Ovamwatate ovanyasha, otamu lalakanene tuu okupewa oinakuwanifwa meongalo?
1. Omumwatate omunyasha oku na okuhovela okutula moilonga naini omayele oo taa hangwa mu 1 Timoteus 3:1?
1 Ombibeli oya ti: “Umwe ngenge a hala oshilonga shoufitaongalo, oye okwe lihalele oshilonga shiwa.” (1 Tim. 3:1) Eendjovo odo da nwefwa mo otadi ladipike ovamwatate opo va kale va wana okupewa omaufembanghenda oilonga meongalo. Mbela owa teelela okuninga omukulunhu opo u shi ninge? Oshiwa okuhovela okulalakanena oinakuwanifwa fimbo u li omunyasha. Kungaho oto ka mona edeulo noto ka ulika kutya owa wana okunangekwa po u li omuyakuliongalo ngeenge owa kulu. (1 Tim. 3:10) Ngeenge ou li omumwatate omunyasha a ninginifwa, ongahelipi to dulu okulalakanena oinakuwanifwa?
2. Ongahelipi omhepo yeliyambo tai dulu okukulikwa nokuulikwa?
2 Omhepo yeliyambo: Dimbuluka kutya oto lalakanene oshilonga shiwa, ndele haifano. Onghee hano, kulika ehalo lokukwafela ovamwaxo. Onghedi imwe to dulu oku shi ninga omokudilonga koshihopaenenwa sha denga mbada shaJesus. (Mat. 20:28; Joh. 4:6, 7; 13:4, 5) Ilikana kuJehova e ku kwafele opo u kale u na ohokwe muvamwe. (1 Kor. 10:24) Mbela ito dulu okukwafela ovanamido ile ovo ve na ounghundi wopalutu meongalo? Mbela oho liyambe ngoo opo u kunghule omwiidi moluumbo lOlupale, okuwapaleka Olupale lOuhamba ile okuwapekulula oinima vali imwe yOlupale lOuhamba? Mbela oho liyambele ngoo oipopiwa mOfikola yOkudeula Ovaudifi? Oto ka mona kutya okuyakula vamwe otaku ke ku etela ehafo. — Oil. 20:35.
3. Oupamhepo owa fimana shi fike peni, nongahelipi tau dulu okukulikwa?
3 Oupamhepo: Osha fimanenena komuyakuli meongalo a kale e na oupamhepo shi dulife okukala e na ounghulungu wopaushitwe. Omunhu oo e na oupamhepo muwa oha kendabala okutala ko oinima ngaashi Jehova naJesus have i tale ko. (1 Kor. 2:15, 16) Oku na okukala ha ulike “oiimati yOmhepo.” (Gal. 5:22) Oku na okukala omuudifi omuladi wevangeli oo a pitifa komesho Ouhamba. (Mat. 6:33) Oto dulu okukulika omaukwatya opamhepo ngeenge owa kala u na onghedindjikilile yokukonakona paumwene. Osho osha kwatela mo okulesha Ombibeli efiku keshe, okulesha oitukulwa aishe yOshungonangelo no-Awake!, okulilongekidila nokukala pokwoongala kweongalo. (Eps. 1:1, 2; Heb. 10:24, 25) Eshi Paulus a li ta ladipike omunyasha Timoteus a ninge exumokomesho lopamhepo, okwa ti: “Lipashukila ove mwene nenongeko loye.” (1 Tim. 4:15, 16) Longa noudiinini mokuyandja oipopiwa oyo to pewa mOfikola yOkudeula Ovaudifi. Lilongekidila oukalele nokukufa ombinga muo pandjikilile. Litulila po nokuhanga omalalakano opamhepo, ngaashi oukokolindjila, oilonga yaBetel, ile okuya kOfikola yOmbibeli yOkudeula Ovamwatate Inava Hombola. Oupamhepo otau ke ku kwafela u ye “onhapo [okahalu] kounyasha.” — 2 Tim. 2:22.
4. Omolwashike sha fimana okukala omudiinini nomulineekelwa?
4 Okukala omulineekelwa nomudiinini: Ovamwatate ovo va li va pewa oshinakuwanifwa shokutukula oikulya yOvakriste vopefimbo lovayapostoli, ova li va hoololwa molwaashi ova li “ve shii kulineekelwa” novadiinini, novayapostoli kava li ve na okukala tave lipula nongeenge oilonga otai longwa ngoo ile hasho. Osho osha li sha pa ovayapostoli omhito ve lipyakidile noinima ikwao ya fimana. (Oil. 6:1-4) Onghee hano, ngeenge owa pewa oshinakuwanifwa meongalo, shi wanifa po ngaashi to dulu. Hopaenena Noa, oo a li a landula filufilu omalombwelo oo a li a pewa e na sha nokutunga onguluwato. (Gen. 6:22) Jehova okwa lenga oudiinini noukwatya oo otau ulike oukulunhu wopamhepo. — 1 Kor. 4:2; tala oshimhungu shi na oshipalanyole, “Omauwa oo haadi mokudeulwa.”
5. Omolwashike ovamwatate ovanyasha ve na okulalakanena oinakuwanifwa?
5 Ngaashi sha xunganekwa, Jehova ota endelelifa oilonga yokwoongela. (Jes. 60:22) Oupokati wovanhu 250 000 ohava ninginifwa odula keshe. Molwaashi ovanhu vahapu vape otava mbobolokele moshili, ovalumenhu va wana ova pumbiwa opo va file oshisho omaongalo. Paife ope na oilonga ihapu moilonga yaJehova, shi dulife nale. (1 Kor. 15:58) Ovamwatate ovanyasha, otamu lalakanene ngoo oinakuwanifwa? Ngeenge osho, omwe lihalela oshilonga sha denga mbada kuhe na vali!
[Ouyelele u li pepandja 2]
Molwaashi ovanhu vahapu vape otava mbobolokele moshili, ovalumenhu va wana ova pumbiwa opo va file oshisho omaongalo
[Oshimhungu shi li pepandja 3]
Omauwa oo haadi mokudeulwa
Ovamwatate ovanyasha ovo va wana ohava mono ouwa ngeenge ovakulunhuongalo tave va pe oinakuwanifwa noku va deula. Efiku limwe konima yokwoongala fimbo omupashukilishikandjo a li omutumba komutune ta tu omukumo omuudifi umwe, okwa li a didilika kutya popepi naye ope na okamati ke li ofika, onghee okwa li e ka pula ngeenge oka hala okupopya naye. Okamati oko oka li ka lombwela omumwatate kutya okapewa oshinakuwanifwa shokuwapaleka alushe omutune konima yokwoongala. Ovadali vako ova li ve ka teelela va ye, ashike kaka li ka hala okuya fimbo ina ka wanifa po oshilonga shako. Osho osha li sha hafifa omupashukilishikandjo nokwa popya nolupandu a ti: “Ovakulunhuongalo vomeongalo linya ohava deula ovamwatate ovanyasha ovo va wana moku va pa oinakuwanifwa. Naasho oshe shi ningifa shipu kuvo va dule okunangeka po ovamwatate ovanyasha ve li ovayakuliongalo ngeenge handi talele po eongalo lavo.”