Oilongifo yetu yokuhonga
1. Omeityo lilipi ovaudifi Ovakriste va fa ovahongi vomiti?
1 Ovahongi vomiti ovanawino ohava longifa oilongifo yomaludi e lili noku lili. Oilongifo imwe ohave i longifa peemhito de likalekelwa, omanga imwe have i longifa pandjikilile. Ohava kala alushe ve na oilongifo oyo hava longifa pandjikilile moshikefa shavo shoilongifo, nove na ounghulungu muhapu woku i longifa. Ombibeli otai ladipike Ovakriste aveshe va kale hava yandje elitulemo koukalele nokukala ‘ovalongi ihava fi ohoni oshilonga shavo.’ (2 Tim. 2:15) Oshilongifo shilipi sha fimanenena moshikefa shopafaneko shoilongifo yetu? Osho Eendjovo daKalunga, efinamhango olo hatu longifa opo tu ‘ninge ovanhu ovahongwa.’ (Mat. 28:19, 20) Onghee hano, otu na okukendabala tu ninge ovahongi ovanekeka “tu shii okulongifa nawa eendjovo doshili, NW.” Kakele kaasho, moshikefa shetu shoilongifo omu na oilongifo oyo hai longifwa pandjikilile oyo Ovakriste ve na okulihonga oku i longifa nawanawa, opo va honge ovanhu oshili. — Omayel. 22:29.
2. Oilongifo yokuhonga ilipi hatu longifa pandjikilile?
2 Oilongifo oyo hatu longifa pandjikilile: Kakele kOmbibeli, oilongifo ilipi vali tu na okulongifa? Oshilongifo sha fimanenena osho tashi dulu oku tu kwafela tu honge vamwe oshili yOmbibeli embo Ombibeli otai hongo lela shike? Shimha twa mane ko embo olo nomukonakoni, ohatu longifa embo “Likalekeni mohole yaKalunga” opo tu mu honge a kale ha tula moilonga omafinamhango Ombibeli efiku keshe. Onghee hano, otu na okukala tu shii okulongifa nawanawa oishangomwa oyo ivali. Otu na yo okukala tu na mo oumbo moshikefa shetu shoilongifo. Okambo Onghundana iwa ya dja kuKalunga! oko kamwe komoilongifo yetu ya denga mbada yokuhovela omakonakonombibeli. Ngeenge moitukulwa yetu omu na ovanhu ovo vehe shii okulesha nawa ile hava popi elaka olo la tolokwa moishangomwa yetu inini ile inali tolokwa nandenande, ohatu dulu okulongifa okambo Kala ho pwilikine kuKalunga opo u ka kale nomwenyo fiyo alushe. Oshilongifo shimwe vali osho hatu dulu okulongifa opo tu yelifile ovakonakonimbibeli kombinga yehangano, okambo Oolyelye tava longo ehalo laJehova kunena? Otu na yo ouvidio ovo tava dulu oku tu kwafela neenghono tu ninge ovanhu ovahongwa, ngaashi Oshike hashi ningwa pekonakonombibeli?, Oshike hashi ningwa kOlupale lOuhamba? nosho yo Mbela Kalunga oku na edina? ke li moshiingilisha. Onghee hano, otu na yo okukala tu shii oku va longifa nawanawa.
3. Oitukulwa yomonakwiiwa yomokafo Oukalele Wetu wOuhamba otai ke tu kwafela tu ninge shike?
3 Oitukulwa yomonakwiiwa yomokafo Oukalele Wetu wOuhamba otai ke tu kwafela tu kale twa pyokoka mokulongifa oishangomwa oyo i li moshikefa shetu shoilongifo shokuhonga. Ngeenge otwa kendabala okulongifa oilongifo oyo nawanawa, ohatu ka tula moilonga omayele a nwefwa mo, oo taa ti: “Lipashukila ove mwene nenongeko loye; dama mulo! Osheshi ngenge to shi ningi, oto lixupifa ove mwene naava tave ku pwilikine.” — 1 Tim. 4:16.