Oufo vokushiva ovanhu kEdimbuluko otava ka yandjwa mounyuni aushe
1. Oshikonga she likalekelwa shilipi tashi ka ningwa mounyuni aushe komesho yEdimbuluko?
1 Jesus okwa ti: “Shi ningeni okudimbulukwa nge.” (Luk. 22:19) Metwokumwe nelombwelo olo laJesus, ovalongeli vaJehova otava ka ongala pamwe novanhu ovo ve na ohokwe mo 30 Marsa 2010, opo va dimbuluke efyo laJesus. Otapa ka ningwa oshikonga she likalekelwa shokushiva ovanhu kEdimbuluko mounyuni aushe okudja momafiku 13 fiyo 30 Marsa.
2. Ongahelipi hatu dulu okuyandja okafo kokushiva ovanhu kEdimbuluko?
2 Nghee to dulu okuyandja okafo kokushiva ovanhu kEdimbuluko: Oto dulu okupa omuneumbo okafo opo a tale efano olo li li kombada yako, ndele to ti: “Momafiku 30 Marsa, ovanhu omamiliyona mounyuni aushe otava ka ongala opo va dimbuluke efyo laJesus. Onde ku etela okafo oko keshivo pamwe noukwaneumbo weni opo nanye mu dule oku ka kala po. Oto dulu yo okuuya pamwe nookaume koye. Didilika yo efimbo nonhele oko taku ka ningilwa Edimbuluko.” Ngeenge eenghalo otadi shi pitike, oto dulu okuleshela omunhu Lukas 22:19 okudja mOmbibeli opo u mu ulikile elombwelo lopamishangwa. Ashike natu dimbuluke kutya oshiwa okupopya pauxupi, molwaashi otu na efimbo la ngabekwa lokumana ko oshitukulwa.
3. Oolyelye hatu dulu okushiva kEdimbuluko?
3 Ngeenge eongalo leni oli na oshitukulwa sha kula, ovakulunhuongalo otashi dulika ve mu lombwele mu fiye oufo vokushiva ovanhu poivelo yomaumbo omo inamu hanga mo ovanhu petalelepo leni lotete. Ngeenge otashi shiiva, otamu dulu okuyandja oifo pamwe nokafo kokushiva ovanhu. Ino dimbwa okushiva ovanhu ovo ho ningi omalishuneko kuvo, ovakonakonimbibeli, ovanailonga vakweni, ovanafikola vakweni, ovapambele, ovashiinda nosho yo ovashiivikile.
4. Olupandu lokupandula Jehova omolwohole yaye eshi a yandja ekulilo oli na oku tu linyengifa tu ninge shike?
4 Lilongekida u ka kufe ombinga moshikonga osho pauyadi: Eemwedi odo da tetekela nosho yo odo da landula Edimbuluko odi li omhito iwa yokutamununa mo omalipyakidilo etu. Mbela ito dulu okuninga po omalunduluko melandulafano loye opo u kufe oukwafelikokolindjila pefimbo olo? Mbela ou na ounona ile ovakonakonimbibeli ovo tava ningi exumokomesho lopamhepo? Ngeenge osho ngaho, oto dulu okukundafana novakulunhuongalo va tale ngeenge ovo vape ova wana okukufa ombinga moshikonga osho she likalekelwa ve li ovaudifi inava ninginifwa. Olupandu letu lokupandula Jehova omolwohole yaye eshi a yandja ekulilo otali ke tu linyengifa tu kale pEdimbuluko notu shive ovanhu vahapu ngaashi tashi dulika ve uye kEdimbuluko. — Joh. 3:16.