Nghee to dulu okuhafela efimbo lEdimbuluko
1. Omonghedi ilipi to dulu okuhapupalifa ehafo loye pefimbo lEdimbuluko?
1 Mbela ino hala okuhapupalifa ehafo loye pefimbo lEdimbuluko muMarsa, Aprili naMei? Onghedi imwe omo to dulu oku shi ninga okutamununa mo oukalele woye, nongeenge otashi shiiva, oto dulu okukufa oukwafelikokolindjila. Osho otashi dulu ngahelipi okuhapupalifa ehafo loye?
2. Ongahelipi okutamununa mo oukalele wetu taku ka hapupalifa ehafo letu?
2 Hapupalifa ehafo loye: Jehova okwe tu shita tu na oukwatya wokudula okukala twa hafa notwa wanenwa eshi hatu mu longele nokuwanifa po omhumbwe yetu yopamhepo oyo twa dalwa nayo. (Mat. 5:3) Okwe tu shita yo monghedi omo hatu dulu okumona ehafo olo hali di mokuyandja. (Oil. 20:35) Oukalele ohau tu kwafele tu longele Kalunga notu kwafele ovanhu. Oshi li pandunge okutomhafana kutya ngeenge otwa kufa ombinga pauyadi moukalele ohatu ka mona ehafo linene. Kakele kaasho, apa ngoo pe fike hatu udifa, opo ngoo pe fike hatu hapupalifa ounghulungu wetu. Eshi hatu likola ounghulungu, otashi ke tu kwafela tu kale tu na omukumo nokuninipika oumbada wetu. Ohatu ka kala tu na eemhito dihapu dokuyandja oundombwedi nokuhovela omakonakonombibeli. Ashishe osho ohashi ningifa oukalele wetu u kale u hafifa neenghono.
3. Omolwashike Marsa naAprili tadi ka kala eemwedi diwa dokukufa oukwafelikokolindjila?
3 Marsa naAprili otadi ka kala eemwedi diwa dokukufa oukwafelikokolindjila molwaashi ohatu dulu okuhoolola eevili 30 ile 50. Kakele kaasho, okuhovela mOlomakaya, 22 Marsa fiyo opEdimbuluko mOmaandaxa, 14 Aprili, ohatu ka kufa ombinga moshikonga shihafifa omo hatu ka shiva ovanhu ve uye kEdimbuluko. Omaongalo otaa ka tunhukwa neenghono eshi vahapu tava ka longa “ve nediladilo limwe” opo va mane ko oshitukulwa sha kula ngaashi tashi dulika mefimbo olo la ngabekwa. — Sef. 3:9.
4. Oshike tu na okuninga, ngeenge otwa hala okukufa oukwafelikokolindjila?
4 Lilongekida paife: Ngeenge ino lilongekida natango, konga efimbo opo u talulule omalipyakidilo oye nokutala kutya omalunduluko elipi to dulu okuninga opo u tamunune mo oukalele woye momwedi umwe ile dihapu. Shi ninga pamwe neilikano. (Jak. 1:5) Shi kundafana yo pamwe noukwaneumbo weni nosho yo navamwe meongalo. (Omayel. 15:22) Otashi dulika u ka mone kutya nonande ku na oukolele ile u na omalipyakidilo mahapu, naave oto dulu okumona ehafo olo hali di moukwafelikokolindjila.
5. Ohatu ka mona oidjemo ilipi ngeenge otwa tamununa mo oukalele wetu pefimbo lEdimbuluko?
5 Jehova okwa hala ovapiya vaye va kale va hafa. (Eps. 32:11) Ngeenge otwa kendabala noudiinini okutamununa mo oukalele wetu pefimbo lEdimbuluko, itashi ka hapupalifa ashike ehafo letu ndele otashi ka hafifa yo Tate yetu womeulu. — Omayel. 23:24; 27:11.