Ovaleshi tava pula  . . .

Omolwashike Kalunga a li a lombwela Abraham a yambe po omona waye?

▪ Ngaashi sha shangwa mOmbibeli membo laGenesis, Jehova Kalunga okwa li a lombwela Abraham kutya na yambe po omona waye a ninge exwikiloyambo. (Genesis 22:2) Ovaleshi vamwe vOmbibeli ohava nyengwa okuuda ko eityo lehokololo olo. Pashihopaenenwa, omuhongwanhu umwe wedina Carol Delaney okwa ti: “Eshi nda li okaana, onda li nda kumwa neenghono fiku nda uda ehokololo olo oshikando shotete. Onda li handi lipula kutya Kalunga oo okwa tya ngahelipi ta pula umwe a ninge oshinima shinyanyalifi sha tya ngaho?” Ndele nonande omaliudo a tya ngaho oku shii okuudiwa ko, oshiwa okukaleka momadiladilo oitwa yonhumba.

Shotete, diladila kutya oshike osho Jehova a li ina ninga. Nonande Abraham okwa li a dimina okuyamba po omona waye, Jehova ka li e mu efa e shi ninge nokape na vali efiku a li a pula umwe a ninge oshinima sha tya ngaho. Jehova okwa hala ovalongeli vaye aveshe va kale nonghalamwenyo ile nova hafa, mwa kwatelwa nounona.

Oshitivali, Ombibeli otai ulike kutya Jehova okwa li e na etomheno liwa eshi a pula Abraham a yambe po omona waye Isak. Kalunga okwa li e shii kutya omido omafele konima yoshiningwanima osho, okwa li ta ka yamba po Omona waye, Jesus, opo e tu file.a (Mateus 20:28) Eshi Jehova a li a pula Abraham a yambe po omona waye, okwa li a ulika monghedi ididilikwedi osho a li ta ka ninga po monakwiiwa nonokutya eyambo lOmona waYe ola li tali ke mu pula shi fike peni. Ngahelipi mbela?

Didilika osho Jehova a li a lombwela Abraham, eshi a ti: “Kufa Isak, omumwoye ewifa, ou u mu hole, ndee . . . mu yamba exwikiloyambo.” (Genesis 22:2) Mbela owa didilika ngoo kutya Jehova okwa ti kufa Isak omumwoye “ou u mu hole”? Jehova okwa li e shii nawa kutya Abraham oku hole omumwaye Isak neenghono noku shii yo kutya Ye oku uditile ngahelipi Omona waYe Jesus. Jehova naye oku hole Jesus neenghono, nomolwaasho a li e mu ifana lwoikando ivali okudja meulu a ti kutya “Omona wange omuholike.” — Markus 1:11; 9:7.

Didilika yo kutya eshi Jehova a li ta pula Abraham a yambe po omona waye okwa li a longifa oshitya shOshiheberi osho tashi ulike kokupula sha nefimaneko. Omuhongwanhu umwe wOmbibeli okwa ti kutya okulongifa kwaKalunga oshitya osho otaku ulike kutya “OMWENE oku udite ko lela ongushu yaasho a li ta pula.” Ngeenge otwa diladila koluhodi linene olo Abraham a li e udite eshi a pulwa a yambe po omona, ohatu ka dula yo okuuda ko ouyahame oo Jehova a li e udite eshi a li ta tale Omona waye omuholike ta hepekwa nokufya. Nopehe na omalimbililo, Jehova okwa li e udite ouyahame munenenene pomhito oyo oo a li ina pita muwo nande onale, noita ka pita vali muwo.

Onghee hano, nonande otashi dulika tu kwatwe konghumwe eshi Jehova a li a pula Abraham a yambe po omona waye, otashi ka kala pandunge okudimbuluka kutya Jehova ka li a efa tatekulululwa oo omudiinini a ninge exwikiloyambo olo. Okwa li a xupifa Isak mefyo nokwa amena Abraham aha kwatwe koluhodi lokufilwa e li omudali. Ndele nande ongaho, Jehova ka li a xupifa “Omona waye mwene, ndele okwe mu yandja omolwetu atushe.” (Ovaroma 8:32) Mbela omolwashike Jehova a li a efa a pite mouyahame wa tya ngaho? Okwe shi ninga opo “tu kale tu nomwenyo.” (1 Johannes 4:9) Olo kali fi tuu euliko linene lohole yaKalunga yoku tu hola! Ndele mbela osho kashi na oku tu linyengifa nafye tu kale tu mu hole?b

[Omashangelo opedu]