Longifa o-jw.org moukalele

O-Web site yetu oi li oshilongifo sha fimanenena shoku tu kwafela tu tandaveleke onghundana iwa ‘fiyo okominghulo dounyuni.’ (Oil. 1:8) Ovaneumbo vahapu kave shii okuya ko-jw.org kuvovene. Ponhele yaasho, ohave lihongo ashike kombinga yayo ngeenge omuudifi e i va ulikila. Ashike, manga ino longifa oshikwaetronika shoye moukalele tala tete ngeenge oshi li eameno oku shi ninga. Kala wa lungama alushe moitukulwa omo ekaulonyanga la lunda pombada. Ngeenge ku na oshikwaelektronika, oto dulu okupula nelungi omuneumbo ngeenge oto dulu oku mu ulikila o-jw.org koshikwaelektronika shaye.

Omupashukili omweendi oha tapele mongodi yaye okavidio Omolwashike u na okukonakona Ombibeli? nohe ka ulike pomhito keshe oyo ta mono. Pashihopaenenwa, ngeenge ta ende eumbo neumbo, oha ti: “Ohandi mu talele po pauxupi opo ndi kwafele ovanhu va mone omanyamukulo omapulo atatu a fimana: Omolwashike mounyuni mu yadi omaupyakadi mahapu? Ongahelipi Kalunga te ke a xulifa po? Nosho yo kutya, ongahelipi hatu dulu okuungaunga nao paife? Okavidio aka kaxupi otaka popi kombinga yomapulo oo.” Oha findi pokambadi kokudana nokutala kutya omuneumbo ote linyenge ngahelipi. Okavidio ohaka nane ovanhu vahapu nohave ka tale fiyo osheshi ka pwa ko. Opo nee omupashukili omweendi oha ti: “Owa uda kutya oto dulu okupula ekonakonombibeli kointaneta. Molwaashi opo ndi li, ohandi dulu oku ku ulikila paife pauxupi nghee hali ningwa.” Ngeenge omuneumbo okwa dimine, ohe mu ulikile nghee ekonakonombibeli hali ningwa ta longifa okambo Onghundana iwa. Ngeenge omuneumbo ke na efimbo, oha ningi elongekido opo e shi ninge metalelepo tali landula ko. Ngeenge tai koufitola vokoofi a ka nwe okoofi ye ta fuda po, oha popi sha faafana nomunhu oo e li omutumba popepi naye shimha a hovele okupopya naye nombili. Oho longifa ngoo o-jw.org moukalele?