Nghee hatu dulu okukwafela ovo vehe shii nawa okulesha

1. Ohapa kala eshongo lilipi ngeenge hatu hongo Ombibeli ovo vehe shii nawa okulesha?

¹ Ovanhu ovo vehe shii nawa okulesha otashi dulika va kale ve na ohokwe moinima yopamhepo, ashike ova tila okulesha Ombibeli ile omambo makwao. Ito ka ndjabula sha lela ngeenge owa pe omunhu a tya ngaho embo Ombibeli otai hongo petalelepo lotete. Ongahelipi hatu dulu okukwafela ovanhu va tya ngaho pamhepo? Natu ka taleni komaetepo ovaudifi ovanawino vokoilongo i dulife 20 ovo va li va pulwa kutya ohave shi ende ngahelipi.

2. Oilongifo ilipi tai longo mokukwafela ovo vehe shii nawa okulesha?

² Ngeenge omukonakoni ke shii nawa okulesha ile ehe shi shii nandenande, oto dulu okuhovela ekonakonombibeli nokambo Listen to God nosho yo Kala ho pwilikine kuKalunga opo u ka kale nomwenyo fiyo alushe. Omukokolindjila umwe wokOilongo ya Hangana oha ulikile omunhu oumbo ovo nokupula a hoolole po oko kapu kuye. Oshitaimbelewa shokoKenya osha ti kutya oilongifo oyo oya kala tai kwafele neenghono moshilongo osho molwaashi meputuko lOvaafrika, ovanhu ova kala hava hongwa okupitila momahokololo ndele hakupitila meenghundafana domapulo nomanyamukulo. Omunhu oo a hongwa oshi na oupu a tambule ko onghedi oyo yokulesha nokupula omapulo, ndele otashi dulika ovo va mona ehongo linini vaha kale va manguluka okuninga ngaho. Ngeenge omukonakoni oku shii ngoo okulesha, ovaudifi vahapu ove hole okuhovela nokambo ngaashi, Onghundana iwa ya dja kuKalunga! ile Ove oto dulu okuninga kaume kaKalunga nosho yo Embo lange lomahokololo Ombibeli.

3. Oinima ilipi i na sha naavo vehe shii okulesha tai ke tu kwafela tu va honge nomupondo?

³ Va pandula: Ovo vehe shii okulesha otashi dulika va kale va fya ohoni, navahapu ove lidina. Oku va kwafela va kale va manguluka luhapu oko haku kala onghatu yotete oyo wa pumbwa okukatuka opo u va honge oshili. Ovanhu vahapu ovo vehe shii okulesha ohava kala ovanaendunge notava dulu okulihonga. Ungaunga navo nefimaneko. (1 Pet. 3:15) Otava ka kala va hala okutwikila okukonakona ngeenge ove wete kutya eenghendabala davo otadi ti sha nonokutya otava ningi exumokomesho lopamhepo. Onghee hano, kala ho va pandula lwoikando.

4. Ongahelipi hatu dulu okuladipika ovo vehe shii nawa okulesha ve lilongekidile ekonakono?

⁴ Nokuli nonande omukonakoni ke shii nawa okulesha, mu ladipika e lilongekidile ekonakonombibeli laye. Ovaudifi vamwe vokoSouth Africa ohava ladipike ovakonakoni vavo va pule oilyo yomaukwaeumbo avo ile ookaume kavo ovo ve shii nawa okulesha ve va kwafele. Omuudifi umwe wokuBritania oha ladipike ovakonakoni vaye ve lilongekide moku va pa va longife embo laye poutendo vonhumba eshi tava konakona opo va mone kutya ohashi kala shipu shi fike peni okumona omanyamukulo ngeenge a tendwa. Omumwatate umwe wokoIndia oha ladipike ovakonakoni vaye va tale omafano oo e li moshileshwa osho tava ka kundafana moshikando tashi landula ko nokudilonga kuo komesho yefimbo.

5. Ongahelipi hatu dulu okuulika elididimiko ngeenge hatu konakona naumwe?

⁵ Kala omulididimiki: Kashi na nee mbudi kutya oto longifa oshishangomwa shilipi, yandja elitulemo koitwa oyo ya fimanenena nokukwafela omukonakoni e i ude ko nawa. Petameko otashi dulika shi kale shiwa okukundafana oule ashike wominute 10 fiyo 15. Ino kendabala okukundafana ouyelele muhapu unene, otamu dulu okukundafana ashike outendo vanini pomhito keshe. Lididimika ngeenge omukonakoni ota lesha ta ende kanini. Eshi ta ende ta shiiva Jehova oshi na oupu shi mu linyengife a xwepopaleke onghedi yaye yokulesha. Oshiwa okushiva omukonakoni kokwoongala eshi opo mwa hovele okukonakona naye opo u mu kwafele a shiive nawa Jehova.

6. Ongahelipi hatu dulu okukwafela ovanhu ve lihonge okulesha?

⁶ Ngeenge ovakonakonimbibeli ove li hongo okulesha, otava ka ninga diva exumokomesho lopamhepo. (Eps. 1:1-3) Ovaudifi vahapu ova kwafela ovakonakonimbibeli vavo tava longifa okambo Apply Yourself to Reading and Writing oule wominute dinini konima yekonakono keshe. Ngeenge omukonakoni okwa teka omukumo, oto dulu oku mu twa omukumo moku mu lombwela oinima yonhumba oyo a dula okulihonga. Mu shilipaleka kutya Jehova ota ka nangeka noupuna eenghendabala daye noku mu ladipika a konge ekwafo okupitila meilikano. (Omayel. 16:3; 1 Joh. 5:14, 15) Ovaudifi vamwe moBritania ohava ladipike ovakonakoni vavo ve litulile po omalalakano e li pandjele nokukendabala ve a hange. Pashihopaenenwa, tete otava dulu okulihonga oalfabeta, opo nee tave lihongo okukonga nokulesha omishangwa donhumba nohauxuuninwa tava lesha moshishangomwa shopaMbebeli osho sha shangwa monghedi i li paunafangwa. Luhapu okuhonga ovanhu okulesha osha kwatela mo oku ve linyengifa va kale ve na ehalo loku shi ninga, ndele haku va honga ashike nghee ve na oku shi ninga.

7. Omolwashike tuhe na okwoongaonga okuhonga oshili ovo vehe shii nawa okulesha?

⁷ Jehova ina dina ovanhu ovo va mona ehongo linini lomounyuni. (Job 34:19) Ndele ponhele yaasho, oha konakona omutima womunhu. (1 Omaf. 28:9) Onghee hano, ino ongaonga okuhonga ovanhu oshili ovo vehe shii nawa okulesha. Ope na oilongifo ya denga mbada ihapu oyo to dulu okuhovela nayo. Nolwanima, otamu ka dula okutaulukila kembo Ombibeli otai hongo nokukwafela omukonakoni a likole eudeko la wedwa po lOmishangwa.