Oshikonga shokushiva ovanhu kEdimbuluko otashi ka hovela mu 1 Marsa
1. Oshikonga shokushiva ovanhu kEdimbuluko otashi ka hovela naini, nomolwashike tashi kwata efimbo lile neudo?
1 Metitano, 1 Marsa, ohatu ka hovela oshikonga shetu shokomudo shokushiva vamwe ve uye va ongale pamwe nafye pEdimbuluko. Edimbuluko otali ka kala ko mo 26 Marsa, sha hala kutya oshikonga otashi ka kwata efimbo lile li dule omido da ya. Osho otashi ka pa ovanhu vahapu omhito va mone eshivo, unene tuu ngeenge eongalo oli na oshitukulwa sha kula.
2. Omalongekido elipi a ningwa po e na sha nokukufa oufo vokushiva ovanhu nosho yo okulonga oshitukulwa?
2 Liunganekeni nawa: Ovakulunhuongalo otava ka yandja omalombwelo e na sha nanghee oshitukulwa shi na okulongwa, mwa kwatelwa ouyelele u na sha nangeenge oufo otava dulu okufiwa peumbo opo inapa hangika omunhu ile hasho. Ngeenge opa xupu oufo konima eshi mwa mana ko oitukulwa yeumbo neumbo, otamu dulu oku va yandja eshi tamu yandje oundombwedi keshe pamwe. Omupashukili woilonga ota ka shilipaleka kutya oufo ova tulwa ponhele opo hapa kufwa oileshomwa ile oifo kovaudifi, ndele oufo kave na okutulwa po ofulundudu poshikando. Otu na ashike okukufa oufo va yeleka oshivike shimwe poshikando.
3. Oshike tu na okukaleka momadiladilo eshi hatu yandje okafo keshivo?
3 Osho hatu dulu okutya: Otashi ka kala shiwa okuninga etwalemo li li pauxupi, naasho otashi ke tu pa omhito opo tu yandje okafo kovanhu vahapu ngaashi tashi dulika. Pepandja 4 ope na oshihopaenenwa shetwalemo osho hatu dulu okulongifa moshitukulwa shetu. Ndele inatu pumbwa okulotoka ngeenge omuneumbo omunambili ile oku na omapulo. Eshi hatu yandje okafo momaxuliloshivike, ohatu dulu yo okuyandja oifo apa tashi wapalele. Omafiku 2 Marsa, efiku le likalekelwa lokuyandja oifo, onghee hano, ohatu ka yandja elitulemo kokuyandja oifo pamwe nokafo keshivo ponhele yokuhovela omakonakonombibeli ngaashi hatu ningi alushe mOlomakaya lotete lomwedi.
4. Omolwashike tu na okukufa ombinga nouladi moshikonga shokushiva ovanhu kEdimbuluko?
4 Otwe lineekela kutya ovanhu vahapu otave ke uya kEdimbuluko. Oshipopiwa shEdimbuluko otashi ka yelifa kutya Jesus oye naanaa lyelye. (1 Kor. 11:26) Otashi ka yelifa nghee efyo laye le tu kwafela. (Rom. 6:23) Otashi ka yelifa yo kutya omolwashike sha fimana oku mu dimbuluka. (Joh. 17:3) Natu ka kufeni ombinga nouladi moshikonga osho.