Yandja elitulemo koshinima osho sha fimanenena
‘Vo va kale, ve shi koneka, nokutya Oove ou to ifanwa Omwene, Ove auke u li po Omukombadambada medu alishe.’ — EPS. 83:18.
1, 2. (a) Oshike sha fimanenena kovanhu aveshe? (b) Omolwashike sha fimana okukala tu na olupandu li na sha noshinima osho?
KUNENA oimaliwa oi li oshinima sha fimanenena kovanhu. Ohava yandje elitulemo mokulikongela oupuna ile okukaleka po osho ve na nale. Vamwe ova tala ko omaukwaneumbo avo, oukolele ile osho va pondola paumwene shi li oshinima sha fimanenena.
2 Ashike, oshinima sha fimanenena unene kufye atushe osho okuyukipalifwa kwounamapangelo waJehova. Otwa pumbwa okuhenuka oinima oyo tai dulu oku tu imba tu yandje elitulemo koshinima osho sha fimanenena. Ngahelipi mbela? Otashi dulika tu kale twe lipyakidila noinima yakwalukeshe ndele hatu dimbwa kutya osha fimanenena okuyukipalifwa kwounamapangelo waJehova. Ile otashi dulika tu efe omayeleko etu dimbwife oshinima osho sha fimana unene. Kakele kaasho, olupandu letu linene li na sha nokuyukipalifwa kounamapangelo waJehova otali dulu oku tu kwafela tu ungaunge nomashongo oo hatu shakeneke monghalamwenyo. Nolupandu la tya ngaho otali ke tu ehenifa popepi elela naJehova.
OMOLWASHIKE SHA FIMANA?
3. Satana okwa popya shike shi na sha nepangelo laKalunga?
3 Eenghatu daSatana Ondiaboli oda etifa po epulo li na sha noufemba waJehova wokupangela. Okwa popya oipupulu kutya epangelo laKalunga oli na oulingilingi nonokutya Kalunga iha pe oishitwa yaye osho sha denga mbada. Ondiaboli oya ti yo kutya ovanhu otava dulu okukala va hafa neenghono nove li nawa ngeenge otave lipangele voovene. (Gen. 3:1-5) Satana okwa popya yo kutya kape na omunhu omudiinini kuKalunga molwaashi ngeenge okwa hangwa komayeleko ote ke liteeka po Jehova Kalunga. (Job 2:4, 5) Metwokumwe neshongo laSatana, Jehova okwa efa pa pite efimbo opo ovanhu va mone oushili u na sha nonghalamwenyo oyo ihe li mepangelo laKalunga.
4. Omolwashike ounamapangelo waJehova u na okuyukipalifwa?
4 Jehova oku shii kutya omapopyo Ondiaboli kae fi oshili. Ndele omolwashike a efa oshinima osho shi ye komesho, eshi a pa Satana omhito a ulike oushili womapopyo aye? Ovanhu novaengeli otava dana onghandangala mokunyamukula epulo olo. (Lesha Epsalme 83:18.) Ovalihomboli votete ova li va anya okudulika kuJehova, novanhu vahapu ova ninga sha faafana. Osho osha li tashi dulu okutula vamwe momalimbililo va diladile kutya Ondiaboli otashi dulika ya popya oshili. Molwaashi epulo olo ola limbililika ovanhu nosho yo ovaengeli, ope na ashike okukala omashilafano pokati koiwana, komihoko nomomaukwaneumbo. Ashike konima ngeenge ounamapangelo waJehova owa yukipalifwa, ovanhu aveshe otava ka dulika fiyo alushe kepangelo laye lopauyuki. Eshito alishe otali ka kala vali li na ombili. — Ef. 1:9, 10.
5. Onghandangala ilipi hatu dana eshi hatu yambidida ounamapangelo waJehova?
5 Oufemba waJehova wokupangela otau ka yukipalifwa, nepangelo laSatana nolovanhu itali ka pondola notali ka hanaunwa po filufilu. Epangelo laKalunga okupitila mOuhamba wopaMessias otali ka pondola, novadiinini otava ka ulika kutya ovanhu otava dulu okukala ovadiinini kepangelo laKalunga. (Jes. 45:23, 24) Mbela owa hala oku ka kala mokati kaavo va kala tava yambidida ounamapangelo waJehova noudiinini? Nopehe na omalimbililo owa hala. Opo tu kanyatele oudiinini wetu, otwa pumbwa okuyandja elitulemo koshinima osho sha fimanenena nokushiiva kutya omolwashike sha fimanenena.
OKUYUKIPALIFWA OKWA FIMANA UNENE KU DULIFE EXUPIFO
6. Okuyukipalifwa kwounamapangelo waJehova okwa fimana shi fike peni?
6 Ngaashi sha popiwa nale, okuyukipalifwa kwounamapangelo waJehova oko oshinima sha fimanenena osho sha kwatela mo ovanhu aveshe. Okwa fimana unene ku dulife ehafo olo hatu mono pauhandimwe. Mbela osho osha ningifa exupifo letu li kale inali fimana ile kutya Jehova ke na ko nasha lela nafye? Hasho nandenande. Omolwashike mbela?
7, 8. Omolwashike okuyukipalifwa kwounamapangelo waKalunga kwa kwatela mo ewanifo lomaudaneko aye?
7 Jehova oku hole ovanhu nokwe va lenga. Okwa li e na ehalo lokulongifa ohonde yOmona waye opo tu dule oku ka kala nomwenyo fiyo alushe. (Joh. 3:16; 1 Joh. 4:9) Ngeno Jehova okwa li a dopa okuwanifa po omaudaneko aye, ngeno Ondiaboli oya mona omhito yokwiifana Jehova omunaipupulu oo ha ngungunine ovapiya vaye oinima iwa noiha pangele pauyuki. Osha ningifa yo ovasheki va pule tava ti: “Eudaneko lealuko laye oli li peni? Osheshi nghee tuu ootatekulu va fya, oinima aishe oi li ngaashi ya kala pehovelo leshito.” (2 Pet. 3:3, 4) Naasho osha ningifa Jehova a mone kutya okuyukipalifwa kwounamapangelo waye okwa kwatela mo exupifo lovanhu ovaduliki. (Lesha Jesaja 55:10, 11.) Shikwao vali, ohole yaJehova otu i liwetele mounamapangelo waye. Onghee hano, ohatu dulu okukala noushili kutya ota kala alushe e hole ovapiya vaye ovadiinini, e va lenga noku va pandula. — Ex. 34:6.
8 Ngeenge otu shii nghee ounamapangelo waJehova wa fimana, itatu ka dinififa nande exupifo letu ile ongushu yetu momesho aye. Otu na okukala tu na etaleko la yuka li na sha nounamapangelo nosho yo exupifo letu. Etaleko la tya ngaho ola fimana ngeenge otwa kala hatu yandje elitulemo koshinima osho sha fimanenena nokukala ovadiinini kepangelo laJehova li li pauyuki.
OSHILIHONGOMWA SHI NA SHA NETALEKO LA YUKA
9. Satana okwa li a popya shike shi na sha naJob? (Tala efano pehovelo loshitukulwa.)
9 Omhumbwe yokukala netaleko la yuka oya yelifwa nawa membo laJob, embo lomomambo Ombiibeli oo a shangwa tetetete. Membo olo ohatu lihongo mo nghee Satana a popya oipupulu kutya ngeenge Job okwa hangwa koupyakadi wa kwata moiti, ote ke liteeka po Kalunga. Satana okwa popya kutya Kalunga oye a li ta hepeke Job. Jehova ina hepeka Job, ashike okwa li a efa Satana a yeleke Job, eshi a ti: “Aishe e i kwete, oi li meke loye.” (Lesha Job 1:7-12.) Moule wefimbo lixupi, Job okwa li a filwa ovapiya vaye, ovana vaye ovaholike ve li omulongo, nokwa li yo a kanifa oiniwe yaye. Satana okwa li eshi ninga nelalakano opo ngeno Kalunga mwene a kale a fa oye omweetifi womaupyakadi aJob. (Job 1:13-19) Natango Satana okwa ka hepeka Job nomukifi uyahameka nounyanyalifi. (Job 2:7) Onghalo yaye oya li ya naipikwa neenghono keendjovo tadi teya omukumo domukulukadi waye nosho yo dovalumenhu vatatu ovo va li tave liningifa va fa ve mu lile po. — Job 2:9; 3:11; 16:2.
10. (a) Job okwa li a ninga po shike opo a ulike oudiinini waye kuKalunga? (b) Omonghedi ilipi a li e na etaleko la puka?
10 Oshidjemo osha li shike? Omapopyo aSatana okwa li a nyanekwa pomutenya kutya kae fi oshili. Job okwa li a anya okuliteeka po Kalunga. (Job 27:5) Ashike, Job okwa ka kala e na etaleko la puka oule wokafimbo. Okwa li ta komangele shi na sha nouyuki waye mwene, nokupula nokuli etomheno kutya omolwashike ta mono oixuna. (Job 7:20; 13:24) Otashi dulika tu diladile kutya oshi shii okuudiwa ko ngeenge otwa tale koixuna aishe oyo Job a mona. Ashike Kalunga okwa li a mona kutya okwa pumbwa okupukulula okudiladila kwaJob. Jehova okwa li e mu lombwela shike?
11, 12. Jehova okwa li a kwafela Job a kale e na olupandu lashike, naJob okwa li e linyenga ngahelipi?
11 Eendjovo odo Kalunga a li a lombwela Job odi li momatukulwa ane membo laJob, etukulwa 38 fiyo 41. Ashike katu na vali apa hatu dulu lokulesha shi na sha naKalunga ta lombwele Job kondadalunde kutya omolwashike ta monene oixuna. Elalakano laJehova lokulombwela Job kala li oku mu yelifila kutya omolwashike a li ta mono oixuna, a fa ngeno te liyukipalifa. Ponhele yaasho, Jehova okwa li a hala okukwafela Job a mone kutya ke fi sha okuyelekanifwa nounene waJehova. Okwa li a kwafela Job a mone kutya okwa li pe na oshinima shinene osho sha li shi na okulipulwa nasho. (Lesha Job 38:18-21.) Osho okwa li sha kwafela Job a kale vali e na etaleko la yuka.
12 Mbela Jehova okwa li ta yandje omayele nonyanya konima eshi Job e lididimikila omayeleko oo a kwata moiti? Hasho nande, na Job ka li nokuli ta diladila ngaho. Nonande okwa li a mona oixuna, lwanima Job okwa ka kala vali e na olupandu. Okwa popya nokuli a ti: “Handi alula eendjovo dange ndele handi lidilulula mondwi nomomute.” Osho osha li oidjemo yomayele aJehova taa tulumukifa. (Job 42:1-6) Potete, Job okwa li yo a pewa omayele e li mondjila komunyasha Elihu. (Job 32:5-10) Konima eshi Job a li a pwilikina koutekuduliko waKalunga nokuyukifa etaleko laye, Jehova okwa li a lombwela vamwe shi na sha noudiinini waJob eshi a li ta yelekwa. — Job 42:7, 8.
13. Ongahelipi omayele aJehova a etela Job ouwa konima eshi a li ta yelekwa?
13 Omayele aJehova okwa li a twikila okweetela Job ouwa nokuli nokonima eshi a yelekwa. Ngahelipi mbela? Nonande “Omwene okwa nangeka noupuna okukalamwenyo kwaxuuninwa kwaJob noupuna uhapu u dule winya wopehovelo,” okutamekulula oku na okukala kwa kufa efimbo. Lwanima okwa kala vali e na “ovana ovamati vaheyali noukadona vatatu.” (Job 42:12-14) Oshoshili kutya Job okwa li a djuulukwa ovana vaye ovo va etelwa efyo kuSatana. Omafimbo amwe, okwa li ha dimbuluka filufilu okumona oixuna kwaye. Nonande mokweendela ko kwefimbo okwa ka uda ko nawa etomheno kutya omolwashike a li ta mono oixuna, omafimbo amwe otashi dulika a li ha diladila kutya omolwashike a li a pumbwa okumona oixuna i fike opo. Kashi na nee mbudi kutya okwa li ta diladila shike, okwa li a pwilikina komayele aKalunga. Naasho osha li she mu kwafela a kale netaleko la yuka, noshe mu hekeleka. — Eps. 94:19.
Ngeenge hatu tale komaupyakadi omonakudiwa mbela ohatu yandje ngoo elitulemo koshinima osho sha fimanenena? (Tala okatendo 14)
14. Oshike hatu lihongo moshimoniwa shaJob?
14 Nafye ohatu dulu okukala netaleko la yuka nokumona ehekeleko mehokololo laJob. Jehova okwe tu tulila po “elongo letu, opo tu kale tu neteelelo hali di melididimiko nomehekeleko lomomishangwa.” (Rom. 15:4) Oshike hatu lihongo mo? Otashi tu kwafele tuha yandje ashike elitulemo konghalamwenyo yetu ndele hatu efa okuyandja elitulemo koshinima sha fimanenena, okuyukipalifwa kwounamapangelo waJehova. Natu kale tu na olupandu nokukala tuu shii kutya onghandangala oyo hatu dana oi li oshinima sha fimanenena mokukala ovadiinini ngaashi Job nonande otu li meenghalo didjuu.
15. Oudiinini wetu ohau etifa oidjemo ilipi ngeenge tu li momayeleko?
15 Omolwashike tashi hekeleke okumona kutya oudiinini wetu owa fimana? Omolwaashi omayeleko etu okwa kwatela mo elalakano lonhumba. Ponhele yokuulika kutya Jehova ine tu hokwa, omayeleko ohae tu pe omhito tu ulike kutya ohatu yambidida ounamapangelo waye. (Omayel. 27:11) Elididimiko letu ohali e ta “oudiinini” nohali pameke eteelelo letu. (Lesha Ovaroma 5:3-5.) Ehokololo laJob otali ulike kutya “Omwene Oye omunalukeno nomunamutimanghenda.” (Jak. 5:11) Onghee hano, ohatu dulu okukala noushili kutya ote ke tu pa ondjabi nosho yo aveshe ovo hava yambidida ounamapangelo waye. Okushiiva ouyelele oo otaku tu kwafele tu ‘lididimike moudjuu keshe nokutalonheni.’ — Kol. 1:11.
KALA TO YANDJE ELITULEMO
16. Omolwashike tu na okulidimbulukifa kutya okuyukipalifwa kwounamapangelo waJehova okwa fimana?
16 Oshoshili kutya okukala hatu yandje elitulemo kokuyukipalifwa kwounamapangelo waJehova otaku dulu okukala eshongo. Omafimbo amwe, omaupyakadi etu otashi dulika a kale a fa e tu wilila po. Nokuli nomaupyakadi oo inaa kwata moiti otaa dulu okumonika a fa a kula ngeenge otwa kala hatu yandje elitulemo kuo. Onghee hano, otwa pumbwa okukala hatu lidimbulukifa pandjikilile nghee sha fimana okuyambidida ounamapangelo waJehova ngeenge twa taalela eenghalo didjuu.
17. Ongahelipi okukufa ombinga pandjikilile moilonga yaJehova taku tu kwafele tu kale hatu yandje elitulemo koshinima sha fimanenena?
17 Ngeenge otwa twikile okukala hatu kufa ombinga pandjikilile moilonga yaJehova otashi ke tu kwafela tu kale hatu yandje elitulemo kounamapangelo waye. Pashihopaenenwa, Ondombwedi yedina Renee oya vela oudu wombada noya kala tai mono oixuna komukifi wa kwata moiti nowokankela. Ofimbo tai hakulwa moshipangelo oya udifila ovo hava longo mo, ovanaudu nosho yo ovatalelipo. Oya li ya longa eevili 80 mokuyandja oundombwedi moivike ashike ivali netata moshipangelo shimwe. Nokuli naashi Renee a li pokufya, ka li a efa okuyandja elitulemo kounamapangelo waJehova. Naasho osha li sha pupaleka oudjuu waye.
18. Ongahelipi oshimoniwa shomumwameme umwe sha yelifa ouwa oo hau di mokuyambidida ounamapangelo waJehova?
18 Oshoshili kutya otwa hala okukala hatu yandje elitulemo kounamapangelo waJehova nokuli nongeenge twa taalela omafininiko nomaudjuu efiku keshe. Omumwameme wedina Jennifer okwa kala omafiku atatu pokapale keedila a teelela odila a shune keumbo. Ndele eedila oda kala tadi kelelwa. Okwa li a fya oudja nokwa loloka, naasho osha li tashi dulu oku mu shololifa. Ndele ponhele yaasho, okwa ilikana a mone nghee ta dulu okukala ekwafo lopamhepo kuvamwe ovo ve li monghalo ya fa yaye. Okwa li a mona oidjemo ilipi? Okwa li a udifila ovanhu vahapu nokuyandja oishangomwa ihapu. Okwa ti kutya, “Onda li ndi udite kutya Jehova okwa nangeka nge noupuna omolwoshimoniwa osho nokwa pange eenghono opo ndi humbate edina laye monghedi ya tongomana.” Oshoshili kutya okwa kala ta yandje elitulemo kelalakano laJehova.
19. Oshiwana shaJehova ohashi tale ko ngahelipi ounamapangelo waJehova?
19 Olupandu li na sha nounamapangelo waJehova ola yoolola ko elongelokalunga lashili kwaao oipupulu. Oshiwana shaKalunga osha kala tashi yambidida ounamapangelo waye oule wefimbo. Tu li ovayambididi velongelokalunga lashili, otwa pumbwa okuninga eenghendabala pauhandimwe opo tu kale tu na etaleko lopamishangwa la yuka.
20. Jehova oha kala e uditile ngahelipi eenghendabala doye dokuyambidida ounamapangelo waye?
20 Kala u shii kutya Jehova okwa lenga eenghendabala doye dokuyambidida ounamapangelo waye omolwoilonga yoye youdiinini nokulididimikila omayeleko. (Eps. 18:25) Oshitukulwa tashi shikula ko otashi ka kundafana kutya omolwashike wa pumbwa okuyambidida ounamapangelo waJehova nomutima aushe, nanghee to dulu oku shi ninga?