Oufo vape va unganekwa monghedi ihokwifa!
1. Oilongifo ilipi yomoukalele ya unganekwa monghedi ipe ihokwifa?
1 Poshoongalele shoshitukulwa shomo 2013 shi na oshipalanyole ‘Eendjovo daKalunga odo oshili’ opa li pa pita oufo vatano vape. Kakele kaasho, opa li yo pa wedwa okafo Onghundana yOuhamba onomola 38 ke na oshipalanyole “Oonakufya otava dulu ngoo shili okukala vali nomwenyo?” Oufo aveshe ovo vahamano ova unganekwa monghedi ipe ihokwifa. Onelalakano lashike mbela? Eshi hatu va yandje meumbo neumbo, ongahelipi hatu dulu oku va longifa nawa?
2. Oufo vape ova unganekwa monghedi ipe nelalakano lashike?
2 Omolwashike onghedi ipe omo va unganekwa hai pondolo?: Omaetepo taa pondola oo hatu longifa meumbo neumbo luhapu ohaa kala a kwatela mo eenghatu edi nhee: (1) Ohatu pula epulo olo tali ningifa omunhu a popye etaleko laye. (2) Ohatu leshele omuneumbo omushangwa. (3) Ohatu mu pe oshifo a ka leshe. (4) Nohatu mu fiile epulo olo hatu uya okunyamukula oshikando tashi uya nokuninga elongekido tu aluke. Onghedi ipe omo oufo va unganekwa oye shi ninga shipu opo tu landule eenghatu nhee adishe.
3. Ongahelipi hatu dulu okuyandja oufo ovo vape moukalele?
3 Nghee hatu dulu oku va longifa: (1) Konima yepopifo, ulikila omuneumbo epulo lihokwifa olo li li kombada yokafo nomanyamukulo oo ta dulu okuhoolola po limwe kepulo olo, noku mu pula kutya ota ti ngahelipi kulo. (2) Pandja okafo, ndele tamu tale opo pashangwa “Osho Ombibeli tai ti.” Lesha omushangwa odikilila okudja mOmbibeli ngeenge eenghalo otadi shi pitike. Ngeenge omuneumbo oku na efimbo, kundafaneni ouyelele oo u li koshi yokapalanyole “Ouwa oo to dulu oku ka mona monakwiiwa.” (3) Yandja okafo noku mu ladipika a leshe ouyelele wa xupa ko pefimbo olo tali mu wapalele. (4) Fimbo ino ya, mu ulikila epulo olo li li kombuda yokafo koshi yokapalanyole “Diladila kombinga yaashi” nokuninga elongekido opo mu uye mu kundafane enyamukulo lopaMbibeli moshikando tashi landula.
4. Ongahelipi hatu dulu okulongifa oufo vape eshi hatu ningi elishuneko?
4 Ovapu yo okulongifa ngeenge hatu ningi omalishuneko. Ohatu dulu okulongifa omushangwa oo wa tofwa mo oo u li kombuda yokafo opo tu nyamukule epulo olo twa dikile po pexulilo leenghundafana detu petalele po lotete. Fimbo ino ya, mu ulikila efano lokambo Onghundana iwa, noku mu ulikila oshileshwa osho shi na ouyelele muhapu u nasha noshikundafanwa, opo nee to mu pe okambo. Ngeenge okwe ka tambula ko, ninga elongekido opo mu uye mu kundafane mokambo oshikando tashi landula. Kungaho owa tameka ekonakonombibeli! Ile ponhele yoku mu pa okambo, oto dulu oku mu pa okafo kamwe vali nokuninga elongekido u uye mu ka kundafane.
5. Oufo vetu ova fimana shi fike peni moukalele?
5 Oufo ova kala hava longifwa moukalele momukokomoko womido di dulife 130. Nonande ova yooloka mounene nomomutungilo, ova kala ve li oshilongifo osho hashi pondola neenghono mokuyandja oundombwedi. Natu longifeni nawa oufo ovo vape opo tu twikile okutandaveleka eshiivo lOmbibeli kombada yedu alishe. — Omayel. 15:7a.