Mbela ito dulu okukufa oukwafelikokolindjila?
1. Omolwashike efimbo lEdimbuluko li li omhito iwa yokutamununa mo oukalele wetu?
1 Efimbo lEdimbuluko omhito iwa yokutamununa mo oukalele wetu. Oli li yo omhito iwa yokudilonga kohole inene oyo Jehova e tu ulikila eshi a yamba po Omona waye molwetu. (Joh. 3:16) Osho oshe tu ningifa tu kale tu na omitima tadi xunga olupandu, nohashi tu linyengifa tu lombwele vamwe kombinga yaJehova nosho yo osho ta ningile ovanhu. (Jes. 12:4, 5; Luk. 6:45) Oli li yo omhito yokuhafela okukufa ombinga moshikonga she likalekelwa shokushiva ovashiivikile nosho yo ovanhu moshitukulwa shetu ve uye kEdimbuluko. Lwanima, ohatu kendabala okukulika ohokwe yaavo va li pEdimbuluko. Mbela ito dulu okutamuna mo oukalele woye mokukufa oukwafelikokolindjila momwedi waMarsa, waAprili ile waMei?
2. Omolwashike Marsa omwedi muwa nokukufa oukwafelikokolindjila?
2 Ninga Marsa omwedi we likalekelwa: Marsa otau ka kala omwedi muwa wokukufa oukwafelikokolindjila. Ovo tava kufa oukwafelikokolindjila momwedi oo otava dulu okuhoolola okulonga eevili 30 ile 50. Ngeenge etalelepo lomupashukilishikandjo oli li muMarsa, ovo va kufa oukwafelikokolindjila navo otava dulu okukala po pokwoongala akushe oko haku ningwa novakokolindjila vondjikilile nosho yo ovo ve likalekelwa. Efimbo loshikonga shokushiva ovanhu kEdimbuluko olo tali ka kala ko mEtivali 26 Marsa 2013 ola wedelwa okudja omido da dja ko, noshikonga osho otashi ka hovela 1 Marsa. Kakele kaasho, Marsa oku na omaxuliloshivike atano. Omolwashike ito konakona eenghalo doye wa mana mo u tale ngeenge oto dulu okuninga omwedi waMarsa we likalekelwa momudo?
3. Ongahelipi hatu dulu okuninga omalongekido opo tu tamunune mo oukalele wetu?
3 Ninga omalongekido paife: Paife olo efimbo lokutalulula elandulafano loye nokutala kutya omalunduluko elipi wa pumbwa okuninga opo u dule okukokola ondjila. Osha fimana koukwaneumbo okulongela kumwe, onghee hano, longifeni efimbo lonhumba pefimbo lElongelokalunga lOukwaneumbo weni mu kundafane omalalakano oo mwe litulila po mu li oukwaneumbo nokuninga elandulafano. (Omayel. 15:22) Ngeenge ito dulu okukufa oukwafelikokolindjila, ino teka omukumo. Mbela ito dulu okulundulula elandulafano loye opo u longe efimbo lihapu momafiku oo ho mono omhito yokuya moukalele? Mbela ito dulu okukala ho i moukalele efiku lonhumba mokati koshivike?
4. Omauwa elipi hatu ka mona mokutamununa mo oilonga yetu momwedi waMarsa, waAprili nosho yo waMei?
4 Eshi hatu tamununa mo oilonga yetu momwedi waMarsa, waAprili nosho yo waMei, ohatu ka hapupalifa ehafo letu nosho yo ewaneno olo hatu mono mokulongela Jehova nomokuyandja kuvamwe. (Joh. 4:34; Oil. 20:35) Komesho yaaishe, eenghendabala detu dokuheliholamwene otadi ka hafifa Jehova. — Omayel. 27:11.