Owa mona ngoo ehafo olo hali di ‘mokuyandja nehalo liwa’?
OVAKRISTE vomuFilippi shonale ova li hava yambidida nehalo liwa elongelokalunga lashili. Omuyapostoli Paulus okwa li a nwefwa mo a shangele Ovafilippi ta ti: “Ohandi pandula Kalunga kange keshe tuu apa handi mu dimbulukwa, ndele momailikano ange aeshe ohandi mu ilikanene alushe nehafo, onye amushe, eshi mu nekwatafano lomevangeli okefiku linya lotete fiyo paife.” (Fil. 1:3-5) Paulus okwa li ta dimbuluka nawa shi na sha neyakulo olo ye novalongi pamwe naye va li va pewa kuLidia oo a li e va ladipika va kale meumbo laye. Lidia noukwaneumbo waye ova li va ninginifwa pomhito oyo. — Oil. 16:14, 15.
Diva konima yaasho, eongalo lomuFilippi olo opo la li la totwa po ola li la tumina Paulus oipumbiwa yonhumba lwoikando ivali pefimbo opo a li a ka talela po ovamwaxe vokuTessalonika oule woivike yonhumba. Oshilando osho Tessalonika osha li eekilometa 160 lwaapo okudja muFilippi. (Fil. 4:15, 16) Konima yomido dinini, ovamwatate vomuFilippi novomuMakedonia ova li va hala okukwafela Ovakriste vokuJerusalem eshi va uda kutya otava hepekwa, nokuli nonande navo ova li tava mono oixuna nova li ve li ‘moluhepo linene.’ Paulus okwa ti kutya ovamwatate ovo “ova koya nokuli eenghono davo” eshi va yandja oikwafa oyo. Ndele nande ongaho, okwa weda ko a ti: ‘Ove tu indila neenghono va pewe omhito va yandje nehalo liwa.’ — 2 Kor. 8:1-4, yelekanifa no-NW; Rom. 15:26.
Ovamwatate vomuFilippi ova twikila okukala nomhepo yokuyandja nokuli nokonima eshi pa pita omido omulongo lwaapo okudja eshi va ninga Ovakriste. Eshi ovamwatate ovo va li va kundaneka kutya Paulus okwa idililwa modolongo muRoma, ova li va tuma Epafroditus e mu twaalele oipumbiwa, a enda oshinano sheekilometa 1 287 nokwa li a taulula nokuli nefuta. Nopehe na omalimbililo, Ovafilippi ova li va tumina Paulus oikwafa opo a dule okutwikila okupameka ovamwaxe nokuudifa, nokuli nopefimbo olo a li modolongo. — Fil. 1:12-14; 2:25-30; 4:18.
Ovakriste vashili ohava yambidida nokunena oilonga yokuudifa nokuninga ovanhu ovahongwa. (Mat. 28:19, 20) Ohava longifa efimbo lavo, eenghono noiniwe yavo opo va xumife komesho oinima yOuhamba. Okamhungu koshitukulwa eshi otaka kundafana eenghedi dimwe omo hatu dulu okuyambidida oilonga oyo twa pewa kuKalunga.
[Oshimhungu pepandja 22, 23]
EENGHEDI DIMWE DOKUYAMBIDIDA OILONGA YOKUUDIFA YOMOUNYUNI AUSHE
ODO VAMWE VA HOOLOLA
Ovakriste vahapu ove litulila po omuvalu wonhumba woimaliwa oyo va tokoka okukala hava tula mokakefa ‘kOmayambidido Oilonga yomOunyuni Aushe.’
Keshe omwedi, omaongalo ohaa tumu omayambidido oo keembelewa dEendombwedi daJehova domoilongo yao. Omaongalo otaa dulu yo okutuma omayambidido oo odikilila kondjukifi ei: Watch Tower Bible and Tract Society of South Africa: Attention Accounting Office, Private Bag X2067, Krugersdorp, 1740, South Africa, ile koshitaimbelewa shEendombwedi daJehova shomoshilongo shao. (Omayambidido okondadalunde oo a tumbulwa pedu nao otamu dulu oku a tumina koshitaimbelewa shEendombwedi daJehova shomoshilongo sheni.) Ngeenge omunhu a hala okuyandja otyeke oku na okushanga ko “Watch Tower Society” noku i tumina kondjukifi oyo ya tumbulwa metetekelo. Otamu dulu yo okuyandja omayambidido oinima ngaashi oulyenge, omamanya nosho yo oinima ikwao yondilo. Oinima ya tya ngaho ou na oku i tuma pamwe nonhumwafo i li pauxupi omo wa popya kutya nayo oi li omayambidido.
OINIMA OYO WA DILADILA OKUYANDJA MONAKWIIWA
Kakele kokuyandja omayambidido opashimaliwa, ope na vali eenghedi dimwe omo tamu dulu okuyambidida oilonga yOuhamba yomounyuni aushe. Eenghedi odo ongaashi:
Omakwashilipaleko: Oto dulu okushangifa ehangano lo-Watch Tower Bible and Tract Society of South Africa li kale umwe womovafyuululi voimaliwa yoye yokomahangano omakwashilipaleko ile yopendjela.
Omatuvikilo okombaanga: Oto dulu okupula ombaanga opo oimaliwa oyo i li koakounta yoye ile oyo wa tuvikilifa oule wefimbo lonhumba i kale mefiloshisho lehangano lo-Watch Tower Bible and Tract Society of South Africa ile li i fyuulule po ngeenge owa fi, to shi ningi metwokumwe noiteelelwa yeembanga domoshilongo sheni.
Oipambuliko nomikuli odo wa ehelwa komahangano onhumba ile kepangelo (Stocks and Bonds): Oto dulu okushanga sha yela nawa kutya oinima oyo nai pewe po ehangano lo-Watch Tower Bible and Tract Society of South Africa ile kutya nai ninge po yalo ngeenge owa fi.
Oiniwe ngaashi etungo ile edu: Oto dulu okuyandja omayambidido oinima ya tya ngaho kehangano ile ngeenge omo ho kala natango monhele oyo, oto dulu okushanga kutya ngeenge owa fi nai pewe ehangano. Ashike fimbo ino tula oinima oyo kedina lehangano, kwatafana tete noshitaimbelewa shomoshilongo sheni.
Omatestamenti nomikanda dikwao dopaveta di na sha netukulo loikwamaliko (Wills and Trusts): Oto dulu okushanga etestamenti kutya ngeenge owa fi oikwamaliko yoye nai pewe ehangano o-Watch Tower Bible and Tract Society of South Africa, ile oku li kwatela momikanda dikwao di na sha netukulo loikwamaliko yoye. Ngeenge owa shangifa ehangano lopalongelokalunga momikanda da tya ngaho, otashi dulika itashi ka pula okufuta oifendela ihapu.
Opo u mone ouyelele muhapu, dengela ile u shangele kombelewa yomavalulo (Accounting Office) kondjukifi oyo ya ulikwa pedu ile u kwatafane noshitaimbelewa shomoshilongo sheni.
Accounting Office
Watch Tower Bible and Tract Society of South Africa
Private Bag X2067
Krugersdorp
1740
South Africa
Onomola yongodi: 011 761 1323