Yambidida ounamapangelo waJehova!

1, 2. Atusheni otu na okukala twa tomhwa kushike? (Tala efano pehovelo loshitukulwa.)

NGAASHI sha kundafanwa moshitukulwa sha tetekela, Ondiaboli oya popya kutya Jehova oha longifa nai ounamapangelo waye nosho yo kutya ovanhu otava dulu okulipangela voovene. Mbela Satana okwa popya ngoo oshili? Natu tye nee ngeno ovanhu ovo va hoolola okulipangela voovene otava kala nomwenyo fiyo alushe. Mbela onghalo yovanhu otai ka kala ngoo i li nawa nopehe na epangelo laKalunga? Mbela oto kala ngoo wa hafa ngeenge owa kala u na emanguluko lokuninga keshe eshi wa hala nosho yo omwenyo waalushe?

² Kape na umwe ta dulu okunyamukula omapulo oo ponhele yoye. Keshe umwe oku na okudiladila moule shi na sha noshinima osho. Ngeenge otwa ningi ngaho, otashi ka ulika kutya Kalunga oye ashike ta dulu okupangela. Epangelo laye ola denga mbada, notwa pumbwa oku li yambidida nomutima wetu aushe. Otwa tomhwa molwaashi Ombiibeli oye tu pa oumbangi u na sha nepangelo olo. Pashihopaenenwa, natu ka konakoneni kutya omishangwa otadi tu lombwele shike shi na sha noufemba waJehova wokupangela.

JEHOVA OKU NA OUFEMBA WOKUPANGELA

3. Omolwashike Jehova oye aeke e na oufemba wokupangela?

³ Jehova oye Omupangeli weshito alishe molwaashi omunaenghono adishe nOmushiti. (1 Omaf. 29:11; Oil. 4:24) MEhololo 4:11, ovo tava ka pangela meulu pamwe naKristus, 144 000, ova popya memoniko, va ti: “Omwene wetu naKalunga ketu, Ove owa wana okutambula efimano nefimaneko nepangelo, osheshi Ove owa shita oinima aishe, ndele kehalo loye oi li po, noya shitwa.” Molwaashi Jehova oye a shita oinima aishe, oku na oufemba wokupangela ovanhu nosho yo oshitwa yopamhepo.

4. Omolwashike okupataneka ounamapangelo waKalunga ku li elongifonai lemanguluko lokuninga omatokolo?

⁴ Satana ina shita nande oshinima shimwe. Onghee hano, ke na oufemba wokupangela eshito. Satana novalihomboli votete kava li va katuka pandunge eshi va tukululila ounamapangelo waJehova oshibofa. (Jer. 10:23) Ndele molwaashi oishitwa oi na emanguluko lokuninga omatokolo, otai dulu okuhoolola i amuke ko kuKalunga. Ndele mbela emanguluko olo ole va pa oufemba wokuninga ngaho? Hasho nandenande. Emanguluko lokuninga omatokolo ohali kwafele ovanhu va ninge omatokolo mahapu e li mondjila efiku keshe. Ashike ihali ningifa ovanhu va tukululile Omushiti nOmuyandjimwenyo wavo oshibofa. Osha yela kutya ngeenge otwa tukululile Jehova oshibofa, kungaho ohatu longifa nai emanguluko letu. Tu li ovanhu, otu na okukala koshi yepangelo laJehova louyuki.

5. Omolwashike hatu dulu okukala noushili kutya omatokolo aKalunga oku li pauyuki?

⁵ Jehova oku li Omupangeli a denga mbada omolwetomheno limwe vali. Oha longifa eenghonopangelo daye pauyuki. Okwa ti: “Aame Omwene, handi wanifa onghenda nouyuki nouwa kombada yedu, osheshi oinima ei onde i hokwa.” (Jer. 9:24) Iha wilikwa keemhango odo da shangwa kovanhu inava wanenena opo ngeno a ufe osho sha yuka naasho shi li mondjila. Jehova okwa yandja eemhango kovanhu she likolelela konghedi yaye yokutokola i li pauyuki. “Ouyuki neyukifo, oyo efina lolukalwapangelo [laye],” onghee hano, ohatu dulu okukala nelineekelo kutya eemhango, omafinamhango nosho yo omatokolo aye aeshe oku li pauyuki. (Eps. 89:14; 119:128) Nonande Satana okwa popya kutya ounamapangelo waJehova kau li nawa, okwa dopa okupangela ounyuni pauyuki.

6. Omolwashike Jehova oye e na oufemba wokupangela ounyuni?

⁶ Shikwao vali, Jehova oku li Omupangeli a denga mbada molwaashi oku na eshiivo nounongo oo wa pumbiwa opo a file oshisho eshito. Pashihopaenenwa, diladila koushili oo kutya Kalunga okwa ningifa Omona waye a velule omikifi odo eendokotola itadi dulu okuvelula. (Mat. 4:23, 24; Mark. 5:25-29) Pataleko laJehova, osho kasha li oshikumwifilonga. Okwa li e shii ashishe osho sha kwatelwa mo noku na eenghono dokuningulula nawa keshe osho sha nyonauka. Osho osha faafana nokudula kwaye okunyumuna oonakufya nokukelela oiponga yopaushitwe.

7. Ongahelipi ounongo waJehova u dule kokule ounongo wounyuni ou u li koshi yepangelo laSatana?

⁷ Ounyuni ou u li koshi yenwefemo laSatana, natango onghee ngoo tau kongo nghee u na okukandula po eenhamanana odo di li pokati koiwana; ashike Jehova oye aeke e na ounongo wokweeta ombili mounyuni. (Jes. 2:3, 4; 54:13) Eshi hatu lihongo kombinga younongo neshiivo laJehova, ohatu ka kala tu udite ngaashi omuyapostoli Paulus oo a shanga a ti: “Oule ou fike peni woupuna noweendunge nounongo waKalunga? Omatokolo aye ohaa konakonwa kulyelye, neendjila daye olyelye e di shii?” — Rom. 11:33.

EPANGELO LAJEHOVA OLA DENGA MBADA

8. Oshike sha kuma omutima woye shi na sha nonghedi yaJehova yokupangela?

⁸ Ombiibeli oya popya shihapu shihe fi ashike oufemba waJehova wokupangela. Oya ulika kutya omolwashike epangelo laye li dule kokule omapangelo makwao. Etomheno limwe ololo kutya oha pangele pahole. Omitima detu ohadi kumwa shili kunghee ha longifa eenghonopangelo daye. Ye “omunefilonghenda, Kalunga omunanghenda, omunanheni, nomunene mouwanghenda nomoudiinini.” (Ex. 34:6) Kalunga oha ungaunga novapiya vaye nefimaneko. Ohe tu file oshisho shi dulife eshi hatu lifile oshisho fye vene. Mepingafano nomapopyo Ondiaboli, Jehova oha yandje kovalongeli vaye ovadiinini oshinima keshe shiwa. Nomolwaasho nokuli a yandja Omona waye oo e na ondilo opo tu dule okukala neteelelo loku ka kala nomwenyo fiyo alushe. — Lesha Epsalme 84:11; Ovaroma 8:32.

9. Otu shi shii ngahelipi kutya Kalunga oku na ko nasha nafye pauhandimwe?

⁹ Jehova oku na ko nasha nonghalonawa yoshiwana shaye ashishe. Oha ulike yo kutya oku na ko nasha nakeshe umwe pauhandimwe. Pashihopaenenwa, diladila kunghee Jehova a kala ta wilike nokunghonopaleka ovatokolipangeli va mangulule oshiwana shaIsrael kovapataneki vasho oule womafelemido atatu. Pefimbo olo lidjuu neenghono, ka li a dopa okudidilika mo Rut, oo a li ehe fi Omuisrael. Okwa li a ninga eliyambo lididilikwedi eshi e uya melongelokalunga lashili. Jehova okwa li a nangeka noupuna Rut eshi e mu pa omushamane nosho yo omonamati. Ndele osho hasho ashike a li a ninga. Eshi Rut ta ka nyumunwa, ote ke lihonga kutya omonamati waye okwa li umwe womepata omo mwa dja Messias. Diladila nee kunghee ta ka kala a tunhukwa okumona kutya ehokololo laye ola shangwa mOmbiibeli, membo la lukilwa edina laye! — Rut 4:13; Mat. 1:5, 16.

10. Omolwashike Jehova ehe fi omupangeli omukwanyanya?

¹⁰ Jehova iha pangele nonyanya noiha findile vamwe kongudi. Osho ohashi eta emanguluko nokuxumifa komesho ehafo. (2 Kor. 3:17) David okwa ti: “Epangelonghono noshinge shi li koshipala shaye [Kalunga], eenghono nehafo tali kala monhele yokukala kwaye.” (1 Omaf. 16:7, 27) Sha faafana, omupsalme Etan okwa shanga a ti: “Oshiwana shi nelao, osheshi shi udite oshivilohafo, eshi hashi ende mouyelele woshipala shoye, Omwene. Efiku alishe otava tanhele edina loye, molwouyuki woye otava nenepekwa.” — Eps. 89:15, 16.

11. Ongahelipi hatu dulu okukala twa tomhwa kutya epangelo laJehova ola denga mbada?

¹¹ Okudilonga alushe kouwa waJehova otaku dulu oku tu tomha kutya epangelo laye ola denga mbada. Ohatu ka kala tu udite ngaashi omupsalme oo a ti: “Efiku limwe alike momikala doye li dule omafiku eyovi pamwe pe lili.” (Eps. 84:10) Osho otashi shiiva ngahelipi? Jehova e li Omumi nOmushiti wetu omunahole, oku shii osho twa pumbwa opo tu kale twa hafa shili, noha wanifa po omhumbwe yetu filufilu. Nokuli nonande oiteelelwa yaye otai pula tu ninge omaliyambo, keshe osho ta pula tu ninge oshi na sha nouwa wetu vene nohashi tu etele ehafo linene. — Lesha Jesaja 48:17.

12. Elinyengotomheno letu la fimana lilipi tu na lokuyambidida ounamapangelo waJehova?

¹² Ombiibeli oya popya kutya konima yOmido Eyovi dEpangelo laKristus, ovanhu vamwe otava ka tukululila ounamapangelo waJehova oshibofa. (Eh. 20:7, 8) Mbela oshike tashi dulika tashi ke ve linyengifa va ninge ngaho? Eshi Ondiaboli tai ka mangululwa mo modolongo otai ka kala ya tokola okupukifa ovanhu, mokuxwaxwameka omahalo avo okuliholamwene, ngaashi hai ningi shito. Otashi dulika i ka kendabale okuningifa ovanhu va kale va tomhwa kutya ope na onghedi imwe omo tava dulu okukala fiyo alushe nopehe na okudulika kuJehova. Ndele osho kashi fi shoshili. Mbela omutotolombo oo otau ka kala ngoo wolela kufye? Omaheka a tya ngaho Ondiaboli itaa ka tya sha kufye ngeenge otu hole Jehova nohatu mu longele omolwouwa waye noufemba wokupangela eshito. Itatu ka kala twa hala onghalamwenyo imwe ihe fi oyo i li koshi yepangelo laJehova lopahole.

YAMBIDIDA OUNAMAPANGELO WAKALUNGA NOUDIININI

13. Okuhopaenena Kalunga ohaku ulike ngahelipi kutya ohatu mu yambidida?

¹³ Oshoshili kutya otwa wana okuyambidida ounamapangelo waJehova nomutima wetu aushe. Ngaashi twa kundafana, Jehova oku na oufemba wokupangela nonghedi yaye yokupangela oya denga mbada. Ohatu dulu okuyambidida ounamapangelo waJehova mokukaleka po oudiinini wetu nosho yo oku mu longela noudiinini. Omeenghedi dimwe vali dilipi hatu dulu okuyambidida ounamapangelo waye? Omokukala hatu ningi oinima monghedi oyo a hokwa. Ngeenge hatu ungaunga noinima ngaashi Jehova, ohatu ulike kutya otu mu hole nohatu yambidida onghedi yaye yokupangela. — Lesha Ovaefeso 5:1, 2.

14. Ongahelipi ovakulunhuongalo nomitwe domaukwaneumbo tadi dulu okuhopaenena Jehova?

¹⁴ Eshi twa konakona Ombiibeli, otwe lihonga kutya Jehova oha pangele pahole. Metwokumwe naasho, omitwe domaukwaneumbo novakulunhuongalo ovo ve hole ounamapangelo waye itava ka kala va hala okufininika vamwe va kale ngeno koshi yepangelo lavo. Ponhele yaasho, otava ka hopaenena Jehova. Paulus okwa li ha hopaenene Kalunga nosho yo Omona waye. (1 Kor. 11:1) Paulus ka li nande ha fifa vamwe ohoni ile e va fininike opo va katuke eenghatu donhumba. Ponhele yaasho, okwa kala he va kumaida. (Rom. 12:1; Ef. 4:1; Filem. 8-10) Jehova naye osho ha ungaunga noinima ngaho. Onghee hano, aveshe ovo ve hole nohava yambidida ounamapangelo waye, ove na okuninga ngaho.

15. Okukala twa fimaneka ovo ve na eenghonopangelo dopakalunga ohaku ulike ngahelipi kutya otu hole onghedi yaJehova yokupangela?

¹⁵ Mbela ohatu linyenge ngahelipi kwavo va pewa eenghonopangelo dopakalunga? Ngeenge hatu longele kumwe navo nefimaneko, ohatu ulike kutya ohatu yambidida ounamapangelo waJehova. Nonande katu udite ko filufilu ile itatu tu kumwe netokolo olo la ningwa, ohatu ka kala twa hala okuyambidida elandulafano olo la tulwa po kuKalunga. Osho osha yooloka ko kwaasho ounyuni hau ningi, ashike osho shi na okukala ngaho koshi yepangelo laJehova. (Ef. 5:22, 23; 6:1-3; Heb. 13:17) Ohatu mono ouwa mokuninga ngaho, molwaashi Kalunga okwe tu halela osho sha denga mbada.

16. Ongahelipi ovo hava yambidida ounamapangelo waKalunga hava ningi omatokolo opaumwene?

¹⁶ Ohatu dulu yo okuulika kutya ohatu yambidida ounamapangelo waKalunga ngeenge hatu ningi omatokolo opaumwene. Jehova iha yandje omalombwelo okondadalunde e na sha nonghalo keshe. Ponhele yaasho, ngeenge te tu wilike, oha holola omadiladilo aye. Pashihopaenenwa, ina yandja oipango yokondadalunde i na sha nomidjalo dopaKriste. Ponhele yaasho, okwa hala tu hoolole fye vene omidjalo nokuliwapeka monghedi i li pandjele notai wapalele Ovakriste ovakalele. (1 Tim. 2:9, 10) Jehova ina hala yo tu pundukife ile tu piyaaneke vamwe omolwomatokolo oo twa ninga. (1 Kor. 10:31-33) Ohatu ka ulika kutya otu hole nohatu yambidida onghedi yaye yokupangela, ngeenge otwa kala hatu wilike eenghatu detu mokutala kunghee Jehova ha tale ko oinima, ndele hangaashi tu udite.

17, 18. Omeenghedi dimwe dilipi ovalihomboli tava dulu okuulika kutya otava yambidida ounamapangelo waJehova?

¹⁷ Natu ka taleni eenghedi dimwe omo ovalihomboli Ovakriste tava dulu okuyambidida onghedi yaJehova yokuninga oinima nosho yo ounamapangelo waye. Mbela ongahelipi ngeenge mohombo omwa holoka omashongo mahapu oo kwa li inaa teelelika? Otashi dulika nokuli omashongo oo a kale a nyemateka. Oshiwa okudiladila kunghee Jehova a li a ungaunga nOvaisrael. Jehova okwa li a popya kutya oku li onga omushamane woshiwana osho shonale. (Jes. 54:5; 62:4) “Ohombo” oyo ya li pokati koshiwana osho naJehova kaya li tuu idjuu! Ashike Jehova ka li a sholola diva. Okwa kala alushe ha file onghenda oshiwana osho lwoikando nokwa kala omudiinini kehangano olo a ninga nasho. (Lesha Epsalme 106:43-45.) Mbela inatu nanenwa tuu kuJehova omolwohole yaye i na oudiinini?

¹⁸ Ovahomboli ovo ve hole onghedi yaJehova yokuninga oinima ohave mu hopaenene. Ihava longifa onghedi ihe fi yopamishangwa opo va henuke oupyakadi mohombo yavo. Ova dimina kutya Jehova okwe va tula kumwe nokwa hala ve ‘limangele kumwe.’ Oluhaelo olo ashike etomheno lopamishangwa lokuteya ohombo nokumangulula omunhu a hombole ile a hombolwe vali. (Mat. 19:5, 6, 9) Ngeenge otava longo noudiinini opo va xwepopaleke onghalo yavo, otava ulike kutya otava yambidida onghedi yaJehova yokupangela pauyuki.

19. Ngeenge otwa dopa okuyambidida ounamapangelo waKalunga, oshike tu na okuninga po?

¹⁹ Molwaashi inatu wanenena, omafimbo amwe otashi dulika tu ninge oinima oyo tai nyematifa Jehova. Oku shii kutya inatu wanenena nokwe tu pa efiloshisho lopahole okupitila mekuliloyambo laKristus. Nomolwaasho ngeenge twa punduka, ohatu dulu okupula Jehova e tu dimine po. (1 Joh. 2:1, 2) Ponhele yokukala tu udite etimba neenghono, natu kendabale okulihonga komapuko oo twa ninga. Ngeenge otwa kala popepi naJehova, ote ke tu dimina po noku tu kwafela tu kale twa pepelelwa notu ungaunge neenghalo da faafana nomupondo monakwiiwa. — Eps. 103:3.

20. Omolwashike tu na okuyambidida ounamapangelo waJehova paife?

²⁰ Mounyuni mupe, ovanhu aveshe otava ka kala koshi yepangelo laJehova, notave ke lihonga eendjila daye douyuki. (Jes. 11:9) Ashike fye ohatu lihongo shihapu paife. Nomhata i na sha nounamapangelo waJehova oi li metifa lokukandulwa po. Paife olo efimbo lokuyambidida ounamapangelo waKalunga mokukala ovadiinini, moilonga yetu nomokuninga eenghendabala da mana mo tu mu hopaenene mukeshe osho hatu ningi.