwaneumbo waye. Onghee hano, omumwatate oo okwa li a ya kokwoongala kwomokati koshivike kwa landula ko ponhele yokuya koilonga. Mefiku la ka landula ko, okwa li e lilongekida a ye koilonga nonande ka li e shii ngeenge ota ka tewa mo moilonga ile hasho. Opo e li po, okwa li a dengelwa ongodi ndele ta lombwelwa kutya omuyandji woilonga wavo okwa tewa mo mofeema. Okudja opo, omumwatate Jean-Claude ina ka tewa mo vali moilonga.

8, 9. Omeityo lilipi hatu dulu okuhopaenena ovapristeri nOvalevi ngeenge otwa ninga Jehova oshitukulwafyuululo shetu?

⁸ Vamwe ovo va li monghalo ya faafana naayo yaJean-Claude otashi dulika va li ve lipula tava ti: ‘Ngeenge onda kanifa oilonga yange, mbela ohandi ka wanifa po ngoo oshinakuwanifwa shange shi na sha nokufila oukwaneumbo wange oshisho?’ (1 Tim. 5:8) Kutya nee owa li monghalo ya faafana naayo ile hasho, otashi dulika wa mona okupitila moshimoniwa shoye kutya kape na efiku u ke lipe oushima ngeenge owa ninga Kalunga oshitukulwafyuululo shoye nongeenge owa lenga neenghono oufembanghenda woye woku mu longela. Eshi Jesus a li a lombwela ovahongwa vaye kutya nava konge tete ouhamba waKalunga, okwa li e va shilipaleka kutya oinima ikwao “aishe,” ngaashi oikulya, oikunwa nosho yo oidjalomwa otave ke i “wedelwa ko.” — Mat. 6:33.

⁹ Ndele dimbuluka kutya nonande Ovalevi kava li va pewa oshitukulwafyuululo mEdu lEudaneko, ova li ve na okukala ve lineekela kutya Jehova ote ke va wanifila po eemhumbwe davo dopalutu molwaashi ova li va pitifa komesho elongelokalunga la koshoka. Jehova okwa li e va lombwela kutya oye ta ka kala ‘oshitukulwa shavo shefyuululo.’ (Num. 18:20) Nonande fye ihatu longo motembeli yo venevene ngaashi ovapristeri nOvalevi, ohatu dulu okuhopaenena oikala yavo mokukala twe lineekela kutya Jehova ote ke tu fila oshisho. Eshi hatu ende twa yuka komuxundalili womafiku axuuninwa, osha fimanenena okukala twe lineekela filufilu kutya Jehova ota dulu oku tu fila oshisho. — Eh. 13:17.

Kongeni tete ouyuki waKalunga

10, 11. Ongahelipi vamwe va li va ulika kutya ove lineekela muJehova ngeenge tashi uya poilonga yokulikongela omboloto? Yandja oshihopaenenwa.

¹⁰ Jesus okwa li yo a ladipika ovahongwa vaye kutya nava ‘konge tete ouyuki waKalunga.’ (Mat. 6:33) Osho osha hala okutya otu na okukala twa pitifa komesho omifikamhango daJehova di na sha naasho shi li mondjila nosho yo osho sha puka, ponhele yokukala twa pitifa komesho eenghulunghedi dopanhu. (Lesha Jesaja 55:8, 9.) Otashi dulika to dimbuluka kutya ovanhu vamwe okwa li hava kunu ile hava landifa omakaya, vamwe ova li hava deulile vakwao oukwaita ile hava longo oilwifo yoita noku i landifa. Ndele konima eshi ve lihonga oshili, vahapu ova ka konga oilonga imwe yokulikongela omboloto, nolwanima ova ka kala va wana okuninginifwa. — Jes. 2:4; 2 Kor. 7:1; Gal. 5:14.

¹¹ Omumwatate Andrew oye umwe womwaavo va li va efa po oilonga yavo eshi ve lihonga oshili. Eshi ye nomukulukadi waye ve lihonga kombinga yaJehova, ova li va tokola toko oku mu longela. Andrew okwa li a fiya po oilonga yaye yokulikongela omboloto nonande okwa li e i lenga neenghono. Omolwashike mbela? Omolwaashi ehangano olo a li ta longele ola li hali kufa ombinga mopolitika nokwa li a tokola toko okupitifa komesho ouyuki waKalunga. Eshi Andrew a fiya po oilonga oyo, okwa li e na ounona vavali noka li vali e na oyuuyemo yasha. Okwa li yo e na oimaliwa inini oyo ya li tai dulu oku va kwafela ashike oule weemwedi dinini. Pataleko lopanhu, Andrew okwa li ta monika a fa ehe na ‘oshitukulwafyuululo.’ Okwa kala ta kongo oilonga e na elineekelo kutya Kalunga ote ke mu kwafela. Paife ngeenge Andrew noukwaneumbo waye tava diladila shi na sha nonakudiwa, otava dulu okukoleka oushili oo kutya eke laJehova inali xupipala. (Jes. 59:1) Molwaashi Andrew nomukulukadi waye ova li va kaleka onghalamwenyo yavo paunafangwa, oshe va kwafela va mone omhito yokuya moilonga yefimbo li yadi. Andrew okwa ti: “Opa li omafimbo amwe twa li hatu lipula unene shi na sha noinima ngaashi oimaliwa, onhele yokukala, oukolele nosho yo oukulupe. Ndele Jehova okwa kala alushe te tu yambidida. . . . Ohatu dulu okupopya noushili kutya okulongela Jehova ohaku eta ouwa noku li oufembanghenda munenenene oo omunhu ta dulu okukala e na.”a — Omuud. 12:13.

12. Oukwatya ulipi twa pumbwa opo tu kale twa pitifa komesho omifikamhango daKalunga? Hokolola oshimoniwa shomoshitukulwa sheni.

¹² Jesus okwa li a lombwela ovahongwa vaye a ti: “Ngeno [okwa] li mu neitavelo li fike pombuto yoshinapi, ngeno tamu dulu okulombwela omhunda ei: Lilundulula po apa, ove u lundulukile kwinya, ngeno tai lilundulula po, ndele kaku noshinima tashi mu nyenge.” (Mat. 17:20) Ndele mbela oto ka dula ngoo okupitifa komesho omifikamhango daKalunga nonande okuninga ngaho otashi dulika ku etife eenghalo didjuu? Ngeenge owe lihange monghalo yonhumba ndele ku shii kutya ninga po shike, oto dulu okupula omayele koilyo yeongalo leni. Nopehe na omalimbililo, oto ka kala u udite wa tulumukifwa pamhepo ngeenge owa udu oimoniwa yavo.

Kala u na olupandu li na sha nomafiloshisho aJehova opamhepo

13. Omafiloshisho opamhepo elipi hatu ka mona ngeenge ohatu longele Jehova noudiinini?

¹³ Ngeenge owa lenga oufembanghenda oo u na wokulongela Jehova, oto dulu okukala noushili kutya ota ka wanifa po eemhumbwe doye dopalutu nosho yo dopamhepo, ngaashi ashike a li a fila oshisho Ovalevi. Diladila shi na sha naDavid. Nonande David okwa li ha di mekololo, okwa li e lineekela kutya Kalunga ote ke mu fila oshisho. Nafye natu kaleni twe lineekela muJehova nokuli nongeenge tu wete twa fa tuhe na omukwafi. Dimbuluka yo kutya Asaf okwa li a kwafelwa a mone kutya oupyakadi waye owa li naanaa peni eshi a li a ya “mouyapuki waKalunga.” (Eps. 73:17) Sha faafana, nafye otu na okukala hatu kongo ekwafo kOdjo oyo hai tu pe eendja dopamhepo. Onghee hano, otu na okukala twa lenga oufembanghenda oo tu na wokulongela Kalunga kashi na nee mbudi kutya otu li meenghalo da tya ngahelipi. Kungaho, ohatu ka ninga Jehova oshitukulwafyuululo shetu.

14, 15. Otu na okulinyenga ngahelipi ngeenge opa ningwa omalunduluko onhumba e na sha neudeko lomishangwa, nomolwashike?

¹⁴ Oto ke linyenga ngahelipi ngeenge Jehova oo e li Odjo youyelele wopamhepo okwa yandje ouyelele wonhumba mupe u na sha ‘noinima yaye yomoule’ oyo tai hangwa mOmbibeli? (1 Kor. 2:10-13, yelekanifa no-NW) Omuyapostoli Petrus okwe tu tulila po oshihopaenenwa sha denga mbada shi na sha nonghedi omo a li e linyenga eshi Jesus a li a lombwela ovapwilikini vaye a ti: “Ngenge itamu li ombelela yOmona wOmunhu nye itamu nu ohonde yaye, nye kamu na omwenyo munye vene.” Molwaashi ovahongwa vahapu vaJesus ova li tava diladila kutya ota popi okulya ombelela nokunwa ohonde yo venevene, ova ti: “Eendjovo edi dikukutu, olyelye ta dulu oku di pwilikina?” Okudja opo, ova “shuna monima.” Ashike Petrus okwa li a nyamukula Jesus a ti: “Omwene, otu ye kulyelye ngeno? Ove u neendjovo domwenyo waalushe.” — Joh. 6:53, 60, 66, 68.

¹⁵ Omuyapostoli Petrus naye ka li a uda ko filufilu osho Jesus a li a hala okutya eshi a ti kutya ove na okulya ombelela nokunwa ohonde yaye. Ndele nande ongaho, okwa li e lineekela ouyelele wopamhepo oo Jehova a li ta yandje. Ngeenge pa ningwa omalunduluko onhumba e na sha neudeko leeshili dOmbibeli kunena, mbela ohatu kendabala ngoo okuuda ko omatomheno kutya omolwashike pa ningwa omalunduluko a tya ngaho? (Omayel. 4:18) Pashihopaenenwa, Ovaberea vomefelemudo lotete ova li va “tambula nohokwe eendjovo daKalunga, ndee tava konakona momishangwa omafiku aeshe.” (Oil. 17:11) Nafye ohatu ka kala twa lenga neenghono oufembanghenda oo tu na wokulongela Jehova, ngeenge otwa hopaenene Ovaberea nokuninga Jehova oshitukulwafyuululwa shetu.

Natu hombole ile tu hombolwe ashike mOmwene

16. Ongahelipi hatu dulu okuninga Kalunga oshitukulwafyuululo shetu ngeenge tashi uya poshipango osho tashi hangwa mo 1 Ovakorinto 7:39?

¹⁶ Onghedi vali imwe omo Ovakriste va pumbwa okukaleka omalalakano aKalunga momadiladilo oyo okutula moilonga omayele Ombibeli e na sha nokuhombola ile okuhombolwa “[ashike, NW] mOmwene.” (1 Kor. 7:39) Ovakriste vahapu ova hoolola okukala inava hombola ile inava hombolwa ponhele yokulipwililikila omayele oo aKalunga. Kalunga oha file oshisho pahole oohandimwe va tya ngaho. Ndele mbela David okwa li a ninga po shike eshi a li e udite owike nokwa li ta monika a fa ehe na omukwafi? David okwa ti: “[Kalunga] ohandi shi mu pimhile, noudjuu wange ohandi u mu mbubulile. Omhepo yange, nande nai notelwe meni lange.” (Eps. 142:2-4) Omuprofeti Jeremia oo a kala ta longele Kalunga noudiinini oule womido omilongo ina hombola naye otashi dulika osho a li e udite ngaho. Otashi dulika to ka kala wa hala okukonakona oshihopaenenwa shaye osho sha kundafanwa metukulwa 8 lembo God’s Word for Us Through Jeremiah.

17. Ongahelipi omumwameme umwe oo ina hombolwa ha ungaunga nowike oo ha kala e udite omafimbo amwe?

¹⁷ Omumwameme umwe wOkoilongo ya Hangana okwa ti: “Inandi lalakanena okukala inandi hombolwa. Onde lilongekida okuhombolwa ngeenge onda mono omunhu oo ta wapalele. Meme oo ehe fi Omukriste okwa li ta kendabala okufininika nge ndi itavele ashike keshe oo te ya. Onda li nde mu pula ngeenge ote ke shi kalela po ngoo shimha twa ka kala itatu shi endifa nawa mohombo yetu. Ndele mokweendela ko kwefimbo, eshi a ka mona kutya ondi na oilonga iwa nohandi dulu okulifila oshisho nonda hafa, ina kala vali ta fininike nge ndi hombolwe.” Omumwameme oo omafimbo amwe oha kala shili e udite owike. Okwa ti: “Ohandi kendabala alushe okukonga ekwafo kuJehova noke na efiku a efele nge.” Ndele mbela oshike sha li sha kwafela omumwameme oo a kale e lineekela muJehova? Okwa ti: “Eilikano olo la kwafela nge ndi mone kutya Kalunga oko e li shili nonokutya alushe oku li pamwe naame. Ondi udite kutya ondi na ongushu nonda hafa molwaashi Omukombadambada meshito alishe oha pwilikine komailikano ange.” Okwa weda ko a ti: “Ohandi kendabala okukwafela vamwe nopehe na okuteelela va alulile nge ouwa wonhumba, molwaashi ondi shii kutya ‘okuyandja oku nelao komesho yokutambula.’ Ohandi kala ndi udite ehafo lokomutima ngeenge handi diladila kwaasho handi dulu okuninga opo ndi kwafele omunhu wonhumba.” (Oil. 20:35) Omumwameme oo okwa ninga shili Jehova oshitukulwafyuululo shaye nota hafele oilonga yoku mu longela.

18. Omeityo lilipi Jehova ta dulu oku ku ninga oshitukulwafyuululo shaye?

¹⁸ Oto dulu okuninga Jehova oshitukulwafyuululo shoye kashi na nee mbudi kutya owe lihange monghalo ya tya ngahelipi. Ngeenge owa ningi ngaho, oto ka valulilwa mokati koshiwana shaKalunga osho sha hafa. (2 Kor. 6:16, 17) Oshidjemo, oto ka ninga oshitukulwafyuululo shaJehova, ngaashi naanaa ovapiya vaye vopefimbo lonale va li va ninga. (Lesha Deuteronomion 32:9, 10.) Ngaashi ashike Kalunga a li a hoolola oshiwana shaIsrael mokati koiwana ikwao shi ninge oshitukulwafyuululo shaye, naave oto dulu okuninga waye note ke ku fila oshisho. — Eps. 17:8.

[Eshangelo lopedu]

Oto nyamukula ngahelipi?

Ongahelipi to dulu okuninga Jehova oshitukulwafyuululo shoye

• mokukonga tete Ouhamba nouyuki waye?

• mokukala wa lenga eendja dopamhepo?

• mokukala ho dulika koshipango shaye shi na sha nokuhombola ile okuhombolwa ashike mOmwene?

[Eendjovo dididilikwedi pepandja 13]

Jehova ota ka ninga oshitukulwafyuululo shetu ngeenge otwa kala twa pitifa komesho oilonga yaye

[Efano pepandja 15]

Oshihopaenenwa shaJeremia otashi tu omukumo