NGHEE HATU DULU OKWEEFA PO OUTONDWE

3 | Efa Po Outondwe

Osho Ombiibeli tai ti:

“Lundululeni onghedi yeni yokudiladila opo mu kale hamu longo ehalo laKalunga.” — OVAROMA 12:2.

Osho osha hala okutya:

Onghedi yetu yokudiladila oya fimana kuKalunga. (Jeremia 17:10) Otwa pumbwa okuninga shihapu shi dulife ashike okuhenuka okupopya nokulonga oilonga ii. Outondwe ohau hovele momadiladilo nosho yo momutima. Onghee otwa pumbwa okuhenuka okudiladila kombinga yoinima oyo tai tu ningifa tu kale tu na outondwe. Ngeenge otwa ningi ngaho ohatu ka ‘lunduluka’ nohatu ka finda outondwe.

Osho to dulu okuninga:

Diladila noukeka kombinga yanghee u uditile vamwe, unene tuu ovo va dja momihoko, ile moiwana imwe. Lipula kutya: ‘Onde va tala ko ngahelipi? Mbela etaleko lange ola kanghamena kwaasho ndi shii kombinga yavo? Ile ola kanghamena konhondo?’ Henuka okutala, ile okulesha kointaneta kombinga yoinima oyo tai xumifa komesho outondwe nosho yo elongifo leenghono.

Eendjovo daKalunga otadi dulu oku tu kwafela tu efe po outondwe

Haalushe hashi kala shipu okukonakona omadiladilo nosho yo omaliudo etu monghedi ya yuka. Ashike Ondjovo yaKalunga otai dulu oku tu kwafela tu ‘holole omadiladilo nomahalo omutima.’ (Ovaheberi 4:12) Twikila okukonakona Ombiibeli. Yelekanifa omahongo ayo nomadiladilo oye, ndele to ningi ngaashi to dulu, opo omadiladilo oye a kale metwokumwe naasho Ombiibeli tai hongo. Ondjovo yaKalunga otai dulu oku tu kwafela, opo tu finde outondwe oo u li “eeshungongulu da kola” momadiladilo nomomitima detu. — 2 Ovakorinto 10: 4, 5.

Oshimoniwa shoshili—STEPHEN

Okwa lundulula onghedi yaye yokudiladila

Stephen nosho yo oilyo youkwaneumbo wavo ova li ve tondike koilumbu. Oshidjemo, okwa li a nwefwa mo kongudu yopapolitika, oyo ya li hai popile oufemba wovanhu. Mokweendela ko kwefimbo, naye okwa li a kufa ombinga moutondwe wa tya ngaho. Stephen okwa ti: “Omafimbo amwe ame nookaume kange otwa li hatu ulike eefilima tadi ulike nghee ovapika Ovaafrika va li hava hepekwa mOilongo yaHangana. Omolwokuhenouyuki oko, otwa li hatu ponokele ovanyasha voilumbu ovo va li pufye tava tale ofilima oyo. Konima yaasho, otwa li hatu i komaumbo oilumbu oyo i li pomudingonoko, opo tu i denge.”

Etaleko laStephen ola li la lunduluka neenghono, konima eshi a hovela okukonakona Ombiibeli nEendombwedi daJehova. Okwa ti: “Omolwoutondwe wopamihoko ,oo wa li wa nwefa nge mo, onda li nda didilika sha mEendombwedi osho sha kumwifa nge neenghono. Pashihopaenenwa, eshi Ondombwedi imwe yoshilumbu ya li ya ka talela po kondje yoshilongo, oya li ya fiya okaana kayo moukwaneumbo wovalaule. Natango, oukwaneumbo umwe woilumbu owa li wa idilila omunyasha omulaule.” Stephen okwa li a tomwa kutya Eendombwedi daJehova odi holafane, ohole oyo ya popiwa kuJesus kutya oyo tai ka didilikifa mo Ovakriste vashili. — Johannes 13:35.

Oshike sha kwafela Stephen a efe po outondwe? Omushangwa oo u li mOvaroma 12:2 owe mu kwafela. Okwa ti: “Onda didilika kutya onda pumbwa okulundulula onghedi yange yokudiladila. Onda didilika kutya inandi pumbwa ashike okulundulula omadiladilo ange, opo ndi kale omunambili, ndele onda mona yo kutya ei oyo onghedi yokukalamwenyo ya denga mbada.” Paife Stephen okwa kala eedula di dulife 40 ehe na outondwe.