Kala u hole okulesha

OINAMWENYO ihai dulu okulesha. Omunhu umwe movanhu 6 ke shii okulesha, molwaashi tashi dulika ina enda mofikola, navahapu ovo va enda mofikola ihava lesha naanaa luhapu. Ndele okulesha ohaku tu pe omhito tu shiive oilongo imwe, tu lihonge kombinga yovanhu ovo tava dulu okunwefa mo onghalamwenyo yetu i kale tai ti sha, notu mone eshiivo olo tali dulu oku tu kwafela tu ungaunge nomupondo noisho yomonghalamwenyo.

Ngeenge okaana oka kala ke shii okulesha nawa, otaka ka kala haka piti nawa mofikola. Okudula okulesha kwomunhu a tya ngaho oko taku ka ufa kutya ota ka dula okumona oilonga ya tya ngahelipi nonokutya ota ka longa eevili ngapi opo a dule okulimonena oipumbiwa yonghalamwenyo. Ovakulukadi ovo ihava longo ndele ove shii okulesha nawa ohava dulu okufila nawa oshisho eemhumbwe domaukwaneumbo avo. Pashihopaenenwa, ohava dulu okutelekela omaukwaneumbo avo oikulya i na oitungifi ya wana, okukaleka po oukoshoki nokwaamena oukwaneumbo uha kwatwe komikifi. Ovadalakadi ovo ve shii okulesha nawa otava dulu okukwafela ovana vavo ve lihonge oinima okudja kounona wavo.

Ouwa munenenene oo hatu dulu okumona okupitila mokulesha oo okumona “eshiivo lokushiiva Kalunga.” (Omayel. 2:5) Okulesha okwa kwatelwa moinima ihapu oyo ya pamba elongelokalunga letu. Pokwoongala kweongalo ohapa leshwa Omishangwa nosho yo oishangomwa ye likolelela kOmbibeli. Okupondola kwetu moukalele okwe likolelela neenghono kokudula kwetu okulesha, notu na okukala hatu lesha eshi hatu lilongekidile omalipyakidilo aeshe oo a popiwa metetekelo. Onghee hano, okukula kwoye pamhepo okwe likolelela kokudula kwoye okulesha.

Longifa nawa omhito oyo u na

Ovanhu vamwe ovo tave lihongo kombinga yaKalunga inava mona lela ehongo. Otashi dulika va kale va pumbwa okuhongwa okulesha opo va dule okuninga exumokomesho lopamhepo, ile va pumbwa ekwafo lopaumwene opo va xwepopaleke okulesha kwavo. Apa sha pumbiwa, eongalo otali dulu okuninga po omalongekido okuhonga ovanhu va tya ngaho okulesha nokushanga. Ope na ovanhu omayovi ovo va mona ouwa muhapu melongekido la tya ngaho. Molwaashi osha fimana okukala hatu lesha nawa, omaongalo amwe ohaa ningi eetundi dokulesha nokushanga pefimbo limwe nOfikola yOukalele woPauteokratika ile pefimbo limwe li lili olo tali wapalele. Nonande eongalo leni kali na elongekido la tya ngaho, oto dulu okuninga exumokomesho mokukala ho ningi eenghendabala okulesha pombada efiku keshe nokukala ho kala pokwoongala kwofikola nokulishangifa u kale ho yandje oipopiwa.

Mupya munene, oinima ngaashi o-TV ohai ningifa ovanhu vahapu vaha kale ve na ohokwe yokulesha. Okutala o-TV nokuhalesha sha wana otaku dulu okwiimba omunhu a ninge exumokomesho mokulesha, notashi mu ningifa yo a kale iha diladila nokutomhafana pandunge ile aha kale ta popi monghedi i uditiwe ko nawa.

“Omupiya omudiinini nomunaendunge” oha nyanyangida oishangomwa oyo hai tu kwafele tu ude ko Ombibeli. Oishangomwa ya tya ngaho ohai kundafana ouyelele muhapu u na sha noinima yopamhepo ya fimana. (Mat. 24:45; 1 Kor. 2:12, 13) Ohai tu kwafele tu shiive oiningwanima ididilikwedi oyo tai ningwa mounyuni nosho yo eityo layo. Ohai tu kwafele yo tu shiive nawa oushitwe oo we tu dingilila nohai tu kwafele tu ungaunge nomupondo nomaupyakadi oo hatu shakeneke. Kakele kaasho, ohai tu hongo yo kombinga yanghee hatu dulu okulongela Kalunga monghedi ya yuka opo a kale e tu hokwa. Okulesha omauyelele a tya ngaho a fimana otaku tu kwafele tu kale tu na oupamhepo muwa.

Ndelenee inashi wana ashike okukala tu shii okulesha nawa. Otu na okukala hatu kongo eemhito dokulesha opo tu mone ouwa. Otu na okukala hatu hoolola noukeka osho hatu ka lesha, ngaashi naanaa hatu hoolola kutya ohatu ka lya oikulya ilipi. Mbela ohatu ka lya oikulya oyo itai tungu ile oyo tai ke tu yahameka? Sha faafana, otu na okuhenuka okulesha oinima oyo tai dulu okunyateka omadiladilo nomitima detu. Otu na okuwilikwa komafinamhango Ombibeli ngeenge hatu hoolola osho hatu ka lesha. Ofimbo inatu hoolola osho hatu ka lesha, natu kaleke momadiladilo omishangwa ngaashi edi: Omuudifi 12:12, 13; Ovaefeso 4:22-24; 5:3, 4; Ovafilippi 4:8; Ovakolossi 2:8; 1 Johannes 2:15-17; nosho yo 2 Johannes 10.

Lesha nelinyengotomheno la yuka

Ngeenge otwa konakona Omavangeli, ohatu ka mona kutya otwa pumbwa shili okukala nomalinyengotomheno a yuka ngeenge hatu lesha. Pashihopaenenwa, Evangeli laMateus otali hokolola nghee Jesus a li ta tomhafana novanongo vomishangwa eshi va li tave mu pula omapulo e na koshi. Ofimbo ine va pa omanyamukulo opamishangwa, okwa li e va pula a ti: “Mboli onye inamu lesha?” nosho yo kutya, “Onye inamu lesha hamba?” (Mat. 12:3, 5; 19:4; 21:16, 42; 22:31) Ohatu lihongo moshinima osho kutya ngeenge itatu lesha nelinyengotomheno la yuka, ohatu ka fika pexulifodiladilo la puka ile tuha ude ko eityo laasho hatu lesha. Ovafarisai ova li tava diladila kutya otava ka mona omwenyo waalushe ngeenge ova kala tava lesha Omishangwa. Jesus okwa yelifa kutya ondjabi yomwenyo waalushe otai ka pewa ashike ovo ve hole Kalunga nova tambula ko oo a tumwa kuKalunga a xupife ovanhu. (Joh. 5:39-43) Ovafarisai ova li ve na omalinyengotomheno a puka, va li ve lihole vo vene, nomolwaasho luhapu ova li hava fiki pexulifodiladilo la puka.

Ohole yokuhola Kalunga oyo i na oku tu linyengifa tu kale hatu lesha Eendjovo daye. Ohai tu linyengifa yo tu konakone kutya ehalo laKalunga olilipi, molwaashi ohole “ohai nyakukilwa pamwe noshili.” (1 Kor. 13:6) Nokuli nonande inatu kala tu hole okulesha nale, ngeenge otu hole Jehova ‘nomadiladilo etu aeshe,’ ohatu ka kala twa halelela okuninga eenghendabala tu lihonge kombinga yaye. (Mat. 22:37) Ohole ohai pendula ohokwe, nohokwe otai ke tu linyengifa tu kale twa hala okulihonga.

Xwepopaleka onhapo yoye yokulesha

Okulesha okwa pambafana nokunongela oitya oyo i li komesho momatumbulo. Nokuli naashi to lesha paife ngaha, oto nongele oitya nokunongonona omaityo ayo. Oto dulu okuxwepopaleka onhapo yoye yokulesha mokukala ho lesha oinhoko yomatumbulo ponhele yokukala to lesha oshitya noshitya. Ngeenge owa xwepopala mokuninga ngaho, oto ka kala to lesha u udite kutya oto lesha shike.

Ngeenge to lesha oishangomwa oyo tai kundafana oinima yomoule, oto ka mona mo ouwa muhapu ngeenge owa longifa onghedi imwe vali i lili. Jehova okwa li a pa Josua omayele e na sha nokulesha Omishangwa a ti: “Embo lomhango ei i ha dje mo mokanya koye, ndelenee [i lesha nondaka yopedu, NW].” (Jos. 1:8) Luhapu ngeenge omunhu ta dilonga, oha popi nondaka yopedu. Onghee hano, outumbulilo wOshiheberi oo wa tolokwa ‘okulesha nondaka yopedu’ owa tolokwa yo “diladila” na “shipulula.” (Eps. 63:7; 77:13; 143:5) Ngeenge omunhu ta dilonga, oha kala ta diladila moule e liteelela. Mokukala hatu lesha hatu dilonga, ohatu ka findila Eendjovo daKalunga momadiladilo nomomitima detu. Ombibeli oi na omaxunganeko, omakumaido, omayeletumbulo, oitevo, omatumwalaka aKalunga etokolo, ouyelele u na sha nomalalakano aye nosho yo oihopaenenwa yashili yoohandimwe ovo va li ko nale. Oinima aishe oyo oya nuninwa okukwafela ovo va hala okweenda meendjila daKalunga. Itashi ke tu etela tuu ouwa okulesha Ombibeli hatu dilonga, opo tu findile osho hatu lesha momadiladilo nomomitima detu!

Yandja elitulemo kwaasho to lesha

Faneka momadiladilo osho to lesha. Kala wa fa u wete momadiladilo oye oohandimwe ovo to lesha kombinga yavo, na kala wa fa u udite u li monghalo omo ve li. Oshipu okuninga ngaho ngeenge to lesha pashihopaenenwa ehokololo li na sha naDavid naGoljat olo li li muSamuel wotete etukulwa eti-17. Oto dulu yo okuhafela okulesha omauyelele e na sha nokutungwa kwetwali ile okunangekwa po kwovapristeri, oo e li muExodus nomuLeviticus, ngeenge owa kala wa fa u wete momadiladilo oye omitamo detwali, oitungifo oyo ya li ya longifwa, ile wa fa u udite edimba loitwiminifo, lomasha nosho yo lomaxwikiloyambo oinamwenyo. Diladila ashike kunghee sha li shitunhula okuwanifa po oshilonga shoupristeri! (Luk. 1:8-10) Ngeenge owa lesha monghedi ya tya ngaho, oto ka uda ko osho to lesha noto ke shi dumbuluka yo noupu.

Ndele ngeenge ino lungama eshi to lesha, omadiladilo oye otaa dulu okutwalwaatwalwa. Otashi dulika omesho oye a kale a tala kwaasho to lesha, ndele omadiladilao oye oku li pamwe pe lili. Mbela ope na omusika tai dana? Mbela o-TV oya tema? Mbela oilyo youkwaneumbo otai kundafana sha? Oshiwa okuleshela poima pwe limwenenena ngeenge otashi shiiva. Ndelenee omafimbo amwe ofye vene hatu lietele oupyakadi. Otashi dulika u kale to diladila kombinga yoinima oyo wa li we lipyakidila nayo momukokomoko wefiku. Oshiwa okudiladila kombinga yoiningwanima yefiku, ndele hapefimbo olo hatu lesha. Otashi dulika u kale to yandje elitulemo eshi opo to hovele okulesha, ile wa ilikana nokuli ofimbo ino hovela, ndele eshi to lesha omadiladilo oye ota twalwaatwala. Ashike ino sholola. Lideula okukala ho yandje elitulemo kwaasho to lesha. Mokweendela ko kwefimbo, oto ka mona kutya oto ende to xwepopala moshinima osho.

Mbela ou na okuninga shike ngeenge owa shakeneke oshitya osho uhe shii nale? Oitya imwe oyo uhe shii otashi dulika ya fatululwa ile ya kundafanwa moshitukulwa osho to lesha. Ile otashi dulika u mone eityo layo eshi to twikile okulesha oshitukulwa ile etukulwa olo. Ngeenge hasho, tala oitya oyo memboitya ngeenge ou li na, ile i didilika opo u ka pule vamwe. Osho otashi ka weda ko koupuna woye woitya notashi ke ku kwafela u ude ko osho to lesha.

Diinina okulesha moipafi

Eshi omuyapostoli Paulus a li a ladipika Timoteus a diinine okulesha, okwa li ta popi kondadalunde shi na sha nokulesha moipafi omolwouwa wavamwe. (1 Tim. 4:13) Okulesha nawa moipafi okwa kwatela mo shihapu shihe fi ashike okutumbula oitya oyo ya shangwa. Omuleshi oku na okukala e udite ko eityo loitya nolomatumbulo. Kungaho, ota ka lesha e uditiwe ko nawa kovapwilikini nokuholola nawa omaliudo oo a kwatelwa mo mwaasho ta lesha. Osho otashi pula tu kale hatu lilongekida nokulideula nawa, nomolwaasho omuyapostoli Paulus a li a ladipika Timoteus a ti: ‘Diinina oku va leshela.’ Ofikola yOukalele woPauteokratika otai ke ku kwafela u ninge exumokomesho mokulesha.

Litulila po efimbo lokulesha

Ombibeli otai ti: “Eemhangela dovadiinini tadi eta ouwa auke. Ndelenee omweendeleli keshe te likongele eemhumbwe.” (Omayel. 21:5) Opo tu mone “ouwa” mokulesha otwa pumbwa okuninga eemhangela, sha hala okutya, otu na okukonga efimbo lokulesha nokuninga eenghendabala opo omalipyakidilo etu amwe aha ye moshipala okulesha kwetu.

Mbela oho lesha efimbo peni? Mbela oho mono shixwepo okulesha ongula inene ile komatango? Oto ka mona kutya oto dulu okulesha shihapu ngeenge owe litulile po nande ominute 15 ile 20 efiku keshe dokulesha. Ndelenee osha fimana okukala ho shi ningi pandjikilile.

Mbela omolwashike Jehova a shangififa omalalakano aye makumwifi mOmbibeli? Opo ovanhu va leshe Eendjovo daye. Osho ohashi va kwafele va konakone oinenelonga yaJehova, va lombwele ovana vavo kombinga yayo nova dimbuluke oilonga yaye. (Eps. 78:5-7) Opo tu ulike shili kutya otu na olupandu omolwoshali oyo Jehova e tu pa, otu na okukala hatu lesha Eendjovo daye odo tadi ke tu pefa omwenyo.