Ka Tuvikila
Oho longifa ngoo oubroshure ovo?
Ombibeli oi na etumwalaka lilipi?
Oka nuninwa okupendula ohokwe yovanhu ovo vehe shii shihapu kombinga yOmbibeli, unene tuu ovo ve li momalongelokalunga ehe fi Oukwakriste
Nghee taka dulu okuyandjwa: “Otwa hala okuuda kutya ove oto ti ngahelipi kombinga yaasho sha popiwa mOmushangwa ou (ile membo liyapuki). [Lesha omushangwa wEpsalme 37:11, oo wa kundafanwa moshileshwa 11.] Mbela kombada yedu otaku ka kala ku li ngahelipi ngeenge exunganeko olo ola wanifwa? [Teelela omunhu a nyamukule.] Eshi oshihopaenenwa ashike shimwe shomoihopaenenwa yomOmbibeli oyo tai dulu okuhekeleka nokuyandja eteelelo kovanhu vomaputuko novomaitavelo aeshe.” Lesha okatendo kotete ketwalemo oko ke li pepandja 3, opo nee, mu pa okabroshure oko.
Hetekela okuninga ngaha: Ngeenge oho konakona Ombibeli nomunhu womaitavelo oo ehe fi Oukwakriste to longifa embo Ombibeli otai hongo, kala ho kundafana naye oshileshwa shimwe shokabroshure aka komesho ile konima yekonakonombibeli leni opo a kale e na eudeko loshikalimo shOmbibeli.
Ondjila oyo tai twala komwenyo waalushe mbela owe i mona?
Oka nuninwa okukwafela ovanhu va mone kutya Kalunga ina hokwa omalongelokalunga aeshe
Nghee taka dulu okuyandjwa: Mounyuni omu na omalongelokalunga mahapu e lili noku lili. Mbela Kalunga okwa hokwa ngoo shili eenghedi di lili noku lili da kitakana omo ovanhu hava ti kutya otave mu longele? [Teelela omunhu a nyamukule. Opo nee, lesha Mateus 7:13, 14.] Jesus oo a li omuprofeti waKalunga okwa popya kutya oku na ashike eendjila mbali, imwe otai twala komwenyo waalushe, ofimbo ikwao tai twala mekano. Okabroshure aka oka nyanyangidwa nelalakano opo ke ku kwafele u mone ondjila oyo tai twala komwenyo waalushe.
Hetekela okuninga ngaha: Pa omuneumbo okabroshure oko, ndele to ningi elongekido lokwaaluka opo mu ka leshe pamwe naye noku mu kwafela okukonga omishangwa mOmbibeli yaye. Ngeenge omhito otai shi pitike, ulikila omuneumbo embo Ombibeli otai hongo, nonghee li na okulongifwa.
Ove Oto Dulu Okuninga Kafume kaKalunga
Oka nuninwa okupendula ohokwe movanhu ovo ehongo ile okulesha kwavo kwa ngabekwa
Nghee taka dulu okuyandjwa: “Mbela ovanhu otava dulu ngoo shili okuninga ookaume kaKalunga? [Teelela omunhu a nyamukule. Opo nee, lesha Jakob 2:23.] Okabroshure aka oka nuninwa oku tu kwafela tu pange oukaume naKalunga ngaashi Abraham a li a ninga.”
Hetekela okuninga ngaha: Kendabala okuulikila omuneumbo nghee ekonakonombibeli hali ningwa, to kundafana naye oshileshwa 1 ashishe ile etata lasho, kutya nee opetalelepo loye lotete ile opefimbo lelishuneko.
Eemhepo dOonakufya—Otadi Dulu Oku Ku Kwafa ile Otadi Ku Etele Oshiponga? Oko Di Li Shili?
Oka nuninwa okutomha ovanhu va mone kutya inava pumbwa okutila ovafi nandenande. Oka yandja oumbangi kutya ovafi kave na eenghono dokuninga sha
Nghee taka dulu okuyandjwa: “Ovanhu vahapu ohava tila oonakufya, molwaashi ova itavela kutya ovafi otava dulu okweetela ovanamwenyo oshiponga. Mbela Ombibeli otai hongo shike? [Teelela omunhu a nyamukule. Opo nee, lesha Omuudifi 9:5, 6, 10.] Pakupopya kweevelishe odo, mbela ovafi otava dulu ngoo shili okukala ve tonde ovanamwenyo ile oku va ulikila ohole? Okabroshure aka otaka yandje omanyamukulo a yela notaa mbilipaleke omapulo oo haa pulwa luhapu e na sha nonghalo yoonakufya.”
Hetekela okuninga ngaha: Ngeenge omuneumbo okwa tambula ko okabroshure oko, ninga elongekido u aluke moshikando tashi uya opo mu kundafane naye oshikundafanwa osho nokunyamukula omapulo aye ngeenge oku na. Diva konima yaasho, ulikila omuneumbo embo Ombibeli otai hongo, nonghee li na okulongifwa.
The Guidance of God—Our Way to Paradise
Oka nuninwa okupendula ohokwe yOvamoslema ovo hava di moitukulwa omo tashi dulika va manguluka okukonakona Ombibeli
Nghee taka dulu okuyandjwa: “Onda uda kutya vati Ovamoslema ova itavela muKalunga kashili umwe nosho yo movaprofeti aveshe. Oshoshili ngoo? [Teelela omunhu a nyamukule.] Onda hala tu kundafane naave kombinga yexunganeko limwe lonale olo tali popi kutya edu otali ka ningwa oparadisa. Mbela nandi ku leshele osho omuprofeti umwe a xunganeka? [Lesha Jesaja 11:6-9.] Ovanhu vahapu ohava kala tave lipula kutya ongahelipi Kalunga ta ka eta omalunduluko oo kombada yedu. Okabroshure aka otaka ulike kutya ovaprofeti ova ti shike kombinga yoshinima osho.”
Hetekela okuninga ngaha: Ngeenge omuneumbo okwa tambula ko okabroshure oko, oto dulu okutya: “Embo eli laKalunga ola ti kutya pehovelo ovanhu ova li moparadisa. Ndele onda hala ndi aluke moshikando tashi uya opo ndi nyamukule epulo eli kutya, ‘Mbela osha li sha enda ngahelipi opo ovanhu va pilamene Kalunga nova kanife oparadisa?’” Shimha wa aluka efiku limwe, kundafana naye etwalemo loshileshwa osho sha hovela pepandja 6.
Real Faith—Your Key to a Happy Life
Oka nuninwa okupendula ohokwe yOvamoslema ovo hava di moitukulwa omo tashi dulika va manguluka okukonakona Ombibeli
Nghee taka dulu okuyandjwa: Ulikila omunhu efano olo li li pepandja 16-17, ndele to ti: “Efano olo otali monika monghedi ya yooloka ko neenghono kwaasho tu wete mounyuni kunena. Ndele mbela ope na ngoo efiku limwe ounyuni u ka kale monghalo ya tya ngaha? [Teelela omunhu a nyamukule.] Natu tale osho embo eli laKalunga la udaneka. [Lesha umwe womomishangwa odo da tofwa mo okudja mOmbibeli yoye.] Okabroshure aka otake tu kwafele tu kale tu na eitavelo la kola kutya fiku limwe omaudaneko oo onaa ka wanifwe shili.”
Hetekela okuninga ngaha: Konima yetalelepo lotete, pula omuneumbo a hoolole limwe lomomapulo oo e li kepandja laxuuninwa. Opo nee, ninga elongekido u aluke moshikando tashi uya opo u li nyamukule okudja mokabroshure.
The Pathway to Peace and Happiness
Oka nuninwa okupendula ohokwe yOvabuddha
Nghee taka dulu okuyandjwa kOmubuddha keshe womukulunhu: “Otashi dulika naave to lipula unene shi na sha noinima inai koshoka oyo hai popiwa apeshe kunena nosho yo nghee hai kumu ovana vetu. Mbela oto diladila kutya omolwashike ovanyasha vahapu ihave lihumbata nawa kunena? [Teelela omunhu a nyamukule.] Ndele mbela ou shii ngoo kutya oshinima osho osha kala sha xunganekwa nale membo limwe olo la shangwa nalenale ofimbo omalongelokalunga ngaashi Oumoslema, Oukriste nosho yo Ouhindu inaa totwa po? [Lesha 2 Timoteus 3:1-3.] Tala kutya eenghalo da tya ngaho otadi twikile nokuli nonande ovanhu otava twikile okulihonga. [Opo nee, lesha ovelishe 7.] Ouyelele oo u li moshishangomwa eshi owa kwafela nge ndi mone kutya ovanhu vahapu ihave lihongo sha. Ove ino hala oku ke u lileshela?”
Hetekela okuninga ngaha: Konima eshi wa ninga omalishuneko onhumba nowa kulika ohokwe yomuneumbo mOmbibeli, mu ulikila omapulo oo e li pepandja laxuuninwa lokabroshure nosho yo okafooloma kokumbestela embo Ombibeli otai hongo oko ke li pepandja olo. Mu lombwela kutya oto dulu oku mu pa embo olo ngeenge okwa hala. Mu ulikila oshikalimo ndele to mu lombwele a hoolole po etukulwa limwe olo a hala mu kundafane, opo nee, kundafana naye okatendo kamwe ile vavali vetukulwa olo.
Why Should We Worship God in Love and Truth?
Oka nuninwa okupendula ohokwe yOvahindu
Nghee taka dulu okuyandjwa: “Eilikano limwe lOvaindia la shiivika nawa ohali ti: ‘Onda li nda pukifwa ndele paife onda mona oshili. Onda li momilaulu ndele paife ondi li mouyelele.’ Mbela oto diladila kutya osha fimana ngoo shili okukala hatu longele Kalunga mohole nomoshili? [Teelela omunhu a nyamukule.] Didilika osho Jesus a li a popya shi na sha naasho.” Opo nee, lesha Johannes 4:24. Lesha yo okatendo 4 oko ke li pepandja 3 lokabroshure, ndele to ke mu pe.
Hetekela okuninga ngaha: Ngeenge omuneumbo okwa tambula ko okabroshure, tya: “Ovahindu vamwe ovahongwanhu ohava ti kutya oshili oya holekwa momitima detu. Ofimbo vamwe hava ti kutya oshili oi li momushangwa uyapuki. Moshikando tashi uya, onda hala ndi uye tu kundafane epulo olo li li pexulilo lokatendo 3 oko ke li pepandja 4, tali ti: ‘Openi hatu dulu okuhanga oshili yaKalunga?’”
Lasting Peace and Happiness—How to Find Them
Oka nuninwa okupendula ohokwe yOvachina
Nghee taka dulu okuyandjwa: “Atusheni ohatu shakeneke omashongo mahapu mokukalamwenyo kunena, oo taa dulu okunyona po ehafo letu. Mbela oshike tashi dulu oku tu kwafela tu kale twa hafa nonande ope na omaupyakadi? [Teelela omunhu a nyamukule.] Okudulika komayele Ombibeli okwa kwafela ovanhu vahapu va kale va hafa. [Lesha Epsalme 119:1, 2.] Vamwe ohava ti kutya Ombibeli embo loilumbu. Ndele pwilikina kwaashi. [Kundafana naye okatendo 16 oko ke li pepandja 17.] Okabroshure aka oka kundafana shi na sha nanghee hatu dulu okumona ehafo nombili tai kalelele.”
Hetekela okuninga ngaha: Ngeenge omuneumbo okwa tambula ko okabroshure, lesheni naye omatumbulo atatu otete mokatendo 18 oko ke li pepandja 17, ndele to ti: “Moshikando tashi uya ohandi uya tu kundafane shi na sha noinima oyo twa teelela nodjuulufi oyo ya popiwa mOmbibeli.” Eshi to ka ninga elishuneko, kundafaneni oshitwa shimwe shomwaayo i li mokatendo 6, pepandja 30.