Jehova oha nangeke noupuna ovo hava yandje nehalo liwa

OMUSHITI wetu okwa lenga ovanhu eshi e va pa oshali i na ondilo, emanguluko lokuninga omatokolo. Kakele kaasho, oha nangeke noupuna ovo hava longifa emanguluko lavo lokuninga omatokolo nopehe na okuliholamwene va xumife komesho elongelokalunga lashili nosho yo ovo hava ningi ngaashi tava dulu opo va yapulife edina laye liyapuki nokuyambidida elalakano laye la tongomana. Jehova ina hala ovanhu tava dulika ashike molwaashi osho ve na okuninga ile ve udite va fininikwa. Ndele ponhele yaasho, okwa lenga neenghono ovo tave mu liyandjele nehalo liwa tave linyengifwa kohole yashili nosho yo kolupandu lomoule laasho e va ningila.

Pashihopaenenwa, eshi Ovaisrael va li mombuwa yaSinai, Jehova okwa li e va lombwela va tunge onhele yelongelokalunga. Okwa ti: “Kufeni muei mu i kwete oshaliyambo kOmwene. Keshe umwe e [na ehalo liwa momutima] waye ne i ete, oshaliyambo kOmwene.” (Ex. 35:5) Omuisrael keshe okwa li e na okuyandja osho ta dulu, omayambidido ehalo liwa, kashi na nee mbudi kutya oshike nonokutya oshi fike peni, osha li tashi ka longifwa monghedi ya yuka opo ehalo laKalunga li wanifwe po. Mbela Ovaisrael ova li ve linyenga ngahelipi?

Ombibeli oya ti: ‘Keshe umwe e nomutima wa penduka nakeshe umwe ou a fininikwa komhepo yaye,’ okwa yandja omayambidido ehalo liwa, ‘keshe umwe e na ehalo liwa momutima waye.’ Ovalumenhu novakainhu ova li va eta nehalo liwa koilonga yaJehova eengodo, outenda vomomatwi, oulinga vokomimwe, oshingoli, oshisilveri, oshikushu, eengodi dimbulawu, eengodi dopuripuri, eengodi ditilyana da fa ohonde, oliina iwa, olududi loikombo, oipa yeedi, ondomo itilyana, oipa yeembwa domomeva, oiti yomwonde, omamanya ondilo, omaadi abalsam nomaadi. Xuuninwa, “oinima aishe yoshilonga eshi sha li shi nokulongwa, oya wana, heeno, oya xupa po.” — Ex. 35:21-24, 27-29; 36:7.

Osho sha li sha hafifa unene Jehova kashi fi oinima oyo ya li ya yandjwa, ndele omhepo yokuyandja nehalo liwa yaavo va li tava yambidida elongelokalunga la koshoka. Ova li yo ve linyengifwa opo va yambe po efimbo neenghono davo mokuyambidida oilonga. Ombibeli oya ti: ‘Omwalikadi keshe omunongo okwa hodila nomake aye mwene. Novalikadi aveshe ava va fininikwa komitima davo dounongo va hodila olududi loikombo.’ Shikwao vali, Jehova okwa pa Besaleel ‘ounongo neendunge neshiivo nomayele moilonga i lili naku lili.’ Nopehe nomalimbililo, Kalunga okwa yadifa Besaleel naOholiab owino wa pumbiwa opo va dule okulonga oilonga aishe oyo e va pa. — Ex. 35:25, 26, 30-35.

Eshi Jehova a li a pula Ovaisrael va yambidide, okwa li e na elineekelo filufilu kutya ‘keshe umwe e na ehalo liwa momutima waye’ ota ka yambidida elongelokalunga lashili. Kakele kaasho, oha nangeke noupuna ovo ve na omitima di na ehalo liwa moku va pa ewiliko nosho yo ehafo linene. Kungaho, Jehova okwa ulika kutya ngeenge ta nangeke noupuna ovapiya vaye ovo hava yandje nehalo liwa, ota shilipaleka kutya oinima oi li po ya wana ile kutya ope na ovanhu ve na owino va wanife po ehalo laye. (Eps. 34:9) Eshi to longele Jehova nopehe na okuliholamwene, kala wa shilipalekwa kutya ota ka nangeka noupuna omhepo yoye yokuyandja nehalo liwa.