Nghee hatu dulu okuhonga ovanhu oshili ovo vehe shii nawa okulesha
1. Eshongo lilipi tashi dulika tu shakeneke moukalele?
1 Ngeenge tu li moukalele, omafimbo amwe ohatu shakeneke eshongo li na sha nokuhonga ovanhu oshili ovo vehe shii nawa okulesha. Ongahelipi hatu dulu okuungaunga neshongo la tya ngaho?
2. Omolwashike twa pumbwa okufimaneka ovanhu ovo vehe shii nawa okulesha, nongahelipi hatu dulu oku shi ninga?
2 Natu kale twe va fimaneka: Jehova oha tale koikala yomitima dovanhu ndele hakouhongelwe wavo. (1 Sam. 16:7; Omayel. 21:2) Onghee hano, katu na okukala twa dina ovanhu ovo vehe shii nawa okulesha. Ngeenge ovanhu va tya ngaho otwa kala twe va fimaneka nokuungaunga navo nelididimiko, otava ka tambula ko noupu osho hatu va lombwele. (1 Pet. 3:15) Osho osha kwatela mo okuhe va kondjifa va leshe omushangwa wonhumba ile okatendo. Eshi omunhu ta ende te lihongo shihapu shi na sha neeshili di na ondilo dOmbibeli, ota ka kala e na ehalo okuxwepopaleka ounghulungu waye wokulesha opo a dule okuhafela okulesha Eendjovo daKalunga “[nondaka yopedu, NW] omutenya noufiku.” — Eps. 1:2, 3.
3. Eenghedi dimwe dokuhonga dilipi hatu dulu okulongifa opo tu honge ovanhu oshili ovo vehe shii nawa okulesha?
3 Eenghedi odo hatu dulu okulongifa pekonakonombibeli: Okulongifa omafano oko onghedi imwe ya denga mbada tai kwafele omunhu a dimbuluke osho e lihonga. Oto dulu okupula omukonakoni woye kutya oshike e wete pefano olo li li moshileshomwa osho tamu longifa. Mu pula omapulo okondadalunde opo u mu kwafele a ude ko kutya efano otali hongo shike. Longifa omishangwa donhumba odo tadi yelifa oshitwa osho sha divilikwa kefano. Oto dulu yo okulongifa omafano mokweendulula oshilihongomwa. Inamu pumbwa okukonakona ouyelele muhapu pefimbo limwe. Divilika enenediladilo nosho yo oitwa ya fimana yaasho mwe lihonga, ndele henuka okupopya oinima oyo inai pamba osho ta mu konakona. Lesha omishangwa odikilila okudja mOmbibeli, nokupula omapulo onhumba u tale ngeenge omukonakoni woye okwa uda ko osho shi li momishangwa odo mwa lesha. Osho otashi ke mu kwafela a kale e na ehalo okuxwepopaleka ounghulungu waye wokulesha opo a dule okukala ha kongo ouyelele muhapu woshili yOmbibeli kuye mwene.
4. Ongahelipi hatu dulu okukwafela ovakonakoni vetu va xwepopaleke ounghulungu wavo wokulesha?
4 Osho hatu dulu okulongifa opo tu va kwafele va xwepopaleke ounghulungu wavo wokulesha: Ovanhu ovo vehe shii nawa okulesha ile ovo inava mona omhito yokulihonga okulesha otava dulu okukwafelwa mokulongifa okabroshure Ove oto dulu okukala nomwenyo fiyo alushe kombada yedu! Okabroshure oko oke na omafano, eendjovo di li pauxupi nosho yo omishangwa odo tadi dulu okufindila oshili yOmbibeli momutima womukonakoni. Moitukulwa imwe, ovakulunhuongalo ohava ningi yo omalongekido onhumba e na sha neetundi meongalo opo ovo vehe shii okulesha nawa va hongwe. Omaetepo oo taa hongo otaa dulu oku tu kwafela tu dule okukwafela ovo vehe shii nawa okulesha opo va dule okuuda ko “omishangwa diyapuki,” odo tadi dulu oku va kwafela va ka xupifwe. — 2 Tim. 3:15.