Natu kale hatu katuka eenghatu meendelelo

Okudja eshi twa unganekulula onhele yetu yokointaneta, omuvalu waavo hava pula ekonakonombibeli owa hapupala neenghono. Vamwe ovo va tula mo omaindilo ove linyengifwa yo konghedi yetu ipe yokuyandja oundombwedi peenhele daaveshe. Oshitaimbelewa ohashi ungaunga meendelelo ngaashi tashi dulika nomaindilo a tya ngaho. Pashihopaenenwa, luhapu oshitaimbelewa ohashi kwatafana novakulunhuongalo vomoshitukulwa omo mu na omunhu oo e na ohokwe konima ashike yomafiku avali okudja eshi a ninga eindilo laye ko-jw.org. Ndele okwa didilikwa kutya vamwe ovo hava tula mo omaindilo avo e na sha nekonakonombibeli ohava kala va teelela oule woivike ihapu. Ongahelipi hatu dulu okushilipaleka kutya ovanhu va tya ngaho ova kwafelwa fimbo inava kanifa ohokwe?—Mark. 4:14, 15.

Ngeenge owa shakeneke omunhu ta ulike ohokwe ndele iha kala moshitukulwa sheni, yadeka diva okafooloma Please Follow Up (S-43), noku ka yandja kuhamushanga pokwoongala kweongalo leni taku landula. Hamushangwa ota ka tumina ouyelele oo keongalo olo tali wapalele ile koshitaimbelewa moule wefiku limwe ile avali, ta longifa okakololo keongalo oko ke li ko-jw.org. Ovakulunhuongalo ove na okukala hava tale ko-jw.org pandjikilile. Ngeenge ova shiivifilwa va dengele omunhu oo, ove na okuninga omalongekido meendelelo opo a kwafelwe. Omuudifi keshe oo a pulwa a ka talele po omunhu a tya ngaho oku na oku shi ninga diva. Ngeenge omunhu ino mu hanga mo meumbo, oto dulu okufiya po okambapila omo wa shanga ouyelele oko ta dulu okukwatafana naave.