Olune—oukwatya wa fimanenena koshipala shaKalunga

OMUNYASHA umwe wokuJapani okwa li e linyengifwa kolune olo a li a ulikilwa komulumenhu umwe omunamido. Omulumenhu oo omutumwa, okwa kala kondje yoshilongo osho shomuAsia oule womido dihapu noka li natango e shii okupopya nawa Oshijapani. Ndele nande ongaho, oshivike keshe okwa li ha ka konakona Ombibeli nomulumenhu oo omunyasha keumbo lavo. Omunamido oo ha kala te limemesha noku na olune, okwa li ha nyamukula nelidiiniko omapulo mahapu oo a li ha pulwa komukonakoni oo omunyasha.

Omulumenhu oo omunyasha iha dimbwa nandenande olune lomutumwa oo omunamido. Omunyasha oo okwa ti: ‘Ngeenge Ombibeli ohai kwafele omunhu a kale e na olune nomunahole ngaho, osha yela kutya ondi na oku i konakona.’ Osho osha li she mu twa omukumo opo a konakone oshinima osho a li ehe shii nandenande. Luhapu olune ohali kumu omutima womunhu shi dulife eendjovo odo hatu popi.

Olune oukwatya wopakalunga

Oshi li paushitwe okuulikila olune ovapambele vetu, molwaashi olune olo okukala u hole omunhu molwaashi e ku pamba.a Ndele olune olo oukwatya wopakalunga wa fimanenena. Jesus okwa ti kutya Xe womeulu iha ulikile ashike olune ovo ve mu hole, ndele naavo yo “ve he shii okupandula.” Okwa kumaida yo ovashikuli vaye kutya nava hopaenene olune laKalunga, eshi a ti: “Kaleni hano mwa wana mwa pwa, ongaashi Xo yeni meulu a wana a pwa.”— Lukas 6:35; Mateus 5:48; Exodus 34:6.

Molwaashi ovanhu ova shitwa oshifeka shaKalunga, otava dulu okuulika oukwatya wolune. (Genesis 1:27) Ohatu dulu okuhopaenena Kalunga nokulihonga okuulikila vamwe olune nokuli naavo vehe fi ovapambele vetu. Ombibeli otai ulike kutya olune ile tu tye oukaume, oli li oshitukulwa shoiimati yomhepo iyapuki yaKalunga ile eenghono daye tadi longo. (Ovagalati 5:22) Onghee hano, omunhu ota dulu okwiimika nokukulika oukwatya oo eshi te lihongo shihapu kombinga yaKalunga, Omushiti wetu, nokweehena popepi elela naye.

Molwaashi olune kali fi ashike oshitukulwa shounhu wetu ndele Kalunga okwe li lenga yo neenghono, osha yukila ko eshi e tu lombwela ta ti: “Kalafaneni mu noukaume” ile tu tye, nolune. (Ovaefeso 4:32) Otwa dimbulukifwa yo kutya: “Okuyakula ovaenda inamu ku dimbwa” ile okuulikila ovaendanandjila olune.— Ovaheberi 13:2.

Ndele mbela ohatu dulu ngoo shili okuulikila vamwe olune, nokuli novaendanandjila, mounyuni ou ovanhu vahapu vehe na olune noihava pandula? Oshike tashi dulu oku tu kwafela tu ninge ngaho? Mbela omolwashike tu na okukala hatu lipula nokuli shi na sha naasho?

Olune ola fimanenena koshipala shaKalunga

Shihokwifa, konima eshi omuyapostoli Paulus a popya kombinga yokuulikila ovaendanandjila olune, okwa weda ko ta ti: “Moku shi ninga vamwe va nangeka ovaengeli, inave shi shiiva.” Mbela ngeno oto ka kala u udite ngahelipi ngeenge ngeno owa pewa omhito yokuyakula ovaengeli? Paulus okwa ti kutya vamwe ove shi ninga “inave shi shiiva.” Oku shi popya noitya imwe, Paulus okwa li a hala okutya ngeenge otwa kala tu na onghedindjikilile yokuulikila vamwe olune, nokuli novaendanandjila, ile ovanhu ovo tuhe shii, ohatu ka pewa ondjabi inatu shi teelela.

Omatoloko mahapu Eembibeli oo e na omaulikokwatakanifo okwa kwatakanifa eendjovo daPaulus nehokololo laAbraham nosho yo laLot oo e li muGenesis etukulwa 18 neti-19. Mehokololo keshe, omwa popiwa kombinga yovaengeli ovo va li ve va holokela inave shi shiiva, ve na omatumwalaka a fimana. Etumwalaka olo Abraham a lombwelwa oli na sha nokuwanifwa kweudaneko laKalunga li na sha noku ka dala okaana kokamati, ofimbo Lot a li a lombwelwa kombinga yokuxupifwa mehanauno olo la li pokuhanga oshilando shaSodom naGomorra.— Genesis 18:1-10; 19:1-3, 15-17.

Ngeenge owa lesha omishangwa odo di li mokatendo ka tetekela, oto ka mona kutya Abraham naLot ova li va ulikila olune ovaendanandjila ovo va li vehe shii. Pefimbo lOmbibeli, okuyakula ovatalelipo novaendanandjila, kutya nee ookaume koye, ovapambele ile ku va shii, osha li sha tambulwa ko meputuko nosha li oshiteelelwa. Onghee hano, paMhango yaMoses, Ovaisrael ova li va teelelwa va wanife po eemhumbwe dovanailongo ovo ve li moshilongo shavo. (Deuteronomion 10:17-19) Ndele nande ongaho, osha yela kutya Abraham naLot ova li va ninga shihapu shi dulife pwaasho sha li tashi pulwa komhango eshi ya ka totwa po. Ova li va ninga eenghendabala da mana mo opo va ulikile ovaendanandjila olune nova li va nangekwa noupuna omolweenghendabala davo.

Oilonga oyo Abraham a longa omolwolune inai mu etela ashike omanangeko noupuna eshi a dala okaana, ndele nafye otwa mona yo ouwa. Ngahelipi mbela? Abraham nomonamati Isak ova dana onghandangala ya fimanenena mokuwanifwa kwelalakano laKalunga. Ova ka kwatelwa momusholondodo wepata omo mwa ka dja Messias, Jesus. Oshihopaenenwa shavo shoudiinini otashi ulike nghee ovanhu va li tava ka xupifwa pakanghameno lohole yaKalunga nosho yo ouwanghenda waye munene.— Genesis 22:1-18; Mateus 1:1, 2; Johannes 3:16.

Omahokololo oo otaa ulike filufilu kutya Kalunga okwa teelela ovo a hokwa va ninge shike nosho yo kutya okwa lenga shi fike peni oukwatya wolune. Okuulika oukwatya oo osha fimanenena koshipala shaKalunga ndele kaku fi ehoololo.

Okuulika olune otaku tu kwafele tu shiive nawa Kalunga

Ombibeli oya ti kutya pefimbo letu ovanhu vahapu tava ka kala “ve he shii kupandula, ve he neitavelo, ve he nohole.” (2 Timoteus 3:1-3) Nopehe na omalimbililo, oho shakene novanhu va tya ngaho efiku keshe. Ndele nande ngaho, osho itashi ti kutya katu na okuulikila vamwe olune. Ovakriste ova dimbulukifwa taku ti: “Inamu alulila nande omunhu owii waye. Lalakaneni ei ya wapalela ovanhu aveshe.”— Ovaroma 12:17.

Ohatu dulu okuninga eenghendabala tu mbwalangadjife olune letu. Ombibeli oya ti: ‘Keshe ou e nohole oye a shiiva Kalunga.’ Onghedi imwe omo hatu dulu okuulika kutya otu na ohole omokuulikila vamwe olune. (1 Johannes 4:7; 1 Ovakorinto 13:4) Onghee hano, ngeenge otwa kala hatu ulikile ovanhu vakwetu olune, otashi ka ulika kutya otwa shiiva nawa Kalunga, naasho otashi ke tu hafifa. Jesus okwa popya mEudifo lokOmhunda a ti: “Ovanelao ovananghenda, osheshi ovo tava ka filwa onghenda. Ovanelao ovo ve nomitima da yela, osheshi ovo tava ka mona Kalunga.”— Mateus 5:7, 8.

Diladila koshihopaenenwa shaAki, omukulukadi omunyasha Omujapani oo e na ovanamati vavali. Konima eshi a filwa ina ombadilila, okwa li a kwatwa kepolimano la kwata moiti. Omafimbo amwe okwa li ha kala e udite nai neenghono ndele ta i kundokotola. Opo nee, oukwaneumbo wonhumba owa li we uya okukala poushiinda shavo. Omushamane oo a li omutwe woukwaneumbo oo okwa fila moshiponga, nomukulukadi okwa fyaala po nounona vatano vanini. Aki okwa li e uditile unene onghenda oukwaneumbo oo, nokwa li a panga oukaume nao. Aki okwa li a ninga ngaashi ta dulu opo a kwafele oukwaneumbo oo, e va pa oikulya, oikutu oyo va li inava pumbwa vali nosho tuu, naasho oshe mu kwafela a pepaleke omaliudo aye. Okwa li e udite a wanifilwa oushili wOmushangwa ou tau ti: “Okuyandja oku nelao komesho yokutambula.” (Oilonga 20:35) Onghee hano, okuulikila vamwe olune oko oshinima sha fimana osho to dulu okuninga ngeenge wa polimana.

“Ota tulike kOmwene”

Okuulikila vamwe olune ihaku pula lela shihapu. Inaku likolelela yo kokudula kwetu ile nokuli keenghono detu dopalutu. Luhapu oinima ngaashi okulimemesha, okupopya eendjovo dolukeno, okukwafela vamwe, okuyandja oshali inini ya diladilwa nawa ile okweefa vamwe va ye komesho yoye momukweyo, ohai pandulwa neenghono. Ngeenge ku shii lela kutya tya shike ile ninga shike ngeenge u li monghalo yonhumba, popya ile u ninge sha osho tashi ulike olune. Omulumenhu omunyasha oo a tumbulwa pehovelo loshitukulwa eshi okwa li a kumwa neenghono kolune lomutumwa omunamido, olo la pondola shihapu shi dulife pwaasho a popya. Hano itashi kumwifa eshi Kalunga a teelela ovalongeli vaye va kale ve ‘hole efilonghenda’ ile tu tye olune.— Mika 6:8.

Oshilonga shinini sholune otashi dulu okupondola shihapu. Ngeenge omunhu okwa ulike olune te shi ningi nomalinyengotomheno a yuka, naunene tuu ngeenge oku hole yo Kalunga, otashi ka kuma omitima daavo ta ulikile olune. Ndele nokuli nonande ovo wa ulikila olune inave ku pandula, osho itashi ti kutya ino pondola sha. Kalunga okwa lenga oukwatya oo. Ombibeli oye tu shilipaleka kutya ngeenge otwa ulikile vamwe olune, kungaho ohatu “tulike kOmwene.” (Omayeletumbulo 19:17) Omolwashike ito kongo eemhito u ulikile olune ovo ve ku dingilila?

[Eshangelo lopedu]

[Ouyelele u li pepandja 20]

Ngeenge ku shii lela kutya tya shike ile ninga shike, popya ile u ninge sha osho tashi ulike olune

[Efano pepandja 19]

Abraham okwa li a pewa ondjabi inene omolwolune laye

[Efano pepandja 20]

Ngeenge hatu ulikile vamwe olune otwa fa hatu “tulike kOmwene”