Ehena popepi naKalunga

Ngeenge Kalunga ta dimi po omanyono, mbela ohe a dimbwa ngoo?

ENYAMUKULO kepulo olo oheeno. Jehova okwa udanekela ovo a hokwa a ti: “Ame ohandi ka dima po omanyonauno avo, ndele itandi dimbulukwa vali omatimba avo.” (Jeremia 31:34) Omushangwa oo otau tu shilipaleke kutya ngeenge Jehova ta dimine po ovanyoni ve livela ombedi, iha dimbuluka vali omanyono avo. Ndele mbela osho osha hala okutya Omushiti weshito linenenene iha dulu okudimbuluka omanyono oo a dimina po ovanhu? Eendjovo daHesekiel otadi yandje ouyelele shi na sha nanghee Kalunga ha dimine po noha dimbwa.— Lesha Hesekiel 18:19-22.

Jehova okwa li a longifa omuprofeti Hesekiel e li omupopikalelipo waye opo a udifile Juda naJerusalem shihe fi oshidiinini etumwalaka laYe letokolo. Oshiwana ashishe osha li sha efa po elongelokalunga laJehova nosha li sha yadifa oshilongo elongifo leenghono. Jehova okwa li a xunganeka kutya Ovababilon otava ka hanauna po Jerusalem. Ndele nande okwa li a yandja etumwalaka letokolo, okwa li yo a ulika kutya oshiwana oshi na eteelelo. Omunhu keshe okwa li ta dulu okuninga ehoololo nokwa li e na okuhumbata oilanduliko yeenghatu daye.— Ovelishe 19, 20.

Ndele mbela ongahelipi ngeenge umwe okwa lundulula oikala yaye ii nokwa hovela okulonga ouwa? Jehova okwa ti: “Omuhenakalunga ngenge te lialuluka koulunde aushe ou a longa, ndee ta diinine eenghedimhango dange adishe, ndee ta longo ouyuki naashi sha yuka, ye ota ka kala shili e nomwenyo, ye ita ka fya.” (Ovelishe 21) Osho otashi ulike kutya Jehova oku “yadi ekufilo” nokwa li a hala okudimina po omulunde oo e lialuluka keendjila daye dii nokwe livela ombedi shili.— Epsalme 86:5.

Ongahelipi shi na sha nomanyono oo a li a nyona? Jehova okwa yelifa a ti: “Omatauluko aye aeshe e a ninga, itae mu valulilwa vali.” (Ovelishe 22) Didilika kutya omanyono omunhu oo e livela ombedi ‘itae mu valulilwa vali.’ Omolwashike eendjovo odo dididilikwedi?

Eityo loshitya shOshiheberi osho sha tolokwa “dimbulukwa” ile “valelwa” ola kwatela mo shihapu shihe fi ashike okudimbuluka oinima yonale. Embo lomauyelele limwe ola popya shi na sha noshitya osho la ti: “Luhapu ohashi ulike kokukatuka eenghatu ile shi longifwe pamwe noityalonga oyo tai holola okukatuka eenghatu.” Onghee hano, oshitya osho sha tolokwa “dimbulukwa” ile “valelwa” otashi dulu okutya “okukatuka.” Eshi Jehova a ti kutya omulunde oo e livela ombedi omanyono aye “itae mu valelwa vali,” okwa hala okutya ita ka katukila vali omunhu oo onghatu omolwomanyono aye oo mokukala te a shokonona ile e mu handukile.a

Eendjovo daHesekiel 18:21, 22 otadi ulike kutya Jehova oha dimine po ovanhu filufilu, naasho otashi kumu omitima detu. Ngeenge Jehova e tu dimina po omatimba, ihe tu a valulile vali monakwiiwa. Ponhele yaasho, oha dimi po omanyono aavo ve livela ombedi onga te a ekele konima yaye. (Jesaja 38:17) Omanyono a tya ngaho ihe a dimbuluka vali.— Oilonga 3:19.

Tu li ovanhu inava wanenena, otwa pumbwa efilonghenda laKalunga molwaashi atushe ohatu nyono luhapu. (Ovaroma 3:23) Ashike Jehova okwa hala tu shiive kutya ngeenge otwe livela ombedi shili, ote ke tu dimina po nehalo liwa. Ngeenge okwe tu dimine po, oha dimbwa, sha hala okutya, ite ke tu handukila ile e tu katukile onghatu vali omolwomatimba etu. Osho itashi tu hekeleke tuu! Mbela onghenda yaKalunga itai ku linyengifa u ehene popepi elela naye?

[Omashangelo opedu]