Mbela owa ulikila nale ovanhu petalelepo lotete nghee ekonakonombibeli hali ningwa?

Ngeenge owa pula omuneumbo wonhumba mu konakone naye Ombibeli otashi dulika a tye ina hala ile a tye kutya oha konakona Ombibeli kongeleka yavo. Molwaashi kave shii kutya ohatu konakona Ombibeli novanhu monghedi ya yooloka ko kwaayo yomalongelokalunga amwe, kave shii yo kutya ekonakonombibeli otali ke va kwafela notali ka kala lihokwifa. Onghee hano, ponhele ashike yokulombwela omunhu kutya oto dulu okukala ho konakona Ombibeli naye, mu ulikila oule wominute donhumba nghee ekonakonombibeli hali ningwa eshi to mu udifile oshikando shotete. Oku shi faneka: Natu tye nee ou shii okuteleka, ino lombwela ashike omunhu kutya ove omuteleki muwa nonokutya oto ke mu alukila u mu etele oikulya oyo wa teleka, ndele mu pa a makele oikulya pomhito oyo. Oto dulu okulongifa omaetepo oo e li pepandja 5 mokafo Oukalele wetu wOuhamba kaMarsa 2006, kOshiingilisha, to shi ningi ashike moule wominute dinini.

Oto dulu okutya: “Mbela oto diladila kutya eendjovo edi onadi ka wanifwe ngoo fiku limwe? [Lesha Jesaja 33:24, ndele to teelele omunhu a nyamukule.] Onda hala oku ku ulikila oshinima shihokwifa shi na sha noshikundafanwa eshi.” Opo nee pa omuneumbo embo Ombibeli otai hongo, ndele to ti na pandje pepandja 36, pokatendo 22. Lesha epulo olo li li pedu lepandja, ndele to mu pula a konge enyamukulo eshi to lesha okatendo oko. Pula vali epulo, ndele to pwilikine eshi omuneumbo ta nyamukula. Lesheni omishangwa vali dimwe. Pula epulo olo to uya okunyamukula oshikando tashi landula, opo nee ninga elongekido lokondadalunde u aluke. Kungaho, owa hovela ekonakonombibeli.