Nghee hatu dulu okulongifa okambo nghundana iwa ya dja kuKalunga!
Okambo oko kape oka nuninwa oku tu kwafela tu ninge omalishuneko nokuhovela omakonakonombibeli
1. Okambo kape kelipi ka pita poshoongalele shoshitukulwa ‘Amena omutima woye!,’ oko ka nuninwa oku tu kwafela tu ninge omalishuneko notu hovele omakonakonombileli?
1 Poshoongalele shoshitukulwa osho sha li shi na oshipalanyole ‘Amena omutima woye!,’ otwa li twa hafa unene eshi twa mona okambo kape oko taka dulu oku tu kwafela tu ninge omalishuneko nokuhovela omakonakonombibeli. Okambo Onghundana iwa ya dja kuKalunga! oko ka pingena po Kalunga Ota Pula Shike kuFye? nako oke na oileshwa ixupi. Osho otashi ke tu kwafela tu longife nomupondo okambo oko mokuhovela omakonakonombibeli eshi hatu longo eumbo neumbo. Okambo Kalunga Ota Pula oka popya kombinga yoiteelelwa yopaKriste, oyo tai dulu okukala eshongo kovakonakonimbibeli vape oku i tambula ko, ofimbo oko kape ka yukifa elitulemo konghundana iwa oyo tai hangwa mOmbibeli. — Oil. 15:35.
2. Okambo Onghundana iwa ya dja kuKalunga! oka nyanyangidwa nelalakano lashike?
2 Okambo oko oka nyanyangidwa nelalakano lashike? Ovamwatate mounyuni ova kala tava pula oshilongifo shipu osho tashi dulu okuhokwifa ovanhu oshili nokutwala membo Ombibeli otai hongo, olo li li oshilongifo shetu sha shiya ko shokuninga omakonakonombibeli. Ovanhu ovo hava kala vehe na ohokwe membo luhapu ohava kala ve na ehalo lokukonakona Ombibeli tava longifa okambo. Kakele kaasho, okambo otaka dulu okutolokwa noupu momalaka mahapu.
3. Omonghedi ilipi okambo oko ka yooloka ko koishangomwa ikwao?
3 Nghee ka unganekwa: Oishangomwa yetu ihapu yokukonakonwa oya shangwa monghedi omo omunhu ta dulu oku i lesha nokuuda ko oshili, nonande kape na ou te mu kwafele. Ashike okambo oko hasho ke li ngaho. Oka shangwa nelalakano lokukonakona Ombibeli to kwafelwa kuumwe. Onghee hano, ngeenge to ka yandje kuumwe, oshiwa mu kundafane okatendo kamwe ile vavali. Oke na outendo vaxupi, notamu dulu oku va kundafana poshivelo sheumbo ile ponhele yaye yomalandifilo. Nonande ohashi kala shiwa okuhovela noshileshwa 1, ohatu dulu okuhovela ekonakonombibeli keshe pamwe mokambo.
4. Ongahelipi okambo taka dulu oku tu kwafela tu honge odikilila okudja mOmbibeli?
4 Moishangomwa yetu ihapu, omanyamukulo omapulo otaa dulu okumonika moutendo. Ndele moshileshomwa eshi, omanyamukulo ohatu a hange mOmbibeli. Ovanhu vahapu ova hala okulihonga okudja mOmbibeli, ndele hamoishangomwa yetu. Onghee hano, konyala omishangwa adishe odo da etwa mo inadi tofwa mo, ndele odi na okuleshwa odikilila okudja mOmbibeli. Osho otashi ka kwafela omukonakoni a mone kutya osho te lihongo osha dja kuKalunga. — Jes. 54:13.
5. Omolwashike sha fimana komuudifi e lilongekidile nawa ekonakono keshe?
5 Okambo inaka yelifa omishangwa adishe. Omolwashike mbela? Oka nuninwa okulinyengifa omukonakoni a pule omapulo nokuyandja omhito komuudifi a longife ounghulungu waye wokuhonga. Onghee hano, osha fimana okulilongekidila nawa ekonakono keshe. Elondwelo: Ino popya unene. Otu hole okuyelifa omishangwa, ndele luhapu ohatu pondola shihapu mokupula omukonakoni a yelife kutya oku udite ko ngahelipi omushangwa. Ngeenge otwa longifa omapulo nelungi, ohatu ke mu kwafela a ude ko nawa eityo keshe lomushangwa. — Oil. 17:2.
6. Ongahelipi hatu dulu okulongifa okambo (a) moitukulwa omo ovanhu va limbililwa kombinga yaKalunga nosho yo Ombibeli? (b) ngeenge hatu longo eumbo neumbo? (c) mokuhovela omakonakonombibeli odikilila? (d) ngeenge hatu ningi omalishuneko?
6 Ngaashi ashike oishangomwa ikwao oyo hai longifwa okuhovela omakonakonombibeli, okambo aka nako ota ka dulu okuyandjwa pomhito keshe, kashi na nee mbudi kutya oshike tashi yandjwa omweedi oo. Vahapu otava ka kala va hafa oku ka longifa nelalakano lokuhovela omakonakonombibeli poshivelo sheumbo. Shimwe vali, ngaashi sha li sha popiwa poshoongalele shoshitukulwa, ngeenge otwe ka yandje kovanhu ovo va ulika ohokwe “otashi ka ningifa lela oilonga yetu yokuninga omalishuneko ihafifa.” — Tala oimhungu pepandja 5-6.
7. Ongahelipi to dulu okuninga ekonakonombibeli to longifa okambo?
7 Nghee to dulu okuninga ekonakonombibeli: Ohatu dulu okuhovela eenghundafana hatu lesha omapulo oo e na eenomola a laulikwa. Opo nee, lesha okatendo nomushangwa (omishangwa) odo da endamekwa. Longifa omapulo nelungi opo u kwafele omuneumbo a ude ko eityo lomishangwa. Manga inamu taulukila koshitukulwa sha landula ko, pula omuneumbo a nyamukule epulo olo la laulikwa, opo u mone kutya okwa uda ko. Pomatalelepo anini opehovelo, otashi dulika shi kale shiwa okukundafana ashike epulo limwe lomomapulo oo a laulikwa. Mokweendela ko kwefimbo, otashi dulika tu tamunune mo eenghundafana detu, tu kwatele mo oshileshwa ashishe.
8. Otu na okutya shike ngeenge hatu popi omishangwa, nomolwashike?
8 Omishangwa odo da tetekelwa koshitya “lesha” luhapu odo da nyamukula epulo olo la laulikwa. Ngeenge to popi omushangwa, henuka okutya, “Omuyapostoli Paulus okwa ti” ile, “Didilika osho Jeremia a xunganeka.” Omuneumbo otashi dulika a diladile kutya ohatu lesha eendjovo dovanhu. Otashi ka kala shiwa ngeenge otwa ti, “Eendjovo daKalunga otadi ti” ile, “Didilika osho Ombibeli ya xunganeka.”
9. Mbela omu na okulesha omishangwa adishe odo da etwa mo eshi tamu konakona?
9 Mbela otu na okulesha omishangwa adishe odo da etwa mo ile ododo ashike di na edidiliko “lesha”? Osho otashi ke likolelela keenghalo. Omishangwa adishe odo da etwa mo, oda etwa mo nelalakano, nakeshe umwe ou na ouyelele oo wa pumbwa okukundafanwa. Ndele peemhito dimwe otashi dulika omukonakoni ke na efimbo, ehe na ohokwe ile tashi dulika a ngabekwa ngeenge tashi uya pokulesha, onghee hano, otamu dulu ashike okulesha odo di na edidiliko “lesha.”
10. Onaini hatu dulu okutaulukila kembo Ombibeli otai hongo?
10 Onaini mu na okutaulukila kembo Ombibeli otai hongo?: Konima yokukundafana lwoikando nokuhovela okukonakona pandjikilile, otamu dulu okutaulukila kembo Ombibeli otai hongo ile mu twikile nokambo Onghundana iwa fiyo mwe ka mana ko. Ovaudifi ove na okulongifa eendunge davo dokuyoolola opo va tokole kutya onaini ve na okutaulukila kembo. Ngeenge otwa taulukile kembo Ombibeli otai hongo, mbela otu na okuhovela ketameko lalo? Kape na omhango i na sha naasho, molwaashi ovanhu ova yoolokafana. Ndele ovakonakonimbibeli vahapu otava ka mona ouwa mokweendulula oikundafanwa imwe membo Ombibeli otai hongo.
11. Omolwashike tu na okulongifa nawa okambo oko kape?
11 Otu na oufembanghenda munene wokuudifila ovanhu onghundana iwa mounyuni omo eenghundana diwa da pumba, kutya Ouhamba waKalunga otau pangele nonokutya mafiku otau ka eta ounyuni mupe omo tamu ka kala ouyuki. (Mat. 24:14; 2 Pet. 3:13) Otu na elineekelo kutya ovanhu vahapu ovo tava udu etumwalaka olo otava ka twa kumwe neendjovo da nwefwa mo odo tadi ti: “Eenghatu daau ha popi eenghundana dehafo, oda wapala ngahelipi keemhunda, daau ta udifile ovanhu ombili, ndee ta hepaululile ovanhu ondaka iwa, daau ta udifa ekulilo, ou ta lombwele Sion, ta ti: Kalunga koye Oye ohamba.” (Jes. 52:7) Natu longifeni okambo oko kape tu udifileni ovanhu moitukulwa yetu onghundana iwa ya dja kuKalunga ovo ve na enota!
[Oshimhungu shi li pepandja 5]
Moitukulwa omo ovanhu va limbililwa kombinga yaKalunga nosho yo yOmbibeli:
● Ovaudifi ova didilika kutya moitukulwa imwe ovanhu ohava kangheke eenghundafana ngeenge owa tumbula Kalunga nosho yo Ombibeli. Ngeenge eenghalo osho di li ngaho moshitukulwa sheni, oshiwa okukundafana oitukulwa oyo ya kuma ovanhu moshitukulwa, ngaashi omhumbwe yepangelo liwa, opo hatu dulu okumona ekwafo tali longo komaukwaneumbo nosho yo eteelelo li na sha nonakwiiwa. Otashi dulika tu yandje okambo Onghundana iwa konima eshi twa kundafana nomunhu lwoikando tu mu yelifile kutya otu shi shii ngahelipi kutya Kalunga oko e li nonokutya omolwashike Ombibeli i shii okulineekela.
[Oshimhungu shi li pepandja 6]
Ngeenge hatu longo eumbo neumbo:
● “Ohatu mu talele po opo tu mu ulikile kutya ongahelipi tamu dulu okushiiva noupu kombinga yelalakano laKalunga lomonakwiiwa li na sha novanhu. Mbela owa diladila ngoo nale kutya pamwe Kalunga ona ka xulife po okumona oixuna fiku limwe? [Teelela omunhu a nyamukule.] Okambo aka oka ulika kutya openi to dulu okuhanga enyamukulo mOmbibeli yoye kepulo olo. [Yandja okambo komuneumbo, ndele tamu lesha okatendo kotete moshileshwa shotete nosho yo Jeremia 29:11.] Okutala kwaasho twa kundafana, mbela otashi ti sha kwoove eshi Kalunga e tu halela onakwiiwa iwa? [Teelela omunhu a nyamukule.] Okambo oto dulu okukala po nako ngeenge owa hala. Opo nee moshikando tashi landula ohatu uya tu kundafane okatendo kativali tu mone enyamukulo lopaMbibeli kepulo eli kutya, ‘Kalunga ota ka xulifa po ngahelipi oyeetifi yokumona oixuna kwovanhu?’” Ngeenge omuneumbo oku na efimbo petalelepo lotete, otamu dulu okulesha nokukundafana okatendo kativali nosho yo omishangwa dako dopatatu. Ninga elongekido u shune ko mu ka kundafane epulo etivali moshileshwa osho.
● “Ovanhu vahapu ove hole okwiilikana, unene tuu ngeenge ve na omaupyakadi. Mbela naave oho ilikana omafimbo amwe? [Teelela omunhu a nyamukule.] Mbela oto diladila kutya Kalunga oha pwilikine ngoo komailikano aeshe, ile pamwe otashi dulika ina hokwa amwe? [Teelela omunhu a nyamukule.] Ondi na okambo aka ta ke tu kwafele tu mone omanyamukulo opaMbibeli komapulo oo. [Yandja okambo komuneumbo, ndele tamu kundafana okatendo kotete moshileshwa 12 nomishangwa odo di na edidiliko “lesha.”] Mbela kashi kumwifi eshi Kalunga e na ehalo okupwilikina kufye? Ndele opo tu mone ouwa pauyadi meilikano, otwa pumbwa okushiiva nawa Kalunga. [Pandja poshileshwa 2, ndele to mu ulikile oupalanyole vasho.] Ohandi dulu oku ku fiila okambo oko ngeenge owa hala, nomoshikando tashi uya ohatu dulu okukundafana omanyakulo opaMbibeli komapulo oo mahokwifa.”
● “Otwe ya oku mu talela po molwaashi ovanhu otave lipula kutya ounyuni ou owa yuka peni. Mbela oto diladila kutya eenghalo onadi ka xwepopale ngoo? [Teelela omunhu a nyamukule.] Ovanhu vahapu ohava kala va kumwa okuuda kutya mOmbibeli omu na onghundana iwa oyo tai tu pe eteelelo. Apa ope na amwe omomapulo oo a nyamukulwa kOmbibeli.” Yandja okambo komuneumbo, ndele to mu pula a hoolole po limwe lomomapulo oo e li konima yokambo olo e na unene ohokwe mulo. Opo nee pandjeni poshileshwa, noku mu ulikila nghee ekonakonombibeli hali ningwa. Ninga elongekido u shune ko mu ka kundafane epulo la landula ko moshileshwa osho.
[Oshimhungu shi li pepandja 7]
Pula omunhu sha yukilila:
● Otwe mu talela po ashike pauxupi tu mu lombwele kombinga yoshilongifo eshi shipe shokukonakona Ombibeli. Okambo aka oke na oileshwa 15 oyo tai ulike kutya openi to dulu okuhanga omanyamukulo mOmbibeli yoye komapulo a fimanenena. [Ulikila omuneumbo efo lokomesho nolokonima.] Mbela owa kendabala ngoo nale okuuda ko Ombibeli? [Teelela omunhu a nyamukule.] Handi uya ndi ku ulikile kutya oileshwa oipu shi fike peni. [Kundafaneni okatendo kotete kepulo 3 moshileshwa 3 nokulesha Ehololo 21:4, 5. Ngeenge otashi shiiva, kundafaneni okatendo ka landula ko nosho yo omishangwa odo di na edidiliko “lesha.”] Ohandi dulu oku ku fiila okambo aka ngeenge owa hala. Ohatu ku ladipike u kendabale okukonakona Ombibeli nande lumwe ngoo. Moshikando tashi landula, ohatu ka kundafana oshileshwa shotete. Didilika kutya epandja ashike limwe.”
[Oshimhungu shi li pepandja 7]
Nghee to dulu okuyandja okambo eshi to ningi elishuneko:
● Ngeenge otwa shuna komunhu oo a li a ulika ohokwe, ohatu dulu okutya: “Oshiwa eshi twe ku hanga mo natango meumbo. Otwe ku etela okambo aka oko taka yandje omanyamukulo opaMbibeli komapulo mahapu mahokwifa. [Yandja okambo komuneumbo, ndele to mu pula a tale kefo lokonima.] Oshikundafanwa shilipi shihokwifa unene kwoove? [Teelela omunhu a nyamukule. Opo nee pandjeni poshileshwa osho a hoolola.] Handi uya ndi ku ulikile nghee okambo aka haka longifwa opo u mone omanyamukulo opaMbibeli.” Ulika nghee ekonakono hali ningwa mokukundafana okatendo kamwe ile vavali nosho yo omishangwa odo di na edidiliko “lesha.” Ekonakonombibeli osho ashike hali ningwa ngaho. Fiila omuneumbo okambo, nokuninga elongekido u shune ko. Ngeenge omwa mane ko oshileshwa, otamu dulu okukundafana natango oshileshwa shikwao osho omuneumbo a hoolola ile mu hovele petameko lokambo.