Ninga omalongekido fimbo kuyele opo u ka tamunune mo oukalele woye
1. Efimbo lEdimbuluko ohali tu pe eemhito diwa dilipi, noshike tu na okuninga po paife?
1 Efimbo lEdimbuluko ohali tu pe alushe eemhito ‘dokupandula Omwene nolupandu lomoule.’ (Eps. 109:30) Ito dulu mbela okutamununa mo oukalele woye muMarsa osho shi li onghedi imwe yokuulika olupandu loye lokupandula Omuyandji wekuliloyambo? Hovela okuninga omalongekido paife.— Omayel. 21:5.
2. Nye omwa li mwe linyenga ngahelipi eshi pa li pa ningwa elongekido lokuninipika eevili doukwafelikokolindjila muAprili omudo wa dja ko?
2 Oukwafelikokolindjila: Omudo wa dja ko, omaongalo okwa li a tunhukwa eshi a uda kutya opa ningwa elongekido li na sha nokuninipika eevili doukwafelikokolindjila momwedi waAprili. Omumwatate umwe okwa ti: “Ondi li natango mosekundofikola, nonda li ndi wete shidjuu kwaame okuya moukokolindjila wondjikilile. Ashike paife mofooloma youkwafelikokolindjila womwedi waAprili ohandi yadeke mo eevili 30, ndele ondi na okuninga eenghendabala ndi longe eevili 50.” Omumwameme umwe oo ha longo oilonga yokulikongela omboloto okwa ti: “Eevili 30 itadi nyenge nge nandenande okuwanifa po!” Eshi omaongalo a shiivifilwa elongekido olo, omumwameme umwe womido 80 nasha oo a li nale omukokolindjila okwa ti: “Omhito ei oyo naanaa nda kala nda teelela! Jehova oku shii kutya onda li handi hafele oukokolindjila neenghono.” Ovaudifi vamwe ovo va li inava dula okukufa oukwafelikokolindjila ova li ve litulila po elalakano lokulonga shihapu moukalele.
3. Otu na omatomheno elipi okukufa oukwafelikokolindjila muMarsa, Aprili naMei?
3 Neudo otashi ka kala shiwa okukufa oukwafelikokolindjila muMarsa molwaashi natango opa ningwa elongekido lokuhoolola okulonga eevili 30 ile 50. Kakele kaasho, ohatu dulu oku ka kufa ombinga moshikonga shokushiva ovanhu kEdimbuluko olo tali ka kala ko momafiku 5 Aprili, osho tashi ka hovela mOlomakaya, mo 17 Marsa. Vahapu otava ka hafela neenghono omhito oyo yokutamununa mo oukalele wavo notashi dulika nokuli va ka kale va hala okukufa oukwafelikokolindjila muAprili nosho yo muMei, tava longo eevili 50.
4. Ongahelipi hatu dulu okutamununa mo oukalele wetu, noidjemo ilipi hatu ka mona?
4 Omolwashike itamu kundafana pElongelokalunga lOukwaneumbo weni tali shikula shi na sha nanghee keshe umwe moukwaneumbo weni ta dulu okutamununa mo oukalele waye pefimbo lEdimbuluko? (Omayel. 15:22) Ilikaneni yo kuJehova a nangeke noupuna eenghendabala deni. (1 Joh. 3:22) Okutamununa mo oukalele woye itaku ke ku pa ashike omhito iwa yokutanga Jehova ndele otaku ke ku etela yo ehafo linene.— 2 Kor. 9:6.