Longifa outraktate opo u tandavelife onghundana iwa
1. Outraktate ova kala hava longifwa ngahelipi koshiwana shaKalunga?
1 Outraktate vopaMbibeli ova kala tava longifwa oule wefimbo koshiwana shaJehova opo shi tandavelife onghundana iwa. Mo 1880, omumwatate C. T. Russell nosho yo vakwao vamwe ova kala tava nyanyangida oufo vedina Bible Students’ Tracts, opo ovaleshi vOshungonangelo va kale tave va yandje kovanhu. Outraktate ova kala va talika ko va fimana, nomolwaasho mo 1884 eshi omumwatate C.T. Russell a shangififa ehangano li li paveta ihali likola oimaliwa nelalakano lokuxumifa komesho oinima yOuhamba, oshitya okatraktate osha li sha kwatelwa medina Zion’s Watch Tower Tract Society, olo hali ifanwa paife Watch Tower Bible and Tract Society of Pennsylvania. Mo 1918, Ovakonakoni vOmbibeli ova li va yandja outraktate ve dule pomamiliyona 300. Outraktate ove li oshilongifo hashi pondola shokuyandja oundombwedi fiyo okunena.
2. Omolwashike outraktate hava pondola?
2 Omolwashike outraktate hava pondola? Outraktate ove na omaluvala mawa nova hokwifa. Etumwalaka lavo li li pauxupi olihokwifa notali hongo. Ovanhu ovo vehe hole okutambula omambo noifo ohashi kala shipu kuvo okutambula outraktate. Ovapu yo okulongifwa kovaudifi ovo vape nosho yo kounona. Shimwe vali, ovanini novapu okuhumbata.
3. Hokolola oshimoniwa shoye ile osho wa lesha moishangomwa osho tashi ulike kutya outraktate ova fimana.
3 Ovanhu vahapu ove lihonga tete oshili eshi va lesha outraktate. Pashihopaenenwa, omukainhu umwe wokoHaiti okwa li a mona okatraktate kamwe ketu mepandavanda. Eshi e ka toola po ndele te ka lesha, okwa ti: “Paife onda mona oshili.” Lwanima, okwa ka ya kOlupale lOuhamba, ndele ta hovele okukonakona Ombibeli nokwa ka ninginifwa. Ashishe osho osha ningwa ashike omolweenghono dEendjovo daKalunga odo di li mokatraktate oko.
4. Otu na okulitulila po elalakano lilipi ngeenge outraktate tava yandjwa omwedi wonhumba?
4 Eumbo neumbo: Molwaashi outraktate ove li oshilongifo hashi pondola mokuyandja oundombwedi, otava kala hava yandjwa meemwedi donhumba okudja muNovemba. Elalakano letu kali fi ashike okuyandja outraktate ngahenya ndele oku va longifa opo tu hovele eenghundafana novaneumbo. Ngeenge otwa mono omunhu oo ta ulike ohokwe petalelepo lotete ile eshi twa ninga elishuneko, ohatu dulu oku mu ulikila nghee ekonakonombibeli hali ningwa hatu longifa embo Ombibeli otai hongo ile oshishangomwa shimwe. Ongahelipi hatu dulu okuyandja outraktate eumbo neumbo? Molwaashi okatraktate keshe oke lili, otwa pumbwa okushiiva oshikalimo shaavo hatu ka yandja.
5. Ongahelipi hatu dulu okuyandja outraktate eumbo neumbo?
5 Omatwalemo etu oku na okukala taa wapalele moshitukulwa shetu notaa tu kumwe noutraktate ovo hatu yandje. Ohatu dulu okuhovela eenghundafana mokupa omuneumbo okatraktate. Omafano mahokwifa oo e li kombada otashi dulika a ka pendule ohokwe yaye. Ile tu mu ulikile outraktate ve lili noku lili noku mu pula a hoolole po oko a hokwa. Ngeenge ohatu longo moshitukulwa omo ovanhu vehe hole okweefela ovanhu momaumbo avo, ohatu dulu okukala tu kwete okatraktate monghedi omo omuneumbo ta dulu okumona noupu efano lokombada, ile tu mu pule ngeenge ohatu dulu oku ka tula koshi yomuvelo, ye a ninge etyekosha laye li na sha nako. Ngeenge oshipalanyole shako oshi li molupe lepulo, ohatu dulu oku mu pula a tye sha shi na sha nepulo olo. Ile tu dute po epulo letu vene olo tali ka pendula ohokwe notali mu linyengifa a kundafane nafye. Opo nee, ohatu dulu okulesha oshitukulwa shonhumba shako pamwe naye, hatu kanghama opo pe na omapulo noku mu pula a tye sha shi na sha nao. Otamu dulu okulesha mOmbibeli omishangwa odo tadi yambidida enenediladilo. Ngeenge omwa mane okukundafana ouyelele wonhumba, oto dulu okuxulifa po eenghundafana nokuninga elongekido u aluke. Ngeenge eongalo leni ohali fiye oishangomwa pomaumbo omo muhe na ovanhu, otamu dulu okufiya po outraktate, tamu va tula opo tava dulu okumonika noupu.
6. Ongahelipi hatu dulu okuyandja outraktate mepandavanda?
6 Okuyandja oundombwedi mepandavanda: Mbela owa longifile nale outraktate mepandavanda? Ovanhu vahapu ohava kala va endelela noihatu mono omhito yokupopya navo. Onghee hano, ohashi kala shidjuu okumona kutya ove na ohokwe ile hasho. Ponhele yoku va pa ashike oifo oyo opo ya piti, fye tuhe shii ngeenge otave ke i lesha, omolwashike itatu va pe ashike outraktate? Molwaashi ove na omafano okombada mahokwifa nove na etumwalaka lixupi, okatalekonawa otaka dulu okulinyengifa omunhu e va leshe nonande oku na ashike efimbo linini. Ashike ngeenge omunhu ina endelela, ohatu dulu okukundafana naye oshikalimo shokatraktate.
7. Hokolola oimoniwa oyo tai ulike nghee hatu dulu okulongifa outraktate ngeenge hatu yandje oundombwedi wohangelela.
7 Oundombwedi wohangelela: Oshipu okuyandja oundombwedi wohangelela noutraktate. Omumwatate umwe oha humbata outraktate vanini mondjato yaye yombulukweva ngeenge ta di mo meumbo. Ngeenge a shakeneke omunhu wonhumba, ngaashi nande ovanailonga vomeefitola, oha pula ashike ngeenge ota dulu oku mu pa sha shokulesha ndele te mu pe okatraktate. Eshi ovalihomboli vamwe va li va ka talela po ko-New York City, ova li ve shii kutya oshi na oupu va ka shakene ko novanhu va dja koilongo i lili noku lili. Onghee hano, ova li va ya nokambo Nations noutraktate vonhumba vomalaka a yoolokafana. Opo nee eshi va li va uda ovanhu ovo va li tava landifa pomunghulo wondjila ile ovo va li omutumba popepi navo moparka ile morestoulanda tava popi omalaka oshinailongo, ova li ve va pa outraktate vomalaka avo.
8. Omolwashike outraktate tava dulu okufaafanifwa nombuto?
8 “Ombuto yoye i kuna”: Outraktate otava dulu okufaafanifwa nombuto. Omunepya oha kunu eembuto dihapu molwaashi ke shii kutya ilipi tai ka eta omino ndele tai kulu. Omuudifi 11:6 ota ti: “Ombuto yoye i kuna ongula, ndele ino tulumukifa eke loye komatango. Osheshi ku shi shii, ilipi po tai ka mena, oyo ile inya, ile ngenge aishe ivali tai ka kala ya wapala.” Onghee hano, natu twikileni ‘okukuna eshiivo’ okupitila moshilongifo osho hashi pondola neenghono. — Omayel. 15:7.
[Blurb on page 3]
Molwaashi outraktate ove li oshilongifo hashi pondola mokuyandja oundombwedi, otava kala hava yandjwa meemwedi donhumba okudja muNovemba