“Oshilonga oshinene”

OSHA li efimbo lokwoongala oko kwa fimana muJerusalem. Ohamba David oya li ya ifana omalenga ayo, omalenga omombala novalumenhu ovanaenghono. Ova li va halelela okuuda etumwalaka olo la fimana. Jehova okwa li a lombwela Salomo, omonamati waDavid, a tunge ongulu ya kula oyo tai ka yapulilwa Kalunga kashili. Ohamba yaIsrael inamido, David, oya li ya pewa oshiyelekifofano ndele tai shi yandje kuSalomo. David okwa ti: “Oshilonga oshinene, ndelenee etungaumbo olo kali fi lomunhu, ndelenee olOmwene Kalunga.” — 1 Omaf. 28:1, 2, 6, 11, 12; 29:1.

Lwanima David okwa li a pula a ti: “Ope na tuu ou a hala nena eli nehalo liwa okweetela Omwene eeshali nomake e yadi?” (1 Omaf. 29:5) Mbela ngeno opo wa li, ngeno owe linyenga ngahelipi? Mbela ngeno owe linyengifwa ngoo u yambidide oilonga oyo inene? Ovaisrael ova li va yandja omayambidido nehalo liwa. Ova li “va hafela ehalo liwa lavo, osheshi va yandja komwene nomutima aushe nehalo liwa.” — 1 Omaf. 29:9.

Konima yomido omafele, Jehova okwa li a tota po oshinima sha kula shi dule otembeli. Okwa li a tota po otembeli inene yopamhepo, oyo i li elongekido olo tali shi ningifa tashi shiiva opo ovanhu va dule oku mu longela nokweehena popepi naye pakanghameno lekuliloyambo laJesus. (Heb. 9:11, 12) Ongahelipi Jehova ha kwafele ovanhu va kale va hangana naye kunena? Ohe shi ningi okupitila moilonga yetu yokuninga ovanhu ovahongwa. (Mat. 28:19, 20) Omolwoidjemo yoilonga oyo, omudo keshe ohapa ningwa omakonakonombiibeli omamiliyona, ohapa ninginifwa ovahongwa omayovi nohapa totwa omaongalo omafele.

Kakele kaasho, exumokomesho la tya ngaho ola ningifa ku pilindwe oishangomwa yopaMbiibeli ihapu, ku tungwe noku wapekululwe Omalupale Ouhamba noku kongwe eenhele doyoongalele. Mbela owa dimina ngoo kutya oshilonga shetu shokutandavelifa onghundana iwa oshi li oshilonga shinene noshi na ondjabi? — Mat. 24:14.

Ohole yokuhola Kalunga, ovanhu vakwetu nosho yo oilonga yokuudifa Ouhamba oyo ya endelela, ohai linyengifa oshiwana shaKalunga shi etele ‘Omwene nehalo liwa eeshali nomake e yadi’ mokuyandja omayambidido. Kashi hafifa tuu ‘okufimaneka Omwene neliko loye noshipe shoye shomukeshe to shi likola,’ nokumona nghee oiniwe yetu tai longifwa moilonga inene mondjokonona yovanhu! — Omayel. 3:9.

Eenghedi dimwe omo vamwe hava yambidida oilonga yomounyuni aushe

Ovanhu vahapu kunena ohava “tuvikile sha” ile ve litulile po omuvalu wonhumba woimaliwa oyo va tokola okukala tava tula mokakefa ‘kOmayambidido Oilonga yomOunyuni Aushe.’ (1 Kor. 16:2) Omwedi keshe, omaongalo ohaa tumu omayambidido oo keembelewa dEendombwedi daJehova odo tadi pashukile oshilongo shavo. Oto dulu yo okutuma omayambidido odikilila kehangano lopaveta olo hali longifwa kEendombwedi daJehova moshilongo sheni. Opo u shiive edina lehangano lopaveta olo hali longifwa kEendombwedi daJehova moshilongo sheni, kwatafana noshitaimbelewa osho hashi pashukile oshilongo sheni. Ondjukifi yoshitaimbelewa otai hangwa ko-www.pr2711.com. Oto dulu okuyandja omayambidido meenghedi tadi landula:

OMAYAMBIDIDO OO HATU DULU OKUTUMA ODIKILILA

Omayambidido oo ohaa ningwa paelektronika, to longifa okakalata kodebit ile kocredit. Moitaimbelewa imwe oto dulu yo okuninga ngaho to longifa o-jw.org ile o-Web site imwe vali.
Omayambidido opashimaliwa, oulyenge ile oinima ikwao yondilo. Ou na okutuma onhumwafo i li pauxupi omo wa popya kutya oimaliwa noinima ikwao oi li omayambidido.

OKUYANDJA OMAYAMBIDIDO OO TO DULU OKU A SHUNIFILWA

Okuyandja omayambidido opashimaliwa nelalakano olo kutya oto dulu oku a shunifilwa ngeenge owe a pumbwa.
Ou na yo okutuma onhumwafo i li pauxupi tai ulike kutya omayambidido oo owe a yandja nelalakano olo.

OINIMA OYO WA DILADILA OKUYANDJA MONAKWIIWA

Kakele kokuyandja omayambidido opashimaliwa nosho yo oinima ikwao yondilo, ope na vali eenghedi dimwe omo tamu dulu okuyambidida oilonga yOuhamba yomounyuni aushe. Eenghedi odo oda tumbulwa pedu. Kutya nee owa hala okuyandja monghedi ilipi, alikana tete ninga ekwatafano noshitaimbelewa opo u ude kutya omukalo ulipi tau longo moshilongo sheni. Molwaashi oiteelelwa yopaveta nosho yo eemhango di na sha noifendela oda yoolokafana, osha fimana okuninga ekwatafano novashiivinawa moinima oyo ofimbo ino hoolola onghedi omo wa hala okuyandja.

Omakwashilipaleko: Oto dulu okushangifa ehangano lopaveta olo hali longifwa kEendombwedi daJehova li kale omufyuululi woimaliwa yoye yokomahangano omakwashilipaleki ile yopendjela.

Omatuvikilo okombaanga: Oto dulu okupula ombaanga opo oimaliwa oyo i li koakounda yoye, opendjela yoye ile oyo wa tuvikilifa oule wefimbo lonhumba i fyuululwe po kehangano lopaveta olo hali longifwa kEendombwedi daJehova, to shi ningi metwokumwe noiteelelwa yeembaanga domoshilongo sheni.

Oipambuliko nomikuli odo wa ehelwa komahangano onhumba ile kepangelo (Stocks and Bonds): Oto dulu okushanga sha yela nawa kutya oinima oyo nai pewe po ehangano lopaveta olo hali longifwa kEendombwedi daJehova ile kutya nai ninge po yalo ngeenge owa fi.

Oiniwe ngaashi etungo ile edu: Ngeenge owa hala okuyandja omayambidido oinima ya tya ngaho, alikana ninga tete ekwatafano noshitaimbelewa. Oshitaimbelewa osho tashi ka ufa kutya oshinima osho otashi ka longifwa kehangano ile kutya otashi landifwa po sho oshimaliwa tashi ka yambidida oilonga yomounyuni aushe.

Okuyandja omayambidido pamukalo wo-Gift Annuity: Palongekido olo, omuyandji oha yandje oimaliwa ile sha shimwe shi lili kehangano lopaveta olo hali longifwa kEendombwedi daJehova moshitukulwa, ye ta kala ta pewa ko oshimaliwa shonhumba shokondadalunde omudo keshe onghalamwenyo aishe she likolelela keudafanotwokumwe. Momudo oo, omuyandji ta tulifa mo elongekido la tya ngaho, otashi dulika a nanwe oifendela i li pedu.

Omatestamenti nomikanda dikwao dopaveta di na sha netukulo loikwamaliko (Wills and Trusts): Oto dulu okushanga etestamenti kutya ngeenge owa fi, oikwamaliko yoye nai pewe ehangano lopaveta olo hali longifwa kEendombwedi daJehova ile oku li kwatela momikanda dikwao di na sha netukulo loikwamaliko yoye. Ngeenge owa shangifa ehangano lopalongelokalunga momikanda da tya ngaho, otashi dulika uha ka fute oifendela ihapu.

Okuyandja omayambidido a tya ngaho owa pumbwa okuninga omalongekido komesho yefimbo. Opo u kwafele oilonga yEendombwedi daJehova mounyuni aushe okupitila meenghedi dimwe dokuyandja omayambidido, opa longekidwa okambo Charitable Planning to Benefit Kingdom Service Worldwide. Okambo oko oke li mOshiingilisha nomOshispanish oka nyanyangidwa nelalakano ka yandje ouyelele kombinga yeenghedi di lili noku lili di na sha nanghee hatu dulu okuyandja omayambidido paife ile monakwiiwa, ile ngeenge owa fi. Ouyelele oo u li mokambo oko otashi dulika itau wapalele moshitukulwa sheni omolweemhango di na sha noifendela moshilongo sheni. Mokulongifa eenghedi da tya ngaho dokuyandja, vahapu ova kwafela mokuyambidida ehangano letu nokukwafela vamwe painiwe mounyuni aushe nosha etela vahapu ouwa ngeenge tashi uya poifendela. Ngeenge okambo oko oke li moshilongo sheni, oto dulu okupula hamushanga weongalo leni e ke ku pe.

Opo u mone ouyelele muhapu, finda opo pa shangwa “Yambidida oilonga yetu yomounyuni aushe” pedu lepandja letu lokointaneta ko jw.org ile u kwatafane noshitaimbelewa shomoshitukulwa sheni.