Okuhonga hatu longifa okambo Onghundana iwa
1. Okambo Onghundana iwa oka unganekwa ngahelipi?
1 Ngaashi sha kundafanwa mokafo Oukalele wetu wOuhamba kaJuli, shimwe shomoilongifo yetu yokuhonga ya fimana okambo, Onghundana iwa ya dja kuKalunga! Omishangwa odo da etwa mo inadi tofwa mo opo omuneumbo a leshe odikilila mOmbibeli yaye. Nonande oishangomwa yetu ihapu oya shangwa monghedi omo omunhu ta dulu okulihonga kuye mwene, oshishangomwa eshi osha unganekwa nelalakano lokukundafana naumwe. Onghee hano, ngeenge to shi yandje, ulikila omuneumbo nghee ekonakonombibeli hali ningwa opo a mone nghee shihafifa okulihonga onghundana iwa okudja mOmbibeli. — Mat. 13:44.
2. Ongahelipi hatu dulu okulongifa okambo Onghundana iwa petalelepo lotete?
2 Petalelepo lotete: Oto dulu okutya: “Ovanhu vahapu kunena ohave lipula shi na sha nonakwiiwa. Mbela oto diladila kutya eenghalo onadi ka xwepopale ngoo fiku limwe? [Teelela omunhu a nyamukule.] Ombibeli oi na onghundana iwa oyo tai dulu oku tu pa eteelelo. Apa ope na omapulo amwe oo a nyamukulwa paMbibeli.” Yandja okambo komuneumbo noku mu pula a hoolole limwe lomomapulo oo e li konima yako. Mu ulikila nghee ekonakonombibeli hali ningwa to longifa okatendo kotete koshileshwa osho a hoolola. Onghedi imwe vali, oto dulu okupula omuneumbo epulo lihokwifa le likolelela koshitukulwa shokambo oko osho wa holola, ndele to mu ulikile nghee okambo oko taka dulu oku mu kwafela a mone enyamukulo mOmbibeli. Ovaudifi vamwe ohava dana okavidio eshi tava ningi etwalemo ngeenge oshileshwa osho osha pambafana nokavidio ke li ko-jw.org.
3. Yelifa nghee hatu dulu okulongifa okambo onghundana iwa pekonakonombibeli.
3 Nghee hatu dulu oku ka longifa pekonakono: (1) Lesha epulo olo la laulikwa opo u kwafele omuneumbo a yandje elitulemo koitwa oyo ya fimanenena. (2) Lesha okatendo oko ka shikula epulo. (3) Lesheni omishangwa odo da endamekwa nokupula omapulo nelungi opo u mu kwafele a mone nghee omishangwa da nyamukula epulo olo. (4) Ngeenge epulo oli na outendo ve dulife pukamwe, natango longifa onghedi 2 nosho yo 3. Ngeenge okavidio oka pamba epulo olo tamu kundafana ndele ino ka danena nale omuneumbo, oto dulu oku ka ulika pomhito oyo. (5) Xuuninwa pula omuneumbo epulo olo li li meendada da ondoka opo u mone ngeenge oku udite ko.
4. Oshike tashi ke tu kwafela opo tu longife nounghulungu oshilongifo eshi sha denga mbada?
4 Kala u shii nawa okambo oko. Ka longifa pomhito keshe tai wapalele. Alushe fimbo ino hovela ekonakono, diladila kombinga yomukonakoni woye nosho yo onghedi ya denga mbada oyo to dulu okutomhafana naye to longifa omishangwa odo da etwa mo. (Omayel. 15:28; Oil. 17:2, 3) Eshi to ende to mono owino nounghulungu woku ka longifa, oto ka mona kutya oke li oshilongifo sha denga mbada shokuhonga ovanhu oshili.