‘Hoololeni oo tamu ka longela’

1. Oshike tu na okuninga, opo tu kale twa hafa shili, nomolwashike? (Jesaja 48:​17, 18)

TATE yetu womeulu oku tu hole neenghono, nokwa hala tu hafele onghalamwenyo paife nosho yo monakwiiwa. (Omuud. 3:​12, 13) Okwe tu shita tu na ounghulungu wonhumba, ndele ine tu pa oukwatya wokudula okulipangela fye vene nosho yo okutokola kufye vene osho shi li mondjila naasho sha puka. (Omuud. 8:9; Jer. 10:23) Oku shi shii kutya opo tu kale twa hafa shili, otwa pumbwa oku mu longela nokudulika kuye. — Lesha Jesaja 48:​17, 18.

2. Satana okwa hala tu itavele oipupulu ilipi, na Jehova okwa ninga po shike, opo a nyaneke pomutenya oipupulu oyo?

² Satana okwa hala tu itavele kutya ohatu dulu okukala twa hafa nonande itatu longele Jehova, nonokutya ovanhu otava dulu okulipangela vo vene nomupondo. (Gen. 3:​4, 5) Opo Jehova a ulike kutya Satana omunaipupulu, okwa efa ovanhu ve lipangele vo vene oule wefimbo. Naasho otu shi liwetele kutya ovanhu itava dulu okulipangela vo vene. Ashike mepingafano naasho, mOmbiibeli omwa tumbulwa ovakainhu nosho yo ovalumenhu vahapu ovo va li va hafa, molwaashi va li tava longele Jehova. Ashike Jesus Kristus oye a li a hafa neenghono e va dule aveshe. Tete, natu ka taleni kutya omolwashike a hoolola okulongela Jehova. Opo nee, ohatu ka konakona kutya omolwashike Tate yetu womeulu a wana okulongelwa. Nohauxuuninwa, ohatu ka kundafana kutya omolwashike twa hoolola okulongela Jehova.

OMOLWASHIKE JESUS A HOOLOLA OKULONGELA JEHOVA?

3. Satana okwa li a hala okupa Jesus shike, na Jesus okwa li a ninga ehoololo lilipi?

³ Eshi Jesus a li kombada yedu, okwa li e na okuhoolola kutya ota longele lyelye. Diva konima eshi Jesus a ninginifwa, Satana okwa li e mu lombwela kutya ote ke mu pa omauhamba aeshe omounyuni ngeenge okwe mu linyongamene. Jesus okwa nyamukula, a ti: “Dja po Satana! Omishangwa oda ti: ‘Jehova Kalunga koye oye aeke u na okulinyongamena noye aeke u na okulongela oilonga iyapuki.’” (Mat. 4:​8-10) Omolwashike Jesus a li a ninga ehoololo olo? Natu ka taleni komatomheno amwe.

4-5. Omatomheno amwe elipi a ningifa Jesus a longele Jehova?

⁴ Etomheno lotete ololo kutya, Jesus okwa li a hoolola okulongela Jehova, molwaashi oku mu hole neenghono. (Joh. 14:31) Shikwao vali, Jesus oha longele Jehova, molwaashi oku shi shii kutya osha yuka okuninga ngaho. (Joh. 8:​28, 29; Eh. 4:11) Oku shi shii kutya Jehova oye Odjo yomwenyo, e shii okulineekelwa noha yandje. (Ep. 33:4; 36:9; Jak. 1:17) Jehova okwa li ha lombwele alushe Jesus oshili, na keshe osho Jesus a li e na okwe shi pewa kuJehova. (Joh. 1:14) Mepingafano naasho, Satana okwa etifa efyo. Satana omunaipupulu, omunalwisho noku lihole ye mwene. (Joh. 8:44) Molwaashi Jesus oku shii oinima aishe oyo, ka li a hala nandenande okuhopaenena Satana nokukala iha dulika kuJehova. — Flp. 2:​5-8.

⁵ Etomheno vali limwe kutya omolwashike Jesus a hoolola okulongela Jehova ololo kutya, okwa li a teelela nodjuulufi oku ka mona omauwa oo taa ka etifwa koilonga yaye youdiinini. (Heb. 12:2) Okwa li e shi shii kutya ngeenge okwa kala omudiinini, ota ka yapulifa edina laXe, note ke shi ningifa tashi shiiva opo okumona oixuna akushe oko kwa etifwa kOndiaboli ku xulifwe po.

OMOLWASHIKE JEHOVA A WANA OKULONGELWA?

6-7. Omolwashike ovanhu vahapu kunena ihava longele Jehova, ndele mbela omolwashike a wana okulongelwa?

⁶ Kunena, ovanhu vahapu ihava longele Jehova, molwaashi kave shii omaukwatya aye mawa nosho yo oinima iwa ihapu oyo e va ningila. Ova faafana novanhu ovo va li tava udifilwa komuyapostoli Paulus muAtena. — Oil. 17:​19, 20, 30, 34.

⁷ Paulus okwa li a yelifila ovapwilikini vaye kutya Kalunga kashili ‘oye a pa ovanhu aveshe omwenyo nomufudo nakeshe shimwe.’ Okwa weda ko a ti: “Otu na omwenyo, hatu linyenge notu li po omolwaye.” Kalunga oye Omushiti, oo a “shita oiwana aishe okudja momunhu umwe,” onghee okwa wana okulongelwa. — Oil. 17:​25, 26, 28.

8. Oshike osho Jehova ehe na efiku a ninge? Shi yelifa.

⁸ Molwaashi Jehova oye Omushiti nOmunamapangelo aeshe, okwa li ta dulu okufininika ovanhu ve mu longele. Ashike Jehova ke na efiku a ninge ngaho. Ponhele yaasho, okwe tu pa oumbangi oo tau ulike kutya oko e li nosho yo kutya oku hole neenghono keshe umwe womufye. Okwa hala ovanhu vahapu ngaashi tashi dulika va ninge ookaume kaye fiyo alushe. (1 Tim. 2:​3, 4) Opo osho shi ningwe, Jehova okwe tu deula tu honge vamwe kombinga yomalalakano aye nosho yo oinima ihapu iwa oyo ta ka ningila ovanhu. (Mat. 10:​11-13; 28:​19, 20) Okwa tula po omaongalo omo hatu dulu oku mu longela nokumona ekwafo okudja kovapashukili ovanahole. — Oil 20:28.

9. Omeenghedi dilipi Jehova ha ulike kutya oku hole ovanhu aveshe?

⁹ Jehova okwa ulika ohole monghedi ididilikwedi eshi ha ningile ovanhu ouwa, nokuli naavo inava hala okwiitavela kutya oko e li. Diladila kwaashi, oule womido omayovi, ovanhu vahapu ova hoolola okulitulila po omifikamhango daasho shi li mondjila naasho sha puka, ponhele yokudulika kuJehova. Ashike nande ongaho, Jehova ohe va pe osho va pumbwa, opo va kale nomwenyo nova hafele onghalamwenyo. (Mat. 5:​44, 45; Oil. 14:​16, 17) Otava dulu okukala nookaume nosho yo ovapambele ovo ve va hole, okumona ounona, okulonga nosho yo okuhafela oidjemo yoilonga yavo omolwaJehova. (Eps. 127:3; Omuud. 2:24) Osho otashi ulike kutya Tate yetu womeulu oku hole ovanhu aveshe. (Ex. 34:6) Paife natu ke lidimbulukifeni kutya omolwashike twa hoolola okulongela Jehova, nanghee he tu nangeke noupuna eshi hatu mu longele.

OMOLWASHIKE TWA HOOLOLA OKULONGELA JEHOVA?

10. (a) Etomheno la fimanenena lilipi hali tu linyengifa tu longele Jehova? (Mateus 22:37) (b) Ouwa ulipi wa mona melididimiko laJehova? (Epsalme 103:​13, 14)

¹⁰ Ngaashi Jesus, etomheno la fimanenena olo hali tu linyengifa tu longele Jehova, ololo kutya otu mu hole neenghono. (Lesha Mateus 22:37.) Ngeenge otwe lihongo kombinga yomaukwatya aJehova, ohatu ka kala tu udite twa ehena popepi naye. Pashihopaenenwa, Jehova ohe tu lididimikile. Eshi Ovaisrael va li inava dulika kuye, okwa li e va pula, a ti: “Alukeni keshe umwe kondjila yaye ii.” (Jer. 18:​11, KB-13) Jehova oku shi shii kutya inatu wanenena. (Lesha Epsalme 103:​13, 14.) Ngeenge otwa dilonga koukwatya waJehova u na sha nediminepo nosho yo komaukwatya aye amwe, mbela itashi ke tu linyengifa tu mu longele fiyo alushe?

11. Oshike vali hashi tu linyengifa tu longele Tate yetu womeulu?

¹¹ Ohatu kala yo twa hala okulongela Jehova, molwaashi otu shii kutya osha yuka okuninga ngaho. (Mat. 4:10) Kakele kaasho, otu shii kutya oilonga yetu youdiinini otai ka eta oidjemo iwa. Ngeenge otwa kala ovadiinini kuJehova, ohatu ka yapulifa edina laye, ohatu ka ulika kutya Ondiaboli oi na oipupulu, nohatu ka hafifa omutima waTate yetu womeulu. Ohatu ka kala tu na etimaumbwile loku ka longela Jehova fiyo alushe, ngeenge otwa hoolola oku mu longela paife. — Joh. 17:3.

12-13. Oshike hatu lihongo moshimoniwa shaJane naPam?

¹² Ohatu dulu okulihonga okukala tu hole Jehova ofimbo tu vanini, nohole ya tya ngaho otai ka ninga yomoule eshi hatu kulu. Natu ka taleni koshihopaenenwa shovamwaina vavali, Jane naPam.a Jane okwa li e na eedula 11, na Pam okwa li e na eedula 10, eshi va hovela okukonakona Ombiibeli. Nonande ovadali vavo kava li ve na ohokwe yokukonakona Ombiibeli, ova li va pitika Jane naPam va konakone Ombiibeli nEendombwedi daJehova, shimha ashike tava i pamwe noukwaneumbo wavo kongeleka mexuliloshivike. Jane okwa ti: “Osho Eendombwedi daJehova da honga nge okudja mOmbiibeli, osha kwafela nge ndi kondjife omafininiko oomakula, oo a kwatela mo okulongifa oingangamwifi nosho yo okuya moluhaelo.”

¹³ Konima yomido dinini, oukadona ovo aveshe ova li va ninga ovaudifi. Lwanima, ova li va ninga ovakokolindjila, nopefimbo opo tuu opo, ova li tava file oshisho ovadali vavo ovanamido. Jane okwa popya shi na sha noinima aishe oyo Jehova e va ningila, a ti: “Onde lihonga kutya Jehova oha file oshisho ookaume kaye, nonokutya ‘Jehova ovo vaye oku va shii,’ ngaashi sha popiwa mu 2 Timoteus 2:19.” Osho otashi ulike kutya Jehova oha file alushe oshisho ovo ve mu hole nova hoolola oku mu longela.

14. Ongahelipi hatu dulu okupopila edina laJehova okupitila meendjovo nomeenghatu detu? (Tala yo omafano.)

¹⁴ Otwa hala ovanhu vakwetu va shiive oshili kombinga yaJehova. Pashihopaenenwa, natu tye nee ngeno: Ou na kaume koye kopofingo e na onghenda, ha yandje noha dimine po. Ashike efiku limwe, owa uda umwe te mu lundile kutya omukwanyanya noke na oshili. Oto ke linyenga ngahelipi? Oto ke mu popila. Sha faafana, ngeenge Satana nosho yo ovanhu ovo a nwefa mo tava kendabala okunyateka edina laJehova, mokupopya oipupulu kombinga yaye, ohatu popile edina laye, mokulombwela vamwe oshili kombinga yaye. (Eps. 34:1; Jes. 43:10) Ohatu ulike kutya otwa hala okulongela Jehova nomutima wetu aushe okupitila meendjovo nomeenghatu detu.

15. Ouwa ulipi omuyapostoli Paulus a li a mona eshi a ninga omalunduluko monghalamwenyo yaye? (Ovafilippi 3:​7, 8)

¹⁵ Otwa halelela okuninga omalunduluko monghalamwenyo yetu, opo tu hafife Jehova, ile tu longe shihapu moilonga yaye. Pashihopaenenwa, omuyapostoli Paulus okwa li a tokola okweefa po ondodo ya fimana melongelokalunga lOshijuda, opo a dule okuninga omushikuli waKristus, nokulongela Jehova. (Gal. 1:14) Oshidjemo, okwa kala e na onghalamwenyo i na eityo, nokwa mona oufembanghenda woku ka pangela pamwe naKristus meulu. Ka li e lipa oushima eshi a hoolola okulongela Jehova, nafye itatu ke lipa oushima eshi twa hoolola okulongela Jehova. — Lesha Ovafilippi 3:​7, 8.

16. Oshike hatu lihongo moshimoniwa shaJulia? (Tala yo omafano.)

¹⁶ Ngeenge otwa kala twa pitifa komesho okulongela Jehova monghalamwenyo yetu, ote ke tu nangeka noupuna paife nosho yo monakwiiwa. Natu ka taleni koshimoniwa shomumwameme wedina Julia. Ofimbo ine lihonga oshili, eshi a li omunyasha, okwa li mongudu yolwiimbo. Omwiimbi dingi umwe okwa li a didilika kutya Julia oha imbi nawa, nokwa li e mu deula. Diva, Julia okwa li a shiivika nawa, nokwa li ha imbi meenhele da shiivika nawa. Ofimbo a li kofikola yokuhonga okwiimba, oyo ya shiivika nawa, umwe womovanafikola vakwao okwa li a hovela oku mu lombwela kombinga yaKalunga, noku mu yelifila kutya edina laKalunga, oJehova. Diva konima yaasho, Julia okwa li a hovela okukonakona Ombiibeli luvali moshivike. Opo nee, okwa li a tokola okulongela Jehova pauyadi, ponhele yokulalakanena eifano lokwiimba. Ashike kasha li shipu okuninga etokolo la tya ngaho. Okwa ti: “Ovanhu vahapu ova li va lombwela nge kutya ohandi hepeke omaano ange, ashike onda hala okulongifa onghalamwenyo yange pauyadi, opo ndi longele Jehova.” Mbela Julia oku udite ngahelipi paife omolwetokolo olo a ningile, omido di dule po 30 da pita? Okwa ti: “Ondi na ombili yopamadiladilo, nonde lineekela kutya Jehova ota ka wanifa po omahalo ange aeshe monakwiiwa.” — Eps. 145:16.

TWIKILA OKULONGELA JEHOVA

17. Efimbo olo tu li ola kuma ngahelipi ovo va hoolola nale okulongela Jehova nosho yo ovo inava hoolola natango oku mu longela?

¹⁷ Otu li pexulilo elela lounyuni ou. Omuyapostoli Paulus okwa ti: “Osheshi ‘oku na okafimbo kaxupi,’ opo ‘ou te uya a fike diva, noita ka shelelelwa.’” (Heb. 10:37) Osho oshe tu kuma ngahelipi? Ovanhu ove na ko efimbo lixupi neenghono lokuhoolola okulongela Jehova. (1 Kor. 7:29) Ngeenge otwa hoolola nale okulongela Jehova, otu shi shii kutya nonande ohatu ke lididimikila omayeleko, ohatu ke shi ninga ashike “okafimbo kaxupi.”

18. Jesus naJehova ova hala tu ninge shike?

¹⁸ Jesus okwa li a ladipika ovanhu va ninge ovahongwa vaye nova twikile oku mu shikula. (Mat. 16:24) Onghee, ngeenge otwa kala hatu longele Jehova omido dihapu, natu kale twa tokola toko tu twikile oku mu longela. Otwa pumbwa okuninga eenghendabala da mana mo tu twikile okulongela Jehova. Nonande osho otashi dulika shi kale shidjuu, ohatu ka kala twa hafa, nohatu ka mona omanangeko noupuna oo haa di mokulongela Jehova. — Eps. 35:27.

19. Oshike hatu lihongo moshimoniwa shaGene?

¹⁹ Ovanhu vamwe ove udite kutya ngeenge ova kala tava longele Jehova, itava ka hafela onghalamwenyo. Ngeenge ou li omunyasha, mbela ou wete shidjuu okulongela Jehova? Omumwatate omunyasha wedina Gene okwa ti: “Onda li handi kala ndi udite kutya, itandi dulu okuhafela onghalamwenyo, molwaashi ondi li Ondombwedi yaJehova. Ounona vahapu ova li tava monika tava hafele oinima ngaashi ouvilo, okweendelafana, ile okudana omaudano ouvidio e na sha nelongifo leenghono, ofimbo ame handi longifa efimbo lange okuya kokwoongala nosho yo moukalele. Okudiladila kwa tya ngaho okwa li kwa kuma ngahelipi Gene? Okwa ti: “Onda li nda hovela okukala nonghalamwenyo yopavali, nonda kala handi hafele onghalamwenyo oule wokafimbo. Ashike osho kasha li sha etela nge ehafo tali kalelele. Onda li nda hovela okudiladila kombinga yoshili yOmbiibeli, nonda li nda tokola okulongela Jehova nomutima wange aushe. Okudja opo, onda ka mona kutya Jehova okwa kala ta nyamukula omailikano ange aeshe.”

20. Otwa tokola toko okuninga shike?

²⁰ Omupsalme umwe okwa imbila Jehova, a ti: “Omunhu oo a hafa oye oo wa hoolola, ndele to mu eta popepi a kale momikala doye.” (Eps. 65:4) Natu kale twa tokola toko ngaashi Josua, oo a ti: “Ame novaneumbo lange, ohatu ka longela Jehova.” — Jos. 24:15.