‘Ou ha yandje nehalo liwa ota ka nangekwa noupuna’

OKUYANDJA omayambo okwa kala ku li oshitukulwa shafimana shelongelokalunga lashili okudja nale. Ovaisrael ova li hava yandje omayambo oinamwenyo, nOvakriste ova kala va shiivika omolwokuyandja “omahambeleloyambo.” Ashike, ope na va li omayambo amwe oo Kalunga a hokwa. (Heb. 13:15, 16) Ngaashi hatu ke shi mona moihopaenenwa tai landula, omayambo aeshe ohaa eta ehafo nosho yo omanangeko noupuna.

Hanna, omupiya omudiinini wopefimbo lonale, okwa li a halelela okaana, ashike okwa li ongadji. Okwa li udanekela Jehova meilikano kutya ngeenge okwa mono okaana kokamati, ote “ke ka yandja kOmwene ka ninge kOmwene omafiku aeshe omokukala kwako.” (1 Sam. 1:10, 11) Lwanima, Hanna okwa ka mona okaana kokamati, Samuel. Konima eshi Samuel a tova, Hanna okwe mu twala kotembeli ngaashi a li a udaneka. Jehova okwa li a nangeka noupuna Hanna omolwomhepo yaye yeliyambo. Okwa li e na oufembanghenda wokumona vali ounona vatano, naSamuel okwa ninga omuprofeti nomushangi wOmbiibeli. — 1 Sam. 2:21.

Ngaashi Hanna naSamuel, Ovakriste kunena ove na oufembanghenda wokulongifa onghalamwenyo yavo moilonga iyapuki yOmushiti wavo. Jesus okwa udaneka kutya eyambo keshe hatu ningi opo tu longele Jehova otali ka nangekwa noupuna. — Mark. 10:28-30.

Mefelemudo lotete, omukainhu Omukriste wedina Dorkas okwa li ha ningi omaliyambo opo a kwafele vamwe, nokwa li a shiivika nawa ‘omolwoilonga iwa ihapu ndele ta yandje oikwafa ihapu.’ Shinyikifa oluhodi, okwa li a “hangika koudu, ndele ta fi,” neongalo ola li la nyika oluhodi. Eshi ovahongwa va li va uda kutya Petrus omo e li moshitukulwa, ova li ve mu indila e uye kuvo. Diladila kehafo olo va li ve na eshi Petrus e uya ndele ta nyumuna Dorkas koufi, naasho osho sha li oshikando shotete omuyapostoli ta nyumuna. (Oil. 9:36-41) Jehova kali a dimbwa omhepo yaDorkas yeliyambo. (Heb. 6:10) Oshihopaenenwa shaye shokuyandja osha shangwa mOmbiibeli tu shi hopaenene.

Omuyapostoli Paulus naye okwe tu tulila po oshihopaenenwa sha denga mbada eshi a li a yamba po nehalo liwa efimbo laye mokukala ta yandje elitulemo koinima yOuhamba. Okwa li a shangela eongalo lomuKorinto a ti: “Ame ohandi ka yandja aishe nehafo, ndele handi liyandjele eemwenyo deni.” (2 Kor. 12:15) Paulus okwa li e lihonga kutya okuninga omaliyambo omolwovanhu vakweni ihashi ku etele ashike ehafo, ndele osho sha fimana oshosho kutya, Jehova ote ke ku nangeka noupuna nota ka kala e ku hokwa. — Oil. 20:24, 35.

Osha yela kutya Jehova oha kala a hafa ngeenge hatu longifa efimbo neenghono detu opo tu xumife komesho etumwalaka lOuhamba nokukwafela ovaitaveli vakwetu. Ndele mbela ope na ngoo vali eenghedi dimwe omo hatu dulu okuyambidida oilonga yokuudifa Ouhamba? Heeno. Kakele koilonga yetu yopahole, ohatu dulu okufimanekifa Kalunga mokukala hatu yandje omayambidido ehalo liwa. Omayambidido oo ohaa longifwa okutamununa mo oilonga yokuudifa mounyuni aushe, mwa kwatelwa okuyambidida ovatumwa nosho yo ovalongi vefimbo li yadi ve likalekelwa. Natango, omayambidido etu ehalo liwa ohaa longifwa mokulongekida nokunyanyangida oishangomwa nouvidio, okukwafela ovo va dengwa koiponga yopaushitwe nokutunga Omalupale Ouhamba. Ohatu dulu okukala noushili kutya ou ha yandje “nehalo liwa ota ka nangekwa noupuna.” Shikwao vali, ngeenge hatu yandje osho shiwa elela kuJehova, kungaho otwe mu fimaneka. — Omayel. 3:9; 22:9.

Eenghedi Dimwe Omo Vamwe Hava Yambidida Oilonga Yomounyuni Aushe

Ngaashi sha li pefimbo lomuyapostoli Paulus, ovanhu vahapu kunena ohava “tuvikile sha” ile ve litulile po omuvalu wonhumba woimaliwa oyo va tokola okukala tava tula mokakefa ‘kOmayambidido Oilonga yomOunyuni Aushe.’ (1 Kor. 16:2) Omwedi keshe, omaongalo ohaa tumu omayambidido oo keembelewa dEendombwedi daJehova odo tadi pashukile oshitukulwa osho shi li koshi yoshitaimbelewa. Oto dulu yo okutuma omayambidido odikilila kehangano lopaveta olo hali longifwa kEendombwedi daJehova moshilongo sheni. Opo u shiive edina lehangano lopaveta olo hali longifwa kEendombwedi daJehova moshilongo sheni, kwatafana noshitaimbelewa osho hashi pashukile oshilongo sheni. Ondjukifi yoshitaimbelewa otai hangwa ko-www.pr2711.com. She likolelela keenghalo domoshitukulwa, oto dulu okuyandja omayambidido meenghedi tadi landula:

OMAYAMBIDIDO OO HATU DULU OKUTUMA ODIKILILA

Omayambidido oo ohaa ningwa paelektronika, to longifa okakalata ko-debit ile ko-credit. Moitaimbelewa imwe oto dulu yo okuninga ngaho to longifa o-jw.org ile o-Web site imwe vali.
Omayambidido opashimaliwa, oulyenge ile oinima ikwao yondilo. Ou na yo okutuma onhumwafo i li pauxupi omo wa popya kutya oimaliwa noinima ikwao oi li omayambidido.

OKUYANDJA OMAYAMBIDIDO OO TO DULU OKU A SHUNIFILWA

Okuyandja omayambidido opashimaliwa nelalakano olo kutya oto dulu oku a shunifilwa ngeenge owe a pumbwa.
Ou na yo okutuma onhumwafo i li pauxupi tai ulike kutya omayambidido oo owe a yandja nelalakano olo.

OINIMA OYO WA DILADILA OKUYANDJA MONAKWIIWA

Kakele kokuyandja omayambidido opashimaliwa nosho yo oinima ikwao yondilo, ope na vali eenghedi dimwe omo tamu dulu okuyambidida oilonga yOuhamba yomounyuni aushe. Eenghedi odo oda tumbulwa pedu. Kutya nee owa hala okuyandja monghedi ilipi, alikana tete ninga ekwatafano noshitaimbelewa opo u ude kutya omukalo ulipi tau longo moshilongo sheni. Molwaashi oiteelelwa yopaveta nosho yo eemhango di na sha noifendela oda yoolokafana, osha fimana okuninga ekwatafano novashiivinawa moinima oyo ofimbo ino hoolola onghedi omo wa hala okuyandja.

Omakwashilipaleko nomalongekido opendjela: Oto dulu okushangifa ehangano lopaveta olo hali longifwa kEendombwedi daJehova li kale omufyuululi woimaliwa yoye yokomahangano omakwashilipaleki ile yopendjela.

Omatuvikilo okombaanga: Oto dulu okupula ombaanga opo oimaliwa oyo i li koakounda yoye, i fyuululwe po kehangano lopaveta olo hali longifwa kEendombwedi daJehova, to shi ningi metwokumwe noiteelelwa yeembaanga domoshilongo sheni.

Oipambuliko nomikuli odo wa ehelwa komahangano onhumba ile kepangelo (Stocks and Bonds): Oto dulu okushanga sha yela nawa kutya oinima oyo nai pewe po ehangano lopaveta olo hali longifwa kEendombwedi daJehova ile kutya nai ninge po yalo ngeenge owa fi.

Oiniwe ngaashi etungo ile edu: Ngeenge owa hala okuyandja omayambidido oinima ya tya ngaho, alikana ninga tete ekwatafano noshitaimbelewa. Oshitaimbelewa osho tashi ka ufa kutya oshinima osho otashi ka longifwa kehangano ile kutya otashi landifwa po sho oshimaliwa tashi ka yambidida oilonga yomounyuni aushe.

Omatestamenti nomikanda dikwao dopaveta di na sha netukulo loikwamaliko (Wills and Trusts): Oto dulu okushanga etestamenti kutya ngeenge owa fi, oikwamaliko yoye nai pewe ehangano lopaveta olo hali longifwa kEendombwedi daJehova ile oku li kwatela momikanda dikwao di na sha netukulo loikwamaliko yoye. Ngeenge owa shangifa ehangano lopalongelokalunga momikanda da tya ngaho, otashi dulika uha ka fute oifendela ihapu.

Okuyandja omayambidido a tya ngaho owa pumbwa okuninga omalongekido komesho yefimbo. Opo u kwafele oilonga yEendombwedi daJehova mounyuni aushe okupitila meenghedi dimwe dokuyandja omayambidido, opa longekidwa okambo Charitable Planning to Benefit Kingdom Service Worldwide. Okambo oko oke li mOshiingilisha nomOshispanish oka nyanyangidwa nelalakano ka yandje ouyelele kombinga yeenghedi di lili noku lili di na sha nanghee hatu dulu okuyandja omayambidido paife ile monakwiiwa, ile ngeenge owa fi. Ouyelele oo u li mokambo oko otashi dulika itau wapalele moshitukulwa sheni omolweemhango di na sha noifendela moshilongo sheni. Mokulongifa eenghedi da tya ngaho dokuyandja, vahapu ova kwafela mokuyambidida ehangano letu nokukwafela vamwe painiwe mounyuni aushe nosha etela vahapu ouwa ngeenge tashi uya poifendela. Ngeenge okambo oko oke li moshilongo sheni, oto dulu okupula hamushanga weongalo leni e ke ku pe.

Opo u mone ouyelele muhapu, finda opo pa shangwa “Yambidida oilonga yetu yomounyuni aushe” pedu lepandja letu lokointaneta ko jw.org ile u kwatafane noshitaimbelewa shomoshitukulwa sheni.