Mona ouwa moilonga yoye youdiinini
1. Oshike tashi dulu oku tu ningifa tuha kale tu na ondjungu yokuya moukalele?
1 Ovanhu ova shitwa opo va ‘mone ouwa mokulonga kwavo kudjuu.’ (Omuud. 2:24) Ndele ngeenge otwa dopa okumona oidjemo iwa youkalele wetu, ohatu ka kwatwa ketekomukumo olo hali tu ningifa tu kanife ehafo letu notuha kale vali tu na ouladi. Oshike tashi ke tu kwafela tu kale tu na etaleko liwa?
2. Omolwashike twa pumbwa okukala tu na etaleko li li pandjele li na sha nanghee ovanhu have linyenge ketumwalaka letu?
2 Kala u na etaleko li Ii pandjele: Dimbulukwa kutya ovanhu ashike vanini va li va tambula ko etumwalaka laJesus, ndele nande ongaho, okwa li a pondola moukalele waye. (Joh 17:4) Jesus okwa li a xunganeka mefaneko laye lomukuni kutya haaveshe va li tava ka tambula ko etumwalaka lOuhamba olo tali faafanifwa nombuto. (Mat. 13:3-8, 18-22) Ashike eenghendabala detu ohadi pondola shihapu.
3. Ongahelipi hatu dulu okwiimika oiimati nokuli nonande ovanhu ashike vanini tava pwilikine ketumwalaka letu?
3 Nghee hatu dulu okwiimika oiimati ihapu: Metwokumwe nefaneko laJesus, ovo va tambula ko etumwalaka ohava “dala,” ile tu tye hava imike oiimati. (Mat. 13:23) Konima ngeenge oilya ya kulu, ihai dala oihati, ndele oilya ipe. Onghee hano, oiimati oyo Ovakriste hava imike, kai fi ovahongwa vape, ndele okukuna eembuto dihapu dOuhamba okupitila mokuudifa. Osho ohashi etifa ‘ouwa’ muhapu oo hau tu ningifa tu kale twa wanenwa, kashi na nee mbudi kutya ovanhu otave linyenge ngahelipi. Kungaho, ohatu yapulifa edina laJehova. (Jes. 43:10-12; Mat. 6:9) Ohatu tyapula yo oufembanghenda wokulonga pamwe naKalunga. (1 Kor. 3:9) “Oshiimati shomilungu” sha tya ngaho otashi hafifa Jehova. — Heb. 13:15, 16.
4. Oukalele wetu otau dulu okweetifa oidjemo ilipi inatu shi shiiva?
4 Oilonga yetu youdiinini otai dulu okweeta oidjemo oyo tuhe wete. Otashi dulika ovanhu vamwe ovo va li va uda eudifo laJesus vaha li va ninga ovahongwa vaye fiyo osheshi a mana oukalele waye wokombada yedu. Sha faafana, eembuto dimwe dOuhamba odo hatu kunu ihadi mene diva, nomunhu ota dulu okuuya moshili inatu shi shiiva. Hano oukalele wetu ohau pondola lela shihapu. Onghee hano, natu twikileni ‘okwiimika shihapu’ nokuulika kutya otu li ovahongwa vaJesus. — Joh. 15:8.