OMAPULO OPAMBIIBELI A NYAMUKULWA
Mbela ohatu dulu ngoo okudiminwa po omanyono etu?
Okuhokiwa kuKalunga kashidjuu unene
Ombiibeli otai ti kutya ovanhu aveshe ove li ovalunde. Otwa fyuulula oulunde komunhu wotete, Adam. Onghee, omafimbo amwe ohatu ningi oinima ii, nolwanima ohatu lipe oushima. Omona waKalunga, Jesus Kristus, okwa futa omanyono etu eshi e tu fila. Ekuliloyambo laye ole shi ningifa tashi shiiva opo tu dule okudiminwa po. Ekulilo oli li oshali ya dja kuKalunga. — Lesha Ovaroma 3:23, 24.
Ovanhu vamwe ova nyona omanyono a kwata moiti, nohave lipula ngeenge Kalunga ota dulu ngoo oku va dimina po. Lao linene, Eendjovo daKalunga otadi ti: ‘Ohonde yOmona waye Jesus otai ke tu koshola omanyono etu aeshe.’ (1 Johannes 1:7) Jehova ohe tu dimine po nehalo liwa, nokuli nomanyono a kwata moiti, ngeenge otu na oikala iwa notwe livela ombedi. — Lesha Jesaja 1:18.
Otu na okuninga shike opo tu diminwe po?
Ngeenge otwa hala Jehova Kalunga e tu dimine po, otwa pumbwa okulihonga kombinga yaye, okuuda ko eendjila daye, omayele aye nosho yo oiteelelwa yaye. (Johannes 17:3) Jehova oha dimine po nehalo liwa ovo ve livela ombedi omolwelihumbato lavo lii notava kendabala okuninga omalunduluko. — Lesha Oilonga 3:19.
Okuhokiwa kuKalunga kashi fi unene shidjuu kufye. Jehova oku shii omaunghundi etu. Oku na onghenda nolune. Mbela olune laye itali ku linyengifa u kale wa hala okulihonga shihapu shi na sha nanghee u na oku mu hafifa? — Lesha Epsalme 103:13, 14.